Saksi-Saksi Yahwe sya sifrur fananjur ari rarwan risuru ro usbu oser ro moḇ seari sor ḇe Balai Kerajaan. Rosai sifrur ro diwani? Rwama wakso ro sarawrow ani ido, payamyum rosai nari waksmai ya?

•  Rosai sifrur ro Balai Kerajaan?

•  Rosai ḇefnai fa rwama wakso?

•  Bati Besi roi sikofen na

 Balai Kerajaan ima moḇ fa sfarkor Refo ya ma roi nane nbuk payamyum faro kankenem koḇena ro ras nakam. Fananjur oroḇaido sarawrow ine, isaramper Au fa:

•   wasmai fawawi ḇekaku ḇekur Manseren Allah

•   wafawi roi ḇebor ḇejadi ro dunya ine.

•   wakenem ḇe snonggaku ḇepyum syadi.

•    wasrow bati ḇefrur pyum.

 Wafawi ke? Saksi-Saksi Yahwe sya rum ari sena sap na ḇe Balai Kerajaan kukro roi sawos ker ro diwa iso Allah Karajan Ḇyedi.​​—Matius 6:9, 10; 24:14; Lukas 4:43.

 Roi rwower ro diwa nbuk payamyum ḇe Au. Farkarkor ro Refo sawos ro fananjur ine isaramper Au fa wasmai fawawinanem. (Amsal 4:5) Rarirya, fawawi wasmai ro Refo anya na isaramper Au fa wunwos snemuk ḇepyum ro kenem Bena. Refo ya iser kankarem faro fakfuken-fakfuken ḇefandun kaku, raris:

•   Faro fandun risai kaku eḇedari kokenem ine?

•   Manseren Allah iso ḇefnai fa koḇekandera ke?

•   Snonggaku ḇemar kwar sya moḇsa na serai?

 Ḇerama ine iso rakrok ro faya sawos ro fananjur ari usbu pupes ya:

•   Rosai Ḇefnai fa Wos Refo ya Fyarkin Ko?

•   Moḇ Risai Wasmai Fafnoḇek ro Fafisu Ḇesamswen?

•   Roi Karajan Allah Ifrur Kwar faro Ko ro Baboine.

 ”Bati ro rumfarkor ayeja ryama dakso fananjur ine. Kyainus kina ayesi, ma nggobas kayam syap-syap na. Nggomnai kwar mura, ikofen ḇo doḇe myanen kaku snonggaku ḇebuk kankarem ro farkarkor anya. Ikofen wer ḇo doḇe myam sakfrur farkarkor ḇeradirya ro gereja ḇyeja ḇa.”​​—Brenda.

 Wafawi ke? Ro Balai Kerajaan, sor ḇaḇyak ḇa ma sor kolekte ḇa kako.

 Ḇaḇebati ḇepyum ḇebuk kananon. Refo ya doḇe roi oser ḇefnai kaku fa snonggaku Kristen sya siryur kayamyam iso insama sisambraḇ si. (Ibrani 10:24, 25) Dunya ine ifo kuker snonggaku ḇefaḇri manggun si. Imbape fafisu korama koso fananjur ari ine, na koḇebati kuker snonggaku ḇemam Allah ma min sesi ḇe roi ḇefandun syadi. Inja, kokyar sarawrow ḇeradine nari nafrur sneprei kaku!

 ”Yafararur ro arwo rawo mandira kwar ido, ras ono yamor ma yaryaḇ ḇa. Mboi snonggaku yasrow ro Balai Kerajaan sifrur aya fa yaryaḇ kaḇer. Fafisu yabur ḇe rum, yamarisen ma yafasos kwar fa yafrur fararur ayena ro ras meser ya wer.”​​—Elisa.

 Wafawi ke? Saksi-Saksi Yahwe sya sidang jemaat sedi ro supswan ine ḇesiper barbor ya nasyadi ro 120.000. Moḇ seari ro na nasyadi ro 60.000. Snar kawasa ḇeyakso sya sibor syadi wer, * inja ro taun ḇebabo wer sifrur rum ari ḇaido Balai Kerajaan ine barbor ya 1.500.