1-3. (a) Rosai ḇefnai fa awin oso myam kaku insama romawa ḇyedi isren? (b) Rosai ḇefnai fa Yahwe imarisen kawasa Ḇyesi sisren?

 ROMAWA oso iḇe ryaḇe rumfarkor ido, nari snari fyasos pyum i. Myam pyum fa romawa ḇyedi imasi kwar, syansun sansun ḇesren, ma isnai pyum. Snari ifrur roi ine fa romawa ḇyedine idafduf ḇa, ma nari snonkaku ḇesesya sfawi sinan ḇyesuya sufaduru pyum i.

 ² Mami koḇedi, Yahwe I, imarisen fa kosren. (Imamat 11:44, 45) Ifawi kosren ido nari mankunko kosmai payamyum, ma nbuk sanandik faro I.​—Yehezkiel 36:22; wasya 1 Petrus 2:12.

³ Saranden ima rosairirya? Ma, rosai ḇefnai fa kosren ido nari kosmai payamyum ya? Kofawi roi nane insama kosewar fa kosren syadi wer.

4, 5. (a) Rosai ḇefnai fandun fa kosren? (b) Rosai kofarkor ro Yahwe fararur Ḇyena faro moḇ myam saranden ya?

⁴ Yahwe fyarkor ko fa kosren ma kofaduru saranden raris mankundi. (Imamat 11:44, 45) Inja, roi ḇefnai kaku fa komarisen kosren iso snar koso moḇ Allah myam saranden raya.​—Efesus 5:1.

⁵ Roi Yahwe ifrur nakam nfarkor ko moḇsa myam saranden ya rai. Yahwe ifrur supswan ine fa ifararur ro mankundi insama war ma wam na nasren ḇesya kwar. (Yeremia 10:12) Kwarapan, kawasa sya sifrur fa supswan ine isren ḇa ḇesyaḇo, ifrur sren mankundi ḇesya kwar. Imnis ra, Yahwe ifrur aiwan ḇebaḇa mkun, sap ḇe mikroba. Koḇuk mikroskop ya mande, na komam roi nane. Mboi, roi nane bisa fyadwer papus ḇemamur ḇe roi ḇemun ḇa. Nane nafrur fa kokandor kaku. Manfawawi sya sḇuk aiwan ḇebaḇa mkun sine fa sifrur sren supswan ine.​—Roma 1:20.

6, 7. Rariso parenta Yahwe ḇyuk faro kawasa Israel sya nafrur fa kofawi saranden ima roi ḇefandun kaku?

⁶ Parenta Yahwe ḇyuk faro kawasa Israel sya nafrur fa kofawi saranden ima roi ḇefandun kaku. Rupa ra, fandun fa baken sena nasren insama Yahwe imarisen  faro samsyom sena faro I. Ro ras Imam Ḇeba imbe isun fa ḇyuk farsarser, fandun fa imasi rarwan risuru. (Imamat 16:4, 23, 24) Ma, rofyor imam ḇesesya sḇuk farsarser ḇaim, fandun fa sban siḇrasna ma siwesna. (Keluaran 30:17-21; 2 Tawarikh 4:6) Fafisu ono ido, rofyor sisouser parenta faro saranden ya ḇa, nari simar.​—Imamat 15:31; Bilangan 19:17-20.

⁷ Ḇekenem ro baboine ido rariso? Kofawi rosai Yahwe imarisen na ro Sasoser Moses. (Maleakhi 3:6) Parenta ani fyasnaibos snar snonkaku ḇesyom faro Yahwe I sya, fandun fa sisren. Parenta nane neḇefadwer ḇa. Baboine, Yahwe imarisen kaker fa snonkaku ḇesyom faro I sisren.​—Yakobus 1:27.

8. Kosren ro nyan risai monda?

⁸ Yahwe myam saranden ima komamwarek baken, sansun, ma rum koḇena nasren pdef monda ḇa. Saranden ine nkur faro nyan kenem koḇena ḇesiper. Ine nkur kako faro samsyom, kenem, ma kakara koḇena. Inja, nyan kenem koḇena kam nasren kada, Yahwe nari myam kosren.

9, 10. Samsyom ḇesren nfasnai ḇe rosairi?

