1, 2. Rosai ḇefnai fa koḇe komam hiburan na ido, fandun fa kokinfir pyum?

 KWARAPAN waḇe wan aibon oso, mboi ḇar oso ro aibon ani ipokem kwar. Rosai nari wafruri? Nari wan monda na ke? Ḇaido, wasawen kam na ke? Ḇaido, wasuf monda ḇar ḇepokem anya ḇo wan ḇepyum na?

² Hiburan dakmnis ra aibon ani. Imbude ḇeḇeso napyum, mboi ḇebor na napyum ḇa kukro naser  fararur farḇuk, mamun, ḇaido manwen na. Inja, koḇe komam hiburan na ido, na kokara radine ke, ’Marisen ayenairi, yaḇe yamam hiburan na ido, mankundaya!’ Ḇaido na kokara, ’Hiburan nakam napyum ḇa’ ke? Oroḇaido, na komewer komam ḇepyum ḇa na ḇo komam monda ḇepyum na ke?

3. Rosai fandun fa yakara ya rofyor yakinfir hiburan na?

³ Kokam komarisen fa kakmbran farma ma korower hiburan na, mboi nari kokinfir pyum na. Inja, fandun fa kokara pyum moḇsariso hiburan komam na nakyaren samsyom koḇena faro Yahwe I.

4. Wos farkin ḇero Refo risai na ḇefnoḇek ko fa kokinfir hiburan koḇena?

⁴ Rofyor koḇuk kenem koḇena faro Yahwe I, koḇeasas faro I nari koḇuk kenem koḇena fa kofarmyan ḇe I. (Wasya Pengkhotbah 5:4.) Koḇeasas nari ’kofrur roi nakam fa koksandik Allah’. (1 Korintus 10:31) Inema koḇuk kenem koḇena faro Allah ro fananjur ari ḇaido ḇaḇeḇaryas monda ḇa, mboi rofyor kokain ḇaido koisya korower ma komam hiburan na kako.

5. Samsyom ḇerariso fandun fa koḇuk faro Yahwe I?

⁵ Rosai kofrur ro kenem koḇena kam nya wis kuker samsyom koḇena faro Yahwe I. Naiso ḇefnai fa Paulus doḇe koḇuk baken ma kenem koḇena faro Allah, imnis ra farsarser ḇesren nari ḇefnai fa imarisen. (Roma 12:1) Yesus doḇe, ”Waswar [Yahwe] Allah bedi kuker sne ḇesiper ma rur bedi ḇesiper  ma karkara bena ḇesiper ma samambraḇ bena kam.” (Markus 12:30) Komarisen koḇuk roi ḇepyum syadi faro Yahwe I ḇesya kwar. Ro Israel fafisu naiwara, snonkaku oso imbe fyarser aiwan faro Yahwe ido, fandun fa ḇyuk aiwan ḇepyum. Aiwan ani iduf ido, nari Allah imewer na. (Imamat 22:18-20) Rarirya kako, bisa Yahwe imewer faro samsyom koḇena. Kukro?

6, 7. Moḇsa na hiburan koḇena nakyaren samsyom koḇena faro Yahwe I?

⁶ Yahwe ikofenḇair ḇe ko ḇo doḇe, ”Fandun fa mkosren, snar aya ine Yasren.” (1 Petrus 1:14-16; 2 Petrus 3:11) Yahwe imarisen monda faro samsyom ḇesren koḇena. (Ulangan 15:21) Kofrur roi Yahwe imewer kaku na raris fararur farḇuk, mamun, ḇaido roi ḇeser manwen na ido, nari samsyom koḇena nasren ḇa. (Roma 6:12-14; 8:13) Oso wer ido, Yahwe imewer kaku rofyor komarisen faro hiburan ḇerarirya. Nari nane nafnai fa samsyom koḇena nasren ḇa, Yahwe na imewer na, ma wis koḇena kuker I namuk.

⁷ Inja, moḇsa na kokinfir pyum hiburan na rai? Wos farkin rosai na ḇefnoḇek ko fa kofawi hiburan rosai monda ḇepyum na ma ḇepyum ḇa na?

8, 9. Hiburan ḇemnis rariso koḇinkwanbur na? Rosai ḇefnai ya?

⁸ Baboine, hiburan naisya nabor kaku. Komam ḇeḇeso napyum faro snonkaku Kristen, mboi ḇebor na namnis ḇa kaku. Ḇepon ya, rwama komam hiburan ḇemnis rariso fandun fa koḇinkwanbur na.

