Sasoser ro Allah neknam ro wos farkin Ḇyena. Wos farkin nane naiso kakaku ḇeknam ro Refo yadori. Nane nafnoḇek ko fa kofawi rosai Allah ḇyaḇir ma kyara na, mura kofrur wos snemuk ḇepyum ma kofrur roi ḇekaku. Wos farkin ro Allah nefainda syadi faro ko kukro rofyor parenta ro Refo nasnai mankun ḇa faro fafisu oso, kofawi rosai nari kofruri.

▸ Farkarkor 1, syos ḇe 8

Kosouser Yahwe iso komarisen kofrur rosai dor na kuker kosnesna ḇesiper. Yahwe imarisen kosouser faro I kukro koswar I. (1 Yohanes 5:3) Koswar ma kokyar faro Sinan I kada, na kosouser wos anun Ḇyena kam ro fafisu nakam. Rarirya, rofyor rya parenta Ḇyena nsamswen kako, nari kosouser na. Kosouser I kada nari kosmai payamyum kukro fyarkor ko fa kofawi moḇsa na kokenem pyum syadi ro fafisu ine rai, ma doḇe nari ḇyuk barakas nabor ḇe ko ro ras ḇarpon iyama.​—Yesaya 48:17.

▸ Farkarkor 1, syos ḇe 10

Yahwe ḇyuk swaf faro snonkaku oser-oser fa skinfir ro mankunsi, ḇaido ḇyuk samambraḇ fa sifrur wos snemuk. Ifrur ko raris robot ḇa. (Ulangan 30:19; Yosua 24:15) Mankunko koḇuk swaf ine fa kofrur wos snemuk ḇepyum. Mboi, kosasor ko ḇa ido, nari kofrur wos snemuk ḇepyum ḇa. Inja, koḇe kosouser Yahwe I ke roḇa, ine ryama ro mankunko. Kofasnai kako snar koma koswar kaku Yahwe I.

▸ Farkarkor 1, syos ḇe 12

Yahwe ḇyuk farkankin fa koḇukimam nyan kenem koḇena. Kofarkor Refo ya kada, nari kofawi na ma payamyum ḇyena faro kenem koḇena. (Amsal 6:16-19; 1 Korintus 6:9-11) Farkankin ine ifnoḇek ko fa kofawi Allah mamam Ḇyena faro roi ḇekaku ma ḇesasar na. Ine fyarkor ko kako fa kona saswar, kofrur wos snemuk ḇepyum, ma kofrur pyum snonkaku ḇesesya. Farkankin ro dunya ine nfarwei ker, mboi Yahwe farkankin Ḇyena nfadwer ḇa. (Ulangan 32:4-6; Maleakhi 3:6) Koso pyum Yahwe farkankin Ḇyena kada, nari nkadaunwarek ko ro roi ḇeḇyeḇa ḇekur baken ma kakara koḇena.

▸ Farkarkor 1, syos ḇe 17

Sneuser iso roi koḇaḇir ro kosnesna fa kofawi roi ḇekaku ma ḇesasar na. Yahwe ḇyuk sneuser ine faro kokam. (Roma 2:14, 15) Koḇuk Allah farkankin Ḇyena fa kokfarkor sneuser koḇena insama nafnak pyum. Rarirya, nari wos snemuk koḇena nafrur fa Allah imarisen. (1 Petrus 3:16) Rofyor koḇe kofrur wos snemuk ḇesasar, na sneuser ine ḇyuk swarapepen. Kofrur roi ḇesasar kwar ido, na koknon ḇa kaku. Sneuser koḇena bisa ifnak pyum ḇa kako, mboi kor fafnoḇek ro Yahwe ido, na ifnak pyum wer. Kona sneuser ḇepyum ido, nari kona snonsnon ḇepyum ma nafrur fa kakara koḇena napyum.

▸ Farkarkor 2, syos ḇe 3

Komkak faro Allah iso koswar kaku I ma koḇesyowi I. Nane nafrur fa komewer kofrur roi ḇefnai fa imarisen ḇa. Ma nari kofrur roi ḇepyum ḇo komewer kofrur roi ḇepyum ḇa na. (Mazmur 111:10) Nane nadif ko fa komam pyum Yahwe wos Ḇyena oser-oser. Nafnoḇek ko kako fa kofrur raris rosai kokofen kwar ḇe I kukro koḇesyowi fafaya I ḇa. Makak faro Allah nfarkin kakara koḇena, moḇ komam snonkaku ḇesesya, ma rosai kokinfir ro ras ḇe ras na.

