1-3. (a) Moḇsa snonkaku ḇebor sya smam fararur sena rai? (b) Fakfuken rosai monda nari kawos ya?

 RO SUPSWAN ine ḇesiper, snonkaku sya sfararur marḇak fa sfamfon mankunsi ma kina sesi. Mboi, ḇebor sya simarisen faro fararur sena ḇa, ma ḇeḇeso sya sfafayaf kaku ḇo sraḇe moḇ fararur sena. Ine iso roi ḇaḇir na ido, rosai wafrur insama fararur Bena nun marisen syadi?

² Yahwe ikofen ḇo doḇe, ”Snonkaku oser-oser sanan ma sinem ma sismai marasrisen ro roi nakam ro fararur marḇak sena. Nakame kako ndrama ro Allah.” (Pengkhotbah 3:13) Yahwe ifrur ko kuker kona fandandun ma marasrisen ro fararur koḇena. Imarisen kosmai raryaḇ ro fararur koḇena.​—Wasya Pengkhotbah 2:24; 5:18.

³ Inja, moḇsa na kosmai marasrisen ro fararur koḇena rai? Fararur ḇemnis rariso fandun fa koḇinkwanbur na? Rariso na komam insama fararur ma ḇaḇeari koḇena nambran pyum rai? Ma, fararur ḇefandun kaku rosai kona ya?

4, 5. Moḇsa Yahwe myam fararur Ḇyena rai?

⁴ Yahwe imarisen fyararur. Kejadian 1:1 doḇe, ”Ro randak ya Allah ifrur farsyos ma supswan.” Rofyor Allah ifrur supswan ma roi ḇero dori nakam, ikofen ḇo doḇe roi ifrur na ”napyum fafayaḇa”. (Kejadian 1:31) Yahwe imarisen faro fararur Ḇyena.​—1 Timotius 1:11.

⁵ Yahwe ima imnai ro fararur Ḇyena ḇaḇeri. Yesus doḇe, ”Mami ifararur isof ras ine.” (Yohanes 5:17) Kofawi nabor ḇa roi ḇepyum Yahwe ifrur na, mboi kofawi kwar roi riḇeso ro fararur Ḇyena. Kyinfir snonkaku nari ḇepoik fnoḇek Roma Ḇyedi, Yesus Kristus i, ro Karajan Allah. (2 Korintus 5:17) Yahwe I kako fyarkin ma myamfaduru pdef snonkaku sya. Roi ine nfasnai ro fararur ḇaḇeḇaryas ro supswan ine ḇesiper, snonkaku riyuta sya smambir kaku Yahwe I ma sna saneraro fa sikenem fyoro ro Firdaus ro supswan ine.​—Yohanes 6:44; Roma 6:23.

6, 7. Moḇsa Yesus myam fararur ḇyena rai?

⁶ Imnis ra Kmari, Yesus imarisen fyararur. Rofyor Yesus isya ro supswan ine ḇaim, ifawi dufkir fararur Allah ḇyuk ḇe i na. Kmari sufrur roi ḇero nanki ma supswan nakam. (Amsal 8:22-31; Kolose 1:15-17) Fafisu Yesus isya ro supswan ine, fyararur marḇak pdef. Fyor ḇyabo kaker, fyarkor fa ḇye sukan ai ḇekir. Imbude ḇyekir fa ifrur roiebor ma ifrur rum. Yesus ḇyekir kaku ro fararur na, inja sifawi kaku i ḇe ”sukan ai”.​—Markus 6:3.

⁷ Rarirya ḇoi, Yesus fararur ḇefandun kaku ḇyedi  ro supswan iso ḇyaryas abar ḇepyum ma fyarkor snonkaku sya fa sakfawi Yahwe I. Ifrur fararur ḇyena fa namnai ro taun rikyor syadi. Fyararur ro arwo na isof ro romfawru. (Lukas 21:37, 38; Yohanes 3:2) Yesus imbran swaf ḇinkwan kilometer riutin ro sampak ḇefo fafen fa ḇyaryas abar ḇepyum ḇe snonkaku ḇebor.​—Lukas 8:1.

