1, 2. (a) Roi ḇepyum kaku rosai Yahwe ḇyuk ḇe ko na? (b) Rosai Yahwe ḇyuk ḇe ko wer insama kenem koḇena napyum syadi?

 YAHWE ḇyuk roi ḇepyum kaku ḇe kokame, isoine kankenem. (Kejadian 1:27) Imarisen kosmai payamyum ro kenem koḇena. Inja, ḇyuk wos farkin fa nfarkor ko insama kofawi moḇsa kun snemuk ḇepyum rai. Fandun fa koḇuk wos farkin anna insama nafnoḇek ko fa koḇukimambir roi ḇekaku ma roi ḇesasar na. (Ibrani 5:14) Kofrur rarirya ido, nama nfasnai komarisen Yahwe fyarkor ko fa kona kakara ḇemnis. Kokenem imnis Allah wos farkin Ḇyena ma mankunko kosmai payamyum ro na ido, na insape kofawi kaku wos farkin anna nefandun kaku.

² Roi ḇekur ko ro kenem ine nabore. Imbude, roi ono naisya ro Refo yadori ḇa, rupa ra kofrur wos snemuk faro pararei ḇena fasfes kuker rik ya. Rosai na kofrur insama wos snemuk koḇena nafrur fa Yahwe imarisen? Wos farkin ro Refo nfarkor ko moḇsa Yahwe myam kankenem ine ma rik ya rai. Kofawi pyum na ido, nari kofrur snemuk ḇepyum ma sneuser koḇena nasren ḇesya kwar. (Amsal 2:6-11) Rwama kawos wos farkin riḇeso nane.

3, 4. (a) Moḇsa Allah myam rik ya rai? (b) Rik ya ḇyekopḇair faro rosai?

³ Refo fyarkor ko snar rik ima isren kukro ḇyeḇair ḇe kankenem ya. Ma, Yahwe myam kankenem ine ḇyesyowi kaku. Rofyor Kain myun kasun ḇyedi raposa, Yahwe dawos yoḇ i ḇo doḇe, ”Kasun bani rik ḇyena dor ḇe Aya ro saprop yadori.” (Kejadian 4:10) Habel rik ḇyena ḇyekopḇair ḇe kankenem ḇyedi. Rofyor Yahwe dap Habel rik ḇyenane, roi ikofen ya iso Habel kankenem ḇyediri.

⁴ Rofyor Fabruḇ Ḇeba raposa, Allah iwan fa snonkaku sya san aiwan kraf. Mboi doḇe, ”Mkan awer kraf ḇena rik kaker, isoine kankenem ḇyedi.” (Kejadian 9:4) Parenta ine isrow faro Nuh kpu up ḇyesya kam, ma ko kako. Nasnai kaku, Yahwe myam rik ya ḇyekopḇair ḇe kankenem. Inja, fandun fa kakna mamam ḇeradine faro rik ya.​—Mazmur 36:9.

5, 6. Moḇsa Sasoser Moses fyasnaiḇair moḇ Yahwe myam kankenem ma rik na rai?

⁵ Ro parenta Yahwe ḇyuk ḇe Moses i, ikofen ḇo doḇe, ”Rofyor snonkaku manseirirya monda . . . dan rik rosairirya kam, nari Yasampum kaku snonkaku ani, ma nari Yamun i. Kankenem ro roi ḇekenem nakam naisya ro rik ḇyena.”​—Imamat 17:10, 11.

⁶ Ro Sasoser Moses, ikofen rofyor snonkaku oso myun aiwan fa dan ido, fandun fa isbawer rik ḇyena ḇe saprop. Ine nfasnai rik ro aiwan ani ima Yahwe ronyariri ma isren. (Ulangan 12:16; Yehezkiel 18:4) Mboi, Yahwe iwan er Israel sya fa sisbawer rik ro aiwan  ani rawo nabro ḇeri ḇa. Rofyor sisewar fa sifrur radine kwar, na san aiwan ani ḇo sisnesna nasren. Sesyowi rik aiwan ya, ine fyasnaiḇair sesyowi Yahwe I, ḇeḇuk kankenem ine. Sasoser ani kako iwan er Israel sya fa sfarser aiwan ḇe farsarser insama napyos sasar sena.​—Mam Fasfas Ḇepupes 19 ma 20.

