WASWAREPEN kaker sai ḇefrur fa Allah malaikat Ḇyesi oso fyadwer i ḇe Setan Ibiris ke?⁠— Fyandun manggundi inja imarisen fa sisyom faro i, ḇefnai fa ḇyembroḇ Manseren Allah. Malaikat ḇesesya sakso Ibiris i ke?⁠— Imbo. Refo dap si ḇe Ibiris ”malaikat ḇyesi”, ḇaido rur ḇeḇarḇor sya.⁠—Fasasna faro Yohanes (Wahyu) 12:9.

Malaikat ḇaido rur ḇeḇarḇor ansine sikyar faro Manseren Allah ke?⁠—Refo ikofen ’rur ḇeḇarḇor sya kako sikyar Allah ima isya’. (Yakobus 2:​19) Imbape kirine simgake, kukro sifawi Allah nari myun si snar roi ḇeḇye ḇa sifrur kwar na. Roi ḇesasar risai sifrur kwar na?⁠—

Refo doḇe malaikat ansi sibur moḇ ḇesrow faro si, isoine nanggi, mura sado ḇe supswan fa sikenem raris snonggaku. Sifrur roi ine kukro imbe sifrur fararur farḇuk kuker bin ḇedoser ḇero supswan ine sya. (Kejadian 6:​1, 2; Yudas 6) Rosai wafawi ḇekur fararur farḇuk ine ya?⁠—

Fararur farḇuk ḇejadi fafisu snon ma bin sufanam su kuker nyan ḇepyum oso. Ramnai ido, nari kapira oso isya ro sna ya snekapar ḇyedi. Ḇape, malaikat ḇefrur fararur farḇuk nama sasar nairi. Allah imarisen insama snon ma bin ḇefakawin kwar su mande na ḇefrur farḇuk. Rarirya rofyor imbeswa suine suna romawa ido, nari sufaduru pyum i.

Rofyor malaikat ansi sepake baken snonggaku ma sifrur farḇuk kuker bin ḇero supswan ine sya, romawa skapar sya siba rawo siba mantar kaku. Sirarmomen ma simarisen sifrur susa snonggaku ḇesesya. Iso ḇefnai fa Allah ifrur faḇruḇ ḇeba fa myun si ma snonggaku ḇefrur ḇarḇor syakam. Imbape, Allah iwan Nuh i fa ḇyawes jawara, ḇaido wai ḇeba oso, fa byukifaspar snonggaku ḇefrur roi ḇenapes sya. Guru Ḇeba Syadi ikofen roi ḇeḇesya ro fafisu Faḇruḇ Ḇeba anya fandun fa koswarapen na.⁠—Kejadian 6:​3, 4, 13, 14; Lukas 17:26, 27.

Wafawi ke, rofyor Faḇruḇ Ḇeba ryama malaikat ḇeḇarḇor ansi moḇsa sḇerai?⁠— Sper baken snonggaku sena bo skaḇer ḇe nanggi. Imbape, sḇe Allah malaikat Ḇyesi wer ḇa, mboi sḇe Ibiris malaikat ḇyesya. Romawa sesya ḇena baken ḇeba mantar ansi moḇsa sḇerai?⁠— Faḇruḇ Ḇeba ya myun pres sikam. Snonggaku ḇesouser Allah ḇa sya kako sakmar.

Ro ras Faḇruḇ Ḇeba ani muma, Allah byuk swaf ḇe rur ḇeḇarḇor sya fa sikenem raris snonggaku wer ḇa. Kopok komam si ḇa rariryano rur ḇeḇarḇor sisewar kaker sawninyan snonggaku sya fa sifrur roi ḇeḇye ḇa kaku. Sifrur kandera nabor syadi wer. Ine snar seḇesawen bur nanggi ḇe supswan ine kwar.

Wafawi sai ḇefnai kopok komam rur ḇeḇarḇor ansi ḇa ke?⁠— Ine snar sima rur sirya. Ḇape kokyar sima sisya kaku. Refo ikofen Ibiris iso ’ḇeanggarkar supswan ḇesiper’, ma malaikat ḇyesi sifnoḇek i.​—Fasasna 12:​9, 12.

Ibiris ma rur ḇeḇarḇor ansi nari sanggar ma sawninyan ko kako ke?⁠— Kosasor ko ḇa ido na bisa ḇae. Rarirya mboi komgak awer. Guru Ḇepyum Syadi doḇe, ’Ibiris ipok aya ḇa.’ Kofanam pdef kuker Allah ido, nari kyadaunwarek ko ro Ibiris ma rur ḇeḇarḇor ḇeso i sya.​—Yohanes 14:30.

