1, 2. Moḇsa Yahwe ḇyaḇir rai rofyor myam koḇesewar kaku fa kankarkar ḇa?

 RAS OSO, rofyor romawa oso imbran ibur ro rumfarkor, isrow dompet ḇefo kuker pipi. Rosai nari ifrur ya? Imarisen ido, na ikram fasis na ḇae. Imbape, ḇyuk kaḇer dompet ani ḇe snonkaku ḇena ya. Rofyor snari ifawi roi ine, imarisen kaku ḇe romawa ḇyedine.

² Sinan sibor simarisen smam romawa sesya sankarkar ḇa. Snar Kma koḇedi ro nanki, Yahwe I, ima Allah ḇekaku. Inja, na imarisen rofyor kawos roi ḇekaku. (Mazmur 31:5) Rarirya, ’komarisen kofrur roi ḇekaku ro roi nakam’. (Ibrani 13:18) Kofrur roi ḇekaku ima roi ḇepyan ḇa. Mboi, rwama kawos moḇsa kofrur roi ḇekaku ro nyan rifyak ro kenem koḇena. Nari kawos kako roi ḇepyum rosai na kosmai rofyor kofrur roi nane.

3-5. (a) Rariso na kankar mankunko rai? (b) Rariso insama kankar mankunko ḇa?

³ Insama kankar snonkaku ḇesesya ḇa, fandun fa kofrur ḇepon na ḇe mankunko resari. Mboi, roi ine  napyan ḇa kako. Ro abad randak, naek srar ro sidang Laodikia sankar mankunsi kuker skara sifrur Allah imarisen kwar, ḇesyaḇo oroḇa. (Fasasna 3:17) Roi ḇeradine na nkur ko kako.

⁴ Yakobus fyasnai ḇo doḇe, ”Rofyor snon oso kyara [isyom faro Allah], ḇape fyarmku ramar ḇyedi ḇa, ḇyeankar mankundi, ma ḇaḇeari ḇyena nefromo.” (Yakobus 1:26) Kokara koma kofrur roi ḇepyum riḇeso kwar ima kankar mankunko, Allah nari myam monda kaker ko ḇo komasasor, kosnuk, ḇaido kankarkar. Inja, moḇsa na koḇeradine ḇa?

⁵ Komam ro fanin ido, na komam mankunko ḇae. Rarirya, kowasya Refo ido, komam manseiso kaku siko. Refo ikofenḇair roi ḇepyum ma ḇepyum ḇa koḇena insama kofadwer nyan kakara koḇena, roi kofrur na, ma roi kawos na fa namnis. (Wasya Yakobus 1:23-25.) Mboi, koisya kokara kopyum kwar ido, na kofrur fararwei ḇa. Inja, fandun fa koḇuk Refo fa komambir pyum mankunko. (Ratapan 3:40; Hagai 1:5) Nadi ya kako na ifnoḇek ko fa komambir pyum mankunko. Oso wer ido, kor fa Yahwe myambir pyum ko kako ma ifnoḇek ko fa kofawi kona roi ḇepyum ḇa kaker, insama kofadwer na. (Mazmur 139:23, 24) Koswarepen ”Yahwe dayin snonkaku ḇefarawrowes, ḇape ima fyanam faro snonkaku ḇena sne ḇenapes”.​—Amsal 3:32.

6. Rosai ḇefnai fa mambeswa imbeswa fandun fa suyawos roi ḇekaku?

⁶ Ro kina yadori, roi ḇefandun kaku iso kankarkar awer. Rofyor mambeswa imbeswa suyawawos pyum  ido, na sukyaryae su ma sukain kuker payamyum. Ankarkar nabor naisya ro farḇakḇuk ya. Rupa ra, snonkaku ḇefarḇuk kwar imbude dembuk snonkaku ḇese, myam sonin ḇeḇyeḇa na, ḇaido imarisen fasis snonkaku ḇese. Manfasfas Mazmur doḇe, ”Yaḇebati kuker snonkaku ḇeankarkar sya ḇa, ma yaḇinkwanbur snonkaku ḇeyokef mankundi.” (Mazmur 26:4) Inja, kankar koswasi syadi wer ro kakara koḇena ido, na farḇakḇuk koḇena napyum ḇa.

