1, 2. (a) Rosai snonkaku ḇefarḇuk babo simarisen na? (b) Fakfuken rosai monda nari kawos ro farkarkor ine?

 KWARAPAN mambeswa imbeswa ḇefarḇuk babo kada, na sumarisen ro ras farḇakḇuk suḇena. Sukara kenem suḇena ro rasras naiwama naser payamyum. Sumarisen fa farḇakḇuk suḇena nakain fyoro ma naser marisen.

² Mboi, sibor ḇefarḇuk sya randak mande farḇakḇuk sena napyum, mboi muniwara namuk ḇo naser fafko. Inja, ḇefarḇuk sya sfandun farkankin ro Allah insama farḇakḇuk sena nakain fyoro ma naser marisen. Rarirya, rwama kawos kankarem ro Refo faro fakfuken nane: Payamyum risai na wasmai ro farḇakḇuk ya? Waḇe wakfarḇuk ido, moḇsa kwinfir pyum mansei nari nwa ḇe swa? Rariso na ḇe swa ḇepyum rai? Ma, rariso insama farḇakḇuk Bena nakain fyoro?​—Wasya Amsal 3:5, 6.

3. Snonkaku oso fyarḇuk kada insape na ismai marisen ke? Fasnaiḇairpan.

³ Sia skara ḇo soḇe snonkaku oso fyarḇuk kada insape na imarisen. Mboi, roi nane nkaku ḇa. Yesus doḇe sia skinfir fa sfarḇuk ḇa ido, napyum kako. (Matius  19:11, 12) Manwawan Paulus dakkofen ḇo doḇe kofarḇuk ḇa rariryano, payamyum ya isya. (1 Korintus 7:32-38) Kwinfir fa waḇe wafarḇuk ido, nama ndramuma ro mankundaw. Pok fa bati, kina, ḇaido adat Bena nafrur Au fa waḇe wakfarḇuk.

4. Payamyum risai monda sismai ro farḇakḇuk ḇekain pyum?

⁴ Refo doḇe farḇakḇuk ima roi ḇepyum ḇeramuma ro Allah ma payamyum ḇyena naisi. Yahwe ikofen ḇekur snon ḇerandak, Adam i, ”Snonkaku ani demir monda ker ima ipyum ḇa. Nari Yafrur snonkaku oso fa ifnoḇek i, insama ḇyero mankundi ḇa.” (Kejadian 2:18) Yahwe ifrur Eva i fa Adam nya i ḇe swa. Inja, su iso ḇe kina ḇerandak kaku. Imbeswa oso suna romawa ido, fandun fa farḇakḇuk suḇena nḇe moḇ ḇepyum fa sufaduru romawa suḇesya. Mboi, roi ḇefnai fa sufarḇuk ima insama suna romawa monda ḇa.​—Mazmur 127:3; Efesus 6:1-4.

5, 6. Rariso farḇakḇuk ya imnis ra ”fasfes kabrai rikyor” rai?

⁵ Raja Salomo fyas ḇo doḇe, ”Snonkaku risuru ipyum syadi ro oser ya derer, snar ḇaḇyak ḇepyum isya faro fararur marḇak suḇena. Rofyor oser ya isapi, min ḇyedi na ifnoḇek i fa dores wer. Mboi rariso rofyor snonkaku oso isapi ḇo ono isya ḇefnoḇek i fa dores wer ḇa? . . .  Fasfes kabrai rikyor napyan fa namuk ḇa.”​—Pengkhotbah 4:9-12.

⁶ Farḇakḇuk ḇepyum nafrur fa snonkaku risuru suḇebati fanam kaku ḇo sufnoḇekyae su, suḇuk sneprei, ma sumamwarek su. Saswar naiso ḇefrur fa farḇakḇuk ya syambraḇ. Mboi, nari syambraḇ syadi rofyor snon ma bin sukam susyom Yahwe I kada. Rarirya, nari farḇakḇuk suḇena imnis ra ”fasfes kabrai  rikyor”, isoine kabrai rikyor sfes fa neoser. Kabrai ḇerarirya na syambraḇ syadi ro kabrai risuru monda. Inja, surir Yahwe isya ro fandu farḇakḇuk suḇena kada, nari farḇakḇuk suḇena syambraḇ syadi.

7, 8. Anun rosai Paulus ḇyuk faro farḇakḇuk ya?

⁷ Rofyor mambeswa imbeswa sufarḇuk kwar, insape sufrur fararur farḇuk fa susmai marisen. (Amsal 5:18) Mboi, snonkaku oso imbe fyarḇuk insama ifrur marisen nafsu ḇyena monda ido, nari kyinfir snonkaku ḇesrow ḇa. Iso ḇefnai fa Refo doḇe oso imbe fyarḇuk ido, ipyum ya umur ḇyedi isrow kwar resari, isoine ro fafisu nafsu ḇepok ḇa ḇyedi imnai resari. (1 Korintus 7:36) Ipyum syadi iwaf rawo imku mankundi resari. Rarirya kada insape na kyara pyum ma ifrur snemuk ḇepyum syadi.​—1 Korintus 7:9; Yakobus 1:15.

