1. Rosai fandun fa komam pyum insama Yahwe imarisen faro ḇaḇeari koḇena, ma rosai ḇefnai ya?

 YESUS ikofen ḇo doḇe, ”Snonkaku ḇesyom kaku sya nari sisyom Mami kuker farkankin rur ḇesren ma imnis kuker kakaku, snar Mami syewar snonkaku ḇemarisen ḇesyom I kuker nyan ḇerarirya ḇae.” (Yohanes 4:23; 6:44, Terjemahan Dunia Baru [NW]) Snonkaku oser-oser fandun fa sḇesewar insama sifawi roi ḇefrur fa Allah imarisen. (Efesus 5:10) Inema roi ḇepyan ḇa kukro Setan imarisen ifrowes ko fa kofrur roi Yahwe imewer na.​—Fasasna 12:9.

2. Fasnaiḇair rosai ḇeḇejadi ro Bon Sinai.

² Moḇsa Setan ifrowes ko rai? Nyan oser iso ifrur ko fa kokmom koḇe kokinfir roi ḇekaku ma ḇesasar na. Waswarepen roi ḇekur er Israel rofyor sḇarek fanam ro Bon Sinai. Moses dek ḇe bon ya bo, ma er ansya sḇarek siwaf fa isabu kaḇer ḇe moḇ sḇarek ro ya. Mboi, simewer siwaf kawandi, inja sor fa Harun ifrur allah faro si. Harun ifrur ḇeri amfyanir sapi mkun ro brawen faro si. Mura, kawasa ansi sifrur munara festa. Sifyer siyar amfyanir ani ma sisyom i. Skara sisyom  amfyanir ani, ima sisyom Yahwe I. Skara sifrur munara ani ḇe ras ḇeba faro Yahwe I, mboi roi sifrur nane sasar nairi. Yahwe myam na ḇe samsyom faro allah ḇekaku ḇa, inja kawasa sibor sya simar. (Keluaran 32:1-6, 10, 28) Farkarkor rosai kun ya? Komarisen awer ḇesesya sankar ko. ”Mkopan awer ro rosai monda ḇemamas na.” Inja, komarisen kofawi roi ḇekaku ma ḇesasar na ido, kofarkor ro Yahwe I.​—Yesaya 52:11; Yehezkiel 44:23; Galatia 5:9.

3, 4. Rosai ḇefnai fandun fa kofawi ras ḇeba ḇebor sifrur ro baboine moḇ ndramuma ya?

³ Rofyor Yesus ryo supswan ine, fyarkor manwawan ḇyesya fa sfasnai rari ḇepyum ro samsyom ḇesren na. Fafisu imar kwar mura, manwawan sya sfarkor Yahwe wos Ḇyena faro manfamyan ḇebabo sya wer. Mboi, manwawan sya simar mura, guru-guru ḇekaku ḇa sḇuk farkarkor ḇekaku ḇa warpu adat sena ma ras ḇeba sena fa nsun ḇe sidang yadori. Ma sḇuk snonsnon faro ras ḇeba ani insama rya isnai ḇe Kristen. (2 Tesalonika 2:7, 10; 2 Yohanes 6, 7) Baboine, sia sifrur kaker ras ḇeba ḇerarirya, fama naser farkarkor ḇekaku ḇa ma nefasfes kuker rur ḇeḇarḇor sya. *—Fasasna 18:2-4, 23.

⁴ Ro supswan ine ḇesiper, snonkaku sya smam ras ḇeba na ḇe roi ḇefandun. Mboi, kofarkor fa kofawi pyum Yahwe kakara Ḇyena kwar, inja fandun fa kofadwer pyum mamam koḇena faro ras ḇeba oso. Imbude napyan ḇa, mboi kokyar Yahwe na ifnoḇek  ko. Kofarkor fa kofawi ras ḇeba ḇeḇeso moḇ ndramuma ya resari, insama kofawi pyum moḇsa Yahwe myam na rai.