7. Moḇsa Daud fyasnai ima ḇyesyowi rik ya?

⁷ Komam ro rosai Daud ifrur rofyor myamunmun kuker snonkaku Filistin sya, kofawi rik nama roi ḇesyowi kaku. Daud manfamyan ḇyesi sifawi Daud imbrow. Inja, sraḇe mbroḇ sesya moḇ sena ma sḇuk kenem sena fa sismai war. Mboi, rofyor sun war anya yoḇ Daud i, imewer dinem na ḇo ”isbawer na ḇe Yahwe I”. Daud doḇe, ”Sye Yahwe, na yapok yafrur roi ine ḇaḇeri! Snonkaku ansine sḇuk kenem sena fa sra sun na, inja moḇsariso na yinem rik sena rai!” Daud fyawi Allah myam kankenem ma rik ya ḇyesyowi kaku.​—2 Samuel 23:15-17.

8, 9. Moḇsa snonkaku Kristen ro baboine smam rik na rai?

⁸ Rofyor Yesus imar kwar, Allah kawasa Ḇyesi siso Sasoser Moses ḇyena wer ḇa kwar. Mboi, Yahwe dor snonkaku Kristen sya fa sisouser pdef sasoser riḇeso. Sfarser aiwan na wer ḇa kwar, mboi fandun fa sḇinkwanbur rik ya kaker. Roi nane nefandun kaku raris sḇinkwanbur fararur farḇuk ma samsyom amfyanir na.​—Farfyar 15:28, 29.

⁹ Ro baboine moḇryairi. Snonkaku Kristen koine kofawi Yahwe iso Knam ro kankenem ine ma roi ḇekenem nakam nama ronyariri. Kofawi kako rik ima isren ma ḇyekopḇair ḇe kankenem ya. Inja, na  kokara pyum wos farkin ro Refo fa kofrur snemuk faro nyan kosewar pararei ḇena fasfes kuker rik ya.

10, 11. (a) Moḇsa Saksi-Saksi Yahwe smam moḇ sisun rik ya ḇaido ḇar rifyak ḇefandun ro rik ḇe baken rai? (b) Rariso snonkaku Kristen oser-oser sifrur snemuk rai?

¹⁰ Saksi-Saksi Yahwe koine kofawi ’koḇinkwanbur rik’ ima kan ḇaido kinem awer rik ya monda ḇa. Ine kyurfasnai kako kosun awer rik ḇe baken koḇena, koḇuk rik koḇena faro snonkaku ḇese ḇa, ma kokram rik mankun koḇena fa kosun na ḇe baken koḇena ḇa. Ine kako kosun awer ḇar rifyak ḇefandun ro rik ya ḇe baken koḇena, isoine sor ḇe sel rik ḇerik, sel rik ḇepyoper, trombosit, ma plasma.

¹¹ Ḇar rifyak ḇefandun ro rik ine sirwas na ḇe ḇar kasun-kasun syadi wer. Sor na ḇe fraksi darah. Snonkaku Kristen oser-oser fandun fa sun wos snemuk, na sismai roi ine ke roḇa. Faro ḇeduf ya rik mankun ḇyena kako. Oser-oser fandun fa mankundi dun wos snemuk kuker moḇsa sḇuk rik ḇyena ro swaf operasi ya imbran kaker, smam dafduf ḇyena, ḇaido sḇuk terapi ḇebabo.​—Mam Fasfas Ḇepupes 21.

12. (a) Rosai ḇefnai fa Yahwe myam wos snemuk ḇeramuma ro sneuser koḇena nefandun kaku? (b) Moḇsariso na kofrur wos snemuk ḇepyum faro nyan kosewar pararei na rai?

¹² Yahwe fyandun kaku faro wos snemuk ḇeramuma ro sneuser koḇena ke? Imboḇae. Wos snemuk kun anna nfasnaiḇair kosnesna, ma Yahwe imarisen fa fyawi kakara ma kosnesna. (Wasya Amsal 17:3; 24:12.) Inja, koḇe kokinfir nyan pararei oso ido, fandun fa koḇenadi kor farkankin ro Yahwe I resari,  insape komam pyum nyan pararei anna moḇsa isnai rai. Ramnai, kofrur snemuk ḇeknam ro Wos Refo ya. Kofuken awer ḇe snonkaku ḇesesya rosai na dakfruri rofyor daksmai fafisu ḇeradine. Snonkaku ḇesesya kako sipok sawyae awer snemuk koḇena. Kukro snonkaku Kristen oser-oser nari kyamar ”kamnam ḇyena” ro mankundi.​—Galatia 6:5; Roma 14:12.