⁸ Rofyor kwara fa wakfarḇuk ido, kwara awer roi ḇepyum monda mboi kwara kako farḇakḇuk nakam samswen na naisi. Paulus doḇe ḇefarḇuk sya, ”nari sisrow kandera nabor”. (1 Korintus 7:28) Farḇakḇuk ḇepyum kako, nari ismai fafisu ḇesamswen. Inja, rofyor kwara fa waḇe wakfarḇuk ido, kwinfir pyum mansei nari nwa ḇe swa.

9, 10. Rosai na ḇekur ko rofyor kofarḇuk kuker snonkaku ḇeyaksyom Yahwe I ḇa?

⁹ Rofyor kwinfir mansei nari nwa ḇe swa, waswarepen wos farkin ḇefandun ine, ”Mkoḇar awer kamnam ḇemarḇak ḇar oser warpu snonkaku ḇena kakyar oser ḇa sya.” (2 Korintus 6:14 Terjemahan Dunia Baru, fasfas kasun)  Mnuk ine ryamuma ro moḇ snonkaku sya sifararur ro yaf ndraya. Snonkaku ḇekaker ro yaf, nari ipok ryir ḇa kamnam ḇaido ai ro aiwan risuru ḇena baba ma samambraḇ ḇemnis ḇa. Ine ipyum ḇa kukro nari aiwan risuru ansuya suḇekandera. Rupa radiri, snonkaku ḇesyom faro Yahwe fyarḇuk kuker ḇeyaksyom Yahwe I ḇa ido, nari nafnai samswen nabore. Inja, Refo danun ḇe ko fa kofarḇuk monda kuker ḇena kakyar oser.​—1 Korintus 7:39.

¹⁰ Fafisu ono, snonkaku Kristen sia skara ipyum syadi sfarḇuk kuker snonkaku ḇesyom Yahwe I ḇa ḇardibur sikenem ro mankunsi. Mboi, kosouser wos anun ro Refo ya ḇa ido, nari koḇekandera ma kosmai marisen oḇa. Yahwe kawasa Ḇyesi koine, kofarmyan ḇe Yahwe I naiso roi ḇefandun syadi kaku ro kenem koḇena. Mboi waḇor fa wakofenḇair roi ḇefandun kaku ine yoḇ swambri ido, na moḇsa ḇaḇir rai? Naek srar sibor skinfir fa sfarḇuk ḇa ipyum syadi ro sfarḇuk kuker snonkaku ḇeswar ma ḇefarmyan ḇe Yahwe I ḇa.​—Wasya Mazmur 32:8.

11. Moḇsa na kwinfir pyum snonkaku waḇe nwa ya rai?

¹¹ Mboi, ine kyurfasnai ḇa snar snonkaku ḇesyom faro Yahwe oser-oser nari ḇye swa ḇepyum ḇe Au. Waḇe wakfarḇuk ido, swewar snonkaku waswar kaku ma isrow kuker Au. Wawaf rawo wasrow snonkaku ḇena marisen ḇemnis Au ma ima syewar ḇepon Allah ro kenem ḇyedi. Ḇesawsaw awer rofyor wawasya ma kwarauser anun ḇeraker women ḇesouser ma ḇefawinanem sḇuk ro syap-syap ḇeyawosḇair farḇakḇuk ya.​—Wasya Mazmur 119:105.

12. Anun rosai Refo ḇyuk ḇe sinan sya fa sap pyan farḇakḇuk ro roma inai sesya?

 ¹² Ro adat ḇeḇeso, sinan sya siso ḇeyap pyan snon ḇaido bin faro roma inai sesya. Soḇe sinan sya siso ḇefawi snonkaku ḇesrow kaku faro roma inai sesya. Roi nane naisya kwar ro awar Refo naiwara kako. Inja, rofyor kina Bansi skinfir fa siso adat ḇeradine ido, Refo isya ifnoḇek sinan sya fa skinfir pyan snon ḇaido bin ḇesrow faro roma inai sesi. Rupa ra, fafisu Abraham kyinfir swa faro Ishak i, syewar bin ḇenana ḇaido ḇena snonsnon ḇa, mboi syewar bin ḇeswar faro Yahwe I.​—Kejadian 24:3, 67; mam Fasfas Ḇepupes 25.

13-15. (a) Moḇsa snon oso fyasos i fa ḇye snonswa ḇefrur pyum? (b) Moḇsa bin oso fyasos i fa ḇye binswa ḇefrur pyum?