5. Rosai ḇefasnai kaku snar Yesus kaparpar ḇyeja ryo tanggal 25 Desember ya ḇa?

⁵ Ro sup ḇebor, snonkaku sya sifrur ras ḇeba Natal ro tanggal 25 Desember kukro skara Yesus snari kyapar i ro tanggal ani. Refo dapḇair tanggal ḇaido paik ro Yesus kaparpar ḇyeja ḇa. Mboi, Refo ikofenḇair fafisu ani moḇ isnai rai. Lukas fyas ḇo doḇe rofyor Yesus snari kyapar i ro Betlehem, ”manfarandows ono sisya skain siwaren rofanfan sesi ro maper ro roḇ ani”. (Lukas 2:8-11) Ro Betlehem, paik Desember yama sup ya ipnunek, imyun ker, ma salju na nasabu. Moḇ ine ryarirya ido, na manfarandows sya srir domba sesya ma siwaren ro ḇandi ro roḇ na ḇa. Inja, Yesus kaparpar ḇyeja ryo paik Desember ḇa, mboi ro paik fafisu sup ya ipnunek mankun ḇa. Refo ma fasfas ro sarisa nfasnaiḇair snar Yesus kaparpar ḇyeja ryo paik September ḇaido Oktober.

6, 7. (a) Ras ḇeba Natal ryamuma ro? (b) Rosai ḇefnai fa komarisen koḇuk ḇe ḇesesya?

⁶ Inja, ras Natal ryamuma ro? Ryamuma ro munara-munara agama ḇekaku ḇa, rupa ra munara Saturnalia ḇeraker snonkaku Romawi, sifrur na faro dewa pertanian ḇenir ḇe Saturnus. The Encyclopedia Americana doḇe, ”Snonkaku Romawi sifrur ras ḇeba Saturnalia ine ro paik Desember faduri. Roi ḇebor sifrur ro ras Natal ryamuma ro dine. Rupa ra, sifrur  anan ḇeba, sḇuk kado, ma spam lilin.” Oso wer ido, tanggal 25 Desember ima ras ḇaḇeaḇen ro snonkaku Persia dewa ori sedi, isoine sor ḇe Mitra.

⁷ Fama, snonkaku ḇebor ḇefrur Natal sya simewer skara ras ine moḇ ryamuma ya. Sifrur Natal monda kukro simarisen siryur kayam warpu kina sesya, san roḇean ḇeyankir, ma sḇuk kado. Ko kako koswar kina ma bati koḇesya, ma Yahwe imarisen insama kawasa Ḇyesi sḇuk rosai sna ḇe ḇesesya. Ro  2 Korintus 9:7 doḇe, ’Allah iswar snonkaku ḇeḇuk kuker marisen.’ Inja, Yahwe imewer koḇuk roi ḇepyum ro fafisu oso monda. Yahwe kawasa Ḇyesi simarisen sḇuk roi ḇepyum ma siryur kayam warpu bati ma kina sesya ro fafisu risai monda, mboi sor kaḇer roi oso ḇa. Sima simarisen sḇuk kukro siswaryae si.​—Lukas 14:12-14.

8. Ḇefawinanem mak sya sḇuk roi ḇepyum ḇe Yesus i rofyor ḇyeḇeaḇen babo ke? Fasnaiḇair na.

⁸ Sibor soḇe snon ḇefawinanem mak sya sun roi ḇepyum ḇe Yesus ḇeḇeaḇen babo ro padwar ani, inja siso nyan ine fa sakḇuk kado ro ras Natal. Kakuḇae, snon riḇeso sia srama smamfar Yesus i fa sḇuk roi ḇepyum ḇe i. Ro awar Refo naiwara, ine iso moḇ sifrur ker faro ḇena nasan sya. (1 Raja 10:1, 2, 10, 13) Mboi, Refo doḇe snonkaku ansine sima ḇefawinanem mak, isoine snonkaku ḇena robor ma sisyom Yahwe I ḇa. Oso wer ido, rofyor srama nanya, Yesus snari kyapar babo i ro padwar ḇa, mboi ḇye ’romawa’ kwar ḇo skoḇarek ro rum kwar.​—Matius 2:1, 2, 11.

9. Refo isya dapḇair ras ulang taun ro mansei?

⁹ Rofyor kapira oso ḇyeḇeaḇen, ima ras ḇeyun marisen kaku. (Mazmur 127:3) Mboi, nfasnai fandun fa kofrur ulang taun ḇa. Kwarapan: Refo dapḇair ras ulang taun risuru monda, iso ulang taun ro Firaun ḇeraker Masir ma ulang taun ro Raja Herodes Antipas i. (Wasya Kejadian 40:20-22; Markus 6:21-29.) Snonkaku risuru suine suma susyom Yahwe I  ḇa. Mboi, Refo fyas ḇaḇeri snonkaku ḇesyom Yahwe I sya sifrur ras ulang taun.