13. Rosai kofawi ro Yahwe I ro parenta ma wos farkin Ḇyena kuker rik ya?

¹³ Roi Yahwe iwan fa kofrur na, nakam faro payamyum koḇena ma nḇair ima iswar ko. (Mazmur 19:7-11) Kosouser parenta Ḇyena insama nbuk payamyum ḇe ko monda ḇa, mboi kosouser I kukro koswar I. Saswar koḇena faro Yahwe naiso ḇefnai fa komewer kosun rik ḇe baken koḇena. (Farfyar 15:20) Kofrur radine kako insama koprei pdef. Snonkaku sibor insape sifawi dafduf ono ndramuma snar sisun rik ḇe baken sena. Dokter sibor sikyar operasi kuker rik ḇa, napyum syadi. Kakuḇae, Yahwe nyan-nyan Ḇyenama napyum ma ndramuma ro saswari.​—Wasya Yesaya 55:9; Yohanes 14:21, 23.

14, 15. (a) Parenta rosai Yahwe ḇyuk faro kawasa Ḇyesi insama nkadaunwarek si? (b) Moḇsa kosouser roi ḇepyum ḇero Yahwe parenta Ḇyena?

¹⁴ Allah parenta Ḇyena nbuk payamyum faro kawasa Ḇyesi ḇesya kwar. Yahwe ḇyuk parenta faro kawasa Israel sya fa nkadaunwarek si ro roi ḇemun na. Rupa ra, iwan si fa sifrur ayar karui insama nadwarek moḇ ḇepyom ro rum sena boya insama oso isapi  ḇa. (Ulangan 22:8) Iwan kako fa smamwarek aiwan sesya. Rofyor oso nya sapi ḇerarmomen, fandun fa myamwarek sapi ani insama iyom awer ḇaido myun awer manseirya kako. (Keluaran 21:28, 29) Oso isouser parenta ine ḇa rawo oso imar ido, nari snonkaku ani syasar.

¹⁵ Kofawi Yahwe ima myam kankenem ine ḇe roi ḇesyowi kaku. Moḇsa roi nane nafnoḇek ko fa kakmam kenem ine rai? Koḇesyowi kaku kenem koḇena kuker komam pyum rum koḇena, oto, moḇ kun oto na, ma hiburan rosai kokinfir na. Snonkaku ḇeḇeso, roma inai babo sya kako, skara roi ḇemun na nkur mankenem si ḇa. Inja, sfandun faro rosai na ḇemun si ḇa ḇo sifrur monda marisen sena. Mboi, Yahwe imewer kofrur rarirya. Imarisen koḇesyowi kaku kenem ine, kenem mankun koḇena, ma snonkaku ḇesesya kako.​—Pengkhotbah 11:9, 10.

16. Moḇsa Yahwe myam sisasyar kapira ro snekapar sena?

¹⁶ Yahwe ḇyesyowi kaku kenem ro snonkaku syakam. Kapira ḇeḇeaḇen ḇaim kako. Ro Sasoser Moses, rofyor oso ifawi ḇa boi ifnai fa bin ḇefadores oso ḇyepar ma ifnai fa bin ani ḇaido kapira ḇyedi imar ido, nari Yahwe myam snonkaku ani syasar kukro myamun kwar. Parenta ya iso kankenem ḇyedi fyadwer kankenem ro snonkaku myun ani kukro imar kwar. (Wasya Keluaran 21:22, 23.) Allah myam kapira ro snekapar dori ima snonkaku kako dirya. Inja, moḇsa Allah myam kapira ro snekapar rofyor sisasyar si? Moḇsa Allah myam kapira riyuta sya, sikapar si ḇaim ḇo smun si ro taun ḇe taun?

