1, 2. Rosai ḇefnai fa waswar Yahwe I?

 WASWAR Sinan I ke? Imbude waswar kaku I, indiriso wamarisen buk kenem Bedi faro I. Rarirya, kwara ima Bati ḇepyum Bediri. Imboi, waswar Yahwe I ḇaim, iso ḇeswar ḇepon Au. Refo ya doḇe, ”Kosaswar snar Allah iswar syadi ko ḇepon kwar.”​—1 Yohanes 4:19.

² Kwarapan moḇsa Yahwe fyasnai saswar Ḇyena kam faro ko kwar. Ḇyuk supswan ḇepyum ine ḇe moḇ fa koḇarek ro na, ma fyasos roi kofandun ro kenem koḇena. (Matius 5:43-48; Fasasna 4:11) Imarisen fa koḇebati kuker I. Inja, ḇyuk Refo insama kofarkor fa kofawi I. Kowasya Refo ido, koisya korower Yahwe dawose. Rofyor koḇenadi, isya ryower nadi koḇena. (Mazmur 65:2) Ḇyuk rur ḇesren ḇesambraḇ kaku Ḇyedi fa fyarkin ma syambraḇser ko. (Lukas 11:13) Ḇepyum syadi wer iso, iwan Roma iswar kaku fa imarwarek ko insama komkei ro sasar ma marmar ya.​—Wasya Yohanes 3:16; Roma 5:8.

3. Rosai na kofrur insama wis koḇena kuker Yahwe I nsambraḇ pdef?

 ³ Kwarapan Ausya nwa bati ḇefrur pyum oso. Bati Banine imarisen ifnoḇek Au rofyor kenem Bedi ḇyero payamyum monda ḇa, mboi rofyor wasmai samswen kako. Wamarisen nwa bati ḇeradine ido, swewar kaku fa mamwarek wis muḇena fa nsambraḇ pdef kada. Wis koḇena kuker Yahwe I rupa radiri. Imarisen ḇyebati kuker ko isof fyoro-fyoro. Naiso ḇefnai fa Refo ya ikofen ḇo doḇe, ”Mkokenem ḇesya kwar ro fadadiren Allah saswar ḇyedi.” (Yudas 21) Moḇsa koso wos ine rai? Refo ya doḇe, ”Koswar Allah iso kofrur parenta Ḇyena. Rarirya mboi, parenta-parenta Ḇyena nmarḇak maro ko ḇa.”​—1 Yohanes 5:3, NW.

4, 5. (a) Moḇsa koswar Allah rai? (b) Rosai ḇefnai fa insape wakswar Yahwe I?

⁴ Moḇsa koswar Allah rai? Koswar Allah iso kowaf Allah iswar ko ḇa, mboi kosewar ḇepon fa koswar I. Waswarepen kaker fafisu risai insape waswar randak Yahwe I?

⁵ Waswarepen moḇsa ḇaḇir rai, fafisu insape randak kaku wafawi Yahwe ima imarisen fa wakenem fyoro ro dunya babo ya. Wafawi roi ifrur nakam na nefromo ḇa. Wafawi Yahwe imarisen ḇyuk Roma Ḇyedi ḇe supswan ine fa imarwarek ko. (Matius 20:28; Yohanes 8:29; Roma 5:12, 18) Ro fafisu anya, insape wafawi Yahwe ima iswar Au, iso eḇedari wakswar I.​—Wasya 1 Yohanes 4:9, 10.

6. Koswar snonkaku oso ido, rosai nari kofruri? Koswar Sinan ido, rosai nari kofruri?

 ⁶ Mboi, saswar koḇena faro Sinan I, ima insape randak monda. Rupa ra koswar snonkaku oso ido, nari kawos radine monda ḇa, ”Yaswar au.” Imbape, nari kofrur roi imarisen na. Rupa radiri, koswar Yahwe ido, na komarisen kokenem raris rosai imarisen na. Rofyor saswar koḇena nasur kwar, komarisen koḇuk kenem koḇena faro I ma koḇebaptis. Kofrur rarirya kada, nama nfasnai koḇeasas kwar fa kofarmyan ḇe Yahwe I isof fyoro-fyoro. (Wasya Roma 14:7, 8.) Moḇsa na kokenem raris asas koḇena rai?

7. (a) Koswar Yahwe ido, rosai nari kofruri? (b) Roi riḇeso rosai imewer fa kofrur na?

⁷ Koswar Yahwe indiriso, ”kofrur parenta Ḇyena”. Refo fyasnaiḇair moḇsa kokenem raris Yahwe marisen Ḇyena rai. Rupa ra, imewer kaku fa komasaser, kokarawraw, kankarkar, kofarḇuk ḇaim ḇo kofrur fararur farḇuk, kosyom mansei monda ḇaido rosai monda. Imarisen fa kosyom faro I monda.​—1 Korintus 5:11; 6:18; 10:14; Efesus 4:28; Kolose 3:9.

