Snar Yesus ima snonggaku ḇenapes dirya, inja daksmai samswen nabor imnis ra snonggaku koine roi kosmai na ḇa. Ḇape, isawarwar ma ifawi mnis kaku roi snonggaku ḇesesya skara na. Ifnoḇek si ido, na ifrur roi ḇesyadi ro rosai sfandun na. Kokarapan nyan ḇepyum ḇyena kawos kwar ro Farkarkor 32, 37, 57, 99.

Yesus ifrur fa snonggaku skara ḇa ima samswen fa sfanam yoḇ i kukro ima nya fararur nabore. Inja snonggaku syakam, ḇesinan kwar ma ḇebabo sya, simgak ḇa fa sfanam yoḇ i. Simarisen sfanam yoḇ i kukro sḇaḇir iswar si. Kowasya fawar ḇyenane ro Farkarkor 25, 27, 95.

Yesus ḇyenadi kaku ḇesya kwar ḇe Kmari, fyor demir ke isya ro ḇarpon snonggaku sya kako. Ḇyenadi ro fafisu imbe inan monda ḇa, mboi ro fafisu nakam. Yesus ḇyenadi yoḇ Kmari fa ikofen kasumasa, isandik I, ma dor farkankin fyor dun snemuk ḇefandun ḇaime. Komampan nyan ḇepyum fyasnai ro Farkarkor 24, 34, 91, 122, 123.

Yesus imarisen myam epon snonggaku ḇesesya fandun sena. Isyadi wer fyor imbrus yano imarisen byuk swaf ḇyena fyor imnaisu fa ifnoḇek snonggaku ḇesesya. Kokarapan moḇsa kakso nyan ḇyenane ma kowasya Farkarkor 19, 41, 52.

Yesus fyarkor snonggaku sya fa simarisen sbuk ampun monda ḇa. Demir imarisen byuk ampun faro manfamyan ḇyesi ma snonggaku ḇesesya. Kokarauser nyan ḇepyum ḇyenane ro Farkarkor 26, 40, 64, 85, 131.

Yesus ifawi ḇardadi ḇekofen nari snonggaku Yahudi ḇebor sya spampum Mesias i mura smun i fa imar. Inja, Yesus na kyara ifararur nabor awer fa ifnoḇek snonggaku sya ke? Oroḇa, Yesus kyara rarirya ḇa. Iryaḇ kaku ro ḇaḇebaryas ma dawoswarek samsyom ḇekaku ya. Inema nyan kenem ḇepyum kaku fyasnai ḇe manfamyan ḇyesya ḇesmai samswen snar spampum ḇaido sidwarek si! Kowasya Farkarkor 16, 72, 103.

Yesus ima ifawinanem syadi ro snonggaku ḇenapes ḇa sya. Swaruser, kakara, ma samambraḇ ḇyena nabor syadi ro snonggaku ḇero ris ḇyedi. Mboi, ifarmyan snonggaku ḇesesya kuker sne ḇerun. Kofarkor nyan ḇepyum fyasnai nane ro Farkarkor 10, 62, 66, 94, 116.

Yesus kyaḇaḇ faro manwawan ḇyesi ma snonggaku ḇesesya, kyaḇaḇ syadi fafisu siso pyum kaku nyan ma farkarkor ḇyuk na ḇa. Kuker kaḇaḇaḇ, danunepen ker si ḇekur roi fandun fa sifrur na insama sfanam ḇe Yahwe I. Kowasya nyan ḇepyum Yesus fyasnai ine ro Farkarkor 74, 98, 118, 135.