17. Rosai na ḇeḇuk sneprei faro bin oso ḇesasyar kapira ro snekapar ḇyedi kwar rofyor ifawi Yahwe ḇaim?

 ¹⁷ Mboi, bin oso myun kapira ro snekapar ḇyedi rofyor ifawi Yahwe ḇaim ido, na rariso? Ikyar kaku Yahwe ḇyuk ampun ḇe i kwar roro farsarser Yesus marmar ḇyedi. (Lukas 5:32; Efesus 1:7) Bin ḇefrur sasar ḇeradine, ḇyuk sasar ker ḇe mankundi awer rofyor imbror kaku kwar. ”Yahwe ima isawarwar ma sneri imyaren asuser . . . Raris swaf ro oridek isof ro orisyun, swaf ya ryariri sasar koḇena isawen na ḇinkwanbur ko.”​—Mazmur 103:8-14.

18. Rosai ḇefnai fa kokam fandun fa kosawen ayayin ro kosnesna?

¹⁸ Fandun fa syowi koḇena faro kenem ro Allah, nsasyar ro kosnesna dona. Ine kyur kako ḇe moḇ kokara min koḇesi. Manwawan Yohanes fyas, ”Mansei ḇeayin naek ḇyedi, ikada snon mamun.” (1 Yohanes 3:15) Kofafayaf faro snonkaku ḇesesya kwar ido, nari nafnai fa muniwara kayin i. Ayayin nafrur fa snonkaku oso ḇyesyowi snonkaku ḇesesya ḇa, danonef i, ḇaido imarisen snonkaku ani imar. Yahwe fyawi rosai kokara faro snonkaku ḇesesya. (Imamat 19:16; Ulangan 19:18-21; Matius 5:22) Kayin snonkaku oso ido, kosewar kaku fa kosawenbur kakara ḇeradine ro swaruser koḇena.​—Yakobus 1:14, 15; 4:1-3.

19. Moḇsa kona mamam raris moḇ Yahwe myam mamamun na rai?

¹⁹ Nyan ḇese naisya wer fa kofasnai syowi koḇena faro kenem ine. Kofarkor ro Mazmur 11:5 snar Yahwe ima dayin mansei monda ḇemarisen faro mamun na. Inja, kokinfir hiburan ḇeser mamun ido,  ine nfasnai komarisen faro mamamun na. Rosai na kosmai rofyor koser kakara koḇena kuker wos rarmomen ma sonin ḇeser mamun na? Ipyum ya, komarisen koser kakara koḇena kuker roi ḇeḇuk payamyum ma ḇesren.​—Wasya Filipi 4:8, 9.

20-22. (a) Moḇsa Yahwe myam Ibiris dunya ḇyedine rai? (b) Rariso Allah kawasa Ḇyesi sfasnai saksowarpu ro dunya ine ḇa?

²⁰ Ibiris dunya ḇyedine dakḇesyowi kenem ine ḇa, ma Yahwe myam dunya ine ḇyenyaki rik, ḇaido syasar kukro myamun. Ro swaf taun risyaran kwar, papoik ro polotik nafnai fa snonkaku riyuta simar, Yahwe manfamyan Ḇyesi sibor kako sakmar. Refo ḇyair papoik ine, ḇaido pamarenta sya simnis ra aiwan ḇeyan ḇepek. (Daniel 8:3, 4, 20-22; Fasasna 13:1, 2, 7, 8) Baboine, sḇoḇ romamun ma sia skowes ker na. Sna pipi nabor kukro sḇoḇ romamun ḇefnai marmar. Nane nfasnai kaku, ’supswan ḇesiper ine isya ro papoik Ibiris’.​—1 Yohanes 5:19.

²¹ Snonkaku Kristen ḇekaku sima saksowarpu ro dunya ine ḇa. Sima siwaira faro oso ḇa ro fararur polotik ma mamun na ḇa. Simewer smamunri, naiso eḇedari saksowarpu ḇa ro organisasi ḇemun snonkaku sya. (Yohanes 15:19; 17:16) Rofyor sewayam snonkaku Kristen sya, sakfrur rarirya faro si ḇa. Isyadi wer, Yesus fyarkor ko fa koswar mbroḇ koḇesi.​—Matius 5:44; Roma 12:17-21.