10. Moḇsa snonkaku Kristen ro abad randak siwara smam ras ulang taun ya?

¹⁰ The World Book Encyclopedia ikofen, snonkaku Kristen ro abad randak sya ”smam ras ulang taun ḇe fararur kafir”. Nane neknam ro farkarkor ḇekaku ḇa. Imnis ra, snonkaku Yunani ro fafisu naiwara sikyar rofyor snonkaku oso ḇyeḇeaḇen, rur oso isya kyadaunwarek i. Ma, sikyar rur ine nya wis kuker dewa ḇeḇeaḇen ro tanggal ani. Inja, soḇe fandun fa sifrur ras ulang taun insama kyadaunwarek i isof fyoro. Oso wer ido, ras ulang taun ḇyewis kuker ḇeyapnanem mak sya.

11. Moḇsa Yahwe imarisen kofasnai syowi rai?

¹¹ Snonkaku ḇebor soḇe ras ulang taun sena ima ras ḇepyum kaku, ma fandun fa sesyowi ma siswar si ro ras ani. Inja, kofasnai koswar kina ma bati koḇesya ro ras oso monda ḇa, mboi ro fafisu risai monda. Yahwe imarisen insama kofrur pyum ma kofasnai syowi ro ras nakam. (Wasya Farfyar 20:35.) Oso wer ido, kokofen kasumasa ḇe Yahwe I faro kankenem ḇyuk ro ras ḇe ras, imbape ro tanggal koḇeaḇen ya monda ḇa.​—Mazmur 8:3, 4; 36:9.

12. Rosai ḇefnai fa ras marmar ya ipyum syadi ro ras ḇaḇeaḇen ya?

¹² Pengkhotbah 7:1 doḇe, ”Snonsnon ḇepyum ipyum syadi ro mani ḇepyum, ma ras marmar ya ipyum syadi ro ras ḇaḇeaḇen ya.” Rosai ḇefnai fa ras marmar ya ipyum syadi ro ras ḇaḇeaḇen ya? Rofyor koḇeaḇen, kofrur roi ḇepyum ma ḇepyum ḇa na ḇaim. Mboi, rofyor koḇuk kenem koḇena  fa kofarmyan ḇe Yahwe I ma kofrur roi ḇepyum, ima kofrur ”snonsnon ḇepyum”, ma komar ido nari Yahwe iswarepen ko. (Ayub 14:14, 15) Yahwe kawasa Ḇyesi sifrur ras ulang taun sena ḇa ma Yesus ras ulang taun ḇyedi ḇa kako. Mboi, ras oser Yesus iwan fa koswarepen na iso Swarapepen marmar ḇyedi.​—Lukas 22:17-20; Ibrani 1:3, 4.

13, 14. Ras ḇeba Paskah nya fasfes kuker rosai?

¹³ Snonkaku ḇebor ḇefrur ras ḇeba Paskah, skara ima sifrur Yesus kaḇakḇok ḇyedi. Mboi, ras ḇeba Paskah nya fasfes kwar kuker Eostre, isoine snonkaku Anglo-Saxon sya dewi fajar ma dewi musim semi seja. The Dictionary of Mythology kako doḇe Eostre ine iso dewi kesuburan. Rari Paskah ḇeḇeso nefasfes kuker roi ḇesur pyum. Imnis ra, Encyclopædia Britannica doḇe, pnor ”iso kakopḇair faro kankenem ḇebabo ma kaḇakḇok”. Ma, kawan kwar sḇuk kelinci ḇe kakopḇair faro roi ḇesur pyum ro snonkaku kafir sya ḇaḇeari sena. Inja, Paskah nya fasfes kuker Yesus kaḇakḇok ḇyedi ḇaḇeri.

¹⁴ Yahwe imarisen fa myam snonkaku sya sun fararur ro agama ḇekaku ḇa fa sḇukifrur kaḇakḇok ro Roma Ḇyedi ke? Na oroḇa ḇeri. (2 Korintus 6:17, 18) Imbape, Yahwe iwan fa kofrur Yesus kaḇakḇok ḇyedi ḇaḇeri.

