FAFISU ono, Yahwe kyadaunwarek romawa ma snonggaku ḇepok ḇa fa ḇekadaunwarek manggunsi kuker nyan kokara ḇa na. Wambran farma ḇe mnu ido, imbude na mam nyan oser Yahwe ifrur na. Ḇape, randak ya na wafawi mnis roi ḇejadi ya ḇa.

Mam man oso iroḇ fanam au mura kyain ro saprop. Rya man ani ḇyepar. Iyer prer ḇyedi oso ma rofyor fanam yoḇ i ido, na imbran bur au. Wayomuser i mboi ḇyinggwanbur Au. Ramnai ido, man ani iroḇ. Prer ḇyedi ḇyepar ḇaḇeri! Wafawi rosai man ani ifrur ya ke?⁠—

Fanam ḇe moḇ man ani kyain ro ya, isya iyokef mgun ḇyesi ro moḇ ḇembron ya. Man sinan ani imgak nari wasrow ma mun mgun ḇyansine. Inja, ifrur i ra ḇyeparpar ma dun au fa ḇinggwanbur si. Wafawi mansei na ḇekadaunwarek ko raris man sinan ḇekadaunwarek mgun ḇyesi ani?⁠— Refo ya byukimnis Allah Yahwe kuker mangganggan ḇemamwarek mgun ḇyansi.​—Ulangan 32:11, 12.

Yahwe Roma Ḇyedi iswar kaku iso Yesus i. Rofyor ikenem ro nanggi, ima malaikat ḇesamambraḇ kaku imnis ra Kmari. Ifawi myamwarek manggundi. Imbape, fafisu Yesus ḇyeḇeaḇen ro supswan ine, ḇyekapira ḇesambraḇ ḇa. Fyandun ono ḇekadaunwarek i.

Insama syambraḇ fa ifrur rosai Allah imarisen fa ifrur ro supswan ine, Yesus na iba muryas ḇe snonggaku ḇenapes kaku. Imboi, Ibiris syewar fa myun i insama Allah marisen Ḇyena ndarirya awer. Moḇsa sisewar fa smun Yesus fafisu ibaḇa kaker ma moḇsa Yahwe kyadaunwarek i naser fawar ḇeyun sne kaku. Imbe wakfawi na ke?⁠—

Yesus ḇyeḇeaḇen fyoro ḇa mura, Ibiris ifrur roi oso fa isnai ra mak ḇesnai ro nanggi ḇero bar Wamurem. Snon ono ḇefawinanem mak sya, sisouser mak ani ro swaf kilometer ri utin isof ro Yerusalem. Sifuken kawasa ḇero diwansya ro diso oso nari ḇye raja Yahudi moḇ ḇyeaḇen roya. Rofyor sifuken yoḇ snon ḇefawi rosai Refo ikofen ḇekur roi ine, sikarem, ”Ro Betlehem.”​—Matius 2:​1-6.

Herodes, raja ḇerarmomen ḇepoik Yerusalem, rofyor ryower sikofen raja ḇebabo insape ḇyeaḇen babo ro mnu Betlehem ḇefanam ani raposa, ikofen ḇe ḇefawinanem mak ansi, ’Mgosewar ma mgosrow romawa ani, mura mgoḇeḇair maḇe aya.’ Wafawi rosai ḇefnai fa Herodes imbe ifawi moḇ Yesus isya roya ke?⁠— Kukro Herodes imarisen faro i ḇa ma imbe myun i!

Moḇsa Manseren Allah kyadaunwarek Roma Ḇyedi rai?⁠— Fafisu ḇefawinanem mak ansi sisrow Yesus i, sbuk hadiah ḇe i. Mura ido, Allah byuk swarapepen faro ḇefawinanem mak ansi roro mafu insama skaḇer ḇe Herodes awer. Inja sibur kuker siso nyan ḇese bo simbran ro nyan ḇeraḇe Yerusalem ya ḇa. Rofyor Herodes ifawi ḇefawinanem mak ansi siswara kwar, imsor fafayaḇa. Herodes syewar fa myun Yesus i, inja iwan fa smun romawa snon ḇero Betlehem ḇeumur taun ri suru ḇe sop fa simar! Ḇape fafisu ya, Yesus rya kwar.

Wafawi rariso Yesus ifrar ibur moḇ ani ke?⁠— Ḇefawinanem mak ansi sibur ramnai, Yahwe byuk swarapepen ḇe Yusuf, Maria swari, fa ikbok ma dun su fa skofrar binggwan ḇe sup Masir. Ro diwa, Yesus daksmai roi ḇemun ḇerama ro Herodes i ḇa. Taun nawas mura, fafisu Maria ma Yusuf suyun Yesus fa skobur, Allah byuk swarapepen ḇese wer ḇe Yusuf i. Ikofen ḇe Yusuf roro mafu insama skobur ḇe Nazaret, kukro ro dia roi ḇeḇye ḇa na ḇekur Yesus i ḇa.​—Matius 2:​7-​23.

