1, 2. Rosai na kofrur ya insama Allah iswar ko ḇesya kwar?

 KOKAM komarisen kona baken ḇesambraḇ ma ḇeprei. Iso ḇefnai fa kan roḇean ḇepyum, koḇe olahraga, ma kofaduru baken koḇena. Roi nane napyan ḇae, mboi na kosusu ḇa kukro kofawi nari kosmai bon ḇepyum. Mboi, fandun fa kosambraḇ ma koprei kako ro roi ḇesena.

² Na kokara komambir kaku Yahwe I kwar, mboi fandun kako fa kosambraḇser wis koḇena kuker I wer. Rofyor Yudas ḇyuk wos samarawraw ḇe snonkaku Kristen fa ’sikenem ḇesya kwar ro fadadiren Allah saswar ḇyedi’, fyasnaiḇair kako nyan fa sifrur na. Doḇe, ”Kakyar mkoḇena nasren kaku.” (Yudas 20, 21) Inja, moḇsa kosambraḇser kakyar ḇenako rai?

3-5. (a) Moḇsa Ibiris imarisen kokara Yahwe farkankin Ḇyena rai? (b) Moḇsa mam Yahwe sasoser ma wos farkin Ḇyena rai?

³ Kokam fandun kaku fa komam Yahwe nyan Ḇyena iso ḇepyum syadi ya. Ibiris imarisen kokara Yahwe farkankin Ḇyena nsamswen kaku fa koso na,  ma kun snemuk ro mankunko faro roi ḇekaku ma ḇesasar na kada, na kosmai marasrisen syadi. Ro Yaf Eden, Ibiris syewar ker fa imbe ifrur samande snonkaku sya sikyar roi ine. (Kejadian 3:1-6) Baboine, ifrur kaker roi ine ker.

⁴ Ibiris iso ḇekaku ya ke? Yahwe farkankin Ḇyena nadwarek mankenem ko ke? Oroḇa. Kwarapan koisya kombran ro yaf ḇepyum kaku, mura komam sifrur ayar ḇekaki fa nadwarek moḇ nono. Imbude kokara, ’Rosai ḇefnai fa sifrur ayar ro moḇ ine?’ Mboi, korower singa ḇeaur isya ro ḇar iwar ya. Moḇsa komam ayar sḇukidwarek ine rai? Kokofen kasumasa kaku snar sifrur ayar ine, inja nadwarek ko ro singa fa dan ko ḇa. Yahwe wos farkin Ḇyena imnis ra ayar ani, ma Ibiris imnis ra singa ya. Allah wos ḇesren Ḇyedi ḇyuk swarapepen ḇe ko, ”Mkoḇaḇir ma mkepen mko! Snar mbroḇ mkoḇedi, Ibiris, imbran yar mura muma imnis raris singa (aiwan ḇeyan ḇepek) ḇeaur ma ḇesewar snonkaku fadoren ḇepek.”​—1 Petrus 5:8.

⁵ Yahwe imarisen fa kosmai kankenem ḇepyum. Imewer kosapi ro Ibiris fafrowes ḇyena. Iso ḇefnai fa ḇyuk sasoser ma wos farkin fa nkadaunwarek ko ma kosmai marasrisen. (Efesus 6:11) Yakobus fyas, ”Mansei ḇekukeḇ sasoser ḇemnis anna isoine sasoser ḇeḇuk ḇaḇemkei faro snonkaku, ma ḇyenamu faḇyeuserna . . . nari isma aski ro fararur ḇyena.”​—Yakobus 1:25.

6. Moḇsa kokyar kaku Allah nyan Ḇyena iso ḇepyum syadi ya?

⁶ Rofyor kosouser Yahwe farkankin Ḇyena, kenem koḇena nari napyum ma kofanam syadi faro I.  Rupa ra, dor ko fa koḇenadi ker faro I, na kosmai payamyum ya. (Matius 6:5-8; 1 Tesalonika 5:17) Kosmai marasrisen rofyor kosouser I fa koso fananjur, insama koḇeari ma kosambraḇser oso ma ḇesesya. Kosmai marasrisen kako rofyor koso ro ḇaḇeḇaryas ma koḇuk farkarkor. (Matius 28:19, 20; Galatia 6:2; Ibrani 10:24, 25) Kokara roi ine fa nsambraḇser kakyar koḇena ido, na kokyar kaku Yahwe nyan Ḇyena iso ḇepyum syadi kaku.