¹³ Kwara fa waḇe wakfarḇuk ido, mam pyum fa fasos Au kwar. Imbude kwara Ausya fasos kwar. Mboi, wos fasos ine kyur kaku ḇe rosairi? Imbude na kwandor faro kankarem ro fakfuken ine.

¹⁴ Refo fyasnaiḇair mambeswa imbeswa suna fararur ḇesisye ro kina yadori. Inja, rosai snon ya fyasos rofyor imbe fyarḇuk naḇese ro rosai bin ya fyasos na. Rofyor snon oso kyara fa imbe fyarḇuk, fandun fa fyasos i kwar snar iso na ḇebukor ro kina yadori. Yahwe imarisen insama snon ya fyamfon fandandun ro baken saprop ma kakara ro swari ma roma inai ḇyesya. Ḇefandun syadi, fandun fa fyarkin pyum kina ḇyesya ro ari na. Refo doḇe snon oso myamfaduru kina ḇyesya ḇa ido, ima ’iḇyeḇa syadi ro snonkaku ḇekyar ḇa sya’. (1 Timotius 5:8) Inja, snon oso imbe dakfarḇuk ido, fandun fa kyara pyum wos farkin ḇero Refo ine, ”Fasos rosai nari wafrur ro ḇandi, ma fasos kam na ro yaf; insape ḇawes rum bedi.” Ine kyurfasnai, rofyor fyarḇuk ḇaim, fandun fa myam kaku na syambraḇ fa iso mnis Yahwe parenta Ḇyena.​—Amsal 24:27.

¹⁵ Bin oso imbe dakfarḇuk ido, fandun fa myam kaku fyasos i kwar fa nari dakḇe binswa ma imbude na dakḇe sna. Refo ikofenḇair nyan riḇeso moḇsa binswa ḇefrur pyum na fyaduru swari ma romawa ḇyesi rai. (Amsal 31:10-31) Baboine, snonkaku ḇebor skara  monda rosai sismai ro swa sesya. Mboi, Yahwe imarisen kokara rosai na koḇuk faro koswasi.

16, 17. Rofyor kwara fa imbe wakfarḇuk ido, rosai fandun fa kwara pyum ḇepon resari?

¹⁶ Farḇuk ḇaim ido, kwara pyum resari rosai Yahwe ikofen faro mambeswa imbeswa suya. Snon ḇebukor ro kina ine kyurfasnai ḇa iso marisen ḇyena ḇo ifrur samswen kina ḇyesya ro rosai ifrur ma rosai dawos na. Snon ḇefrur pyum ima iso Yesus rari ḇepyum ḇyena, isoine isawarwar ma ifrur pyum manfamyan ḇyesi. (Efesus 5:23) Bin ya fandun fa kyara rosai monda na dakfrur insama iso wos snemuk rosai swari dun kwar na, ma fyararur kayam fnoḇek i. (Roma 7:2) Fandun fa kyara ḇepon na moḇsa fyasnai kyunem kuker sneri ḇesiper faro snon ḇenapes ḇa. Kyara na kwar fama, nari jadi fa ifrur na ḇa ido, ipyum ya fyarḇuk awer resari.

¹⁷ Fandun fa mambeswa imbeswa sumam ḇepon marisen ro sumin ya ḇardibur ro marisen mankun ḇyena ḇardi. (Wasya Filipi 2:4.) Paulus fyas, ”Snon mko oser-oser: iswar swari imnis iswar mankundi ma bin oser-oser iḇye kada ḇyesyowi swa ḇyedi.” (Efesus 5:21-33) Rarirya, snon ke bin ke, fandun fa suswaryae ma suḇesyowiyae su. Ipyum syadi snon ya ifawi eḇe bin ya ḇyesyowi i, ma eḇe bin ya kako fyawi snon ya iswar i. Rarirya kada, na susmai marisen ro farḇakḇuk suḇena.

18. Rosai ḇefnai fandun fa snon ma bin susasor su rofyor sufrur wis saswar?

¹⁸ Fafisu snon ma bin sufrur wis saswar, naiso swaf ḇepyum fa sufawiyae su. Swaf ḇepyum kako fa sufasnai  kakara ḇepyum ma sukofen roi ḇekaku insama sufawi sumnis fa sufarḇuk ke roḇa. Rofyor sufrur wis saswar, na sufarkor moḇsariso sukain suyawos raya ma suḇesewar fa sufawi pyum roi ḇero susnesna oser-oser. Sufanam syadi kwar ido, na sumarisen sufasnai syadi saswar suḇena. Roi nane nsasar ḇa. Mboi sufarḇuk ḇaim ndari, fandun fa sufarmku mankun su insama sufrur awer fararur farḇuk na. Saswar ḇekaku na ifnoḇek su fa sufarmku mankun su ma sumewer sufrur rosai monda nari ḇefrur fa wis mankun suḇena  ma wis suḇena kuker Yahwe I kako namuk.​—1 Tesalonika 4:6.

