1, 2. Kosmai samswen ro farḇakḇuk koḇena kyurfasnai farḇakḇuk koḇena namnis ḇa kwar ke? Fasnaiḇairpan.

 FARḆAKḆUK ima roi ḇepyum ḇeramuma ro Yahwe I. Ine ifrur fa snonkaku sya na simarisen syadi. Mboi, samswen ro farḇakḇuk na naisi. Syadi wer, samswen ḇekur mambeswa imbeswa rya nabro ḇa, nafnai fa sufanam su wer ḇa kwar.

² Na kokandor ḇa fafisu komam farḇakḇuk koḇena nasmai samswen. Ine kyurfasnai ḇa farḇakḇuk koḇena namnis ḇa kwar. Mambeswa imbeswa ḇesmai samswen ḇemarḇak kaku ro farḇakḇuk sena kako sia sismai payamyum snar sifrur wis sena fa namnis kaḇer ma sisambraḇser farḇakḇuk sena. Moḇsa sifrur na rai?

3, 4. Rosai na ḇekur mambeswa imbeswa ḇefarḇuk kwar sya?

³ Farḇakḇuk ima ḇye snonkaku ḇesisye risuru fa suḇeoser. Imbude marisen, kakara, kenem, moḇ surama ya, ma adat suḇena naḇesisye. Inja, snonkaku oso imbe myambir ma fyawi pyum kaku swari nane nefandun swaf ma sasewar.

 ⁴ Mboi fawas mura, mambeswa imbeswa sumam monda ker fararur suḇena oser-oser rawo nafnai fa sufanam su wer ḇa. Rya oser-oser ikenem ro mankundi. Rosai na ḇefnoḇek su fa sufanam su wer?

5. (a) Rosai ḇefnoḇek snonkaku Kristen oso insama fyanam faro swari? (b) Ro Ibrani 13:4, moḇsa komam farḇakḇuk ya rai?

⁵ Yahwe ḇyuk wos anun ḇepyum kaku insama mankunko ma koswasi kofanam faro I ma faro koswasi kako. (Mazmur 25:4; Yesaya 48:17, 18) Yahwe iwan fa snonkaku syakam sesyowi farḇakḇuk ya. (Ibrani 13:4) Komam roi oso ḇyesyowi ma ḇyefandun kaku ido, na komamwarek ma komyof kaku i. Yahwe imarisen fa komam farḇakḇuk ya ryadiri.

6. Ro Matius 19:4-6, moḇsa Yahwe myam farḇakḇuk ya rai?

⁶ Yahwe iso ḇefrur farḇakḇuk ḇerandak ya. Roma ḇyedi, Yesus i, doḇe, ”Mkowasya ḇake, ḇefrur snonkaku sya ro randak ya ifrur snon ma bin? Ma ikofen: Rarirya snonya nari ibur snari ma kmari ma ḇyeoser kuker swari, isof sukam suḇe ḇaken oser. Rarirya suḇe suru werḇa ḇoi suḇe oser. Inja, rosai Allah ḇyefa ḇeḇeoser kwar, snonkaku sipok sfaspar i ḇa.” (Matius 19:4-6) Randak ya, Yahwe ifrur farḇakḇuk insama nakain isof fyoro. Imarisen fa kina sya sfanamyae si, sismai marisen, ma siryaḇ ro kenem sena.

7. Rosai na mambeswa imbeswa sufrur insama farḇakḇuk suḇena nsambraḇ?

⁷ Ḇefarḇuk ro baboine sismai samswen nabor syadi ro ḇefarḇuk ro fafisu naiwara sya. Fafisu ono, samswen sena nmarḇak rawo skara farḇakḇuk sena namnis ḇa kwar, mura sisusu. Imbape, mambeswa imbeswa sufawi Yahwe moḇ myam farḇakḇuk ya kada, nari farḇakḇuk suḇena nambran pyum.​—1 Yohanes 5:3.

8, 9. (a) Fafisu ḇerariso fandun fa kosouser Yahwe wos anun Ḇyena? (b) Moḇsa na kofasnai komam farḇakḇuk koḇena ḇe roi ḇefarfnak ḇa?

⁸ Yahwe ḇyuk wos anun nakam faro payamyum koḇena. Raris kofawi kwar, danun ḇe ko fa koḇesyowi farḇakḇuk ya. (Ibrani 13:4; Pengkhotbah 5:4) Yahwe anun Ḇyena rya napyan ḇe ko ḇa rariryano, kosouser na kada, nari kosmai payamyum ro na.​—1 Tesalonika 1:3; Ibrani 6:10.

 ⁹ Farḇakḇuk koḇena nama roi ḇefarfnak risyaḇa, inja komewer kenem ḇaido wos koḇena nafrur fa farḇakḇuk koḇena namuk. Imbape, komarisen fa wis saswar koḇena kuker koswasi nsambraḇ syadi. Moḇsa kofrur na rai?

10, 11. (a) Samswen ḇeba risai ḇekur mambeswa imbeswa ḇeḇeso sya? (b) Rosai ḇefnai fandun kaku fa komam moḇ kawos yoḇ koswasi raya?