▸ Farkarkor 2, syos ḇe 9

Marandor ine kyur kako ḇe snonkaku ḇefafko kaku faro sasar ifrur kwar na. Snonkaku ḇeswar faro Yahwe I nari fyafko kaku rofyor ifawi imbran sasar kwar ro farkankin Ḇyena. Komam mboi kofrur sasar kwar ido, kor payasyos ro Yahwe I roro farsarser fasaspar Yesus marmar ḇyedi. (Matius 26:28; 1 Yohanes 2:1, 2) Kombror kaku kwar ma kofrur roi ḇesasar wer ḇa ido, kokyar kaku Yahwe ipyos sasar koḇena kwar. Inja, kokara kosasar kaker awer faro sasar kofrur ro ḇepon iwara na. (Mazmur 103:10-14; 1 Yohanes 1:9; 3:19-22) Kosewar kaku fa kun farkarkor ro sasar koḇena, kofadwer kakara ḇesasar kona kaker ya, ma kokenem raris Yahwe marisen Ḇyena.

▸ Farkarkor 2, syos ḇe 18

Snonkaku oso ifrur sasar ḇeba ḇo imewer imbror ma imewer iso Yahwe farkankin Ḇyena wer ido, na ipok ryo sidang yadori wer ḇa. Fandun fa sisasyar i. Oso sisasyar i kwar ido, na kokainus i ḇa ma kawos kuker i ḇaḇeri. (1 Korintus 5:11; 2 Yohanes 9-11) Roi nane nfasren Yahwe snonsnon Ḇyedi ma sidang ya. (1 Korintus 5:6) Sisasyar snonkaku ḇeradine ima aprer ḇemnis faro i insama imbror ma kyaḇer wer ḇe Yahwe I.​—Lukas 15:17.

▸ Farkarkor 3, syos ḇe 19

Yahwe ima iswar ko ma imarisen ifnoḇek ko. Inja, ḇyuk akurfasnai, farkankin, ma wos anun yoḇ ko ro Refo ma ḇyuk naek srar sya. Koma snonkaku ḇenapes ḇa siko, inja kofandun kaku roi nane kam. (Yeremia 17:9) Koḇesyowi ma korower snonkaku Yahwe kyur fa sfarkin ko kada, ima koḇesyowi Yahwe I ma komarisen kosouser faro I.​—Ibrani 13:7.

▸ Farkarkor 4, syos ḇe 2

Snar koma konapes ḇa, inja napyan fa kofaḇri mankunko ma kararer ko. Imboi, Yahwe imarisen fa kona sne ḇerun. Randak ya, kofarkor fa kona sne ḇerun iso snar komam mankunko koḇese ro Yahwe I, mura kofawi koma koḇeroyo ḇaime. (Ayub 38:1-4) Sne ḇerun fyandun kako kukro kofarkor fa komam snonkaku ḇese sfandun syadi ma kokara roi ḇepyum syadi faro si. Snonkaku ḇeararer nari myam mankundi isyadi ro ḇesesya. Mboi, snonkaku ḇena sne ḇerun dankar mankundi ḇa ḇo fyawi samambraḇ ḇyena ma raryar ḇa ḇyena kako. Imkak ḇa ḇo na ikofenḇair sasar ḇyena, dor maf, ryower wos anun, ma iso na. Snonkaku ḇena sne ḇerun ikyar faro Yahwe I ma iso farkankin Ḇyena.​—1 Petrus 5:5.

▸ Farkarkor 4, syos ḇe 4

Papoik iso hak fa sḇuk parenta ma sifrur wos snemuk. Yahwe nya papoik ḇekaki syadi ro nanki ma supswan ine. Snar ifrur roi nakam, inja iso ḇepoik ro supswan farsyos ḇeba ine. Yahwe ḇyuk fararur ḇe snonkaku ḇeḇeso fa smamwarek ko. Rupa ra sinan sya, penatua ro sidang, ma pamarenta sya. Sikam suf papoik ḇeḇeso, ma Yahwe imarisen fa kofararur kayam fnoḇek si. (Roma 13:1-5; 1 Timotius 5:17) Imbape, fafisu roi snonkaku sya sor ro ko iḇese ro Allah marisen Ḇyena, nari kosouser syadi faro Allah ro snonkaku sya. (Farfyar 5:29) Koḇesyowi papoik ro snonkaku Yahwe ḇyuk sine ido, ima koḇesyowi wos snemuk Ḇyena.

▸ Farkarkor 4, syos ḇe 7

Yahwe kyinfir penatua, isoine naek ḇekir sya, fa smamfaduru sidang ya. (Ulangan 1:13; Farfyar 20:28) Penatua ansine sifnoḇek ko fa kofanam pdef ḇe Yahwe I ma kosyom I kuker payamyum ma konapnap ḇa. (1 Korintus 14:33, 40) Skanow penatua sya kuker rur  ḇesren, kukro fandun fa siso pyum kaku wos ḇero Refo ḇesmai farkankin rur ḇesren ya resari. (1 Timotius 3:1-7; Titus 1:5-9; 1 Petrus 5:2, 3) Komarisen kofararur kayam fnoḇek penatua sya kukro kokyar ma komarisen kofnoḇek Allah organisasi Ḇyedi.​—Mazmur 138:6; Ibrani 13:17.

