FASAL 25

Moḇsa Na Yamnai Yafnak Ker Rofmar ya?

”Rofyor yaḇeumur taun riwar yafnak rofmar yedi. Ḇarpurya yafawi Allah mamam Ḇyena faro roi anine. Fyor yafrur roi ine yaḇaḇir yasren ḇa. Yafuken ḇe manggundaya ḇo yoḇe, ’na Allah iswar snonggaku ḇemnis ra aya ke?”​—Luiz.

ROFYOR waba muryas, rmomen nafsu na syambraḇ kaku. Roi ine bisa nafrowes au fa wafnak ker rofmar Bedi ḇaido ḇemasturbasi. * Snonggaku ḇebor skara ḇo soḇe inema masalah ḇeba risyaḇa. Soḇe ”Nun masalah ḇe snonggaku osoḇa.” Ḇape, roi ḇepyum nasya ḇefnai fa binggwanbur roi ine. Manwawan Paulus doḇe, ”Mkomun marisen rosai ḇero baken mkoḇena . . . isoine . . . ḇaḇermomen.” (Kolose 3:⁠5) Masturbasi ḇaido farfnak rofmar myun ḇeri rmomen nafsu yaḇa, ḇape ifrur fa rmomen nafsu ine iba syadi. Ramnai, mampan roi ḇeuser nane:

● Farfnak rofmar fyasnai kenem ḇaido rari ḇefandun manggun. Imnis ra fyor snonggaku oso ifnak rofmar ḇyedi isya ifrur marisen ḇaken manggun ḇyedi.

● Farfnak rofmar nafrur snonggaku oso myam bin ḇaido snon sya ḇe roi ḇyuk fa ifrur rmomen nafsu ḇyedi monda.

● Farfnak rofmar ine nafrur snonggaku oso nya kakara fandun manggun ma nafrur samswen i fa ismai marisen ro farḇakḇuk ya.

Insama wafnak rofmar bedi fa wasmai marisen rmomen nafsu awer, ḇesewar kaku fa farmku manggundaw. (1 Tesalonika 4:​4, 5) Insama wafarmku manggun, Refo danun insa binggwanbur fafisu na ḇefrur nafsu Bedi deke. (Amsal 5:​8, 9) Ḇape, farfnak rofmar ine wafrur ker na ido na rarso? Imbude ḇesewar kaku kwar fa wamnai ro roi ḇeḇesyan ani ḇape jadi ḇa. Napyan kaku ḇe au fa kwara wapok ḇa kwar fa waso Allah sasoser Ḇyena. Iso Pedro kyara faro manggundi. Doḇe, ”Rofyor yasapi ro roi ani wer, snerikar kaku. Yakara roi yafrur nane na yasmai ampun ḇa. Nafrur fa imbe yaḇenadi ido syamswen kaku.”

Wakḇaḇir rarirya ido, ḇekaḇaḇ monda. Samswen ḇena ine nyan ḇesae nasya​—romawa babo ḇebor sya​—ma ḇeba sya ono sisya simnai sifrur roi ani kwar. Inja, Au kako bisa!

Moḇsa Wamnai Buksasar ḇe Manggundaw Rai?

Raris ḇeḇeyap kwar, ḇesapi ro marisen ḇesasar sena fa sifnak rofmar sena nafrur sḇuksasar ḇe manggunsi ker. Inja, rofyor kwara ”fafardun ḇerama ro Allah”, na nadif Au fa wamnai wafrur roi ani. (2 Korintus 7:​11) Ḇape, fyor wabuk sasar ḇe manggundaw syadi ido na nafrur samswen ya iba wer. Na ḇesanekar rawo wamarisen waso rmomen nafsu bena.​—Amsal 24:10.

Inja, ḇesewar kaku fa buk mamam ḇepyum fa bukimam asuser samswen na. Farfnak rofmar ima roi ḇemamas. Roi ani bisa nafrur au fa ’ḇemanfamyan faro nafsu ḇeḇor ma rmomen,’ ma kenem ma rari ḇesasar ine nasur rawo nafrur swaruser bena nabye ḇa. (Titus 3:3) Ḇape, farfnak rofmar inema fararur farḇuk ḇeḇye ḇa risya ḇa. (Yudas 7) Inja, wakna samswen ḇeradine ido, kwara awer snar wafrur sasar kwar na ḇesmai ampun ḇa. Mboi, roi wafrur kaku iso wapampum marisen ḇesasar ya ma wapok wasusu awer!

Imbude, marisen ḇesasar ine ndrama ido nafrur waryaḇ wer ḇa. Rarirya ido, waswarepen kaku wos ḇero Amsal 24:16, ”Snonggaku ḇenapes insapi rarwan rifik rariryano, nari dores kaḇer; ḇape snonggaku ḇeḇarḇor nari isapi pdef snar roi ḇemuni.” Inja, wasusu awer fyor ro swaf ono wasapi, ine fyasnaiḇair ḇa auma snonggaku ḇeḇarḇor risau. Ḇape, mamuser kaku rosai ḇefrur marisen ḇesasar ani deke, ma ḇesewar kaku insama wafrur roi ḇerarya awer.

