Rariso Yesus Marmar Ḇyedi ’Byak Namuk Snonggaku Ḇebor Sya’ Ra?

NAFNAK

Kankarem ro Refo

Roro Yesus marmar ḇyedi, Manseren Allah byuk fasaspar, ḇaido imkei snonggaku sya ro sasar ma marmar i. Refo doḇe Yesus rik ḇyena nemaeja kaku neḇebak kwar fa fyaspar snonggaku sya. (Efesus 1:7; 1 Petrus 1:18, 19) Inja Yesus ikofen ryama ”insa ḇyuk kankenem ḇyedi fa ḇyukḇak namuk kawasa ḇeḇor”.—Matius 20:28, BABEASAS BABO Wos Byak ro Rasras.

Rosai ḇefnai fandun fa Yesus ”ḇyukḇak namuk kawasa ḇeḇor”?

Allah ifrur snonggaku ḇerandak, Adam, ḇye snonggaku ḇemnis kaku, nya sasar oḇaberi. Adam ismai swaf fa ikenem isof fyoro, mboi swaf ḇepyum ine ipromes buri snar isouser Manseren Allah ḇa. (Kejadian 3:17-19) Fafisu Adam dakna romawa, byuk sasar na fa nado ḇe si kako. (Roma 5:12) Inja Refo ikofen rya Adam ’byoḇ’ manggundi ma romawa ḇyesya fa sḇe women faro sasar ma marmar ya. (Roma 7:14) Snar Adam romawa ḇyesikam sismai sasar kwar, oso ḇaberi ipok fa dun kaḇer kankenem ḇemnis kaku ḇepromes kwar snar Adam ifrur anya.—Mazmur 49:7, 8.

Manseren Allah myam mboi iswar kaku Adam romawa kpu ḇyesya kukro nari sna payamyum ro ras iyama ḇa. (Yohanes 3:16) Ḇape, Allah ima dufepen nako nanapes ya, inja na byuk maf beri ḇa, ḇaido ḇyefnder sasar ro snonggaku sya rarirya monda ḇa. (Mazmur 89:14; Roma 3:23-26) Inja, Manseren Allah fyasos nyan ḇekaku insama kosmai ampun ma ipyos sasar koḇena kako. (Roma 5:6-8) Nyan ani iso farsarser fasaspar roro Yesus marmar ḇyedi. Ine fyasnai Allah iswar kaku snonggaku koine.

Moḇsa farsarser fasaspar ani byak namuk snonggku sya rai?

Ro Refo ya, wos ’farsarser fasaspar’ kyurfasnai ḇe roi ri kyor anskoine:

Roi sbuki ḇaḇyak.—Bilangan 3:46, 47.
Roi ḇebuk fasaspar.—Keluaran 21:30.
Maeja ḇyena namnis kuker robebor ḇaido snonggaku nari skoḇes kaḇer anya. a

Rwama komam moḇsa roi ri kyor anskoya naisya ro Yesus Kristus farsarser fasaspar byuk ani.

Ḇaḇyak. Refo doḇe snonggaku Kristen Allah ’byak namuk si kwar’. (1 Korintus 6:20; 7:23) Roi sbukibak namuk ya iso Yesus rik ḇyena, rarirya ’snonggaku ro keret kam, wos, kawasa, ma er byak namuk si kwar faro Allah’.—Fasasna faro Yohanes (Wahyu) 5:8, 9.
Fasaspar. Yesus farsarser ḇyedi byuk makakei ro sasar ya.—1 Korintus 1:30; Kolose 1:14; Ibrani 9:15.
Maeja ḇemnis. Maeja ro Yesus farsarser ḇyedi imnis kuker kankenem Adam ifrur fa ipromes anya, isoine kankenem snonggaku ḇemnis kaku. (1 Korintus 15:21, 22, 45, 46) Refo ikofen, ”Ma raris snonkaku sibor sḇesasar snar snonkaku oser [Adam] ḇaḇeyuk ḇyena, rarirya kako nari snonkaku sibor sikenem imnis Allah marisen ḇyedi, snar snonkaku oser [Yesus Kristus] ḇeḇeyuser Allah marisen ḇyena.” (Roma 5:19) Mnuk ine ikofenḇair moḇsa marmar ro snonggaku oser byak namuk snonggaku sibor. Kaku bae, Yesus ”ḇyuk mankundi kwar imnis sasuref warek sasar ro snonkakusya kam” ḇemarisen ḇefasnai syowi faro farsarser ḇyedi sya.—1 Timotius 2:5, 6.

a Ro Refo ya, wos sefararwe na ḇe wos ”fasaspar” kyur ḇe ḇaḇyak, ḇaido roi oso ḇemaeja, ḇyeḇeḇak. Imnis raris, kata kerja Ibrani ka-far kyur kaku ḇe ”ḇekawef”. (Kejadian 6:14) Nono ido sbuk na kako fa ikofen Yahwe ikawef sasar ya. (Mazmur 65:3) Kata benda ḇyeja, koʹfer, kyur ḇe ḇaḇyak sbuk na fa sikawef, ḇaido sfaspar, roi oso . (Keluaran 21:30) Rarirya kako, wos Yunani lyʹtron, sefarwe ker na ḇe ”fasaspar”, kyur kako ḇe ”ḇaḇyak ḇebuk fasaspar”. (Matius 20:28; The New Testament in Modern Speech, ro R. F. Weymouth) Manfasfas Yunani sbuk wos ine fa skur ḇe ḇaḇyak sbukifaspar snonggaku ḇeḇe tawanan ro mamamun ḇaido women oso.