¹⁰ Snonkaku oso na ifrur samswen swari kuker nyan risai monda. Mboi, snonkaku Kristen ipok fa myun awer ḇaido ifrur rosai monda ḇefnai samswen faro swari. Imbude kawos wos ḇefnai fa koswasi sisnesna naduf. Wos koḇena namnis ra romamun. Bin oso doḇe, ”Swa yedi roi dawos na nafrur fa sneri iduf ker. Ikofen ker radine, ’Auma wafrur marmor monda!’ ma ’Auma ḇekir ḇa!’ Yakofen kaku, par ayenane smam na ḇa, mboi sneri ḇyepar kaku.” Snon oso ikofen ḇo doḇe swari dap ker wos ḇefamfnom fa ḇyuk dor i. Doḇe, ”Roi dawos na napyum ḇaḇeri, yamewer yap kaḇer roi dawos na. Yaḇe yawos yoḇ i fama yapok ḇa. Iso ḇefnai fa yafararur isof ro roḇ. Ro moḇ yafararur yaknon syadi ro yaro rum.” Baboine komam kada, wos ḇefrur dafduf ma rarmomen naiso snonkaku ḇebor sawos na ker.

¹¹ Mambeswa imbeswa sukoryae ker su ido, nari susnesna naduf, ma fandun swaf kawan kaku insape par suḇena naprei. Nasnai kaku, Yahwe imewer ḇefarḇuk kwar sya sifrur radine. Mboi, na kofawi ḇa  ḇo kofrur fa koswasi sisnesna naduf kwar. Imbude kokara kofrur pyum si kwar, mboi kyara rarirya kako ke? Rofyor wos koḇena nafrur fa sisnesna naduf ido, na komarisen kofadwer kenem koḇena ke?​—Galatia 5:15; wasya Efesus 4:31.

12. Rosai ḇefnai fa kokara resari roi kawos faro koswasi na?

¹² Yahwe myam moḇ kawos yoḇ koswasi ro ḇarpon snonkaku ḇesesya ḇaido rofyor kemire, inema roi ḇefandun nairi. (Wasya 1 Petrus 3:7.) Yakobus 1:26 ḇyuk swarapepen ḇe ko, ”Rofyor snon oso kyara [isyom faro Allah], ḇape fyarmku ramar ḇyedi ḇa, ḇyeankar mankundi, ma ḇaḇeari ḇyena nefromo.”

13. Rosai fandun fa mambeswa imbeswa sumam wer?

 ¹³ Roi ḇese isya wer fandun fa mambeswa imbeswa sumam kaku na. Raris, koḇuk oras nabor koḇena faro ḇesesya ido na moḇsa koswasi skara rai? Kofrur roi ine kuker kakara ḇepyum, rupa ra koḇaryas ḇaido kofnoḇek snonkaku ḇesmai samswen sya, mboi kokara na koswasi sisnesna naduf ke roḇa? Imbeswa Kristen oso doḇe, ”Swa yedi ḇyuk oras nabor ḇyena faro imbesrar ḇese ro sidang. Sanerine iduf ma yakara dakfandun aya ḇa.”

14. (a) Roi risai kofarkor ro Kejadian 2:24 ya? (b) Rosai fandun fa kokara ya?

¹⁴ Snonkaku Kristen koine, kona fararur ḇefandun fa komam sinan koḇesya ma naek srar ro sidang yadori. Mboi, kofarḇuk kwar ido, ḇefandun syadi iso komam koswasi. Yahwe doḇe mambeswa na ḇyekayamyam pdef kuker swari. (Kejadian 2:24) Fandun fa kokara pyum koswasi sisnesna. Kwarapan, ’Yaḇuk oras ayena faro swa yedi, yamam i, ma yafasnai saswar ayena faro i ke?’

15. Rosai ḇefnai fa snonkaku Kristen ḇefarḇuk kwar fyanam mankenem awer kuker snonkaku ḇe swa ḇyedi ḇa?

¹⁵ Kofanam ker snonkaku oso ḇese ido, nari nafnai fa kosmai samswen ro farḇakḇuk koḇena. Nakyaren swaruser koḇena ma fawas mura komarisen snonkaku ani. (Matius 5:28) Saswar anya nari syambraḇ mura nafnai fa kofrur farḇakḇuk koḇena fa nmamas.

16. Parenta ro Refo risai ḇekofenḇair farḇakḇuk ya?

¹⁶ Refo doḇe koḇesyowi farḇakḇuk ya, raposa ikofen wer ḇo doḇe farḇakḇuk ya myamas awer kukro  ”ḇefrur farḇuk ma ḇefrur ḇarḇor nari Allah ḇyuk samamyai faro si”. (Ibrani 13:4; Amsal 5:18) Inja, moḇsa na koḇesyowi farḇakḇuk ine ma kofrur mamas awer na rai?