⁹ Samsyom ḇesren. Kosowarpu awer ro agama ḇekaku ḇa na. Rofyor kawasa Israel sewomen ro Babilon, sḇarek warpu snonkaku ḇeso ro agama ḇekaku ḇa ḇefrur fararur farḇuk ḇeḇyeḇa na. Mboi, Yesaya ikofen ḇepon snar nari skaḇer ḇe Israel ma sifrur samsyom ḇesren ya fa dores kaḇer. Yahwe doḇe, ”Mkosasyar ro diwa, mkopan awer ro rosai monda ḇemamas na! . . . Mkosasyar ro fandu si, mkomamwarek  mko insama mkosren pdef.” Sipok siḇyaren awer samsyom sena kuker farkarkor, adat, ḇaido moḇ agama ḇekaku ḇa sifrur ker ro Babilon na.​—Yesaya 52:11.

¹⁰ Snonkaku Kristen ḇekaku ro baboine sya kako, sḇinkwan ro agama ḇekaku ḇa. (Wasya 1 Korintus 10:21.) Ro supswan ine ḇesiper, adat, roi sifrur ker, ma kakyar ro snonkaku ḇebor ndramuma ro farkarkor agama ḇekaku ḇa. Imnis ra, snonkaku ḇeraker sup ḇebor soḇe rofyor komar kwar, roi oso ro ko isya ikenem kaker. (Pengkhotbah 9:5, 6, 10) Fandun fa snonkaku Kristen sya sḇinkwanbur roi ḇeradine na. Imbude kina koḇesi siwan ko fa kakso marisen sena. Mboi, komarisen Yahwe myam kosren, inja komewer koso marisen sena.​—Farfyar 5:29.

11. Kenem ḇesren nfasnai ḇe rosairi?

¹¹ Kenem ḇesren. Insama Yahwe myam kosren, kofrur awer fararur farḇuk ḇeḇyeḇa ro rosairirya kam. (Wasya Efesus 5:5.) Yahwe iwan ko fa koḇinkwan ro fararur farḇuk ḇeḇyeḇa. Doḇe snonkaku ḇefrur fararur farḇuk ḇeḇyeḇa ma ḇembror ḇa, nari saksmai kankenem ro Allah Karajan Ḇyedi ḇa.​—1 Korintus 6:9, 10, 18; mam Fasfas Ḇepupes 22.

12, 13. Rosai ḇefnai fandun fa kakara koḇena nasren?

¹² Kakara ḇesren. Roi kofrur na ndramuma ro rosai kokara na. (Matius 5:28; 15:18, 19) Kona kakara ḇesren ido, nari kofrur roi ḇesren na. Kakuḇae, koma konapes ḇa. Naiso ḇeḇewari fafisu ono, kona kakara ḇesasar. Rarirya ido, fandun fa kosawen na ḇeri. Oroḇa ido, fawas mura nari kosnesna nasren  ḇa ma imbude na kofrur roi ḇesasar. Mboi, fandun fa koser kakara koḇena fa nafo kuker roi ḇesren na. (Wasya Filipi 4:8.) Rarirya, nari kopampum hiburan ḇeḇyeḇa ḇaido ḇefo mamun na. Kosasor ko kako ro rosai kowasya na, komam na, ma roi kawos na.​—Mazmur 19:8, 9.

¹³ Fandun fa kosren ro samsyom koḇena, kenem koḇena, ma kakara koḇena insama Allah iswar ko ḇesya kwar. Mboi, Yahwe myam roi ḇefandun kako iso komamwarek baken koḇena fa nasren.

14. Rosai ḇefnai fandun kaku fa baken koḇena nasren?

¹⁴ Komamwarek baken ma moḇ koḇarek na fa nasren ido, nari nun payamyum faro mankunko ma snonkaku ḇesesya. Nari komarisen, ma snonkaku ḇesesya kako sakmarisen rofyor srama yoḇ ko. Imboi, roi ḇefnai kaku fa komamwarek ko fa kosren iso snar komarisen kosandik Yahwe I. Kwarapan, komam romawa oso ryadir ker ido, imbude kokara pyum ḇa ro sinan ḇyesuya. Rupa radiri, koradir ma komam pyum baken koḇena ḇa ido, nari snonkaku ḇesesya skara pyum Yahwe I ḇa. Paulus doḇe, ”Nkofrur roi osoḇaḇeri ḇefrur fa snonkakusya sfafayaf. Inja, snonkaku osoḇaḇeri fa kyoryae afuffarmyan nkoḇena. Inja, ro fararur ḇeḇor nkoḇena, nkofasna mboi nkoine Allah manfamyan ḇyesi.”​—2 Korintus 6:3, 4.