7, 8. Moḇsa sinan sya sḇuk wos ḇero Refo fa sfarkor romawa sesya insama sifrur roi ḇekaku rai?

⁷ Romawa sya kako sfarkor fa sifawi fandun fa sankarkar awer. Sinan sya sḇuk wos ḇero Refo fa  nfarkor roi ḇekaku yoḇ si. Farfyar ḇero Refo naisya nfasnaiḇair snonkaku ḇeankarkar sya. Rupa ra, Akhan i, kyarawraw, Gehazi dankarkar fa ismai pipi, ma Yudas kyaraw pipi ma ḇyoḇ Yesus i faro kumpan sarak ri 30.​—Yosua 6:17-19; 7:11-25; 2 Raja 5:14-16, 20-27; Matius 26:14, 15; Yohanes 12:6.

⁸ Refo dap kako farfyar ḇebor ḇekur ḇe snonkaku ḇeankarkar ḇa. Rupa ra, Yakub iwan romawa ḇyesya fa sun kaḇer pipi sisrow ani, Yefta ma inai binjos ḇyedi sufrur asas suḇena faro Allah, ma Yesus ifrur roi ḇekaku ḇesya kwar, syadi wer fafisu ismai samswen kaku. (Kejadian 43:12; Hakim 11:30-40; Yohanes 18:3-11) Farfyar nane nafnoḇek romawa sya fa sifawi kofrur roi ḇekaku ima roi ḇefandun nairi.

9. Moḇsa nari sinan sya sifnoḇek romawa sesya fa sankarkar ḇa rai?

⁹ Sinan sya sfarkor wos farkin ro Refo ḇefandun kaku ine, ”Mkoḇuk farkarkor faro snonkaku ḇesesya; inja, snaro naek srar mkofarkor mankunmkoḇa? Naek srar mkofarkor snonkaku besesya insa skaraw awer, ḇape mankun mkoido mkokarawke?” (Roma 2:21) Sinan sya sawos roi oso ḇoi sifrur ḇese ido, na romawa sesya sifawi. Sinan sya sfarkor romawa sesi fa sikofen roi ḇekaku, mboi mankunsi sifrur na ḇa ido, nari romawa sya sikmom. Ma, rofyor smam sinan sesi sankarkar ro roi kasun na kako ido, imbude na sakfrur ra sinan sesi. (Wasya Lukas 16:10.) Mboi, smam sinan sesya sawos roi ḇekaku ido, fafisu sakna romawa kwar, nari sawos roi ḇekaku kako.​—Amsal 22:6; Efesus 6:4.

10. Moḇsa na kankarkar ḇa rofyor kawawos kuker naek srar koḇesi?

¹⁰ Fandun fa kankar awer naek srar koḇesi kako. Awawos koḇena ro ras ḇe ras napyan kaku fa nfadwer ḇe farfyar ḇeḇyeḇa, ma wos anonef. Inja, kofar roi kofawi ḇaim ido, muniwara nari kofar pampam roi ḇekaku ḇa. Inja, ipyum syadi kofara pyum swadon koḇena. (Amsal 10:19) Kokofen roi ḇekaku ima kyurfasnai ḇa fandun fa kawos roi kokara, kofawi, ḇaido korower nakam. Oso wer ido, roi kofar na nkaku yo, ima fandun koḇena risyaḇa ḇaido ima ipyum ḇa, ma kofar kaḇer awer na kako. (1 Tesalonika 4:11) Snonkaku ḇeyawos naba imbude kyara iso ḇekaku ḇo dawoswarek i, ”Yawos monda raris moḇ yakara raya.” Imboi, Yahwe kawasa Ḇyesi koine, komarisen fa wos koḇena napyum ma nun sneprei.​—Wasya Kolose 4:6.