7, 8. Rosai na ḇefnoḇek ko insama komkak ḇa rofyor kosmai fafrowes?

⁷ Imbude komkak faro ras ḇarpon iyama, raris kosmai fafrowes ḇemarḇak kaku ro kakyar koḇena. Kokara radirya ido, koswarepen Yahwe doḇe, ”Aya,  Yahwe, iso Allah mkoḇedi, ḇefarkor mko faro payamyum mkoḇena, ḇefarkin mko ro nyan ḇefandun fa mkombran ro na. Yamarisen kaku insama mkosouser parenta Ayena, snar nari aski mkoḇena namnis ra warḇeki, ma fararur ḇekaku mkoḇena namnis ra risen ro soren.”​—Yesaya 48:17, 18.

⁸ Kosouser faro Yahwe I kada, nari kosmai payamyum raris warḇeki ḇepok fa ḇesyor ḇaḇeri ma roi ḇekaku kofrur na namnis ra risen ḇeraren ro yendisare. Rosai monda ḇekur kankenem koḇena, na kosouser pdef. Refo doḇe, ”Wasawen roi ḇemarḇak bena ḇe Yahwe I, ma nari ifnoḇek au. Na myam snonkaku ḇenapes isapi ḇaḇeri.”​—Mazmur 55:22.

9, 10. Koḇe snonkaku ḇemas ido rosairi?

⁹ Kofanam kaku faro Yahwe I, nari koḇe snonkaku ḇemas. (Ibrani 6:1) Koḇe snonkaku ḇemas ine ido rosairi?

¹⁰ Koḇe snonkaku ḇemas ima ndramuma ro umur koḇena nakaki monda ḇa. Snonkaku ḇemas ima fandun fa ḇyebati fanam kuker Yahwe I ma syewar fa nya kakara raris I. (Yohanes 4:23) Paulus fyas, ”Snonkaku ḇekenem imnis rari snonkaku, sisawen monda roi simarisen ro rari snonkaku. Ḇape snonkaku ḇekenem kuker Allah Rur ḇyedi [srir kakara sena] monda rosai Allah Rur ḇyedi imarisen.” (Roma 8:5) Snonkaku ḇemas ima myam monda faro marisen mankun ḇaido arasai ḇyena ḇardi ḇa. Mboi, myam monda fararmyan ḇyena faro Yahwe I ma ifrur snemuk  ḇepyum. (Amsal 27:11; wasya Yakobus 1:2, 3.) Imewer sawninyan i fa ifrur roi ḇesasar. Snonkaku ḇemas ifawi roi ḇepyum ma dun snemuk fa ifrur na.

11, 12. (a) Rosai Paulus ikofen kuker wos snonkaku Kristen sima sifawi smambir ya? (b) Rosai ḇemnis ro snonkaku Kristen ḇemas kuker atlit oso?

¹¹ Koḇe snonkaku ḇemas ima fandun fa koḇesewar kaku. Manwawan Paulus fyas ḇo doḇe, ”Roḇean ḇepnas kada faro ḇebasya, snar sima sifawi smambir kwar roi ḇeḇye ma roi ḇeḇarḇor.” (Ibrani 5:14) Wos ”sifawi smambir kwar” imbude kowasenkara muraḇe atlit ḇekir sya.

¹² Rofyor komam atlit ifnak pyum ro pertandingan, fyarkor kawan kwar ro farfnak pyum ḇyena. Mboi, snari kyapar i fa ḇye atlit ḇeri ḇa. Ras skapar kapira oso, ifawi ḇaḇeri moḇsa iwawai ḇramin ma wemin ḇyena rai. Mboi, ḇarpur mura, fyarkor fa duf robebor na ḇo imbran. Fyarkor farfnak ani resari, inja ḇye atlit. Rupa radiri, insama koḇe snonkaku Kristen ḇemas, kofandun swaf ma kofarkor pdef ro farfnak ani.

13. Rosai ḇefnoḇek ko fa kokara raris Yahwe I?

¹³ Ro syap ine, kofarkor nyan fa kokara raris Yahwe I. Koḇesyowi ma komarisen faro Yahwe farkankin Ḇyena. Kofrur wos snemuk ido, na kokara, ’Sasoser ma wos farkin rosai ḇemnis kaku ro fafisu ine? Moḇsa yaso pyum kaku na rai? Rosai Yahwe imarisen fa yafrur ya?’​—Wasya Amsal 3:5, 6; Yakobus 1:5.