15, 16. Rosai na kofrur insama kosren ḇesya kwar?

¹⁵ Baken ma sansun koḇena. Komamwarek baken koḇena fa nasren ḇesya kwar. Rupa ra, komam fa ras nakam komasi. Koḇuk sabun ma war fa koḇan ḇramin  koḇena, ḇepon kaku iso rofyor koḇe kokankun ḇaido kan ḇaim, ma rofyor koraḇe kakus ḇaido kopan ro roi ḇeradir na. Ḇanḇan ḇramin ine rya fyandun mankenem ḇa, mboi kofrur na ido nari roi ḇefnai dafduf nsun ro ko ḇa, ma kokenem kawane. Imboi, kona kakus ḇaido der fa kosawen kapui noḇa ido, kona nyan kaker fa kosewar moḇ ḇesrow fa kokapu ro na insama nafnai dafduf awer. Er Israel sya sakna moḇ fa sisawen war ḇa. Inja, sḇai der fa skapu ḇo sḇayek na kuker saprop ma sra ḇinkwanbur ro snonkaku sya rum sena ma ro war andir na.​—Ulangan 23:12, 13.

¹⁶ Sansun koḇena nasnai kaku, nek faḇye, ḇaido namnis kuker ḇesasyar babo na awer. Mboi,  ḇefandun syadi iso nekaraprap ḇa ma nasren. (Wasya 1 Timotius 2:9, 10.) Komarisen kosandik Yahwe I ḇesya kwar ro moḇ kosansun ko rai.​—Titus 2:10.

17. Rosai ḇefnai fa komarisen komamwarek rum ma moḇ koḇarek na fa nasren pdef?

¹⁷ Rum ma moḇ koḇarek ro na. Ro moḇ risai koḇarek ya, komamwarek rum koḇena fa nasren. Komam pyum oto, motor, speda, ḇaido roi ḇese ḇeradine kam fa nasren pdef. Fandun syadi wer iso rofyor kora koso fananjur ḇaido koḇaryas. Kukro rofyor koḇaryas, kawosḇair kankenem ḇesren ro Firdaus ro supswan ine. (Lukas 23:43; Fasasna 11:18) Inja, rum ma moḇ koḇarek na nasren ido, nane nḇair kofasos ko kwar fa kokenem ro Firdaus isoine moḇ ḇesren.

18. Rosai ḇefnai fandun fa komamwarek moḇ koḇukiari na fa nasren pdef?

¹⁸ Moḇ koḇukiari. Komam saranden ima roi ḇefandun kaku kuker komamwarek moḇ koḇukiari na fa nasren, Balai Karajan, ma moḇ kofrur munara kebaktian na kako. Kawasa ḇerama babo ḇe Balai Karajan, na simarisen kukro moḇ na nasren. Ine nun sanandik faro Yahwe I. Ro sidang, kokam kona swaf fa kofrur sren Balai Karajan ma komamwarek na fa napyum ḇesya kwar.​—2 Tawarikh 34:10.

19. Rosai fandun fa koḇinkwanbur na?

¹⁹ Refo dapḇair ḇa kenem ḇemamas rosai fandun fa koḇinkwanbur na. Mboi, ḇyuk wos farkin ḇe ko fa kofawi kaku moḇsa Yahwe myam roi nane rai. Imewer kokun tabaku ḇaido kinem swan ḇaido kan aryawin ḇemnis ḇa na. Koḇebati kuker Allah mande, nari  kofrur roi nane ḇa. Kukro? Koḇesyowi roi ḇepyum ro Allah isoine kenem ine. Kenem ḇeradine nafrur fa kokenem kawan ḇa, kodafduf, ma nafnai roi ḇemun faro snonkaku ḇero ris koḇedi. Sibor sisewar fa simnai insama sidafduf ḇa. Mboi, Yahwe bati Ḇyesi koine, komarisen komnai ro kenem ḇeradine kukro koswar I. Binkbor oso doḇe, ”Yor fafnoḇek ro Yahwe I ndari, yafadwer kenem ayena ma yamnai ro kenem ḇeḇyeḇa ayena. . . . Yafawi snar mankundaya ido, na yasambraḇ fa yafrur roi nane ḇa.” Rwama kawos wos farkin ro Refo ririm na ḇefnoḇek snonkaku oso fa imnai ro kenem ḇemamas na.

