1, 2. Rosai fandun fa kofawi ro Ibiris ma rur ḇeḇarḇor sya?

 KANKENEM ro dunya babo Yahwe ifrur anya nari ipyum kaku. Inja, kenem koḇena na namnis Allah marisen Ḇyena ro randak ya. Mboi baboine, koisya ro papoik Ibiris ma rur ḇeḇarḇor sya kaker. (2 Korintus 4:4) Komam si ḇa, mboi kofawi sisya ma sisambraḇ kaku.

² Ro farkarkor ine, nari kawos moḇsa koḇebati pdef kuker Yahwe I ma kokadaunwarek mankunko ro Ibiris i. Yahwe ḇyeasas nari ifnoḇek ko. Mboi, fandun fa kofawi moḇsa Ibiris ma rur ḇeḇarḇor sya sifrowes ma smun ko.

3. Rosai Ibiris imarisen ifrur faro ko?

³ Ibiris kyursof snonkaku sya ḇo doḇe sisyom Yahwe I snar sfandun mankun si ma nari simnai sifarmyan ḇe Yahwe I fyor sismai fafisu ḇesamswen. (Wasya Ayub 2:4, 5.) Fafisu snonkaku oso imarisen fyarkor fa fyawi Yahwe I, Ibiris ma rur ḇeḇarḇor sya smam roi ine, inja sisewar fa sidwarek i. Ma, simsor kaku rofyor sia sḇuk kenem sena ḇe Yahwe I ma sebaptis. Refo ḇyair Ibiris i ḇe ”singa (aiwan ḇeyan  ḇepek) ḇeaur ma ḇesewar snonkaku fadoren ḇepek” si. (1 Petrus 5:8) Ibiris imarisen ifrur fa wis koḇena kuker Yahwe I naḇyeḇa.​—Mazmur 7:1, 2; 2 Timotius 3:12.

4, 5. (a) Rosai na Ibiris ipok fa ifrur ḇe ko ḇa? (b) Moḇsa ’kosampum Ibiris’ i rai?

⁴ Ḇape, komkak awer faro Ibiris ma rur ḇeḇarḇor sya. Yahwe na idwarek rosai imbe sifrur yoḇ ko na.Yahwe ḇyeasas snar ”raryur ḇeba” ro snonkaku Kristen ḇekaku sya nari simkei fa sisasyar ro ” kandera  ḇeba”. (Fasasna 7:9, 14) Ibiris na idwarek roi ine ḇaḇeri kukro Yahwe kyadaunwarek kawasa Ḇyesi.

⁵ Kofanam pdef faro Yahwe ido, Ibiris na imuk wis koḇena kuker Yahwe I ḇa. Sinan ḇyuk kakyar ro Wos ḇesren Ḇyena ḇo doḇe, ”Yahwe na fyanam faro mko rofyor mkofanam pdef faro I.” (2 Tawarikh 15:2; wasya 1 Korintus 10:13.) Allah manfamyan ḇebor Ḇyesya raris Habel, Henokh, Nuh, Sara, ma Moses i, sisambraḇ fa sisampum Ibiris i kukro sfanam pdef ḇe Yahwe I. (Ibrani 11:4-40) Inja, na kakfrur rarirya. Refo ḇyeasas, ’Mkosampum Ibiris, rarirya nari ifrarbur mko!’​—Yakobus 4:7.

6. Moḇsa Ibiris myun ko rai?

⁶ Ibiris ifawi Yahwe idwarek rosai na ifrur faro ko na, mboi na ḇyesewar pdef fa ifrur wis koḇena kuker Allah naḇyeḇa. Baboine, Ibiris myun ko kuker nyan nabore. Ro taun risyaran Ibiris ḇyuk fafrowes nabor kwar. Fafrowes riḇeso rosai ḇyuk kwar na?