8, 9. Refo ḇyuk akurfasnai faro roi nakam ro kenem koḇena ḇa, mboi moḇsa na kofawi Yahwe mamam Ḇyena faro roi anna rai? Fasnaiḇair na.

⁸ Insama kofrur fa Yahwe imarisen, inema kofawi parenta ḇaido sasoser Ḇyena monda ḇa. Kukro? Ḇyuk parenta oser-oser ḇa faro roi nakam fa koso na ro kenem koḇena. Inja, moḇsa na kofrur snemuk ḇepyum rai? (Efesus 5:17) Fandun fa komam wos farkin  ro Refo fa fyarkin kenem koḇena. Ine iso nyan ḇepyum fa kofawi Yahwe mamam Ḇyena. Kowasya ker Refo ya kada, na komambir pyum Yahwe I. Ine ifnoḇek ko fa kofawi roi imarisen na ma rosai imewer na.​—Wasya Mazmur 97:10; Amsal 6:16-19; mam Fasfas Ḇepupes 1.

⁹ Imnis ra, moḇsa na kofawi roi komam ro televisi ḇaido Internet napyum ke roḇa? Yahwe ikofenḇairbos na ḇa. Mboi, ḇyuk wos farkin ro Refo insama kofrur snemuk ḇepyum. Baboinema, komam kada felem-felem nabor nfasnai mamamun ma fararur farḇuk na. Refo ya doḇe, Yahwe imewer kaku faro snonkaku ḇemamun, ma ’ḇefrur farḇuk nari ḇyuk samamyai faro si’. (Mazmur 11:5; Ibrani 13:4) Rariso wos farkin Ḇyenane nafnoḇek ko fa kofrur snemuk ḇepyum rai? Kofawi Yahwe imewer faro roi oso ḇaido fararur farḇuk ḇeḇyeḇa na ido, koḇinkwanbur na.

10, 11. Rosai ḇefnai fa kosouser faro Yahwe I?

¹⁰ Rosai ḇefnai fa kosouser faro Yahwe I? Kofrur snemuk ḇesasar ido nari kosmai samamyai ḇaido samswen. Inja, kosouser faro Yahwe I insama roi anna nkur ko ḇa. Mboi, irya monda ḇa. (Galatia 6:7) Imbape, kosouser faro Yahwe I kukro koswar I. Rupa ra roma mkun oso iḇe ifrur fa kmari imarisen, ko kako komarisen kofrur fa Kma koḇedi ro nanki imarisen. Roi ḇepyum kaku iso kofawi Yahwe imarisen faro ko!​—Mazmur 5:12; Amsal 12:2; mam Fasfas Ḇepupes 2.

¹¹ Kosouser faro Yahwe I rofyor komam roi anna  napyan ḇe ko ḇaido snar nyan ḇese oḇa monda ḇa. Na kopok komamfarfir sasoser ma parenta risai monda komarisen fa imbe koso na. (Ulangan 12:32) Imbape, komarisen kosouser Yahwe I ro roi nakam, raris manfasfas Mazmur ḇekofen radine, ”Yamarisen faro parenta Bena, kaku, yaswar na.” (Mazmur 119:47; Roma 6:17) Komarisen komnis ra Nuh i, ifrur Yahwe parenta Ḇyena kam kukro iswar I. Refo doḇe Nuh ”ifrur na imnis kaku radiri”. (Kejadian 6:22) Yahwe ikofen roi nane ḇe Au kako ido, na moḇsa kwara rai?

12. Moḇsa na kofrur fa Yahwe imarisen rai?

¹² Kosouser faro Yahwe ido, moḇsa na ḇyaḇir rai? Refo ya doḇe nari ’imarisen’. (Amsal 11:20; 27:11) Kwarapan kada! Kosouser faro Sinan Ḇefrur supswan farsyos ine ido na imarisen. Idafdif ko ḇa, mboi ḇyuk swaf fa kokinfir ro mankunko. Koḇe kofrur roi ḇekaku oroḇaido roi ḇesasar, ine ryamuma ro ko. Yahwe imarisen kofrur snemuk ḇepyum kukro koswar I. Rarirya, nari kosmai payamyum ro kenem koḇena.​—Ulangan 30:15, 16, 19, 20; mam Fasfas Ḇepupes 3.

13, 14. Rosai ḇefnai fa Allah parenta Ḇyena nsamswen kaku maro ko ḇa? Buk wos sarḇer.