15. Ras ḇeba Halloween ryamuma ro?

¹⁵ Halloween nya wis kuker ḇena fui, faknik ḇemamun, ma manwen sya. Inema ras ḇeba ḇebabo risyaḇa. Fyor paik ya isnai kaku ḇo fanam ḇe tanggal 1 November kwar, snonkaku Kelt ro Inggris ma Irlandia ḇero fafisu naiwara sifrur ras ḇeba Samhain. Sikyar sifrur na ido, na rur ro snonkaku ḇemar sya skaḇer ḇe supswan ine. Kawasa sya srir roḇean ma aninem insama rur-rur ansya sikyaren si ḇa.  Baboine, romawa sya sisansun si ma sra ro rum ḇe rum fa sor gula-gula ḇaido coklat. Ḇena rum ḇyuk ḇe si ḇa ido, nari rur ansya sikyaren i. Inja, kawasa sine sifawi ḇa ḇo, sisya siso fararur ḇero fafisu naiwara ḇena wis kuker rur ḇeḇarḇor sya kwar.

16, 17. Koḇe kofarḇuk ido, rosai fandun fa kokara ḇepon resari?

¹⁶ Ras farḇakḇuk naser marasrisen. Snonkaku sya sifrur ras farḇakḇuk sena naḇesisye ro supswan ine ḇesiper. Komam kada, sia simewer skara adat ro ras farḇakḇuk oso ryamuma royo. Inja, imbude sifawi ḇa ḇo roi sifrur ono ndramuma ro farkarkor ḇekaku ḇa. Mboi, imbeswa Kristen ḇefrur aw faro farḇakḇuk suḇena fandun fa sumam pyum snar Yahwe imarisen na ke roḇa. Susewar fa sufawi adat anna moḇ ryama ya kada, nari sufrur wos snemuk ḇepyum.​—Markus 10:6-9.

¹⁷ Sino sikyar snar adat ḇeḇeso ro farḇakḇuk, nari nun roi ḇepyum faro siswasi. (Yesaya 65:11) Rupa ra, ro moḇ ḇeḇeso snonkaku sya sisawen fas ḇepek ḇaido roiebor ḇesena ḇe imbeswa ḇefarḇuk babo. Sikyar roi sifrur nane na nafnoḇek su fa suna romawa, susmai marasrisen, ma sukenem kawan kuker susmai fadadiren ro rur ḇeḇarḇor. Mboi, snonkaku Kristen sima sḇinkwanbur adat risai monda ḇena wis kuker agama ḇekaku ḇa.​—Wasya 2 Korintus 6:14-18.

18. Wos farkin risai kwara pyum na rofyor imbe wakfarḇuk?

¹⁸ Imbeswa Kristen na sumarisen fa ras farḇakḇuk suḇena naser marisen, napyum, ma ḇerama sya sakmarisen.  Inja, ḇerama ro ras farḇakḇuk sya sikofen awer roi ḇepyum ḇa, wos fanfadak, ḇaido syowi ḇa faro ḇefarḇuk suya ma snonkaku ḇesesya. (Amsal 26:18, 19; Lukas 6:31; 10:27) Farḇakḇuk Kristen ima dakser ’roi ḇeḇor insa ssḇuki darer mankunsi’ ḇa. (1 Yohanes 2:16) Inja, kwara fa imbe wakfarḇuk ido, fasos roi nakam insama na waswarepen kaḇer na ḇe roi ḇepyum.​—Mam Fasfas Ḇepupes 28.

19, 20. Fararur tos ryamuma ro?

¹⁹ Roi oso komam sifrur kako ro munara farḇakḇuk ma munara ḇesena iso tos. Rofyor snonkaku oso kyanow gelas ḇyedi, na ikofen rosai imarisen na, mura ḇesesya sakso fa skanow gelas sena. Moḇsa snonkaku Kristen smam roi ine rai?

²⁰ Ro International Handbook on Alcohol and Culture, doḇe tos ine ryamuma ro adat kafir ḇero fyor iwara, iso ”sḇuk aninem ḇesren faro dewa . . . sfadwer fararyor na ḇe nadi ḇeknampu raris wos ’na wakenem kawane!’ ḇaido ’waprei ḇesya kwar!’” Ro fafisu naiwara, snonkaku skanow gelas sena ḇe bo fa sor barakas ro dewa sya. Mboi, Yahwe ima ḇyuk barakas kuker nyan ḇeradirya ḇa.​—Yohanes 14:6; 16:23.