17. (a) Moḇsa snonkaku ḇebor ḇero baboine smam fararur farḇuk kuker snonkaku oso ḇese rai? (b) Rariso snonkaku Kristen sya smam fararur farḇuk kuker snonkaku ḇesesya rai?

¹⁷ Baboine sia skara sna oso ḇese ro ḇandi ima syasar ḇa. Komewer kona kakara ḇeradirya. Yahwe imewer kaku fararur farḇuk ḇemnis ḇa ma snonkaku ḇefrur farḇuk kuker oso ḇese. (Wasya Roma 12:9; Ibrani 10:31; 12:29) Kofrur farḇuk kuker snonkaku ḇese ido, ima kofrur mamas farḇakḇuk koḇena ma koḇesyowi Yahwe parenta Ḇyena ḇa. Oso wer ido, wis koḇena kuker Yahwe I kako na namuk. Inja, fandun fa koḇinkwanbur roi ḇerandak ḇefnai fa na kofrur roi ine. Kona kakara ḇemnis ḇa faro snonkaku ḇesesya ido, kosawen na.​—Ayub 31:1.

18. (a) Rosai ḇefnai fa ḇefrur farḇuk wer kuker snonkaku ḇese ima imnis isyom allah ḇekaku ḇa? (b) Moḇsa Yahwe myam snonkaku ḇefrur farḇuk kuker oso ḇese?

¹⁸ Ro Sasoser Moses, snonkaku ḇefrur farḇuk kuker swari ḇa ima sasar ḇeba nairi, ine imnis kuker samsyom faro allah ḇekaku ḇa. Samamyai faro roi risuru suine naiso marmar ya. (Imamat 20:2, 10) Rosai ḇefnai fa snonkaku ḇefrur farḇuk kuker oso ḇese ima imnis ra isyom allah ḇekaku ḇa? Rofyor snonkaku Israel oso isyom allah ḇekaku ḇa, ima isouser asas ḇyena faro Yahwe I ḇa. Inja, rofyor snonkaku oso ifrur farḇuk kuker oso ḇese, ima isouser asas ḇyena faro swari ḇa. (Keluaran 19:5, 6; Ulangan 5:9; wasya  Maleakhi 2:14.) Kakuḇae ro fafisu naiwara, Yahwe myam snonkaku ḇefarḇuk kuker oso ḇese ima sasar ḇeba kaku nairi.

19. Rosai ḇefnai fa komewer kofrur farḇuk kuker oso ḇese?

¹⁹ Baboine, koro Sasoser Moses ḇyena ḇa kwar, mboi Yahwe fyadwer mamam Ḇyena ḇa. Komewer kosyom allah ḇekaku ḇa ido, fandun fa komewer kofrur farḇuk kuker oso ḇese kako. (Mazmur 51:1, 4; Kolose 3:5) Kofrur farḇuk kuker oso ḇese ido, inema koḇesyowi farḇakḇuk koḇena ḇa ma koḇesyowi Allah koḇedi, Yahwe I ḇa.​—Mam Fasfas Ḇepupes 26.

20. Moḇsa snonkaku ḇefawinanem syambraḇser farḇakḇuk ḇyena rai?

²⁰ Moḇsa kosambraḇser farḇakḇuk koḇena rai? Refo ya doḇe, ”Kuker fawawinanem, sḇawes rum ya, ma kuker mamkarkir, sifrur i fa dores nako.” (Amsal 24:3) Rum oso isya bisa ḇyeboyas ḇa ma ḇyeḇei oroḇaido bisa iknon, ipyum, ma inako. Farḇakḇuk ya imnis rariri. Snonkaku ḇefawinanem nari ifrur fa farḇakḇuk ḇyena nafo marasrisen ma syambraḇ.

21. Rariso fawawi ro Refo nafnoḇek farḇakḇuk koḇena fa nsambraḇ rai?

²¹ Refo dapḇair rum ya raposa, ikofen wer, ”Kuker fawawi, sim-sim ḇyena nari nafo arasai ḇepyum ma ḇekakur nabor.” (Amsal 24:4) Rosai kofarkor ro Refo na nafrur fa farḇakḇuk koḇena napyum syadi. (Roma  12:2; Filipi 1:9) Rofyor kowasya Refo ma syap-syap kayamyam warpu koswasi, kawos moḇsa kosouser na ro kenem koḇena rai. Kosewar swaf fa kofasnai kofandun koswasi, kofrur pyum si, koswar si, ma koḇesyowi si. Kor fafnoḇek ro Yahwe insama ifnoḇek ko fa kosambraḇser farḇakḇuk koḇena ma insama koswasi siswar syadi ko wer.​—Amsal 15:16, 17; 1 Petrus 1:7.

22. Rosai ḇefnai fandun fa koswar ma koḇesyowi koswasi?

²² Fandun fa kosewar kaku insama koswasi sifawi koma koswar si ma koḇesyowi si. Rarirya kada, nari farḇakḇuk koḇena nakain pyum ma nsambraḇ. Ma ḇefandun syadi iso, nari kofrur fa Yahwe imarisen.​—Mazmur 147:11; Roma 12:10.