 ⁹ Felem nabor, situs web, roi sfasnai ro televisi, rofafnak ro elektronik, ma musik, naser fararur farḇuk, mamun, ḇaido manwen na. Roi ḇepyum ḇa sfasnai anna rya napyum, ma sia sifrur na ḇe roi ḇefrur kamambrif. Inja, snonkaku Kristen sya fandun fa sisasor pyum si. Spampum hiburan ḇemnis ḇa kuker Yahwe parenta ḇesren Ḇyena. (Farfyar 15:28, 29; 1 Korintus 6:9, 10) Kofrur rarirya kada, kofasnai faro Yahwe snar komewer kaku roi ḇepyum ḇa na.​—Mazmur 34:14; Roma 12:9.

10. Kokinfir hiburan ḇepyum ḇa ido, rosai nari kosmai na?

¹⁰ Snonkaku ḇeḇeso skara smam hiburan ḇeser mamun, fararur farḇuk, ḇaido manwen na, nama roi ḇesasar ḇa. Soḇe, ’Sasar oḇa! Na yakfrur roi ḇeradine ḇa.’ Kokara radine ido, kankar ko. Refo ya doḇe, ”Sne ya dankarkar syadi ro rosai monda ma idafdif.” (Yeremia 17:9) Komarisen faro hiburan Yahwe imewer na ido, na samswen fa kopampum roi ḇepyum ḇa na. Komarisen ker faro hiburan ḇerarirya ido, nari fawas mura kokara roi anna nsasar ḇa. Muniwara, sneuser koḇena napup ma rofyor koḇe kokinfir roi ḇesasar, na sneuser koḇena nbuk swarapepen ḇe ko ḇa kwar.​—Mazmur 119:70; 1 Timotius 4:1, 2. 

11. Rariso Galatia 6:7 ifnoḇek ko fa kokinfir hiburan koḇena rai?

¹¹ Refo ya doḇe, ’Rosai snonkaku sya sker ma skekef na nari sinek na.’ (Galatia 6:7) Komarisen faro hiburan ḇepyum ḇa na ido, nari kakfrur roi ḇepyum ḇa. Snonkaku riḇeso simarisen smam hiburan ḇefasnai fararur farḇuk, muniwara sakfrur rarirya.  Imbape, koma Yahwe ḇyuk fafnoḇek ḇe ko fa kokinfir pyum hiburan risai koḇe komam na.

12. Rosai nari ḇefnoḇek ko fa kokinfir pyum hiburan na?

¹² Kofawi hiburan ḇeḇeso namnis ḇa kukro nasnai kaku, rarirya koḇinkwanbur na. Mboi, kofawi mankun ḇa hiburan oso napyum ke roḇa ido, na rariso? Yahwe ḇyuk maro ko ḇa sasyos faro rosai bisa komam, korower, ḇaido kowasya na. Imbape, imarisen koḇuk sneuser ḇesmai farkarkor kwar ro Wos Refo ya fa koḇukimam roi nane. (Wasya Galatia 6:5.) Yahwe ḇyuk wos farkin, isoine knam ro kakaku ḇekofenḇair rosai imarisen na. Nane nafnoḇek ko fa kofarkor sneuser koḇena. Mura, kofawi rosai Yahwe imarisen na ido, na kofrur snemuk ḇepyum ḇefnai fa imarisen.​—Efesus 5:17.

13. Rosai ḇefnai fa hiburan snonkaku Kristen oso kyinfir na, naḇesisye kuker snonkaku ḇesesya? Mboi, rosai ḇefandun syadi ya?

¹³ Komam kada, rosai snonkaku Kristen oso kyinfir na, naḇesisye kuker snonkaku ḇesesya. Rosai ḇefnai ya? Kukro marisen koḇena namnis kam ḇa. Oso wer ido, rosai snonkaku oso imarisen na, imbude snonkaku ḇesesya simarisen na ḇa. Imbape, ḇefandun syadi iso snonkaku Kristen syakam na skinfir pyum imnis kuker wos farkin ro Refo ya. (Filipi 1:9) Kokara pyum roi ine ido, nari kokinfir pyum hiburan koḇena imnis Allah marisen Ḇyena.​—Mazmur 119:11, 129; 1 Petrus 2:16.

14. (a) Rosai fandun fa kokara wer ḇekur oras koḇena? (b) Anun rosai Paulus ḇyuk na?