7. Rosai ḇefnai fa Ibiris myun Yahwe kawasa Ḇyesi?

⁷ Manwawan Yohanes fyas ḇo doḇe supswan ine ḇesiper isya ro papoik Ibiris. (1 Yohanes 5:19) Ibiris iso ḇepoik dunya ḇeḇarḇor ine, ma imarisen kako fa ḇyepoik Yahwe kawasa Ḇyesi. (Mikha 4:1; Yohanes 15:19; Fasasna 12:12, 17) Ibiris ifawi swaf ḇyedi nabor ḇa kwar. Inja, ḇyesewar kaku fa myun kokam insama kosouser faro Sinan I ḇa. Fyorno ido, Ibiris myun ko fa nasnaibos, mboi myun ko kako kuker nyan kofawi ḇa na.

8. Rosai fandun fa snonkaku Kristen oser-oser sifawi kaku ya?

 ⁸ Ro Efesus 6:12 doḇe, ”Kofaḇri . . . fakosampum rur ḇeḇarḇor ro farsyos sansoren.” Snonkaku Kristen oser-oser koḇesewar kaku fa kosampum Ibiris i ma rur ḇeḇarḇor sya. Kofawi ḇeḇuk kenem sena kwar fa sfarmyan ḇe Yahwe I sakso ro faḇaḇri ine. Ro Manwawan Paulus syapram ḇyedi faro sidang ro Efesus, danun snonkaku Kristen sya rarwan rikyor fa ’sores nako’.​—Efesus 6:11, 13, 14.

9. Rosai Ibiris ma rur ḇeḇarḇor sya simarisen sifrur faro ko na?

⁹ Ibiris ma rur ḇeḇarḇor sya sisewar kaku fa sifrowes ko kuker nyan nabore. Kosampum fafrowes ḇyena kwar, mboi na kosambraḇ fa kosampum farawrowes ḇese ḇyena ḇa. Ibiris syewar ḇaḇeraryar ḇa koḇena insama ifrowes kaku ko fa kosapi. Mboi, na koḇinkwanbur i kukro Refo ikofenḇair fafrowes ḇyena ḇe ko. (2 Korintus 2:11; mam Fasfas Ḇepupes 31.) Ḇepon ya iso kakyar faro rur ḇeḇarḇor sya.

10. (a) Kakyar faro rur ḇeḇarḇor sya ido rosairiri? (b) Moḇsa Yahwe myam rur ḇeḇarḇor sya rai?

¹⁰ Kakyar faro rur ḇeḇarḇor nya wis kuker Ibiris fararur ḇyena, rupa ra ḇeyapḇair ras ḇarpon iyama, ḇena robor, ḇena fui, ḇeyawos kuker snonkaku ḇemar sya. Refo doḇe roi ḇena wis kuker rur ḇeḇarḇor sya ima roi ḇefrur ayin kaku ma Yahwe kawasa Ḇyesi koine komewer kofrur roi ine. (Ulangan 18:10-12; Fasasna 21:8) Inja, fandun fa koḇinkwanbur roi ḇebor ḇena wis kuker rur ḇeḇarḇor sya.​—Roma 12:9.

11. Komarisen kofawi roi ḇena wis kuker rur ḇeḇarḇor sya ido, rosai na kosmai ya?

 ¹¹ Ibiris ifawi napyan fa ifrur ko insama kokyar faro fararur ro manwen sya rofyor komarisen fa kofawi roi ḇena wis kuker rur ḇeḇarḇor sya. Roi nane nari nafrur fa wis koḇena kuker Yahwe I naḇyeḇa.

12. Moḇsa Ibiris dawninyan kakara koḇena rai?

¹² Ibiris ḇyesewar kaku fa ifrur snonkaku sya sikmom. Fawawas ifrur fa snonkaku sya sikmom insama skara roi ḇepyum ima iḇyeḇa ma ḇeḇyeḇa ima ipyum. (Yesaya 5:20) Ibiris ifrur fa komam anun ḇero Refo nun payamyum ḇa ma kosmai marisen rofyor koso awer farkankin ro Allah kada.