8, 9. Rosai ḇefnai fa Yesus ismai marasrisen ro fararur ḇyena?

⁸ Yesus myam fararur ifrur ḇe Allah ima imnis ra roḇean. Fararur ine nbuk raryaḇ ma samambraḇ ḇe i. Swaf oso Yesus fyararur marḇak rawo nya swaf fa danan ḇa. (Yohanes 4:31-38) Ḇyuk swaf ḇyena kam fa ifnoḇek snonkaku ḇesesya insama sfarkor fa sifawi Kmari. Iso ḇefnai fa ikofen faro Yahwe I, ”Yafrur wasma baba kwar ro supswan ine kuker nyan yafrur posa fararur buk maro aya fa yafrur na.”​—Yohanes 17:4.

⁹ Yahwe ma Yesus sufararur marḇak fafayaḇa ma sumarisen kuker fararur suḇena. Komarisen ’koso Allah’, ma koso Yesus wewur ḇyena. (Efesus 5:1; 1 Petrus 2:21) Inja, komarisen kofararur marḇak kaku ma koḇuk roi ḇepyum syadi.

10, 11. Rosai na ḇefnoḇek ko fa kona kakara ḇepyum faro fararur koḇena?

¹⁰ Yahwe kawasa Ḇyesi koine, kofararur marḇak fa kofamfon mankunko ma kina koḇesya. Komarisen kosmai raryaḇ ro fararur koḇena, ḇoi napyan ḇa. Inja, rosai na kofrur insama kosmai raryaḇ ro fararur koḇena?

 ¹¹ Fandun fa kona kakara ḇepyum. Imbude na kopok kofadwer ḇa ro moḇ risai ḇaido kofrur fararur koḇena ker ke roḇa, mboi bisa kofadwer nyan kakara koḇena. Ḇepon ya iso kofawi rosai Yahwe imarisen ḇe ko na. Rupa ra, Yahwe imarisen fa ḇebukor ro kina sya sḇesewar kaku fa sfamfon fandandun ro kina yadori. Refo doḇe rofyor snonkaku oso fyamfon kina ḇyesya ḇa, ima ”iḇyeḇa syadi ro snonkaku ḇekyar ḇasya”. (1 Timotius 5:8) Auso ḇebukor ro kina ido, na wafararur marḇak kaku fa famfon fandun ro kina Bedi. Wamarisen faro fararur Bedi ke roḇa, waswarepen rofyor famfon kina Bedi, ima wafrur fa Yahwe imarisen.

12. Payamyum risai na kosmai ya snar komyaren ma kankarkar ḇa?

¹² Komyaren ma kankarkar ḇa. Rari risuru suine nari sufnoḇek ko fa kosmai marisen ro fararur koḇena. (Amsal 12:24; 22:29) Bos koḇesi na sikyar ko. Oso wer ido, snonkaku ḇeankarkar ḇa nari sesyowi i snar kyaraw pipi ḇa, roiebor na ḇa, ḇaido oras ḇa. (Efesus 4:28) Ḇefandun syadi wer, Yahwe ifawi rofyor komyaren ma kawos roi ḇekaku. Na kona sneuser ḇepyum kukro kofawi kofrur fa Allah koswar ya imarisen.​—Ibrani 13:18; Kolose 3:22-24.

13. Payamyum ḇese risai na kosmai ya rofyor kankarkar ḇa ro fararur koḇena?

¹³ Rari ḇepyum koḇena ro moḇ kofararur na nun sanandik ḇe Yahwe I. Rofyor kofawi roi ine, na kosmai marisen ro fararur koḇena. (Titus 2:9, 10) Ono wer ido, bati ro moḇ kofararur imbude simarisen sfarkor Refo snar rari kofasnai na.​—Wasya Amsal 27:11; 1 Petrus 2:12.