 ¹⁴ Roi ḇese fandun fa kokara na iso, barbor ro oras koḇuk faro hiburan na. Naiso ḇefasnai rosai komam ḇe roi ḇefandun syadi. Kofarmyan faro Yahwe I ro kenem koḇena naiso roi ḇefandun syadi. (Wasya Matius 6:33.) Mboi kofawi ḇa ḇo, hiburan na nafnak oras nabor koḇena. Paulus ḇyuk anun ḇo doḇe, ”Mkomam pyum nyan mkokenem raya, insama mkokenem raris snonkaku ḇefawinanem, mboi raris snonkaku ḇefawinanem ḇa awer. Mkoḇuk oras mkoḇena kuker payamyum kaku.” (Efesus 5:15, 16, Terjemahan Dunia Baru [NW]) Inja,  komam pyum fa oras koḇena nabro awer faro hiburan na. Fararmyan naiso roi ḇefandun syadi ro kenem koḇena.​—Filipi 1:10.

15. Moḇsa kokadaunwarek mankunko ro hiburan na ḇefnai fa wis koḇena kuker Yahwe I namuk?

¹⁵ Nasnai kwar, fandun fa kopampum hiburan ḇemnis ḇa kuker Yahwe marisen Ḇyena. Mboi, kokmom faro hiburan oso ido, na rariso? Fandun fa kosasor ko kako ke? Kwarapan roi ine. Rofyor wambran ro nyan mkun ro bon ḇekaki, na wambran fanam ro fofen andir ya ke? Oroḇa. Komewer komar ido, nari koḇinkwanbur roi ḇemun na ḇae. Hiburan kokinfir na kako ryadiri. Refo ya doḇe, ”Ḇinkwan wemin bena ro roi ḇeḇyeḇa na.” (Amsal 4:25-27) Inja, koḇinkwanbur hiburan kofawi kaku ḇe hiburan ḇeḇyeḇa monda ḇa, mboi koḇinkwan kako ro hiburan ḇefnai fa kokmom roi anna napyum ke nafnai fa wis koḇena kuker Yahwe I namuk.

16. (a) Roi ḇeḇeso risai Yahwe dayin na? (b) Moḇsa kofasnai koma kayin rosai Yahwe dayin na?

¹⁶ Manfasfas Mazmur fyas, ”Ḇeswar Yahwe I mkoya, mkayin roi ḇeḇyeḇa na.” (Mazmur 97:10) Refo ya ikofenḇair Yahwe kakara Ḇyena ma rosai ḇyaḇir na. Kwarapan roi wafarkor na nafnoḇek Au fa nwa kakara raris moḇ Yahwe kyara raya. Rupa ra, kofarkor fa kofawi kwar Yahwe ima dayin ”ramar ḇeankarkar, ma ḇramin ḇemun snonkaku ḇesasar ḇa, sne ḇefrur aw ḇeḇyeḇa na, ma wemin ḇefrar ḇeri fa  ḇefrur roi ḇeḇarḇor”. (Amsal 6:16-19) Kofarkor kako fa koḇinkwanbur fararur farḇuk, samsyom amfyanir, mon, masasor, dosam, ayin, masaser, munara marares, ma roi ḇesena. (Galatia 5:19-21) Ausya mam wos farkin ḇero Refo nane fa kwinfir hiburan Bena ke? Komarisen koso Yahwe marisen Ḇyena ro nyan kenem koḇena kam, rofyor kowarpu ḇesesya oroḇaido rofyor kemir monda. (2 Korintus 3:18) Ḇekaku ya iso, rosai kokinfir rofyor kemir monda naiso ḇefasnai kenem kaku koḇenairi.​—Mazmur 11:4; 16:8.

17. Rofyor kokinfir hiburan ḇaim, rosai kokara ḇepon resari?

¹⁷ Rofyor koḇe kokinfir hiburan na, kokarapan resari, ’Roi yakinfir nane nari nakyaren ḇaḇebati ayena kuker Yahwe I ke? Moḇsa nari nakyaren sneuser ayena rai?’ Rwama komam wos farkin ḇese riḇeso wer ḇefnoḇek ko fa kokinfir hiburan na.

18, 19. (a) Anun risai Paulus ḇyuk ḇe ko na? (b) Wos farkin risai wer nari ḇefnoḇek ko fa kokinfir hiburan na?