13. Moḇsa Ibiris ifrur fa snonkaku sya sikmom rai?

¹³ Ibiris fafrowes oser ḇyedi ḇe fyoro kwar iso ifrur fa snonkaku sya sikmom. Ro Yaf Eden, ifrur fa Eva ikmom kuker ifuken, ”Kaku Allah doḇe snar mupok muyan awer aibon ro aiknam nakam ro yaf ine ke?” (Kejadian 3:1) Ḇarpur mura ro Ayub fafisu ḇyedi, Ibiris ifuken Yahwe I ro ḇarpon malaikat sya, ”Rofyor Ayub ismai roi noḇa ido, na imkak pdef faro Au ke?” (Ayub 1:9) Yesus ḇyebaptis raposa, Ibiris dawos sampum i ḇo doḇe, ”Kaku Au Rumkun Allah, buk sasoser insa karu nane nemamami.”​—Matius 4:3.

14. Rariso Ibiris ifrur fa snonkaku sya sikmom kuker smam roi ḇena wis kuker manwen ḇe roi ḇemun ḇa?

¹⁴ Baboine, Ibiris ḇyuk fafrowes ḇemnis radirya insama snonkaku sya sikmom. Ifrur fa roi ḇeḇeso ḇena wis kuker rur ḇeḇarḇor rya naser roi ḇemun ḇa,  mura skara nama nsasar ḇa. Ma, snonkaku Kristen ḇeḇeso skara roi ine na myun si ḇa. (2 Korintus 11:3) Inja, moḇsa kokadaunwarek mankunko rai? Rariso kokyar na kosapi ro Ibiris fafrowes ḇyena ḇa? Rwama komam roi risuru Ibiris ḇyukifrowes ko, isoine hiburan ma nyan pararei na.

15. Rariso hiburan kokinfir na nḇair kosowarpu kuker rur ḇeḇarḇor sya?

¹⁵ Baboine, felem, vidio, roi sfasnai ro televisi, rofafnak ro elektronik, ma situs ro Internet sfasnai rur ḇeḇarḇor, fui, ma manwen sya nabor kaku. Sibor skara roi nane napyum ma nmun si ḇa. Imbape, sifawi ḇa ḇoi roi nane na nmun si. Snonkaku oso na daksowarpu ro roi ḇena wis kuker rur ḇeḇarḇor sya ro ḇemamnanem mak, smam ro ḇramin, kartu tarot, ma bola kristal. Ibiris iyokef roi na ḇemun si ma ḇyesewar kaku fa roi anna rya nasnai mankun ḇa, napyum, ma nafrur marisen. Oso wer ido, ifrur fa oso kyara roi anna nun roi ḇemun ḇa kukro myam monda ḇo ifrur na ḇa. Rosai ḇefnai fa nyan kakara ḇeradine nari nun roi ḇemun?​—1 Korintus 10:12.

16. Rosai ḇefnai fandun fa kopampum hiburan ḇena wis kuker manwen sya?

¹⁶ Ibiris ma rur ḇeḇarḇor sya na sipok sifawi kakara koḇena ḇa. Mboi, na sifawi marisen ma nyan kakara koḇena kuker smam roi kokinfir ḇe mankunko ḇaido kina koḇansi, hiburan kokinfir na kako. Ibiris ma rur ḇeḇarḇor sya na sifawi komarisen fa kakfawi si rofyor kokinfir felem, rakrok sonker, ḇaido  syap ḇefasnai ḇe ḇeyuf robor sya, rur ḇeḇarḇor ḇesower snonkaku, ḇena manwen, poncana, ḇaido ḇesena kam. Mura, sifrur ko fa kosun ro fararur ḇena wis kuker rur ḇeḇarḇor sya.​—Wasya Galatia 6:7.

17. Rariso Ibiris ifrowes ko kuker ḇyuk marisen koḇena fa koprei insama kosun ro denem ḇyena?

¹⁷ Ibiris ḇyuk kako marisen koḇena fa koprei. Baboine, snonkaku ḇebor siduf marḇak. Imbude sia sisewar fa siprei ro dafduf sena, ḇoi nun bon ḇepyum ḇa. (Markus 5:25, 26) Imbude simkak, inja sisewar nyan kaku insama siprei. Mboi, snonkaku Kristen koine fandun fa kosasor ko insama kokinfir awer sasewar  pararei sun ro ”samambraḇ ro rur ḇeḇarḇor”.​—Yesaya 1:13.