14-16. Rosai fandun fa kokara resari rofyor kosewar fararur?

¹⁴ Refo ikofenḇair ḇa fararur risai ḇemnis ya ḇaido ḇemnis ḇa faro snonkaku Kristen. Mboi, Refo ḇyuk farkankin na ḇefnoḇek ko fa kofrur snemuk ḇepyum faro fararur risai koḇe kokinfir na. (Amsal 2:6) Kuker koḇuk wos farkin ro Refo, na kokara fakfuken ḇeuser nane.

 ¹⁵ Fararur yafrur ine dor aya fa yafrur roi Yahwe imewer na ke? Kofarkor kwar roi riḇeso Yahwe imewer na, rupa ra karawraw ma ankarkar. (Keluaran 20:4; Farfyar 15:29; Efesus 4:28; Fasasna 21:8) Inja, na komewer kaku fa kofrur fararur risai monda ḇemnis ḇa kuker Yahwe parenta Ḇyena.​—Wasya 1 Yohanes 5:3.

¹⁶ Fararur ine ifnoḇek roi Allah imewer na ke? Rupa ra, moḇsa kwara rai rofyor siwan Au fa wakfararur ro toko ḇeḇoḇ tabaku? Ima nsasar ḇa. Mboi, wafawi kwar moḇsa Yahwe myam tabaku ya. Inja, wasowarpu ḇeri fa ḇoḇ tabaku ḇa, mboi wafararur ro moḇ ine ido, Yahwe myam wasasar kako.​—Keluaran 21:22-24.

17. Rosai na ḇefnoḇek ko fa wos snemuk koḇena nafrur fa Allah imarisen?

¹⁷ Imnis ra neḇeyap kwar ro Ibrani 5:14, kuker koḇuk wos farkin ro refo, na koḇe snonkaku ’ḇefawi ḇemambir roi ḇeḇye ma roi ḇeḇarḇor’. Kwarapan, ’Rofyor yun fararur ine, na nafrur fa snonkaku ḇesesya skarkar ke? Snar yafararur ro sup bondi, fandun fa yaḇarek ḇinkwan ro swa yedi ma romawa yesi ke? Moḇsa ine nari nakyaren si rai?’

18. Rosai ḇefnai fa kofakapon ḇaḇeari koḇena ima napyan ḇa?

¹⁸ Ro ’ras ḇepupes na nari ndama kuker kandera nabor’. Inja, samswen fa kofakapon ḇaḇeari koḇena ḇe Yahwe I. (2 Timotius 3:1) Kosewar fararur ma kuf fararur koḇena pdef nama samswen kaku. Fandun fa kofamfon kina koḇesi, mboi kofawi kako ḇaḇeari  koḇena ima roi ḇefandun kaku. Inja, sasewar pipi ya nefandun syadi awer ro ḇaḇeari koḇena. (1 Timotius 6:9, 10) Rarirya, moḇsa ”komam pyum roi ḇefandun syadi” ma kofamfon kina koḇesya rai?​—Filipi 1:10, Terjemahan Dunia Baru (NW).

19. Rosai ḇefnai fa kokyar faro Yahwe ido, na nafnoḇek ko fa kona mamam ḇepyum faro fararur koḇena?

¹⁹ Wakyar faro Yahwe I kuker sne ḇesiper. (Wasya Amsal 3:5, 6.) Kofawi snar Yahwe ima ifawi pyum rosai kofandun na ma iswar ko. (Mazmur 37:25; 1 Petrus 5:7) Refo doḇe, ”[Mkoswar] pipi awer, mboi mkokenem imnis kuker rosai isya faro mko. Snar Allah ikofen kwar, ’Nari yarir aw ḇa ma nari yabur aw ḇa.’” (Ibrani 13:5) Yahwe imewer komkakwarek moḇsa kofamfon kina koḇesya rai. Ikofen kwar snar na fyamfon fandandun ro kawasa Ḇyesi. (Matius 6:25-32) Inja, imnis rariso fararur koḇena, fandun fa kofarkor Refo, koḇaryas abar ḇepyum, ma koso fananjur nakam.​—Matius 24:14; Ibrani 10:24, 25.