¹³ Kokara Yahwe parenta Ḇyena nadwarek marisen koḇena ḇaido samswen kaku fa koso na ido, na rariso? Refo ya fyasnaibos ḇo doḇe, ”Parenta-parenta Ḇyena nmarḇak maro ko ḇa.” (1 Yohanes 5:3, NW) Wos Yunani faro wos ”nmarḇak” kyur ḇe ”samswen”.  Ro mnuk ḇesena, sfasnai wos ine ḇe sasoser ḇemnis ḇa ḇaido snonkaku ḇesewar nyan fa ifrur marisen ḇyena ḇe snonkaku ḇese, ma ifrur samswen snonkaku ḇese. (Matius 23:4; Farfyar ro Manwawansya 20:29, 30) Yahwe parenta Ḇyena ”nmarḇak maro ko ḇa”, ḇaido nsamswen kaku maro ko ḇa. Roi iwan fa kofrur nakam, kosambraḇ fa kofrur na.

¹⁴ Rupa radine, kwarapan Ausya wafnoḇek bati Bani fa dun robor ḇyena ḇe rum ḇebabo ḇyeja. Fyasos robor ḇyena kam kwar. Ono nmanan, mboi ono na swambraḇ fa kwanow na ro mankundaw ḇa kukro nmarḇak kaku. Na bati Bani dor Au fa kwanow na ro mankundaw ke? Na roḇa! Kukro? Imewer ḇepardi. Rupa ra bati ani, Yahwe imewer dor ko fa kofrur roi ḇesamswen kaku na. (Ulangan 30:11-14) Yahwe fyawi samambraḇ koḇena. Ima ”ifawi pyum moḇsa ifrur ko ndraya, iswarepen snar koinema saprop siko”.​—Mazmur 103:14.

15. Rosai ḇefnai fa kokyar Yahwe ḇyuk parenta Ḇyena faro payamyum koḇena?

¹⁵ Moses ikofen yoḇ kawasa Israel sya ḇo doḇe Yahwe ḇyuk parenta Ḇyena faro ’payamyum sena isof fyoro’ ma sisouser na ido, nari ’sikenem pdef’. (Ulangan 5:28-33; 6:24) Baboine ryadirya. Rosai Yahwe dor fa kofrur nakam, nari nafrur fa kenem koḇena napyum syadi. (Wasya Yesaya 48:17.) Mami koḇedi, Yahwe I, fyawi roi ḇepyum syadi faro ko. (Roma 11:33) Refo ya doḇe, ”Allah ikada isaswar.” (1 Yohanes 4:8) Ine kyurfasnai rosai ikofen na ma rosai ifrur na, ndramuma ro saswar ya.

16. Koinema konapes ḇa ma kokenem ro dunya ḇeḇarḇor ine, mboi rosai ḇefnai fa kosambraḇ kaker fa kosouser faro Yahwe I?

 ¹⁶ Kosouser faro Allah parenta Ḇyena, nama napyan kam ḇa kukro kokenem kaker ro dunya ḇero Ibiris papoik ḇyena. Dawninyan snonkaku koya fa kofrur roi ḇeḇyeḇa na. (1 Yohanes 5:19) Koisya koḇesewar kako fa kopampum kakara ma sne ḇenapes ḇa koḇena, ḇefnai fa kosouser faro Sinan I ḇa. (Roma 7:21-25) Mboi, koswar Yahwe ido, nari kosambraḇ ḇesya kwar fa kofrur roi ḇekaku. Myam kosewar kaku fa kosouser faro I, ma ḇyuk rur ḇesren ḇesambraḇ kaku Ḇyedi fa ḇyukifnoḇek ko. (1 Samuel 15:22, 23; Farfyar 5:32) Rur ḇesren Ḇyeja ifnoḇek ko fa kona rari-rari ḇepyum insama napyan syadi fa kosouser faro I.​—Galatia 5:22, 23.

17, 18. (a) Rosai nari kofarkor ro syap ine? (b) Rosai nari kofarkor ro farkarkor ḇerama ya?

¹⁷ Ro syap ine, nari kofarkor moḇsa kenem koḇena nafrur fa Yahwe imarisen rai. Nari kofarkor moḇsa koso pyum Yahwe wos farkin ma parenta Ḇyena ro kenem koḇena. Koswarepen Yahwe ima idafdif ko ḇa insama kosouser I. Kosouser faro I kada, nari kenem koḇena napyum syadi ro ras ḇarpon iyama. Mboi ḇefandun syadi ya, kosouser Yahwe ido, nama kofasnai koswar I.​—Mam Fasfas Ḇepupes 4.

¹⁸ Yahwe ḇyuk sneuser ḇe ko insama kofawi roi ḇekaku ma roi ḇesasar na. Kofarkor sneuser koḇena ido, nari nafnoḇek ko fa ”kofrur parenta Ḇyena”. Inja, sneuser ido rosairiri, ma moḇsa kofarkor sneuser koḇena rai? Nari kofarkor roi nane ro farkarkor ḇerama ine.