▸ Farkarkor 4, syos ḇe 8

Yahwe kyur sinan sya fa smamwarek romawa sesya ma kina karyer sesi. Mboi, Refo doḇe snonswa iso ḇebukor ro kina yadori. Imbape, kma ro kina ani isya ḇa ido, na awin iso ḇebukor faro kina ani. Ḇebukor ro kina fararur ḇyena kako iso fyasos roḇean, sansun, ma moḇ fa sḇarek. Fandun kako fa fyarkin kina ḇyesi insama smam ari sena ḇe Yahwe I. Imnis ra myam fa siso fananjur, sḇaryas, ma sfarkor pyum Refo ya kayamyam. Nya fararur kako fa iso ḇeyun wos snemuk ro kina yadori. Isewar kaku ker fa iso raris Yesus i, isoine ifrur pyum, nya kakara ḇemnis, myamun ḇaido imasasor ḇa. Roi nane nari nafrur fa skain pyum syadi, mura ḇero kina yadori syakam siknon ma wis sena kuker Yahwe I nsambraḇ syadi.

▸ Farkarkor 4, syos ḇe 12

Raryur Naek Ḇefarkin siso raryur oso ro snon ḇena saneraro fa ḇekenem ro nanki. Allah kyur si fa sḇuk farkankin faro kawasa Ḇyesi. Ro abad randak naiwara, Yahwe kyur raryur naek ḇefarkin fa sfarkin sidang Kristen insama sisyom I ma sifrur fararur ḇesren Ḇyena. (Farfyar 15:2) Baboine, ḇefarmyan ḇe Raryur Naek Ḇefarkin ansine sfasnai, sfarkin, ma skadaunwarek Allah kawasa Ḇyesi. Rofyor naek ansine imbe sifrur wos snemuk, sikyar faro farkankin ro Allah Wos Ḇyena ma rur ḇesren Ḇyedi. Yesus dapḇair snon ḇesmai ramrem ansine ḇe ”women ḇesouser ma ḇefawinanem”.​—Matius 24:45-47, NW.

▸ Farkarkor 4, syos ḇe 15

Fafisu ono, na sor srar sya fa suf pyan naek sya fararur sena. Rarirya ido, na sisaswo roi ḇedwarek siḇrusna kukro ine fyasnai sesyowi Yahwe fasasos Ḇyena. Mboi, sifrur roi ine ro fafisu sairirya kam ḇa. Rupa ra, rofyor srar oso ḇyuk farkarkor Refo mboi swari oroḇaido naek ḇebaptis isya ro moḇ anya ido, nari isaswo roi fa ḇyukidwarek ḇruri.​—1 Korintus 11:11-15.

▸ Farkarkor 4, syos ḇe 17

Kowaira faro oso ḇa iso na kosun ro fararur polotik ḇa. (Yohanes 17:16) Yahwe kawasa Ḇyesi sima sifararur faro Allah Karajan Ḇyedi. Kofrur ra Yesus i, isoine koso ro fararur ḇero dunya ine ḇa.

Yahwe iwan ko fa kosouser faro pamarenta ma ḇeyuf papoik sya. (Titus 3:1, 2; Roma 13:1-7) Mboi, iwan ko kako fa komamun awer. Inja, snonkaku Kristen sima sneuser sena nadwarek si fa siso mamun. Rofyor siwan fa snonkaku Kristen oso kyinfir imbe fyadwer fararur militer sḇuk ḇe i na kuker fararur militer ḇa, na mankundi kyara sneuser ḇyedi idwarek i ke roḇa.

Koma kosyom Yahwe I monda kukro iso ḇefrur konya. Kakuḇae, koma koḇesyowi kakop ḇeḇair faro sup koḇena. Mboi, kokunem faro barbar ya ḇa ḇaido kodisen dow sup ine ḇa. (Yesaya 43:11; Daniel 3:1-30; 1 Korintus 10:14) Yahwe kawasa Ḇyesi oser-oser mankunsi sun snemuk fa skinfir ro pemilu ḇa, kukro sima skinfir Allah pamarenta Ḇyena kwar.​—Matius 22:21; Yohanes 15:19; 18:36.

▸ Farkarkor 5, syos ḇe 2

Dunya ine ifo kuker Setan kakara ḇyena. Snonkaku ḇeswar ma ḇeso Yahwe I ḇa sya siso ḇena kakara ḇeradine, ma spampum farkankin Ḇyena. (1 Yohanes 5:19) Kakara ḇeradine kako nafnai kenem  ḇepyum ḇa. Roi nane kam sap na ḇe kakara dunya. (Efesus 2:2) Yahwe kawasa Ḇyesi sisewar kaku fa kakara dunya ine dawninyan si ḇa. (Efesus 6:10-18) Imbape, koma komarisen faro Yahwe parenta Ḇyena ma kosewar kaku fa kokara raris moḇ kyara raya.

