FAKFUKEN RO ROMA INAI BABO
Moḇsa Yasnai Rai?
Rosai ḇefnai fandun fa mam pyum kaku sansun wasun na? Kukro sansun wasun na nḇairo mansei kaku au. Sansun Bena nfasnaiḇair auma snonggaku ḇerariso?
Kakara ḇesasar ri kyor ma nyan fa ḇinggwanbur na
Kakara ḇesasar #1: Ḇe fa media siso ḇefasospyan moḇ wasnai raya.
Binkbor oso ḇenir ḇe Theresa doḇe, ”Fafisu ono yaso model ḇero iklan sfasnai na kukro yamam ker na. Kokara ker roi snonggaku sepake na ido, nari nafrur fa kosowanan si.”
Bin sya monda ḇa ḇemarisen ḇekoḇes roi smam ro iklan na. Syap The Everything Guide to Raising Adolescent Boys ikofen, ”Snon sya kako sakkoḇes roi sfasnai ro iklan na kako. Manfarḇaḇyan sya sanggar si kwar, ḇesyadi fyor roma ansi sikasun kaker.”
Kwarapan kada: Refo doḇe, ”Snonggaku ḇefawi royoḇa sya sikyar faro wos nakam, ḇape snonggaku ḇena fawawi kyara kaku nyan ḇyena oser-oser.” (Amsal 14:15) Imnis kuker wos anun ine, fasawsaw awer kuker roi mam ro iklan na. Rupa ra, fafisu mam iklan ḇefasnai sansun smam na ḇe sansun ”ḇepduk kaku” ḇaido sansun sor ḇe ”seksi” ido, wafuken manggundaw:
’Yaso model ine ido, mansei ḇesmai kaku untung ya?’
’Moḇsa snonggaku sya na smam aya rai?’
’Ayama snonggaku ḇemnis radirya ke ma nama nasrow kuker rosai yakyar ya ke?’
Wos anun: Ro swaf minggu oser, mampan iklan ma media ḇesena ḇefasnai monda model ro sansun na. Kenem ḇerariso simarisen fa wakso na? Imbude sna aw kwar insama nafrur fa kwara fandun fa waso model sansun oso ke? Inai babo oso snori Karen doḇe, ”Kokame kokara fandun fa kosnai pyum, kosun sansun ḇepyum na, ma komarisen kofasnai baken ‘ḇepduk kaku’ koḇena.” Ikofen wer, ”Ḇebor ḇefrur iklan na sifawi kwar roi ine inja napyan ḇe si fa sifrur romawa babo sya simarisen faro roi anna.”
Kakara ḇesasar #2: Wasowanan moḇ snonggaku ḇebor sisnai raya insama smam waḇese ḇa.
Roma babo oso snori Manuel doḇe, ”Fyor sansun oso syae babo ido, snonggaku syakam na simarisen sakna sansun ḇebabo ani. Kakso fa koḇepake na ḇa ido, na smam koma koḇese ro si.” Inai babo ḇenir ḇe Anna dakna kakara ḇeradirya kako, bo doḇe, ”Ine snar imbe koso rosai ḇesae babo na monda ḇa, ḇape ine snar komgak bati koḇesya simarisen faro ko ḇa.”
Kwarapan kada: Refo doḇe, ”Mkoso awer nyan famfnom ro supswan ine.” (Roma 12:2 ) Imnis wos ananun anine, bas pan lemari ḇeser sansun bena mura wafuken manggundaw:
’Rosai ḇeawyae kaku aya faro sansun yakinfir na?’
’Sansun ḇefrur ya iso perusahaan ḇesnosno kwar nama yafandun kaku na ke?’
’Sansun yakinfir na nama insama snonggaku sya smanen aya monda ke?’
Wos anun: Kwara awer roi ri suru suine monda bisa kwinfir ya, isoine insa smanen au ḇaido smamkyof au. Roi ḇekyor isya bisa wakinfir ya, isoine sansun wasun na nafrur fa wamarisen ma wakyar faro manggundaw. Wakyar syadi manggundaw ido, nari wamgakwarek wer ḇa bati bansi simarisen faro au ke roḇa.
Kakara ḇesasar #3: Kwara auma ’ḇe seksi syadi ido, na wasnai pyum syadi’.
Binkḇor oso ḇenir ḇe Jennifer doḇe, ”Imbe yakofen kaku, fyorno ido yamarisen fa yasun sansun ḇe seksi kermgun, rupa ra ḇeknampu manggenem, ḇefyos, ḇaido ḇefasnai ḇaken ayena.”
Kwarapan kada: Refo doḇe, ”Karamas bena, karamas ro kankenem monda awer . . mboi karamas ḇena nek ro sne ḇeyokef.” (1 Petrus 3:3, 4) Imnis wos anun anine, kwarapan rosai ḇesnai pyum syadi na, karamas smam ro bandi ke ḇeyokef na.
Wos anun: Sansun ḇepyum kaku iso sansun ḇesyadadi ḇa. Kakuḇae, sansun ḇeradirya nama smam kyof na. Ḇape, kwarapan roi ine:
Ausya wakfarfyar kuker snonggaku oso ḇeyawos ker ma dawos ḇekur manggundi monda ke? Ḇeḇye ḇa syadi ya, snonggaku ani ifawi ḇa bo isya ifrur fa kwara fyandun au ḇa!
Imnis ra awawos, sansun kosun na bisa nfasnai kosewar ḇesesya fa smam ko monda ma nari nafnai ra sḇinggwanbur ko
Wasun sansun ḇesyadadi ido, auma wamnis ra snonggaku ani. Rya sansun wasun na imḇe ikofen ’mgomam, aya kada’. Ma, snonggaku sya bisa skara wasun sansun ani kukro mam boi wasnai pyum manggun ḇa ḇaido snar kwara auma wapyum syadi ro ḇesesya. Na smam kako au ḇe snonggaku ḇesewar fa ḇesesya smam au, smam au kuker nyan ḇesasar kako.
Wamewer snonggaku ḇese smam au radirya ido, wasansun pyum au kuker syadadi ḇa. Binkbor oso ḇenir ḇe Monica doḇe, ”Wasansun sansun ḇepyum nama namnis ra wasun insar sya sansun sena ḇa. Imboi ima kyurfasnai ḇesyowi manggundaw ma snonggaku ḇero ris bedi.”