Fandun fa kofawi roi ḇeḇye ḇa risai rur ḇeḇarḇor sya sisewar sidif ko fa kofrur na. Kwarapan kada. Roi ḇeḇye ḇa risai rur ḇeḇarḇor sya sifrur fafisu sado ḇe supswan ine?⁠— Faḇruḇ Ḇeba myun ḇaim, sifrur fararur farḇuk kuker bin sya, roi malaikat sya sipok sifrur awer na. Babo ine, rur ḇeḇarḇor sya simarisen snonggaku sya sisouser ḇa faro Allah sasoser Ḇyena ḇekur fararur farḇuk ya. Knikine imbe yafuken Au: Refo doḇe mansei na bisa ḇefrur fararur farḇuk ya?⁠— Imbo, kaku beri, snonggaku ḇeḇeimbeswa sya monda.

Baboine, inai ma roma babo ri ḇeḇeso sakfrur fararur farḇuk, mboi inema sasar nairi kukro seromawa babo kaker. Refo ikofen ḇekur snon sya ”rofmar” sena, ḇaido sidon. (Imamat 15:​1-3) Bin sya rofmar sena sor ḇe vidon. Yahwe ifrur bar ḇero baken suine faro fandun oso na ḇeḇeimbeswa kwar sya monda susmai marasrisen na. Rur ḇeḇarḇor sya simarisen snonggaku sifrur rosai Allah iwan fa sifrur awer na. Imnis raris, rur ḇeḇarḇor simarisen roma ma inai babo sufnak sidon ḇaido vidon suḇena. Na komewer kofrur rur ḇeḇarḇor sya simarisen ḇae?⁠—

Roi ono wer rur ḇeḇarḇor sya simarisen na boi Yahwe dayin kaku na. Wakfawi roi sairiri?⁠— Ḇaḇerarmomen. (Mazmur 11:5) Ḇaḇerarmomen iso snonggaku oso ifrur roi ḇeḇye ḇa ma ifrur kandera snonggaku ḇese. Waswarepen, iso snonggaku ḇeba mantar, rur ḇeḇarḇor ansi romawa sesi, roi sifrur na.

Rur ḇeḇarḇor sya kako simarisen sifrur makakak snonggaku sya. Nono ido, sifrur si raris snonggaku ḇemar kwar sya. Imbude sifrur mgaren sena ndrok imnis ra mgaren ro snonggaku ḇemar kwar ansi. Kuker nyan ine, rur ḇeḇarḇor ansi sifrowes kawasa ḇebor fa sikyar snonggaku ḇemar kwar sya sikenem kaker ma bisa sawos kuker ḇekenem kaker sya. Imbo, rur ḇeḇarḇor sifnai ra snonggaku sibor sikyar faro rur ro snonggaku ḇemar sya.

Inja kosasor kaku ko insama Ibiris ma rur ḇeḇarḇor sya sifrowes awer ko. Refo danunepen ko, ’Ibiris ḇyefarari malaikat ḇesren, manfamyan ḇyesi sifrur kako radiri.’ (2 Korintus 11:14, 15) Ḇape ḇekaku ya, rur ansine sḇarḇor kaku. Rwama komam rariso sisewar sifrur ko fa kakfrur raris si.

Rosai ḇefarkor snonggaku ḇebor fa sifawi smamunmun, sifrur fararur farḇuk ḇemnis ḇa ma sikyar faro rur snonggaku ḇemar kwar sya?⁠— Sifawi roi annane snar smam ro televisi ma felem, sifnak komputer ma vidio game, sna ḇaḇebati ḇepyum ḇa ro rumfarkor, ma siwasya syap komik ḇae? Snar sifrur roi nane nafnai fa sfanam syadi faro Allah ke ḇaido faro Ibiris ma rur ḇeḇarḇor sya? Moḇsa wakkara rai?⁠—

Kwara ido, mansei ḇemarisen ḇefrur ko fa korower ma komam roi ḇeḇye ḇa na?⁠— Imbo, Ibiris ma rur ḇeḇarḇor sya. Inja rosai fandun fa kofrur ya?⁠— Fandun fa kowasya, korower, ma komam roi ḇeḇuk payamyum ḇe ko ma ḇefnoḇek ko fa kofarmyan ḇeYahwe I. Kwarapan roi ḇepyum ri ḇeḇeso naisya bisa wafrur na ke?⁠—

Kofrur roi ḇepyum ido, roi ono ḇa ḇefrur fa komgak faro rur ḇeḇarḇor sya. Yesus syambraḇ syadi ro si, ma simgak faro i. Ras oso, rur ḇeḇarḇor ansine sar naba ḇe Yesus i bo soḇe, ’Rosai waḇe wafrur kuker inggo?’ (Markus 1:​24) Fafisu Yesus ryama fa myun pres Ibiris ma rur ḇeḇarḇor sya, na kakmarisen ḇae?⁠— Isof ro ras anya, kofanam pdef ḇe Yesus ma Kma ḇero nanggi ido, kokyar Yesus nari kyadaunwarek ko ro rur ḇeḇarḇor sya.