19, 20. Moḇsa snonkaku Kristen sya smam farḇakḇuk ya rai?

¹⁹ Fawar ro syap ma felem nabor naisya nfasnaiḇair ro papupes ya, sifrur munara fakawin ḇeba ma ḇeyun marisen. Mboi komam kada, inema insape randak monda. Yahwe ifrur farḇakḇuk na fa nakain fyoro.​—Kejadian 2:24.

²⁰ Baboine, sibor sya soḇe farḇakḇuk ima roi ḇemankenem ḇa, ma simarisen ido simeruk farḇakḇuk sena monda. Sia wer skara ḇo soḇe sismai samswen ido, iso swaf ḇesrow fa sibur siswasi ma simeruk farḇakḇuk sena. Mboi, waswarepen wos sarḇer ro Refo ḇekur fasfes kabrai rikyor ḇenako anya. Kabrai ḇerarirya spaw kaku na kako, napok namuk ḇa. Kor fafnoḇek ro Yahwe ido, na farḇakḇuk koḇena nakain fyoro. Yesus doḇe, ”Rosai Allah ḇyefa ḇeḇeoser kwar, snonkaku sipok sfaspar i ḇa.”​—Matius 19:6.

21. Rosai na ḇefnoḇek snon ma bin oso fa iswar swari?

²¹ Kokam kona roi ḇepyum ma ḇepyum ḇa na. Mboi, napyan syadi fa komam roi ḇepyum ḇa ro snonkaku ḇesesya, syadi wer ro koswasi. Kofrur radine ido, nari kosmai marisen oḇa. Imbape, komam roi ḇepyum ro koswasi kada, nari komarisen. Koswasi sinapes ḇa, mboi na kosambraḇ fa kofrur roi ine faro si ke? Imboḇae! Yahwe ifawi koma konapes ḇa, ḇesyaḇo myam monda roi ḇepyum ro ko. Kokarapan kada rofyor myam monda roi ḇepyum ḇa ro ko!  Manfasfas Mazmur doḇe, ”Rofyor sasar naiso mamepen na, sye Yah, mansei na ḇekain pdef, sye Yahwe?” (Mazmur 130:3) Snon ke bin ke iso raris Yahwe I kada, nari myam monda faro roi ḇepyum ro swari ma fasaw fa ḇyuk maf.​—Wasya Kolose 3:13.

22, 23. Rariso Abraham ma Sara sufasnai nyan ḇepyum faro ḇefarḇuk kwar sya?

²² Fawas mura, nari farḇakḇuk ya syambraḇ syadi.  Rupa ra Abraham ma Sara su, farḇakḇuk suḇena nakain fyoro ma nun marisen. Fafisu Yahwe iwan fa Abraham subur rum suḇedi ro mnu Ur, imbude Sara ḇyeumur taun ri 60 syadi kwar. Kwarapan kada, na samswen fa ibur rum ḇepyum ḇyedi ḇo ḇyarek ro rum kruḇen. Mboi, Sara ima bati ḇefrur pyum ma bin ḇesouser faro swari, ma ḇyesyowi fafaya swari. Inja, rosai Abraham ifrur na iso na ḇo isampampum ḇa, rarirya susmai bon ḇepyum.​—Kejadian 18:12; 1 Petrus 3:6.

²³ Kakuḇae, farḇakḇuk ḇefo marisen nama mambeswa imbeswa nari suna wos oser ker ḇa. Swaf oso Abraham imewer ryower rosai Sara ikofen na. Mboi, Yahwe doḇe, ”Rwower i.” Abraham iso na ḇeri, ma ismai bon ḇepyum. (Kejadian 21:9-13) Swaf oso mankunko ma koswasi kona wos oser ḇa ḇekur roi oso ido, kofafko awer. Kona wos oser ḇa yo, ḇefandun syadi iso koswaryae ma koḇesyowiyae ko ḇesya kwar.

24. Rosai na kofrur insama farḇakḇuk koḇena nun sanandik faro Yahwe I rai?

²⁴ Ro sidang Kristen yadori, mambeswa imbeswa sibor sisya sismai marisen ro farḇakḇuk sena. Kwara fa waḇe wakfarḇuk ido, ḇefnder awer snar mansei imbe kwinfir fa nwa ḇe swa, ima roi ḇefandun kaku ro kenem Benairi. Ine nari nawyae kenem Bena isof fyoro-fyoro. Inja, wor fafnoḇek ro Yahwe I. Wafrur rarirya kada, nari kwinfir pyum mansei nari nwa ḇe swa, fasos mankundaw fa wakfarḇuk, ma bawes farḇakḇuk ḇesambraḇ ma ḇefo saswar. Nane kam nari nun sanandik faro Yahwe I.