20. Rariso insama kankenem koḇena napyan syadi rai?

²⁰ Mamwarek mkamsu fa suḇye. (Wasya Matius 6:22, 23.) Ine kyurfasnai, fandun fa kofaduru kankenem koḇena fa napyan syadi insama komam monda fararmyan koḇena ḇe Yahwe I. Kofawi na ipyum ḇa kaku rofyor kosewar ker pipi, koryaḇ faro marasrisen, ḇaido hp ḇebabo ḇyefandun syadi ro wis koḇena kuker Yahwe I. Inja, moḇsa kosewar ḇepon roi ḇefandun syadi rai? Mam kaku insama nwa nyaki nabor awer. Rofyor kona nyaki, fandun fa kofrur aw fa koḇakpres na. Kosasor ko ḇa ido, arasai koḇena na  nafrur fa oras ma samambraḇ koḇena nabro monda rawo kona oras fa koḇenadi ḇa, kofarkor, ḇaido koḇaryas. Oso wer ido, arasai koḇena na nafrur fa komam ker na. Inja, komarisen faro roi kosmai ro rasras na, rupa ra ”roḇean ma sansun”. (1 Timotius 6:8) Ma rosai monda samswen kosmai na, fandun fa ras nono komam kaḇer roi kofrur kwar na insama kofrur nabor faro Yahwe I.

21. Rosai ḇefnai fa kosewar ḇepon roi ḇefandun syadi?

²¹ Swewar ḇepon roi ḇefandun syadi. Fandun fa  koḇuk oras, samambraḇ, ma arasai koḇena kuker fawawinanem. Snar kosasor ko ḇa ido, roi ḇefandun mankenem ḇa, rupa ra farkarkor ma pipi, nafnai fa oras ḇebor koḇena nabro monda. Yesus doḇe, ”Mkosewar bepon [Karajan] Allah.” (Matius 6:33) Rosai ḇefandun syadi ḇe ko, na nasnai ro rosai kokinfir na, rari koḇena, roi kofrur ker ro rasras na, ma ras ḇarpon iyama.

22, 23. (a) Fararur ḇefandun kaku rosai snonkaku Kristen sifrur ya? (b) Rosai na ḇefnoḇek ko fa kosmai marasrisen ro fararur koḇena?

²² Fararur ḇefandun syadi fa kofrur ya iso kofarmyan ḇe Yahwe I ma koḇaryas abar ḇepyum. (Matius 24:14; 28:19, 20) Raris Yesus i, komarisen kofrur roi ḇepyum faro Yahwe I. Sia sraḇe moḇ ḇefandun syadi manḇaryas. Sia wer sfarkor wos ḇese insama sḇaryas ḇe snonkaku ḇeyawos wos ani. Wor snonkaku ḇefrur roi ine fa sfawar roi sismai ro ḇaḇeḇaryas sena. Na sikofenḇair ḇe Au snar sismai marasrisen ro kenem sena.​—Wasya Amsal 10:22.

²³ Ḇebor ro ko, sisewar kaku fa sfararur ḇaido sna fararur ro moḇ ḇeḇeso fa sfamfon fandandun ro kina sesya. Yahwe myam ma ḇyesyowi roi kofrur nakam fa kofamfon kina koḇansi. Inja, fararur koḇena moḇsa ḇyerai, kosouser Yahwe ma Yesus su kuker kofararur marḇak. Ma, koswarepen fararur ḇefandun kaku iso kofarmyan ḇe Yahwe I ma koḇaryas abar ḇepyum ḇekur ḇe Allah Karajan Ḇyedi. Ine iso na ḇefrur ko fa kosmai marasrisen.