Ḇeḇirḇar kaker fa buk kenem bedi ḇe Yahwe ma ḇebaptis ke? Rarirya ido, fawar ine na ifnoḇek au.

Fawar ine nari kyarem fakfuken:

•  Yaḇebaptis kwar bo yafrur sasar ḇeba ido na rarso?

•  Yaḇebaptis kwar mboi yafrur roi nabor ḇa faro Yahwe ido na rarso?

•  Rariso fyor yaḇaḇir ayama yasyus ḇa fa yafarmyan ḇe Yahwe I?

•  Bati besi roi sikofen na

 Roi ḇefnai ya: Ras oso imbude wakrower sisasyar snonggaku oso bur sidang snar sasar ḇeba ifrur na. (1 Korintus 5:11-13) Roi warower ine imbude nafnai ra wakmgak ras oso wakfrur radirya kako.

 ”Randak ya yakara yamewer fa yakḇebaptis, kukro yamgak yafrur sasar ḇeba bo sisasyar aya bur sidang yadori. Yamewer yafrur sinan yesuya sumairi.”​—Rebekah.

 Roi Refo ikofen ya: ”Iḇye kada snonggaku ḇeḇarḇor ibur nyan ḇyena . . . Iḇye kada kyaḇer ḇe Yahwe I, ḇefasnai sawarwar ḇe i, faro Allah koḇedi, kukro byuk ampun kuker snemura.”​—Yesaya 55:7.

 Kwarapan roi ine: Kakuḇae, snonggaku ḇefrur sasar ḇeba ma ḇemewer ḇembror sya na sisasyar si bur sidang ya. Imbape, snonggaku ḇefrur sasar imbror kaku ma imarisen fyadwer kenem ḇyena ido, Yahwe nari byuk ampun ḇe i.—Mazmur 103:13, 14; 2 Korintus 7:11.

 Auma snonggaku ḇenapes ḇa raryano, bisa pampum fafrowes na kuker fafnoḇek ro Allah. (1 Korintus 10:13) Waswarepen, auso nari ḇeyap rosai imbe wafrur ya, mboi snonggaku ḇese siso ḇeyap ḇe au ḇa.

 ”Yamgak yaḇebaptis kwar bo yafrur sasar ḇeba. Imbape yafawi yaḇebaptis ḇa ido, ima sasar dirya kako. Ipyum ya, yakara famfnom ḇa fyor yaḇebaptis ḇaim.”—Karen.

 Farkarkor ya: Imnis Saksi Yahwe ḇebor sya, bisa swewar kaku fa wakfrur sasar ḇeba awer.—Filipi 2:12.

 Infa wafawi nabor syadi wer: Mam artikel ”Bagaimana Aku Bisa Menolak Godaan?”

 Roi ḇefnai ya: Imbude ras oso warower romawa babo ono sisya sra ḇe moḇ ḇeḇinggwan ro kina ma bati sesya fa sifrur nabor ro fararmyan ya. Imbude wamgak snonggaku sya na sor au kako fa wakfrur radirya.

 ”Fafisu koḇebaptis raposa, swaf nabor naisya fa kofrur nabor syadi wer ro fararmyan koḇena. Imbape na snonggaku syakam ḇa bisa sifrur na, snar sfasos ḇaim ḇaido roi ono nadwarek si.”—Marie.

 Roi Refo ikofen ya: ”Iḇye syadi snonkaku oser-oser imnasen mankundi resari ro kankenem ḇyedi; insape imsik mankundi, mboi myam awer faro kankenem snonkaku ḇese.”—Galatia 6:4.

 Kwarapan roi ine: Bukimam awer samambraḇ bena kuker snonggaku ḇesesya. Waswarepen wos ḇero Markus 12:30: ”Waswar Manseren Allah ḇedi kuker sne ḇesiper.”

 Inja, ko oser-oser fandun fa kofarmyan ḇe Yahwe I kuker sne ḇesiper. Roi kofrur ḇe Yahwe ima namnis kam ḇa, kukro samambraḇ koḇena naḇesisyeyae. Ḇape, waswar kaku Yahwe I ido, na swewar fa wafrur roi ḇepyum syadi fa wafarmyan ḇe I imnis samambraḇ bena.

 ”Koḇebaptis ima snemuk ḇefamfnom risyaḇa, ḇape ima nafrur samswen kenem bena ḇa kako. Kofanam kuker naek srar sya ido, nari sifnoḇek ko fafisu kosmai samswen. Fyor kobuk nabor syadi ḇe Yahwe, nari kosmai marisen. Inja, komewer koḇebaptis ido, na kosmai fainda ya ḇa.”—Julia.

 Farkarkor ya: Kokarapan rosai monda kosmai kwar ḇefasnaiḇair Yahwe iswar ko. Rarirya, nari nadif ko fa kobuk roi ḇepyum syadi ḇe Yahwe I imnis samambraḇ koḇena.—1 Yohanes 4:19.

 Infa wafawi nabor syadi wer: Mam artikel ”Apakah Aku Orangnya Bertanggung Jawab?”

 Roi ḇefnai ya: Snonggaku koine komnis Yahwe I ḇa, ima Manḇepoik supswan ma farsyos ine. Inja, imbude wamgakwarek na Yahwe na myamfaduru au ke roḇa.

 ”Snar awin ma kamam suma Saksi Yahwe suiri, inja fyorno ido yaḇeḇirḇar yaḇe yafarmyan ḇe Yahwe I snar yasowanan su monda ke? Yakyar kuf ḇa Yahwe dun kaku aya fa yafarmyan ḇe I.”—Natalie.

 Roi Refo ikofen ya: ”Snonkaku oso ḇaḇeri nari ryama faro aya, rofyor Mami ḇewan aya duni maro aya, ma nari yaḇawesi ro ras papupesya.”—Yohanes 6:44.

 Kwarapan roi ine: Kwara fa bebaptis ido ima fasnaiḇair Yahwe isya dun au fa ḇebati kuker I. Wamarisen wakḇebati kuker Yahwe I ke?

 Yahwe iso ḇeyap mansei ḇesyus kaku fa ḇyebati kuker I, au ḇaido snonggaku ḇese ḇeyap na ḇa. Oso wer ido, Yahwe ḇyeasas fyor ’fanam faro Allah, ma nari Allah fyanam faro au’. —Yakobus 4:8.

 ”Yahwe iswar ko. Inja bisa komamḇir I ma kofanam faro I. Inja, fafisu kokara koma kosyus ḇa fa kofarmyan ḇe I ido, koswarepen Yahwe manggundi dakkara rarirya ḇa. Ma, roi Yahwe kyara nama kaku rarirya.”—Selina.

 Farkarkor ya: Waso kwar roi sor ro ḇemarisen ḇebaptis ido, ine kyurfasnai wasyus fa wafarmyan ḇe Yahwe I kwar. Wafawi, Yahwe ima isyus fa wafarmyan ḇe I.—Fasasna faro Yohanes (Wahyu) 4:11.

 Infa wafawi nabor syadi wer: Mam artikel ”Apa Gunanya Berdoa?”