Bisa mam moḇsa Yahwe kyadaunwarek Roma Ḇyedi ke?⁠— Kwara ido, mansei ḇemnis ra man mgun ansi sinan skoḇedi iyokef si ro moḇ ḇembron ḇaido raris Yesus ḇebaba kaker anya? Wakmnis ra si ḇae?⁠— Snonggaku ono imbe sifrur fa wasmai roi ḇemun. Wafawi manseisi ke?⁠—

Refo doḇe Ibiris imnis ra singa ḇeaur imbe dan ḇepek ko. Raris singa ḇesewar aiwan mgun sya, Ibiris ma rur ḇeḇarḇor sya sisewar romawa sya kako. (1 Petrus 5:8) Ḇape Yahwe syambraḇ syadi ro Ibiris i. Yahwe syambraḇ fa kyadaunwarek romawa Ḇyesya ḇaido ipyos roi ḇeḇye ḇa Ibiris ifrur yoḇ sikam.

Waswarepen kaker roi wafarkor ro Fasal 10 ro syap ine, Ibiris ma rur ḇeḇarḇor sya sisewar fa sifrowes ko fa kofrur rosai?⁠— Imbo, sisewar insama kofrur fararur farḇuk ḇemnis ḇa Allah dayin kaku na. Ḇape mansei Allah ḇye si fa bisa sifrur fararur farḇuk ya?⁠— Kaku beri, snon ma bin ḇeba kwar ma suḇe imbeswa kwar.

Imbape faḇye kaku, snonggaku ḇeba ḇeḇeso simarisen sifrur fararur farḇuk kuker romawa sya. Sifrur rarirya ido, nafnai ra roma ma inai sakfrur roi ḇeḇye ḇa smam ro snonggaku ḇeba ansi. Romawa ansi kako sbuk rofmar sena kuker nyan ḇemnis ḇa. Iso ḇejadi ro mnu Sodom iwara. Refo ikofen snonggaku ḇero diansya, ”ro romawa sya isof ḇesinan sya” sisewar fa sifrur farḇuk kuker snon ḇerama ḇemamfar Lot i.​—Kejadian 19:​4, 5.

Yesus fyandun ono ḇekadaunwarek i, inja au kako wafandun skadaunwarek au ro snonggaku ḇeba sya​—⁠ma romawa ḇesesya kako​—⁠ḇesewar fa ḇefrur farḇuk kuker au. Mam ido snonggaku ḇeradine na sifrur si ra bati besi. Imbude na sbuk roi oso ḇe au mboi sor fa wakofenḇair awer rosai imbe sifrur yoḇ au na. Ḇape, snonggaku ansi sfandun manggunsi, raris Ibiris ma rur ḇeḇarḇor sya, ma siḇe sisewar marisen faro manggunsi monda. Ma sisewar fa sismai mararisen ine kuker sifrur fararur farḇuk kuker romawa sya. Ine sasar ḇeba kaku nairi!

Wafawi rosai na sifrur fa sismai marisen ḇe manggunsi ke?⁠— Imbude na span ma sifnak rofmar bedi. Ḇaido sifnak rofmar sena ḇe rofmar bedi. Imbape, mam monda awer snonggaku oso ifnak sidon ḇaido vidon bedi. Iḇye eba, kasun bedi ke, snami, ḇaido kmami kako ke ipok ifrur rarirya awer.

Rosai na wafrur ya fa kwadaunwarek baken bedi ro snonggaku ḇefrur roi ḇeḇye ḇa ḇeradirya?⁠— Ḇepon ya, mam monda awer snonggaku oso ifnak rofmar bedi. Imbe ifrur na ido, wakofen bos ma war naba, ”Wamnai! Na yakofenḇair au ḇe ḇesesya!” Rofyor snonggaku ani ikofen roi ifrur na snar sasar bena ido, wakyar awer i. Roi ikofen na nkaku ḇa. Wakofen monda roi ifrur na ḇe ḇesesya! Imbude na ikofen roi ifrur na nama roi ḇekankunes faro mu, mboi wakofenḇair na monda. Ḇesyadi fafisu ikofen nari byuk hadiah ḇe au ḇaido ifrur makak au ke, wafrar wabur i bo wakofen roi ifrur na ḇe ḇesesya.

Wamgak awer, mboi fandun fa wasasor au. Rofyor sinan bansu sukofenḇair ḇe au ḇekur snonggaku ḇaido moḇ nari dun roi ḇemun ḇe au ido, rwower roi sukofen na kada. Rarirya ido, snonggaku ḇeḇarḇor sya sna swaf fa sifrur susa au ḇa.