•   Moḇsa ḇaḇir rai fyor rwower ono sifyak ḇesesya?

  •  Biasa monda. Faro aya, ima wos monda nairi.

  •  Rya napyum ḇa kero, ḇape sasar oḇa.

  •  Yamarisen ḇa, yamewer yarower na.

•   Wafanfadak ker ras ḇe ras ke?

  •  Ras oso ḇaime

  •  Yafrur ker na ḇa

  •  Yafrur ker na

•   Kwara ido, kawos fanfadak ine roi ḇesasar kaku ke roḇa?

  •  Oroḇa

  •  Imbo

 Kwara ido, wos fanfadak ima roi ḇefarfnak risya ḇa ke? Imbude kwarem, ’Yafawi ḇa. Mboi roi nabor naisya komam na ḇe roi ḇefarfnak ḇa. Oso wer ido, wos fanfadak ima roi sawos ro ras-ras nairi!’ Rarirya ke?

 Kaku ya, snonggaku ḇebor sya simarisen ḇa sawos wos ḇeḇye ḇa na. Ma sna sano ḇepyum imbude kwara ḇa na. Imnis raris:

•  Wawos fanfadak ido fyasnaiḇair manseiso au. Snonggaku sya bisa sifawi rari bena ro wos wawos na. Wawos wos ḇeḇye ḇa na ido, ine fyasnai wafandun snonggaku ḇesesya sneḇaḇir sena ḇa. Wafrur rarirya ke?

   Refo ya doḇe, ”Ḇape rosai ḇesasyar ro sḇadon neknam ro sne.”​—Matius 15:18.

•  Wos fanfadak na nafrur fa snonggaku skara roi ḇeḇye ḇa kuker au. Syap Cuss Control ikofen, ”Nyan kawos na rai nfasnaiḇair mansei na ḇebati kuker konya, kina ḇaido min fararur koḇesi na sesyowi ko ke roḇa, wis koḇena kuker ḇesesya napyum ke roḇa, na kona fararur oso ḇaido kenaikan jabatan ke, ma moḇsa snonggaku kofawi ḇa sya sifrur ko rai.” Syap ani ikofen wer, ”Kwarapan kada, wawos fanfadak ḇa ido, imbude na wis bena kuker ḇesesya napyum syadi.”

   Refo ya doḇe, ”Mkosawen . . . famfaras.”​—Efesus 4:⁠31.

•  Wos fanfadak na nafrur wapyum syadi imnis moḇ kwara ya ḇa. Ro syap How Rude! Dr. Alex Packer ikofen, ”Snonggaku bewos fanfadak syama sifrur boyas rawo.” Ikofen wer snar wos ḇeḇye ḇa na nafrur fa smam snonggaku ani ḇyepande ḇa, fyafir ḇa, ḇaido iḇye ḇa. Ikofen kako snar wos ḇeraryana nari nawyaye kakara snonggaku oso.

   Refo ya doḇe, ”Wawos ḇemamas nasasyar awer ro mkosḇamna.”​—Efesus 4:​29.

•  Wap ḇepon roi imbe wafrur na. Swewarpan fa wafyak ḇa ro swaf paik oser ḇaido isyadi ḇa. Bisa fasepen roi swewar fa wafrur kwar na ro tabel ḇaido kalender oso. Ḇape insama wapampum rari ḇeḇye ḇa ine, roi ono fandun fa wafrur ya wer. Imnis raris:

•  Ḇinggwanbur hiburan na ḇefrur fa kwara ker awawos ḇeḇye ḇa na. Refo ya ikofen, ”Bemaniḇoḇ kuker ḇaḇeḇarḇorya, nari rari ḇeḇye bedi dakḇarḇor kako.” (1 Korintus 15:33) ”Bemaniḇoḇ” ḇaido ḇaḇebati inema kuker snonggaku sya monda ḇa imḇape hiburan na kako, imnis ra felem, video game, ma musik na. Kenneth, ḇeumur taun ri 17 doḇe, ”Wamarisen doya oso ido, wos ḇeḇye ḇa naro dori yo na napyan fa waso dasdisen ani.”

•  Ḇe snonggaku ḇeba kwar. Snonggaku riḇeso sya sfanfadak kukro skara ine nafrur smam siba kwar. Ḇape, ine kyaku ḇa. Refo ya doḇe, snonggaku ḇeba kwar sya sfawi roi ḇeḇye ma roi ḇeḇarḇor. (Ibrani 5:​14) Na sfanfadak monda ḇa insama sifrur snonggaku sya ”smanen” si.

 Wos ḇeḇye ḇa na nafrur rusak kakara bena ma snonggaku ḇese ḇerower sya. Ro dunya ine snonggaku sibor kaku sbuk wos ḇeḇye ḇa na! Syap Cuss Control ikofen, ”Wasowanan awer. Wasasor au ro wos bena insama ine iḇye ḇa syadi awer. Na wasmai payamyum, ma snonggaku ḇesesya kako simarisen au.”