”Rofyor yaḇe roma babo anya, yakmarisen faro snon kako. Ine roi ḇesamswen kaku ḇe aya. Yakara roi yaḇaḇir nari nakain fyoro ḇa, imbape sneḇaḇir yenaine naisya kaker isof ro kirine.”—David, ḇeumur taun ri 23.

 David ima snonggaku Kristen diri, inja imarisen ifrur Manseren Allah imarisen. Ḇape, na bisa ifrur Manseren imarisen fafisu sneri ryo snon sya ke? Moḇsa Manseren Allah sneḇaḇir Ḇyeja faro homoseksual ḇaido fararur farḇuk ro snon kuker snon ma bin kuker bin?

•  Rosai Refo ikofen ya?

•  Ine kyurfasnai . . . ?

•  Ḇape rariso fyor . . . ?

 Snonggaku roi skarana ḇekur homoseksual ine naḇesisyeyae ine ndramuma ro ḇaḇebarpur ḇaido fafisu sikenem ya. Imbape, snonggaku Kristen sisowanan kakara ro snonggaku ḇebor sya ḇa ḇaido ”farkarkor wam syoso-syoso ḇefrur ḇirḇar ro farfnak fromo ro snonkaku ḇefawi ankarkar ḇeḇuk farkarkor ninyan”. (Efesus 4:14) Kakara sena ḇekur homoseksual (ma ḇekur roi ḇesena) fandun fa neknam ro Refo ya.

 Manseren Allah mamam Ḇyena ro Refo ya ḇekur homoseksual nasnaibos kaku. Allah Wos Ḇyena doḇe:

•  ”Weneffus awer kuker snon imnis ra weneffus kuker bin sya.”​—Imamat 18:22.

•  ”Eḇedari Allah myam monda siḇo ḇyuk fa sifrur raris marisen sena, . . . Allah myam mondasiḇo siso mankunsi rmomen ḇefrur mamyai sena. Bin sesya kako sfarḇuk kuker snonsya werḇa; imnis rari ḇaḇekawin ro snonkakuḇa ḇoi, sfarḇuk kuker bin ḇesesya.”—Roma 1:​24, 26.

•  ”Wafawiḇake snonkaku ḇeso Allah marisen ḇyenaḇasya, nari sakḇe kinaḇa ro Allah kawasa ḇyesi? Imbude sḇeankar naek uri. Snonkaku ḇefrur farbuk, snonkaku ḇesyom amfyanir, snon ḇefarḇuk kuker snon min sesi, mankarawraw, ḇeyanfarmbram ma ḇemasaser, snonkaku ḇeyonef min sesi, ma ḇeyankarkar snonkaku ḇese -- snonkaku ḇeradinesya kam nari sakḇe kina ro Allah kawasa ḇyesiḇa.”​—1 Korintus 6:​9, 10.

 Kaku ya, Manseren Allah sasoser Ḇyena kyur faro snonggaku syakam, iḇye si ḇena kenem homoseksual ine ke roḇa. Fandun fa snonggaku syakam sfarmku manggunsi rofyor imḇe sifrur roi ḇefrur fa Manseren Allah imarisen ḇa.​—Kolose 3:5.

 Ine kyurfasnai Refo ya ikofen kayin snonggaku ḇefrur fararur farḇuk ro snon kuker snon ma bin kuker bin ke?

 Oroba. Refo fyarkor ko ḇa fa kayin mansei rirya kako​—sima sikenem ḇe homoseksual ke ḇaido heteroseksual. Imbape, Refo ikofenḇair ḇe ko fa ’kokenem kuker aski fnoḇek snonggaku sya kam’, komam si ro moḇ sikenem raya ḇa. (Ibrani 12:14) Inja, kopok kokoryae si awer, kofrur awer roi ḇefasnai kayin kaku si, ḇaido kofrur roi ḇeḇye ḇa faro snonggaku ḇekenem homoseksual ansine.

 Ine kyurfasnai snonggaku Kristen fandun fa spampum sasoser ḇebuk ijin faro farbakḇuk rofandu snon kuker snon ma bin kuker bin ke?

 Refo ikofenḇair Manseren Allah byuk farḇakḇuk inera ḇe fasfes rofandu snon ma bin. (Matius 19:​4-6) Imbape, sasoser pamarenta ḇekur farḇakbuk ro fandu snon kuker snon ma bin kuker bin nama fandun polotik nairi, mboi snar siḇe smam kawasa sesi kenem sena naisyaḇa. Refo ikofenḇair snonggaku Kristen sya fa sewaira bar oso ḇa ro fararur polotik na. (Yohanes 18:36) Inja, na sipok sisaramper ḇaido sawoswarek sasoser pamarenta ḇa ḇekur farḇakḇuk rofandu snon kuker snon ma bin kuker bin.

 Ḇape, rariso fyor snonggaku oso ikenem radirya kwar? Snonggaku ani bisa fyadwer kenem ḇyena ke?

 Imbo. Komam ido, snonggaku Kristen ḇeḇeso ro randak iwara sima simarisen syadi faro snon ḇaido bin min sesi. Fyor sikofen kwar snonggaku ḇemnis radirya na sakna waris ḇa ro Karajan Allah, Refo doḇe, ”Naek ono rofandu mko ro randakya rari sena namnis rarirya.”​—1 Korintus 6:​11.

 Ine kyurfasnai snonggaku ḇefrur wer ḇa fararur farḇuk rofandu snon kuker snon ma bin kuker bin na kenem ḇeradirya namnai beri ke? Oroba. Refo doḇe, ”Mkorer kwarbur snonkaku ḇekwar fnoḇek rari ḇeponiwara, ma mko ḇeḇefrur babo pdef ro ras ḇe ras farari fanir (Allah) ḇefrur mko kwar.” (Kolose 3:​10) Fararwei ani nama nefandun swaf kawane.

 Rariso fyor snonggaku oso imarisen isouser faro Allah mboi nya kaker marisen faro snon ḇaido bin min ḇyedi?

 Kokame bisa kopampum marasrisen ḇesasar koḇena ḇae. Inja, fafisu snon ḇaido bin imarisen faro min ḇyesi, bisa kyinfir fa pyampum marasrisen ḇesasar anya. Nyan ya rarso? Refo doḇe, ’Mkokenem kuker rurya kada, nari mkoso kankenem rmomen krafya ḇa.’​—Galatia 5:​16.

 Mam kada mnuk ani ikofen ḇaḇeri snonggaku oso nari ipok fa nya marisen ro kraf ya ḇa. Imḇape, fyarkor Refo ras ḇe ras ido, nari nya samambraḇ fa pyampum marasrisen ro kraf ani.

 David, ḇeḇeyap ro randak ani, kyara kaku roi ani kyaku bos ḇeri, ḇesyadi fafisu fyawar samswen ḇyena faro sinan ḇyesuya. Doḇe, ”Yaḇaḇir yasmai sneprei kaku, ma yafawar na ro fafisu iwara kada nari yasmai marisen kaku ro swaf yababo kaker ya.”

 Nari koḇeaski syadi fafisu koso pyum Yahwe sasoser Ḇyena. Kokyar Yahwe sasoser Ḇyena. Kokyar sasoser anna nama ”naḇyoḇer, ma nafrur sneri imarisen”, ma ’kofrur na ido na kosmai barakas’. ​—Mazmur 19:​8, 11.