▸ Farkarkor 5, syos ḇe 7

Snonkaku ḇesampum kakaku iso snonkaku ḇepambar fa ḇeyonef kakaku ro Refo ya. Sima sembroḇ faro Yahwe ma Raja ro Allah Karajan Ḇyedi, Yesus i, ma sawninyan snonkaku ḇesesya fa siso si. (Roma 1:25) Imbe sifrur fa Yahwe kawasa Ḇyesi sikyar mankun ḇa. Snonkaku Kristen ḇeḇeso ro randak naiwara sakḇe snonkaku ḇeradine. Ma ro fafisu koḇedine kako, sia sakradiri. (2 Tesalonika 2:3) Snonkaku ḇesouser pdef faro Yahwe I, nari sḇinkwan ḇeri ro snonkaku ḇesampum kakaku ine. Kopok komam monda awer marisen koḇena ḇaido dafdif ro snonkaku ḇesesya nafnai fa kowasya ḇaido korower rosai monda ḇeramuma ro snonkaku ḇesampum kakaku ine. Koma kosouser pdef faro Yahwe I ma kosyom I monda.

▸ Farkarkor 5, syos ḇe 9

Ro Sasoser Moses, er Israel sya sor faro Yahwe I fa ipyos sasar sena kuker sun farsarser faro payasyos ine raris mor, mani, ma aiwan ḇo sun mundum ḇe bait yadori. Rofyor sifrur roi ine, na siswarepen snar Yahwe imarisen ipyos sasar sena ḇe er oser ḇaido snonkaku oser-oser. Ḇarpur mura, rofyor Yesus ḇyuk kenem ḇyedi fa ipyos sasar koḇena kwar, farsarser faro payasyos ine kofandun na wer ḇa kwar. Yesus fyarser kenem ḇenapes ḇyedi ”ḇerarwan oser monda isof fyoro-fyoro”.​—Ibrani 10:1, 4, 10.

▸ Farkarkor 7, syos ḇe 6

Ro Sasoser Moses, Yahwe imarisen fa san aiwan kraf. Iwan si kako fa sḇuk aiwan ḇe farsarser. (Imamat 1:5, 6) Mboi, Yahwe imewer kawasa Ḇyesi smun farfnak aiwan sya. (Amsal 12:10) Ro Sasoser Moses, iwan fa skadaunwarek aiwan sya ro farfnak ḇeḇyeḇa. Iwan kawasa Israel sya fa sfaduru pyum aiwan sesya.​—Ulangan 22:6, 7.

▸ Farkarkor 7, syos ḇe 6

Fraksi darah. Ḇar rifyak ḇefandun ro rik naiso sor ḇe sel rik ḇerik, sel rik ḇepyoper, trombosit, ma plasma. Ḇar rifyak ḇefandun ro rik ine sirwas na ḇe ḇar kasun-kasun syadi wer. Sor na ḇe fraksi darah. *

Snonkaku Kristen sima simewer sisun rik derer ḇaido ḇar rifyak ḇefandun ro rik na kako ḇe baken sena. Mboi, bisa sisun fraksi darah ḇe baken sena ke? Refo ḇyuk akurfasnai ḇesnaibos ḇa. Inja, snonkaku Kristen oser-oser sun snemuk ro mankunsi fa siso sneuser sena ḇesmai farkarkor ro Refo kwar na.

Snonkaku Kristen riḇeso sima simewer fraksi darah nakam kako. Imbude skara mura faro Sasoser Moses ḇekofen rik ro aiwan smun kwar, fandun fa sisbawer kam na ro saprop.​—Ulangan 12:22-24.

Sia sifrur wos snemuk ḇese wer. Sun fraksi darah riḇeso kukro sneuser sena nadwarek si ḇa. Imbude skara snar fraksi-fraksi kasun ro rik nama nḇair ḇe kankenem wer ḇa kwar.

Waḇe wun fraksi darah ine ido, kwara resari:

• Yafawi kwar snar yamewer fraksi darah nakam ido, ima yamewer kako yasmai aryawin riḇeso sḇuk faro dafduf ayena ḇaido aryawin sḇukidwarek rik ayena fa nsasyar ker ḇa ke?

•   Yafasos aya kwar fa yakofenḇair ḇe dokter, roi ḇefnai fa ayama yun ḇaido yamewer fraksi darah ono ke?

Nyan Pararei. Snonkaku Kristen koinema, koḇuk ma kokram rik koḇena ḇa faro operasi nari sifrur ro swaf minggu riḇeso ḇe ḇarpon. Mboi, nyan pararei ḇese isya, isoine sḇuk snonkaku ḇeduf ani mankundi rik ḇyena. Snonkaku Kristen oser-oser mankunsi sun snemuk imbe sḇuk rik mankun sena ro swaf operasi ya imbran, fafisu smam dafduf na, ḇaido siso terapi ḇebabo. Rofyor sifrur nyan ḇeradine, na sḇe fa snonkaku ḇeduf ani rik ḇyena nsasyar ḇe ḇandi fa nkain nwaf ro swaf ono resari.​—Waḇe wafawi nabor wer ido, mam ro syap Menara Pengawal 15 Oktober 2000, ram 30-31.