11, 12. (a) Rosai ḇefnai fa snonkaku ḇekram fasis sasar ḇyena ifrur samswen syadi mankundi wer? (b) Rofyor bati koḇedi oso ifrur sasar ḇeba, imbude rosai na kokara ya? (c) Moḇsa na kawos kakaku ḇe Yahwe organisasi Ḇyedi rai?

¹¹ Yahwe ḇyuk fararur ḇefarfnak ḇa ḇe penatua sya fa sifnoḇek sidang. Kokofen kakaku yoḇ si kada, na napyan fa sifnoḇek ko. Kukro? Rofyor koduf ḇo koraḇe dokter ido, na kokram fasis dafduf koḇena ro si ke? Kofrur rarirya ido, moḇsa na dokter imbe ifnoḇek ko rai. Rupa radiri, rofyor kofrur sasar ḇeba ido, kokram fasis awer na. Mboi, fandun fa kosrow penatua sya ma kokofenḇair kaku na ḇe si. (Mazmur 12:2; Farfyar 5:1-11) Imbape, koisya kofawi bati koḇedi ifrur  sasar ḇeba ido, na rariso? (Imamat 5:1) Na kokara ḇo koḇe, ”Ima bati yediri, inja na yakofenḇair ḇa.” Ḇaido, koswarepen snar penatua sya na sifnoḇek i fa fyadwer kenem ḇyedi ma wis ḇyena kuker Yahwe I fa nsambraḇ syadi wer ke?​—Ibrani 13:17; Yakobus 5:14, 15.

¹² Rofyor koser laporan, rupa ra laporan dinas koḇena ḇe Yahwe organisasi Ḇyedi, koser kaku na ḇo kankar awer. Kankar awer kako rofyor koser formulir perintis ḇaido formulir fararur ḇesena.​—Wasya Amsal 6:16-19.

13. Moḇsa kankarkar ḇa rofyor kofrur farḇaḇyan kuker naek srar koḇesi?

¹³ Naek srar Kristen sya fandun fa smam pyum sasewar sena fa nadwarek awer ḇaḇeari sena. Rupa ra, kopok koḇaḇoḇ awer rofyor koisya koro Balai Karajan ḇaido rofyor koḇaryas. Kopok kowan awer kako naek srar sya fa skoḇes ḇaido sḇoḇ pyan roiebor koḇena. Rofyor kor naek srar sya fa sfararur yoḇ ko ido, paik ya ibro, koḇak si raris ḇaḇyak kokofen kwar yoḇ si na. Koḇuk roi pamarenta sap kwar na, rupa ra asuransi kesehatan ḇaido cuti. (1 Timotius 5:18; Yakobus 5:1-4) Ma, rofyor naek ḇaido srar sḇuk fararur ḇe ko ido, kokara awer fa sifrur pyum syadi ko. (Efesus 6:5-8) Kun fasis awer oras koḇena faro roi ḇese, ma kofrur fararur sḇuk ḇe ko na raris moḇ kawos kwar ndraya.​—2 Tesalonika 3:10.

14. Snonkaku Kristen sifrur farḇaḇyan kayam ḇaim, rosai fandun fa sifrur ya?

¹⁴ Moḇsa kofrur farḇaḇyan kuker naek srar koḇesi,  rupa ra koḇuk pipi fa koḇaḇoḇ ḇaido insama ḇyukiḇaḇoḇ resari? Wos farkin ḇesrow ro Refo naisi: Kofrur surat perjanjian! Rofyor nabi Yeremia kyoḇes saprop ono, ifrur akta pembelian risuru. Saksi sya siso ḇefasepen oser ya, insape surat ansuya neḇekram fa nfasnaibos roi anna. (Yeremia 32:9-12; mam kako Kejadian 23:16-20.) Naek srar sia skara sifrur surat perjanjian ido, ima rya sikyar mankun ḇa faro naek srar sya. Mboi ḇekaku ya, sifrur roi ani insama naser awawos ḇa, fafko, ma rakrok na. Oso wer ido, koswarepen snar kokain pyum kuker naek srar ro sidang ima ḇyefandun syadi ro asas farḇaḇyan sairirya kam.​—1 Korintus 6:1-8; mam Fasfas Ḇepupes 30.