¹⁸ Kokinfir hiburan ima imnis ra kokinfir rosai nari koḇe koser ro swaruser koḇena. Paulus fyas ḇo doḇe, ”Mkokara ker roi ḇekaku na, roi ḇefandun nakam, roi Allah imarisen nakam, roi ḇesren nakam, roi nakam ḇeyun saswar, roi ḇesyowi nakam, roi ḇepyum nakam, ma roi nakam ḇeyun sanandik.” (Filipi 4:8, NW) Koser roi ḇepyum ḇeradine ro swaruser koḇena ido, nari kokara raris manfasfas Mazmur ḇekofen, ”Iḇye kada wos ḇesasyar ro swadon yedi ma waswasen ro sne ayedi nafrur fa wamarisen, sye Yahwe.”​—Mazmur 19:14.

 ¹⁹ Kwarapan, ’Rosai yaser ro swaruser ayena? Rofyor yamam felem oso raposa, yakara roi ḇeyun marisen na ke? Yasmai sneprei snar yana sneuser ḇesren ke? (Efesus 5:5; 1 Timotius 1:5, 19) Yamkei fa yaḇenadi ḇe Yahwe I ke? Ḇaido yakara sasar isya ke? Hiburan ine ifrur fa yakara mamun ḇaido fararur farḇuk na ke? (Matius 12:33; Markus 7:20-23) Nane nafrur fa yaso ”nyan famfnom ro supswan ine” ke?’ (Roma 12:2) Kokarem pyum kaku fakfuken nane kada, na kofawi rosai fandun fa kofrur wer insama wis koḇena kuker Yahwe I nsambraḇ pdef. Komarisen koḇenadi raris manfasfas Mazmur ḇekofen, ”Ḇe mka yesuine insama yamam awer roi ḇeyun roi noḇa.” *—Mazmur 119:37.

20, 21. Rofyor kokinfir hiburan koḇena, rosai ḇefnai fa kokara resari snonkaku ḇesesya sneuser sena?

²⁰ Wos farkin ḇese fa koswarepen wer iso, ”Iḇye kofrur rosai komarisen anna ḇape roi ḇeḇor komarisen anna nbawes kankenem kobenaḇa. Snonkaku oso ifararur faro fandun mankundi ḇyena ḇardi awer. Snonkaku oser-oser ifararur faro fandun snonkaku ḇese kako.” (1 Korintus 10:23, 24) Koso marisen koḇena monda awer. Kokara pyum kaku roi kokinfir na nawyae naek srar koḇesi.

²¹ Sneuser koḇena namnis kam ḇa. Rupa ra, imbude  komam roi sfasnai ro televisi nakyaren sneuser koḇena ḇa. Mboi rofyor kofawi roi anna nakyaren naek srar koḇesya sneuser sena ido, rosai nari kofruri? Kona hak fa komam na, mboi kokinfir fa komam awer na. Kukro? Komewer kofrur sasar faro naek srar koḇesi, ḇaido ’koḇesasar faro Kristus i’. (1 Korintus 8:12) Rarirya, komewer kofrur rosai monda nari ḇefnai fa naek srar koḇesi skarkar.​—Roma 14:1; 15:1; 1 Korintus 10:32.

22. Moḇsa kofasnai syowi koḇena rofyor naek srar koḇesi skinfir hiburan sena?

²² Felem komam na, roi kowasya, ḇaido roi ḇese nakyaren sneuser koḇena mboi nakyaren ḇesesya sneuser sena ḇa ido, na moḇsa koḇerai? Snar koswar ma koḇesyowi naek srar koḇesya, inja na kodif si ḇa insama siso marisen koḇena. Snonkaku oso ḇeyun oto ifawi imbude snonkaku sya na siruren kaku ḇaido sifrar fawas ro i. Mboi, sikam sun pyum oto sena fa nafrar ro moḇ oser. Rupa radiri, naek srar koḇesya koso kam wos farkin ḇero Refo, mboi kona kakara ḇemnis kam ḇa ḇekur ḇe hiburan risai komarisen na.​—Pengkhotbah 7:16; Filipi 4:5.

23. Rosai ḇefnoḇek ko fa kokinfir pyum hiburan na?

²³ Inja, rosai nari ḇefnoḇek ko fa kokinfir pyum hiburan na? Isoine koḇuk sneuser koḇena ḇesmai farkarkor kwar ro wos farkin ro Refo ma koswar kaku naek srar koḇesi. Kofrur rarirya ido, nari kosmai marisen kukro ’kofrur nakam fa koksandik Allah’.