Rupa ra, nyan pararei oso isya sor ḇe hemodilusi. Ine ido, rofyor operasi ya imbran ḇaime, na sḇe fa snonkaku ḇeduf ani rik ḇyena nsasyar ḇe ḇandi resari ḇo sfadwer na kuker roi sor ḇe cairan pengembang volume darah. Mura, ro swaf operasi ya imbran kaker ḇaido imnai kwar, insape sisun kaḇer ḇeduf ani rik ḇyena ḇe baken ḇyedi.

 Nyan pararei ḇese wer iso sor ḇe penyelamatan sel. Ine ido, ḇeduf ani rik ḇyena ḇesasyar kwar ro swaf operasi ya imbrane, siryur na, sḇein na fa nasren, insape ro swaf operasi ya imbran kaker ḇaido imnai kwar, sisun kaḇer ḇeduf ani rik ḇyena ḇe baken ḇyedi.

Dokter oser-oser imbude nyan sifrur roi nane naḇesisye kermkun kero. Inja, snonkaku Kristen oso kyara fa dakḇe operasi, smam dafduf ḇyena, ḇaido iso terapi ḇebabo ido, syewar kaku fa fyawi pyum resari moḇsariso na sḇein rik ḇyena rai.

Koḇe kokara fa sifrur nyan pararei kuker sḇuk rik mankun koḇena ḇaim, kokara resari:

• Rofyor sisasyar rik ayena ḇe ḇandi ḇo imbude imnai fasaw mkun ido, na yamam rik anna ndro baken ayena kaker, inja yasbawer awer na ḇe saprop ya ke?​—Ulangan 12:23, 24.

• Ro swaf yaro rumbeduf, sun rik ayena kerno, siḇyaren na, ma sisun kaḇer na ḇe baken ayedi ido, na sneuser ayedi ḇesmai farkarkor ro Refo kwar ikyaren aya ḇa ke?

• Yafawi snar yamewer sḇuk pararei kuker sisun rik mankun ayena, ima yamewer kako yasmai tes darah, hemodialisis, ḇaido sḇuk mesin fa nafnoḇek barmor ma paru-paru (heart-lung bypass machine) ayena fa nambran ke?

 Kofrur wos snemuk ḇaim faro fraksi darah ma nyan pararei kuker sḇuk rik mankun koḇena kako, koḇenadi resari kor fa Yahwe fyarkin ko ma kofarkor kaku roi ine ro Refo ari. (Yakobus 1:5, 6) Raposa, mankunko iso ḇeyun wos snemuk raris sneuser koḇena ḇesmai farkarkor ro Refo kwar na. Kopok kofuken awer ḇe snonkaku ḇesesya ḇo koḇe simnis raris ko ido, rosai nari sifruri. Snonkaku ḇesesya kako sipok sisowarpu awer ro wos snemuk koḇena.​—Roma 14:12; Galatia 6:5.

▸ Farkarkor 7, syos ḇe 11

Kenem ḇesren iso roi kofrur na nasren ro Allah ḇarpon Ḇyedi. Ine kyur kako ḇe kakara, wos, ma fararur koḇena. Yahwe iwan ko fa koḇinkwanbur fararur farḇuk ḇemnis ḇa nakam. (Amsal 1:10; 3:1) Kun snemuk ḇepon fa koso pyum Yahwe parenta Ḇyena ḇekur ḇe saranden ine rofyor koisya koro fafisu ḇefnai fa kofrur roi ḇesasar ḇaim. Fandun fa koḇenadi faswef kor insama Sinan fyaduru kakara koḇena fa nasren pdef, ma kosewar kaku fa kopampum farawrowes ḇefnai fa na kofrur fararur farḇuk.​—1 Korintus 6:9, 10, 18; Efesus 5:5.

▸ Farkarkor 8, syos ḇe 11

Kenem ḇefawi mamyai ḇa kyur kako ḇe fararur ḇaido awawos ḇesasar kaku faro Allah marisen Ḇyena. Snonkaku ḇena kenem ḇeradine ḇyesyowi Allah sasoser Ḇyena ḇa. Sifawi oso nya kenem ḇefawi mamyai ḇa ine ido, na panitia pengadilan smam roi ine. Kenem ḇemamas kyur kako ḇe fararur ḇesasar nono. Oso nya kenem ḇeradine ido, imbude na panitia pengadilan ro sidang smam i, mboi ndramuma ro roi ifrur na nemankenem ke roḇa.​—Galatia 5:19-21; Efesus 4:19; waḇe wafawi nabor wer ido, mam ”Pertanyaan Pembaca” ro Menara Pengawal 15 Juli 2006.