15. Moḇsa Yahwe myam snonkaku ḇeankarkar ro farḇaḇyan rai?

¹⁵ Fandun fa kawos roi ḇekaku ḇe snonkaku syakam, faro ḇe Saksi Yahwe ḇa sya kako. Yahwe myam kawos roi ḇekaku ima roi ḇefandun kaku nairi. ”Warnkyara ḇekaku ḇa Yahwe dayin na, mboi warnkyara ḇesrow nafrur fa imarisen.” (Amsal 11:1; 20:10, 23) Ro fyor iwara, warnkyara sḇuk ker na ro farḇaḇyan sena. Mboi, snonkaku ḇefarḇaḇyan riḇeso sankar ḇekoḇes sya kuker sḇuk warnkyara sena fa sifrur roiebor sena nek ḇaido nasabu kermkun syadi ro ḇaḇyak ḇekaku ḇyena. Baboine, snonkaku sifrur roi ine ro farḇaḇyan sena. Yahwe dayin ankarkar ro fyor iwara, ma baboine myam na rarirya kaker.

16, 17. Ankarkar ḇerariso fandun fa koḇinkwanbur na?

 ¹⁶ Kokam kosmai fafisu na ḇefrowes ko fa kankarkar, rupa ra fyor koḇe kosewar fararur, koser dokumen pamarenta sor na, ḇaido ujian ro rumfarkor. Ḇebor sya skara kankarkar, kopambarbar wos na, ḇaido koḇuk kankarem ḇefrur fa skara sasar nama roi ḇesasar ḇa nairi. Inja, na kokandor roi anna ḇa kukro Refo ikofenḇair ḇepon kwar snar ro rasras ḇepupes, nari snonkaku sya ”siswar mankunsi ḇardi ma sewomen faro pipi, . . . simewer roi ḇeḇyena”.​—2 Timotius 3:1-5.

¹⁷ Na komam ido, snonkaku ḇeankarkar sya rya sikenem pyum syadi. (Mazmur 73:1-8) Snonkaku Kristen oso imbude nya fararur wer ḇa, sankar i, ḇaido sifrur pyum i ḇa ro moḇ fyararur kukro dankarkar ḇa. Mboi, kankarkar ḇa ima roi ḇefandun syadi. Rosai ḇefnai ya?

18. Rosai ḇefnai fa kankarkar ḇa ima roi ḇepyum kaku rirya?

¹⁸ Baboine, samswen kaku fa kosrow snonkaku ḇeyawos ḇaido ḇefrur roi ḇekaku ma kokyar kaku si. Ine iso rari ḇepyum kaku. Ma, fandun fa kokam kona rari ine. (Mikha 7:2) Kakuḇae, snonkaku riḇeso skoryae ma skara kofawi royoḇa kukro kawos roi ḇekaku. Mboi, ono sisya sesyowi ko kako snar kofrur roi ḇekaku ma sikyar ko. Ro supswan ine ḇesiper, Saksi-Saksi Yahwe sifawi kaku si snar sankarkar ḇa. Snonkaku ḇeḇeso simarisen syadi sḇe Saksi sya fa siso ḇefararur kukro sifawi Saksi sima sankarkar ḇa. Ma, rofyor ḇefararur  sya sisasyar si snar sankarkar, na sisasyar Saksi sya ḇa.

19. Moḇsa kofrur roi ḇekaku na nawyae wis koḇena kuker Yahwe I rai?

¹⁹ Kofrur roi ḇekaku ro roi nakam ido, nari kona sneuser ḇepyum ma swaruser koḇena naknon. Na koḇaḇir raris Paulus i, fyas ḇo doḇe, ”Nkokyar nkosnesna nasren.” (Ibrani 13:18) Ḇefandun kaku ya, Kma koḇedi Yahwe I, iswar ko, myam ko, ma ḇyesyowi sasewar koḇena fa kankarkar ḇa ro roi nakam.​—Wasya Mazmur 15:1, 2; Amsal 22:1.