21. Ras ḇeba ḇerariso fandun fa snonkaku Kristen sḇinkwanbur na?

²¹ Koḇe koso ras ḇeba oso ke roḇa, fandun fa kokara ḇepon roi sifrur ro ras ḇeba ani. Rupa ra, ras ḇeba ma munara yakyaker riḇeso naser fayaryer  ḇefrur nafsu, masaser, ma sifrur farḇuk na. Ras ḇeba riḇeso kako nfasnai kenem ro snon ḇefrur farḇuk kuker snon ma bin kuker bin, ḇaido sisandik sup sena. Inja, koso ro ras ḇeba ḇeradine ido, kofasnai kayin rosai Yahwe dayin na ke?​—Mazmur 1:1, 2; 97:10; 119:37.

22. Snonkaku Kristen sya imbe siso ras ḇeba ido, rosai skara ḇepon resari?

²² Snonkaku Kristen fandun fa sisasor pyum si ma sḇinkwanbur ras ḇeba rosai monda ḇesyowi Allah ḇa. Manwawan Paulus fyas ḇo doḇe, ”Mkanan roḇa mkinem mkofrur nakam fa mkoksandik Allah.” (1 Korintus 10:31; mam Fasfas Ḇepupes 29.) Ras ḇeba nakam ḇa ḇefasnai fararur farḇuk, agama ḇekaku ḇa, ḇaido sisandik sup sena. Komam ḇo ras ḇeba oso nsasar ḇa ido, mankunko iso ḇeyun snemuk imbe koso na ke roḇa. Fandun fa kokara kako roi kofrur na nawyae snonkaku ḇesesya.

23, 24. Moḇsa na kokofenḇair roi ḇefnai fa komewer koso ro ras ḇeba oso ḇe kina koḇedi ḇe Saksi ḇa?

²³ Imbude koso wer ḇa kwar ro ras ḇeba ḇesandik Yahwe I ḇa. Ine nafnai fa kina koḇedi ḇe Saksi Yahwe ḇa sino skara komewer si ḇaido komewer koryur kayam warpu si wer. Imbude skara ras ḇeba ḇeradirya iso swaf ḇesrow fa siryur kuker kondi. Inja, rosai nari kofrur ya? Na kosewar kaku fa kofasnai koma koswar si ma sfandun faro ko. (Amsal 11:25;  Pengkhotbah 3:12, 13) Ro ras ḇesena insape kor si fa koryur kayamyam.

²⁴ Rofyor kina koḇansi imbe sakfawi roi ḇefnai fa koso wer ḇa ro ras ḇeba oso ido, komarisen kokofenḇair na yoḇ si kuker komam anun ḇero syap koḇena ma ro jw.org. Kofasnai awer koḇe kofamfaḇri kuker si ḇaido kodif si fa siso marisen koḇena. Kofnoḇek si fa sifawi kaku koma kokara pyum roi ḇebor na kwar ma inema snemuk mankun koḇenairi. Fandun fa kokḇaḇ pdef, ma ’kawawos kuker saswar, ma wos koḇena mbuar awer’.​—Kolose 4:6.

25, 26. Moḇsa sinan sya na sifnoḇek romawa sesya fa siswar Yahwe wos farkin Ḇyena rai?

²⁵ Fandun fa kokam kofawi pyum roi ḇefnai fa komewer koso ro ras ḇeba oso. (Ibrani 5:14) Komarisen kofrur fa Yahwe imarisen. Ma sinan siko ido, fandun fa koḇuk swaf fa kofnoḇek romawa koḇesi insama sifawi pyum kaku ma siswar wos farkin ro Refo ya. Siswar Yahwe I kwar ido, nari simarisen kako sifrur fa imarisen.​—Yesaya 48:17, 18; 1 Petrus 3:15.

²⁶ Yahwe imarisen myam kofrur roi nakam fa kosyom I kuker nyan ḇesren ma ḇekaku. (Yohanes 4:23) Mboi, sibor sisya skara ḇo soḇe ro dunya ḇefo ankarkar ine, na snonkaku oso ifrur roi ḇekaku, ḇaido dawos roi ḇekaku pdef ḇa. Kakara ḇeradine nkaku ke? Nari kawos roi ine ro farkarkor ḇerama ya.