▸ Farkarkor 9, syos ḇe 7; Farkarkor 12, syos ḇe 10

Yahwe ḇyuk fararur farḇuk ḇe snonkaku insama snonswa ma binswa sufasnai saswar ḇesren suḇena. Imboi, rofyor oso ifarfnak ḇaido isfu rofmar ḇyedi, ḇaido ifrur sasar rofmar ḇyedi fa imarisen monda ido, ima ismai marisen kuker nyan ḇemamas. Snonkaku ḇefrur ker roi ḇeradine nari nafnai fa wis ḇyena kuker Yahwe I naḇyeḇa. Nafnai fa fyaduru nafsu ḇesasar ma myam fararur farḇuk kuker nyan ḇesasar. (Kolose 3:5) Koisya kona kenem ḇeradine ma samswen fa komnai ido, kosusu awer. (Mazmur 86:5; 1 Yohanes 3:20) Koḇenadi kor kaku fa Yahwe ifnoḇek ko. Koḇinkwan ro sonin ḇeḇyeḇa ḇefnai fa kokara roi ḇemamas na. Kawos kuker sinan Kristen koḇedi oso ḇaido bati ḇena kakyar oser ḇeswar Yahwe I. (Amsal 1:8, 9; 1 Tesalonika 5:14; Titus 2:3-5) Wakyar kaku snar Yahwe isya myam ma ḇyesyowi sasewar Bena fa wasren pdef ro roi ḇemamas na.​—Mazmur 51:17; Yesaya 1:18.

▸ Farkarkor 9, syos ḇe 9

Farḇakḇuk sapsaper ine kyur ḇe snonkaku ḇena swa isyadi risuru. Yahwe imarisen fa ḇefrur farḇakḇuk ine iso snon oser ma bin oser monda. Ro er Israel randak naiwara, snon oso imbe nya swa rioser syadi ido, Allah idwarek i ḇa. Mboi, ima Allah marisen Ḇyena ro randak ya ḇa. Fafisu ine, Yahwe imewer kwar farḇakḇuk sapsaper ine. Imarisen snonswa nya bin oser monda, ma binswa nya snon oser monda.​—Matius 19:9; 1 Timotius 3:2.

▸ Farkarkor 10, syos ḇe 12

Yahwe imarisen fa mambeswa imbeswa suḇarek kayamyam ro swaf sukenem kaker. (Kejadian 2:24; Maleakhi 2:15, 16; Matius 19:3-6; 1 Korintus 7:39) Imarisen monda rofyor oso ifrur farḇuk kuker oso ḇese insape imbe suḇesisye ido, ryamuma ro sumin ḇesasar ḇa ani.​—Matius 19:9.

 Fafisu ono, snonkaku Kristen sia sifrur farḇuk kuker oso ḇese ḇa, mboi skinfir fa sḇesisye monda. (1 Korintus 7:11) Snonkaku Kristen oso bisa kyinfir fa ḇyesisye rofyor ismai samswen ḇeradine:

• Swari fyawi kwar ḇo myam fandun ro rum ḇa: Snonswa imewer myam kina ḇyesi rawo sna kumpan ḇaido roḇean oḇa.​—1 Timotius 5:8.

• Ismai wayam ḇefnak ḇa: Swari myun i ra idafduf ḇaido imbe myun i fa imar.​—Galatia 5:19-21.

• Wis ḇyena kuker Yahwe I imbe imuk: Eḇe snon ḇaido eḇe bin ya idwarek marmar swari fa imbe ifarmyan ḇe Yahwe I fama jadi ḇa.​—Farfyar 5:29.

▸ Farkarkor 11, syos ḇe 19

Kokame kofandun wos sandik ma wos ḇefrur fa koryaḇ. (Amsal 12:25; 16:24) Kawos wos ḇepyum ma kawos myaren kada, nari kokam kosambraḇ ma kosmai sneprei. Ine nari nafnoḇek naek ma srar koḇesya fa simku ma sismai samswen ḇemarḇak rariryano, na sfarmyan pdef ḇe Yahwe I. (Amsal 12:18; Filipi 2:1-4) Komam oso isya imyaren ḇa ido, korower pyum i ma kosewar fa kofawi pyum rosai kyara na. Rarirya kada, na kofawi wos ma roi ḇesrow risai na koḇukifnoḇek i. (Yakobus 1:19) Kosewar fa komambir pyum naek srar koḇesya insama kofawi rosai sfandun na. Rarirya, na kofnoḇek si fa sfanam ḇe Knam ḇeḇuk sneprei ma samarawraw nari ḇefrur si fa se andei.​—2 Korintus 1:3, 4; 1 Tesalonika 5:11.