²² Agama na kako nafnai fa snonkaku riyuta sya simar. Refo dap Babel Ḇeba ḇe raryur ro agama ḇekaku  ḇa ro supswan ine ḇesiper. ”Ro mnu ani sisma kwar nabisya rik sena, kawasa Allah ḇyesi rik sena ma kawasa ḇeḇor rik sena smun ro supna.” Inja, kofawi kaku roi ḇefnai fa Yahwe iwan ko insama ’kosasyar’ ro na ke? Snonkaku ḇesyom faro Yahwe I sya nari sisasyar ro agama ḇekaku ḇa.​—Fasasna 17:6; 18:2, 4, 24.

23. Rosai na kofrur insama ’kosasyar’ ro Babel Ḇeba ya?

²³ ’Kosasyar’ ro Babel Ḇeba nama kofasnaibos kaku kaksowarpu awer ro agama ḇekaku ḇa rosai monda. Rupa ra, komamuser insama snonsnon koḇena sipyos na ro agama ḇekaku ḇa randak kakso kwar na. Mboi, roi anna monda nasrow ḇaim. Fandun kako fa kayin ma kopampum fararur ḇeḇyeḇa ḇero agama ḇekaku ḇa na kako. Agama ḇekaku ḇa imarisen ma ḇyemanmin fararur farḇuk, polotik, ma faḇri mankun. (Wasya Mazmur 97:10; Fasasna 18:7, 9, 11-17) Roi nane nafnai fa snonkaku riyuta sya simar.

24, 25. Rosai ḇefnai fa kofawi Yahwe I kwar, nane nbuk payamyum ma sneuser ḇesren ḇe ko?

²⁴ Fafisu kofawi Yahwe I ḇaim, koisya komarisen faro roi ḇeḇyeḇa ro Ibiris dunya ḇyedine. Mboi, ro fafisu ine kofadwer kenem koḇena kwar. Kokyar faro farsarser ro Yesus marmar ḇyedi ma koḇuk kenem koḇena fa kofrur Allah marisen Ḇyena. Komam Yahwe mankundi ḇyuk sneprei ḇe ko. Kosmai payamyum ma kona sneuser ḇesren kukro kofawi kofrur fa Allah imarisen.​—Farfyar 3:19; Yesaya 1:18.

²⁵ Ḇepon iwara, kaksowarpu kwar ro organisasi ḇesyowi kenem ine ḇa ido, kokyar Yahwe ḇyuk ampun ḇe ko kwar roro farsarser fasaspar Yesus marmar  ḇyedi. Koḇesyowi kaku roi ḇepyum ḇerama ro Yahwe I, isoine kankenem ya. Kofasnai roi nane kuker kofrur roi ḇepyum fa kofnoḇek snonkaku ḇesesya fa sakfawi Yahwe I, sibur Ibiris dunya ḇyedine, ma sḇebati kuker Allah.​—2 Korintus 6:1, 2.

26-28. (a) Fararur ḇepyum rosai Yahwe ḇyuk ḇe Yehezkiel i? (b) Fararur rosai Yahwe dor fa kofrur ro fafisu ine?

²⁶ Ro Israel fafisu naiwara, Yahwe ikofenḇair ḇe Nabi Yehezkiel i fa ḇyuk swarapepen faro kawasa sya snar kero monda nari kyakok Yerusalem ma fyarkor si rosai fandun fa sifrur fasaw insama siḇye. Ḇyuk swarapepen faro si ḇa ḇo simar ido, nari Yahwe dor fa kyamar fadwer kenem sena. (Yehezkiel 33:7-9) Yehezkiel ḇyesyowi kenem ine, inja syewar kaku fa ifrur roi nakam insama ḇyaryas anun swarapepen ani.

²⁷ Yahwe ḇyuk fararur ḇe ko kako fa koḇuk swarapepen faro kawasa sya snar Ibiris dunya ḇyedine kero wer Yahwe kyakok na, ma fandun fa kofnoḇek si fa sakfawi Yahwe I insama saksun ro dunya babo ya. (Yesaya 61:2; Matius 24:14) Komarisen kokofenḇair anun swarapepen ani. Raris Paulus i, komarisen kokofen, ”Aya ine yasren, yaḇe sasarḇa faro mansei ryawer nari ḇero ya. Snar yamyaren kaku yaḇaryas Allah marisen ḇyena kam faro mko.”​—Farfyar 20:26, 27.

²⁸ Oso wer ido, fandun fa kosren ro roi ḇesena wer ro kenem koḇena. Rwama kawos roi ine ro farkarkor ḇerama ine.