18. Nyan pararei ḇerariso fandun fa snonkaku Kristen sḇinkwanbur na?

¹⁸ Snonkaku ono ro Israel ḇepon siwara, sisya sḇuk ”samambraḇ ro rur ḇeḇarḇor” ine. Yahwe ikofen yoḇ si, ”Rofyor mkokanow ḇramin mkoḇena fa mkor ido, Yamewer Yamam mkondi. Mkofarser nadi nabor rariryano, Yarower na ḇa.” (Yesaya 1:15) Kwarapan: Yahwe imewer ryower nadi sena! Inja, ko kako komewer fa kofrur roi risai monda na ḇefnai fa wis koḇena kuker Yahwe I naḇyeḇa ḇaido imewer ḇyuk fafnoḇek ḇe kondi, syadi wer rofyor koduf. (Mazmur 41:3) Kosewar insama kofawi sasewar pararei koḇena nya wis kuker manwen ḇaido rodur sya ke roḇa. (Matius 6:13) Komam mboi imbude nya wis kuker roi anna ido, fandun fa koḇinkwanbur na!​—Mam Fasfas Ḇepupes 32.

19. Rosai ḇefnai fa snonkaku sya simkak faro Ibiris i?

¹⁹ Sino skara snar Ibiris ma rur ḇeḇarḇor sya sima sisya ḇa. Mboi, ḇesesya sikyar sima sisya snar smam ro mankunsi. Rur ḇeḇarḇor ine ifrur makak si ma sifrur wis kuker si rawo siwarai rarirya kwar. Sia kako sifrur snonkaku ḇesesya simkak kuker fawar manwen ḇemun snonkaku sya. Sia simarisen faro fawar ani ma sfawar na wer ḇe ḇesesya. Inja, snonkaku ḇebor simkak faro Ibiris i.

20. Moḇsa na kokara ḇa ḇo kakfawar Ibiris ankarkar ḇyena rai?

²⁰ Kwarapan roi ine: Ibiris imarisen snonkaku sya  simkak faro i. (2 Tesalonika 2:9, 10) Ibiris ima dankarkar kukro fyawi moḇsa dawninyan snonkaku kakara sena insama simarisen faro manwen sya. Roi nane nafrur fa sikyar faro roi ḇekaku kam ḇa na. Imbude sia sfawar rosai smam ma srower kwar na. Sfawar kaḇer na ido, sfawar syadadi na wer. Komewer koso Ibiris i fa kofawar pampam roi ḇefrur makakak ḇefasnai manwen sya.​—Yohanes 8:44; 2 Timotius 2:16.

21. Na kofawar rur ḇeḇarḇor sya ḇa, mboi roi ḇepyum rosai na kawos ya?

²¹ Rofyor Yahwe manfamyan Ḇyedi oso nya fawar ḇena wis kuker rur ḇeḇarḇor, na ipok fyawar awer na ḇe snonkaku ḇesesya. Yahwe kawasa Ḇyesi simkak awer faro roi na Ibiris ma rur ḇeḇarḇor sya sifrur na. Mboi, fandun fa komam monda faro Yesus ma Yahwe papoik ḇyuk ḇe i na. (Ibrani 12:2) Yesus fyawar rur ḇeḇarḇor sya faro manfamyan ḇyesi ḇa. Ima myam monda faro abar Karajan ma ”fararur ḇeba Allah ifrurna”.​—Farfyar 2:11; Lukas 8:1; Roma 1:11, 12.

22. Wos snemuk rosai kun ya?

²² Koswarepen snar Ibiris imarisen fa wis koḇena kuker Yahwe I naḇyeḇa. Imarisen ifrur rosai monda fa wis koḇena namuk. Mboi, kofawi Ibiris denem ḇyena kwar. Inja, kun snemuk fa kopampum roi risai monda ḇena wis kuker rur ḇeḇarḇor sya. Na kopok ’koḇuk fafisu faro Ibiris awer’ fa ifrur snemuk koḇena nsambraḇ ḇa. (Wasya Efesus 4:27.) Kosampum Ibiris i, ma na koḇinkwanbur denem ḇyena ma kosmai payamyum ro Yahwe fadadiren Ḇyedi.​—Efesus 6:11.