Buk swaf fa kwarauser saswar ma Allah sawarwar Ḇyena. Manfasfas Mazmur Daud, raso ifrur sasar snar ḇaḇeraryar ḇa manggun ḇyena, ikofen radine, ”Raris kma oso ḇefasnai sawarwar faro snonggaku ḇemgak faro I. Snar ifawi kaku moḇsa koḇefrur rai, iswarepen snar koinema saprop.” (Mazmur 103:13, 14) Imboḇae, Yahwe kyara koma konapes ḇa ma ”imarisen byuk ampun.” (Mazmur 86:5) Osower ido, Imarisen koḇesewar fa kofadwer kenem koḇena. Inja, nyan ḇepyum risai monda wun infa wamnai wafrur marisen ḇesasar bena?

Mamuser hiburan bena. Roi mam ro filem ḇaido TV ḇaido situs internet na nafrur rmomen nafsu bena nek ke? Manbefas Mazmur kuker fawawinanem ḇyenadi ḇe Allah ḇo doḇe, ”Ḇe mga yesuine insama yamam awer roi ḇeyun roi noḇa.” *​—Mazmur 119:⁠37.

Ḇensewar kaku insa swaruser bena nmam ḇe roi ḇesena. Naek Kristen ḇenir William danun, ”Wenef ḇaim, wawasya roi oso ḇefesepen kuker parkara rohani na. Ine fyandun kaku insama roi ḇepupes kokara ro ras ani iso roi ḇefesepen kuker rur ya.”​—Filipi 4:⁠8.

Wawos ḇe snonggaku oso. Snar wamai, imbude na samswen ḇe au fa wakofenḇair masalah bena ḇe snonggaku wakyar ya. Mbape, fawar na ido, na sifnoḇek au fa binggwanbur kenem ḇemnis ḇa ine! Naiso naek Kristen oso ḇenir David ḇyaḇir ya. Doḇe, ”Yemir yawos ḇe kamam yedi”. Yapok na yaḇefnder ḇaḇeri wos ḇyena. Kuker imbrif aum, doḇe, ’Kamam myanen au.’ Ifawi yaḇesewar marḇak kaku fa yawose. Wos osoḇaḇeri ḇepyum fa ḇefrur yaryaḇ kaku ma ḇefrur fa yun snemuk fa yamnai yafrur marisen ḇesasar ine.

”Ramnai, Kamami fyasnai mnuk ḇeḇeso ḇefnoḇek aya fa yamam snar ’yabinggwan syadi’ ḇaim, ma mura mnuk ḇeḇeso wer fa ḇebuk kakakyar snar yafawi kaku roi yafrur ani na nun ḇesasar ḇeba kaku. Dor aya fa yafrur awer roi ine ro swaf oso, ma nari nuyawos roi ine wer. Ikofenḇair insama yaḇesanekar awer fyor marisen ine dek wer, ḇape ḇesewar wer pdef syadi.” Rosai David ikofen ya? Doḇe, ”Payamyum ya iba kaku snar ono sisya ḇefawi masalah yena ma sifnoḇek aya.” *

RO FASAL ḆEUSER YA

Fararur farḇuk famfnom inema masalah ḇeba dirya. Swewar fa wafawi rosai ḇefnai i.

[Fasfas Kasun]

 MNUK ḆEKNAM KAKU

”Fanam awer marasrisen ḇeḇerarmomen baken ro snonkborsya, mboi swewar ḇaḇenapnapesya, ḇaḇefarmkuya, saswar ma aski fnoḇek snonkaku ḇefararyor faro Manseren kuker sne ḇesrensya.”​—2 Timotius 2:​22.

 ANGGINEM

Ḇenadi rofyor rmomen nafsu ani dek ḇaim. Wor ḇe Allah Yahwe I fa byuk ”baba ro papoik” insa wasapi awer ro fafrowes anya.​—2 Korintus 4:7.

 WAFAWI KE . . . ?

Snonggaku ḇepok ḇa nari isapi ro marisen ḇesasar ro fararur farḇuk. Ḇape snon ḇaido bin ḇefarmku manggun ro marisen ḇesasar nari syambraḇ fyor demire.

AW YENA!

Na yakara roi ḇesren ker fyor ․․․․․

Insa yasapi awer ro rmomen nafsu ani, Nari ․․․․․

Roi imbe yafuken ro sinan ayesuya isone ․․․․․

 KWARA IDO?

● Rosai ḇefnai kaku fa waswarepen snar Yahwe ”imarisen ḇyuk ampun”?​—Mazmur 86:5.

● Snar Allah, iso ḇefrur rmomen nafsu ya, inja ikofen kako fandun fa wafarmku manggun, Allah ikyar nari wapok wafrur rosai?

[Ḇeḇeyap ro ram 182]

Fyor yafrur mnis samswen ayenane, yaḇaḇir sneuser yedi isren ro ḇarpon Yahwe I, ma na yapok yafadwer naba kuker roi risai monda!’’​​—Sarah

[Sonin ro ram 180]

Wasapi fyor wafrar ido, na wafrar kaḇer wer ro randak ḇa​—fyor wafrur wer farfnak rofmar ya, nama nfasnaiḇair ḇa wasusu kwar