FAKFUKEN RO ROMA INAI BABO
Rosai Na Yafrur Kaku Insama Guru Yedi Fyafayaf Aya Ḇa?
Roi simgak ro guru sya
Komam kada, guru sya rya sifrur pyum roma farkor sesya ḇa, sor ker marisen sena, ḇaido sifrur papum.
Snonkbor ḇenir ḇe Luis, ḇyeumur taun ri 21, fyar ḇo doḇe, ”Guru yeja dawos famfadak ma imasasor ker roma farkor ḇyesya ro rumfarkor. Yamam mboi, rya kyara ifrur marisen ḇyena monda bo nari sisasyar i ro rumfarkor ḇa kukro kero wer ḇye pansyon kwar.”
Binkbor oso wer ḇenir ḇe Melanie, ḇyeumur taun ri 25. Fafisu naiwara, guru ḇyeja dakfrur pyum i ḇa. Doḇe, ”Guru yeja ifrur pyum aya ḇa kukro ifawi agama yedi iḇese ro bati ḇesesya. Doḇe nari sifrur aya rarirya ker, inja yaso monda.”
Imbude nwa guru ḇefrur samswen ker Au. Imboi, bisa wasmai marasrisen ro fafisu wafarkor ro rumfarkor ya. Waso anun nane pan.
Roi bisa fa wakfrur na
Waso roi sfasos kwar na. Roi guru sya simarisen ro murid oso na iḇese ro ḇesesya. Inja, swewar fa wafawi rosai guru Bedi imarisen ro Au na, ma swewar fa wafrur pyum roi dor ro Au na.
Refo doḇe: ”Snonggaku ḇefawinanem imarisen fa ryower ma fyarkor nabor syadi wer.”—Amsal 1:5.
”Yasewar fa yafawi rosai guru yeja imarisen na. Inja, yafrur roi imarisen na kuker yaso marisen ḇyena. Rarirya, guru yeja bisa nuna kakara oser.”—Christopher.
Besyowi guru Bedi. Wawos yoḇ i ido, fasnai syowi. Ifrur Au fa wafafayaf yo, wakfrur rarirya awer ḇe i. Waswarepen, myam Au ḇe bati ḇyedi ḇa boi myam Au ḇe murid ḇyedi.
Refo doḇe: ”Iḇye mkawawos kuker saswar, ma wos anna mbuar awer, isof mkofawi, rariso nari mkokarem faro snonkaku oser-oser.”—Kolose 4:6.
”Murid ḇebor sya sesyowi guru sesya ḇa. Inja, besyowi guru bedi ido, nari myam na ma nari ifrur pyum au syadi.”—Ciara.
Fasnai saswar. Guru Bedi ima snonggaku dirya kako. Inja, ḇruri bisa iduf kako ma imgakwarek kako. Rarirya, kwara radine awer, ’Guru yedine iḇye ḇa kaku’ ḇaido ’Guru yedine dakmarisen aya ḇa.’
Refo doḇe: ”Kokam kosasar ro roi nabor.”—Yakobus 3:2.
”Sfararur ḇe guru nama roi ḇepyan risya ḇa. Yakara na yapok ḇaḇeri fafisu aya iso ḇebuk farkarkor faro romawa farkor syakam insama sḇe romawa ḇepyum syadi ma ḇena fawawi. Inja, yamarisen yaḇe murid ḇefrur pyum insama guru yedi ḇyesusa ḇa.”—Alexis.
Fawar yoḇ sinan Bansuya. Sinan Bansuya nari sumarisen sufnoḇek Au. Sumarisen waryaḇ ro rumfarkor Bena. Ma nari subuk anun ḇe Au fa nwa kakara ḇepyum faro guru Bedi ḇefrur Au fa wafafayaf ani.
Refo doḇe: ”Fararur nambran ḇa rofyor skain sawos pyum na ḇaime, ḇape nari nambran pyum rofyor ḇekara na sibore.”—Amsal 15:22.
”Snar sinan bansuya suma sufawi nabor syadi ro au, inja bisa susrow fasaw nyan ḇepyum faro samswen ḇeradirya ro roma inai babo sya. Inja, rwower pyum wos anun suḇena. Nari wasmai payamyum.”—Olivia.
Nyan fa wawos ḇe guru Bedi
Imbude wabe wakofenḇair ḇe guru Bedi rosai ḇaḇir ya. Wamgak fa wawos ido, waswarepen roi imbe wafrur ya iso insama mufamfaḇri ḇa, ḇape wor i fa muyawos pyum. Rya ine imnis ra roi kwara ro randak ya ḇa, boi ine nari byuk bon ḇepyum.
Refo doḇe: ”Rarirya komarisen kokenem ro ḇaḇeoser ma kofarkoryaye ko.”—Roma 14:19.
”Mam mboi rya guru Bedi imarisen faro Au ḇa ido, wafukenpan i rosai ḇefrur fa fyafayaf Au ya. Wafawi na kwar ido, bisa fadwer rari bena.”—Juliana.
”Fafisu imbe wawos yoḇ guru bedi ido, ipyum ya wawos fyor farkarkor ya imbran ḇaime ḇaido farkarkor ya posa kwar fafisu ono sisya sro dia ḇa. Wawos myaren rosai ḇaḇir ya. Rarirya, imbude na guru bedi ifawi pyum Au ma ḇyesyowi roi wafrur kwar na.”—Benjamin.
FAWAR ḆEKAKU
”Nilai yeja iḇye ḇa, ma guru yedi isaramper aya ḇaḇeri. Roi nane nafnai fa yakara iḇye kwar bo yafarkor awer mura.
”Yor anun ro guru ḇese. Ikofen ḇe aya radine, ’Guru ani ifawi pyum au ḇaim, ma wakfawi pyum i ḇa. Inja, fawar ḇe i rosai ḇaḇir ya. Imbude nane nbuk payamyum ḇe murid ḇesesya ḇemgak fa sawos yoḇ guru ani.’
”Roi ḇeradirya iso yamewer kaku na! Ḇape yakara pyum kaḇer rosai ikofen ya, kukro roi ikofen na nsasar ḇa. Yamarisen roi nakam nambran pyum raris marisen yena ido, aya iso ḇefrur epon na kada.
”Inja meser ya, yara ḇe guru ani ma yawos yoḇ i. Yakofen ḇe i yaḇesyowi kaku farkarkor byuk ro kelas, ma yasmai payamyum syadi ro farkarkor byuk ḇe ko na. Imboi, samswen kaku fa yaso farkarkor byuk na, ma yakmom rosai imbe yafrur ya. Byuk wos anun ḇe aya, ma imarisen ifnoḇek aya wer rofyor nggofarkor ḇa ḇaido ro e-mail.
”Yakara ḇaḇeri na ifrur radine ḇe aya! Yawos raposa, yamam guru yedine nufanam syadi. Nane nafrur fa yamarisen fafisu yara ro rumfarkor.”—Maria.
Angginem: Kwain pyum ḇa kuker guru Bedi ido, mam na ḇe swaf fa fadwer kenem Bena fa napyum syadi fafisu waba kwar. Katie, ḇeumur taun ri 22, ikofen radine, ”Wafarkor ro rumfarkor wer ḇa yo, na wasrow kaker snonggaku ḇefrur pyum au ḇa. Inja, wafawi nyan fa fadwer rari Bena insama mam pyum samswen wasmai kuker guru bedi ido, ro ras iyama nari swambraḇ fa kwain pyum kuker snonggaku ḇese ḇefrur susa au sya.”
