Sifakfuken roma inai babo ro sup Amerika sya kwar, mboi 80% ḇaido ḇebor sya soḇe sima senadi. Fama, benadi ker ro ras ḇe ras sima sibor ḇa. Sia sifuken kaker radine, ’Konadi insama koknon monda ke, payamyum ḇeba syadi ro nadi ine isya wer?’

•  Nadi ido rosairiri?

•  Manseren Allah ryower na ke?

•  Rosai monda yanadiwarek ya?

•  Bati Besi roi sikofen na

 Nadi ima kawawos kuker Manḇefrur roi nakam. Kwarapan! Manseren Yahwe ima isyadi kaku ro snonggaku koine ro roi risai monda. Imbape, ḇyinggwan ro ko oser-oser ḇa. (Farfyar 17:27) Ro Refo ya dori, fararyor ḇepyum kaku isya. Refo ya doḇe, ’Mgofanam faro Allah, ma nari Allah fyanam faro mgo.’​—Yakobus 4:8.

 Moḇsariso na fanam faro Manseren Allah rai?

•   Nyan oser ya iso wanadi. Iso nyan ḇesrow fa wawos yoḇ Manseren Allah.

•   Nyan ḇese iso wafarkor Refo ya. Ine iso nyan fa Manseren Allah dakkawos yoḇ Au.

 Wanadi ma wafarkor Refo ima imnis ra wawos kuker Manseren Allah ma I kako dawos kuker Au, inja oso derer dawos ker ḇa. Wafrur roi suine kada, nari wis Bena kuker Manseren Allah syambraḇ syadi wer.

 ”Yakara yana swaf fa yawos kuker Allah Ḇepoik Syadi, Yahwe I, ima syowi ḇeba kaku nairi.”​—Jeremy.

 ”Yanadi ḇo yafar roi yakram roi sanerine faro Yahwe I mura, rya yafanam kaku yoḇ I wer.”​—Miranda.

 Wakyar Manseren Allah ima isya ma Ausya wanadi wor faro I ima ipyum. Fama, imbude wakyar kuf ḇa na ryower nadi Bena. Imboi, Refo ya doḇe Yahwe ima ”Manḇerower Nadi” dirya. (Mazmur 65:2) Ḇepyum syadi wer iso, dor Au fa wasawen makakwarek Bena kam faro I. Kukro? ’Snar fyaduru Au.’​—1 Petrus 5:7.

 Kwarapan: Nwa bati ido, Ausya wawos ker yoḇ i ke? Rupa radiri, bisa wawos ker yoḇ Manseren Allah roro nadi. Fafisu wanadi, wor I kuker wap snori, Yahwe. (Mazmur 86:5-7; 88:9) Refo ya ikofen ḇe ko fa ’konadi faswef.​​—1 Tesalonika 5:17.

 ”Yanadi ima moḇ yawos kuker Kma yedi ro nanggi. Yafar roi yakara nakam yoḇ Allah.”​—Moises.

 ”Yafar yoḇ Yahwe I roi snonggaku ḇesesya sifawi na ḇa, imnis ra yawos ḇe Awin ḇaido bati yedi.”​—Karen.

 Refo ya doḇe, ”Iḇye mkoraryof rosairya wer kako, mboi mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa.”​—Filipi 4:6.

 Inja, bisa fa kofar samswen koḇena faro Allah ke? Imbo ḇae! Refo ya doḇe, ”Wasawen roi ḇemarḇak bena ḇe Yahwe I, ma nari ifnoḇek au.”​—Mazmur 55:22.

 Imboi, na wafar ker samswen Bena monda ḇa. Binkbor oso ḇenir ḇe Chantelle doḇe, ”Konadi ḇo kor monda fafnoḇek ker ido, nama ḇabebati ḇepyum risya ḇa. Ayama yakara ḇoi, ḇepon ya kokofen kasumasa faro Manseren Allah resanari. Ipyum ya iso kofar ker yoḇ Allah roi ḇefrur fa komarisen kokofen kasumasa na.”

 Kwarapan: Rosai monda na waḇe wakofen kasumasa faro Allah? Kwarauser roi ri kyor ḇedif Au fa wamarisen wakofen kasumasa faro Yahwe I ro ras ine.

 ”Komam roi kasun monda, raris komam pampen ḇepduk ido, bisa nafrur ko fa komarisen kokofen kasumasa faro Yahwe I.”​—Anita.

 ”Kwarauser Sinan fararur ḇyena ḇefrur mananen ḇaido mnuk ro Refo wamarisen kaku na, ramnai fasnai kasumasa bena faro Yahwe I ḇekur roi anna kam.”​—Brian.