▸ Farkarkor 12, syos ḇe 16

Refo iser parenta ḇekur ḇeri faro munara farḇakḇuk oḇa. Rari ma moḇ sifrur munara farḇakḇuk ro supswan ine ḇesiper naḇesisye. (Kejadian 24:67; Matius 1:24; 25:10; Lukas 14:8) Roi ḇefandun kaku  syadi ro munara farḇakḇuk iso asas ḇesren ro Yahwe ḇarpon Ḇyedi. Mambeswa imbeswa sibor simarisen kina ma bati ḇefanam sesya sakso insama sakrower asas ḇesren sena ma penatua sawos faya ḇeknam ro Refo na. Mankunsi na ḇeyap imbe sifrur festa ke roḇa, ma festa risai imbe sifrur rofyor sifrur asas ḇesren kwar. (Lukas 14:28; Yohanes 2:1-11) Wos snemuk rosai mambeswa imbeswa suyun kwar, sumam pyum kaku snar farḇakḇuk suḇena nesyowi Yahwe I. (Kejadian 2:18-24; Matius 19:5, 6) Wos farkin ro Refo naiso ḇefnoḇek su fa sufrur wos snemuk ḇepyum. (1 Yohanes 2:16, 17) Mboi, sufasos aninem swan ro munara farḇakḇuk suḇena ido, sumam pyum kaku fa smamwarek pyum kaku festa ani. (Amsal 20:1; Efesus 5:18) Sumarisen fa munara suḇena naser musik ḇaido hiburan ono ido, sumam pyum kaku snar nakam nun sanandik faro Yahwe I. Sumam monda awer faro munara farḇakḇuk suḇena, mboi sumam faro wis suḇena kuker Allah ma ḇesesya.​—Amsal 18:22; waḇe wafawi anun ḇese wer ido, mam syap Menara Pengawal 15 Oktober 2006, ram 18-31.

▸ Farkarkor 13, syos ḇe 18

Koma komarisen kofrur wos snemuk ḇepyum ḇeknam ro wos farkin ro Refo. Imnis ra, snonkaku Kristen oso, swari ḇe Saksi ḇa dor i fa iso i ḇo sura sunan kayam kuker kina ḇeba ḇyesi ro ras ḇeba ono. Waksmai roi ḇeradine ido, rosai na wafruri? Sneuser Bedi idwarek Au ḇa ido, wakofenḇair ḇepon ḇe swambri ḇo woḇe rofyor mam kina ḇyesi sifrur roi ḇemnis kuker Refo ḇa, na wakfrur na ḇa. Ono wer ido, kwara pyum kako naek srar ḇesesya imbude skarkar rofyor smam rwa wakso ro munara ani.​—1 Korintus 8:9; 10:23, 24.

Oroḇaido, imbude bos Bedi ḇyuk roi oso ḇe Au ro ras ḇeba ono. Nari pampum na ke? Rarirya kam ḇa. Imbe wun na ke pampum na ke, ndramuma ro moḇsariso bos Bedi myam roi ḇyuk anna raya. Myam na ḇe roi fandun fa ḇyuk nairi kukro ras ḇeba ani ke? Ḇaido ḇyuk na ḇe Au snar ḇyesyowi fararur marḇak Bena monda ke? Kwara roi ine ma roi ḇesena resari insape wun snemuk.

 Ro fafisu ḇese wer, imbude oso ḇyuk roi ono ḇe Au ro ras ḇeba ma doḇe, ”Yafawi auma wakfrur ras ḇeba ine ḇa, mboi yaḇe yaḇuk monda ine ḇe au.” Imbude ima fyasnai frur pyum monda. Ḇaido, imbude isya ifrowes monda Au fa wakfrur ras ḇeba ani ke? Kwara ḇepon roi ine kwar ido, insape mankundaw waḇe wun roi ḇyuk anna ke roḇa. Wos snemuk rosai monda imbe kofrur na, komarisen fa sneuser koḇena napyum ma kosouser pdef ḇe Yahwe I.​—Farfyar 23:1.

▸ Farkarkor 13, syos ḇe 22

Ro samswen ḇebor na, sisamberen fa smam pyum parkara na ido, nari naba ḇa. (Matius 5:23-26) Roi ḇefandun syadi faro snonkaku Kristen syakam iso, sisandik Yahwe I ma smamwarek sidang fa ḇyeoser pdef.​—Yohanes 13:34, 35; 1 Korintus 13:4, 5.

Snonkaku Kristen ḇesmai parkara kuker naek srar sesi, sisewar fa skain pyum kaḇer ḇo sun na ḇe kankain karkara ḇa. Syap 1 Korintus 6:1-8 naser Manwawan Paulus wos anun ḇyena ḇekur parkara ro fandu snonkaku Kristen sya. Kun naek koḇesi ḇe kankain karkara ido, ine nun roi ḇepyum ḇa faro Yahwe snonsnon Ḇyedi ma sidang ya. Matius 18:15-17 naser nyan rikyor faro snonkaku Kristen fa siso na insama sḇukimam pyum samswen ḇeba raris, wos kursof ḇaido ankarkar na. (1) Sisewar ḇepon fa sawos pyum samswen sena ro mankunsi resari. (2) Sifrur na kwar mboi jadi ḇa ido, sor snonkaku ḇemas oso ḇaido suru ro sidang fa dakfnoḇek pyan. (3) Sfandun wer ido, insape sḇuk parkara ani fa penatua sya smam na. Ryarirya ido, nari penatua sya sḇuk wos farkin ro Refo fa sifnoḇek sikam insama skain pyum kaḇer. Mboi, oso isya imewer iso wos farkin ro Refo ido, imbude na penatua sya sifrur panitia pengadilan.