20, 21. Yahwe imarisen fa komkei ro kenem ḇerariso?

²⁰ ”Snar asas ḇeḇor kam neḇefrur maroko kwar. Inja, iḇye kofasren mankun ko ro roi ḇeḇor kam ḇefrur mamas baken ma rur koḇesi. Iḇye komkak faro Allah.” (2 Korintus 7:1) Yahwe imarisen fa komkei ro kenem ḇemamas nari ḇemun kakara ma baken koḇena.

²¹ Roi befnai kaku fa ”kofasren mankun ko ro roi ḇeḇor kam ḇefrur mamas” naisya ro 2 Korintus 6:17, 18. Yahwe doḇe, ”Mkopampam awer beri kuker roi ḇeyarwarem.” Mura ḇyeasas, ”Rarirya nari yana mko. Nari yaḇe Kma faro mko, ma nari mkoḇe romawa maro aya.” Inja, koḇinkwanbur roi nari ḇefnai fa komamas ido, nari Yahwe iswar ko raris kma oso ḇeswar roma ḇyedi.

22-25. Wos farkin ro Refo risai monda ḇefnoḇek ko fa koḇinkwanbur kenem ḇemamas na?

²² ”Waswar [Yahwe], Allah bedi, kuker snembri  ḇesiper ma kuker rur bedi ḇesiper ma kuker karkara bena ḇesiper.” (Matius 22:37) Ine iso parenta ḇefandun syadi. (Matius 22:38) Yahwe nya hak fa ismai saswar ḇesiper koḇena. Mboi, kofrur roi oso ḇefrur fa kokenem kawan ḇa ḇaido ḇefnai fa akuk koḇena namnis ḇa ido, nama koswar I kuker sne ḇesiper ḇa. Imboi, nari kosewar kaku fa koḇesyowi kankenem ḇyuk ḇe ko na.

²³ ”[Yahwe] iso ḇeḇuk kenem ma knaref ma roi ḇeḇor kam faro snonkaku sya.” (Farfyar 17:24, 25) Bati koḇedi ḇyuk roi ḇepyum oso ḇe ko ido, na kosawen na ke kofrur na fa naḇyeḇa? Kenem ine iso roi ḇepyum ḇeramuma ro Yahwe I. Koḇesyowi kaku na. Inja, komarisen koḇuk kenem koḇena fa kosandik I.​—Mazmur 36:9.

²⁴ ”Waswar min besi imnis waswar mankundaw.” (Matius 22:39) Kenem ḇemamas nafnai samswen faro mankunko monda ḇa, mboi snonkaku koswar ḇero ris koḇedi sya kako. Rupa ra, rofyor snonkaku oso ḇyarekus snonkaku ḇekun ker tabaku ido, na daksmai dafduf ḇemarḇak kaku kukro paw ro tabaku anna. Inja, komnai ro kenem ḇemamas nane ido, nama nfasnai koswar min koḇesi.​—1 Yohanes 4:20, 21.

²⁵ ”Buk swarepen faro si insa [sisouser pamarenta sya] ma snonkaku ḇesma papoik.” (Titus 3:1) Ro sup ḇebor sisya sidwarek ḇena ḇaido ḇeḇuk aryawin ḇemnis ḇa na. Yahwe iwan ko fa koḇesyowi pamarenta sya, inja kosouser faro parenta ḇeradine na.​—Roma 13:1.

26. (a) Rosai fandun fa kofrur insama Yahwe imarisen faro samsyom koḇena? (b) Rosai ḇefnai fa kosren ro Allah mamam Ḇyedi ima nyan kenem ḇepyum syadi nairi?

 ²⁶ Komarisen koḇebati kuker Yahwe ido, fandun fa kofadwer roi riḇeso. Kona kenem ḇemnis ḇa kaker ido, komnai ḇeri. Kakuḇae, nanema roi ḇepyan risyaḇa, mboi kopok fa kofrur roi ine! Yahwe ikofen kaku ḇo doḇe nari ifnoḇek ko. Doḇe, ”Aya, Yahwe, iso Allah mkoḇedi, ḇefarkor mko faro payamyum mkoḇena, ḇefarkin mko ro nyan ḇefandun fa mkombran ro na.” (Yesaya 48:17) Kosewar kaku fa kofrur roi ḇepyum syadi insama kosren pdef ido, kokyar kaku nama kosandik Allah koḇedi.