Mboi, samswen ono naisya fandun fa kun na ḇe ḇar hukum, raris ḇaḇesisye, mansei ḇemamfaduru romawa, pembayaran tunjangan, klaim asuransi, kebangkrutan, ḇaido surat wasiat na. Snonkaku  Kristen oso kyinfir fa dun samswen ine ḇe hukum insama samswen ine namnai kuker payamyum ido, ima imbran sasar Paulus anun ḇyena ḇa.

Rofyor snonkaku Kristen ismai samswen ḇeba raris pemerkosaan, pelecehan anak, penyerangan, karawraw ḇefnak ḇa, ḇaido mamun ḇo rya fa ikofenḇair ḇe ḇeyuf papoik sya ido, ima imbran sasar Paulus wos anun ḇyena ḇa.

▸ Farkarkor 14, syos ḇe 14

Setan roḇa Ibiris syewar fa ifrowes snonkaku sya ro randak kwar, isoine ro yaf Eden anya. (Kejadian 3:1-6; Fasasna 12:9) Ifawi ifrur fa kakara koḇena namnis ḇa kwar ido, na napyan fa dawninyan ko fa kofrur roi ḇeḇyeḇa. (2 Korintus 4:4; Yakobus 1:14, 15) Syun nyan kakara ḇyena ro fararur polotik, agama, farḇaḇyan, hiburan, farkarkor, ma roi ḇebor ḇesena fa rya napyum kero.​—Yohanes 14:30; 1 Yohanes 5:19.

Ibiris fyawi swaf faro i fa ifrowes snonkaku koine nabor ḇa kwar. Inja, syewar pyum kaku fa ifrowes snonkaku ḇebor syadi, isyadi wer myam faro Yahwe kawasa Ḇyesi. (Fasasna 12:12) Kosasor ko ḇa ido, fawawas nari Ibiris ifrur fa kakara koḇena napyum ḇa. (1 Korintus 10:12) Raris, Yahwe ima imarisen fa farḇakḇuk ya kyain isof fyoro. (Matius 19:5, 6, 9) Mboi, snonkaku ḇebor smam farḇakḇuk ḇe wis ḇefandun mankun ḇa, inja simarisen ido simuk na monda. Felem ma munara ro televisi nabor sfasnai nyan kakara dunya ine. Komam pyum samande kakara dunya ine nafrowes awer ko.

Nyan ḇese Ibiris ḇyukifrowes ko iso komarisen fa komkei. (2 Timotius 3:4) Kosasor ko ḇa ido, muniwara nari koḇesyowi snonkaku Yahwe ryem sya ḇa. Rupa ra, imbude naek oso pyampum akurfasnai ḇeramuma ro penatua. (Ibrani 12:5) Ḇaido, imbude srar oso isasurem faro Yahwe fasasos Ḇyena ḇekur ḇe ḇebukor ro kina yadori.​—1 Korintus 11:3.

 Kosewar kaku insama Ibiris dawninyan nyan kakara koḇena ḇa. Mboi, komarisen koso Yahwe nyan kakara Ḇyena ma kokara monda faro ’roi ḇero boiyaswa na’ ḇesya kwar.​—Kolose 3:2; 2 Korintus 2:11.

▸ Farkarkor 16, syos ḇe 9

Kokame komarisen fa koprei ma kosmai aryawin ḇesrow kaku faro dafduf koḇena. (Yesaya 38:21; Markus 5:25, 26; Lukas 10:34) Baboine, nyan fa dokter ma ḇesesya sḇuk pararei na nabore. Rofyor kokara fa kosewar pararei, fandun fa koso pyum wos farkin ro Refo ya. Koswarepen snar Karajan Allah derer monda nari ḇefrur fa koprei ḇeri. Inja, komam pyum samande kosewar pararei ker awer rawo kofarander ari koḇena ḇe Yahwe I.​—Yesaya 33:24; 1 Timotius 4:16.

Koḇinkwanbur nyan pararei rosai monda rya kokmom nama ndramuma ro aryawin manwen na. (Ulangan 18:10-12; Yesaya 1:13) Inja, koḇe kosewar nyan pararei oso ido, kosewar pyum fa kofawi roi anna ndramuma royo, ma kakara rosai sfasnai ro roi anna. (Amsal 14:15) Koswarepen pyum snar Ibiris syewar marmar kaku fa ifrowes ko insama koso ro fararur manwen na. Inja, kokmom nyan pararei oso rya naser aryawin ḇeramuma ro manwen na ido, ipyum syadi koḇinkwanbur na.​—1 Petrus 5:8.

▸ Farkarkor 16, syos ḇe 18