14. Rosai fandun fa kofrur kaku insama kakyar koḇena nsambraḇ?

¹⁴ Komnai awer fa kosambraḇser kakyar koḇena faro Yahwe I. Rupa ra, roḇean ḇepyum nafrur fa baken  koḇena nsambraḇ, kona fawawi kuker Yahwe I kako nafnoḇek ko fa kakyar koḇena nako. Rofyor kofarkor Refo, insape kofawi knam ro kakaku kuker Yahwe ma nyan Ḇyena. Mboi faḇaḇye mura, kofawi syadi wer kakaku ya. Ine iso Paulus ikofen ya, ”Roḇean ḇepnas kada faro ḇebasya.” Kuker koso roi kofarkor ya, kosmai fawawinanem. Refo doḇe, ”Fawawinanem ima roi ḇefandun kaku dirya.”​—Amsal 4:5-7; 1 Petrus 2:2.

15. Rosai ḇefnai fandun fa koswar kaku Yahwe I ma naek srar sya?

¹⁵ Insama baken na nsambraḇ ma naprei pdef, fandun fa kofaduru pdef na. Rarirya kako, snonkaku ḇemas ifawi snar fandun fa ḇyesewar kaku insama fyanam pdef faro Yahwe I. Paulus ḇyuk swarapepen ḇo doḇe, ”Indo naek srar mkomnasenbir mankun mko ma mkokukeḇ kaku ḇeri naek srar mkoisya mkokenem imnis kankarem kakyar mkoḇena faro Kristus!” (2 Korintus 13:5) Rariryano, kakyar ḇesambraḇ monda nasrow ḇaim. Saswar koḇena faro Yahwe ma naek srar koḇesi fandun fa nasur pdef. Paulus doḇe, ”Rofyor . . . yafawi roi ḇeborkam; ma rofyor yasma kakyar ḇeba kaku isof yawan bon nafa nabur, ḇape yaswar snonkaku ḇeseḇa, rarirya yaḇefainda roi osoḇaḇeri!”​—1 Korintus 13:1-3.

16. Rosai Ibiris imarisen kokara ya?

¹⁶ Ibiris imarisen kokara nari kopok ḇa fa kofrur Yahwe imarisen. Imarisen kosusu ma kokara samswen koḇena napok namnai ḇa. Imewer kokyar faro naek srar koḇesi, ma imewer kosmai marisen.  (Efesus 2:2) Ibiris ifawi snar kokara pyum ḇa ido, na nafrur fa kopyum ḇa ma wis koḇena kuker Allah naḇyeḇa. Mboi, Yahwe ḇyuk kakyar ḇe ko kwar na ifnoḇek ko fa kopampum kakara ḇepyum ḇa na.

17. Rosai ḇefnai fa saneraro ine fyandun kaku?

¹⁷ Ro 1 Tesalonika 5:8, Refo ḇyair saneraro kuker roi ḇesaswo bukor ro sordade oso ḇera ḇeso mamun ya, ma saswo ani sap ḇe ”saneraro fasaspar”. Saneraro faro Yahwe asas Ḇyena nadwarek kakara koḇena ma nafnoḇek ko fa kopampum kakara ḇepyum ḇa na.

18, 19. Fasnaiḇairpan moḇsa saneraro syambraḇser Yesus i rai?

¹⁸ Saneraro Yesus ismai na iso eḇedari dores nako. Ro roḇ ḇepupes ikenem ro supswan, ismai samswen nabor kaku. Bati ḇyedi ḇyoḇ i. Bati ḇesesya sfamyun i. Ḇesesya wer sifrar sibur i. Kawasa ḇyesya spampum i ma siwan fa smun i ra imar. Rosai ḇefnoḇek i fa  ibur samswen nakam? Snar ”iswarepen monda marisen nari ḇyaḇir ro ḇarpurya. Baboine ḇyuk sasoser fnoḇek Allah ro ḇar raku karapesa nasanya.”​—Ibrani 12:2.

¹⁹ Yesus ifawi snar isouser pdef ido, na nun sanandik ḇe Kmari ma nfasnai Ibiris ima dankarkar. Saneraro ine ifrur i fa iryaḇ kaku. Ifawi kako na isrow Kmari ro nanki wer. Saneraro ine ifnoḇek i fa isusu ḇa. Raris Yesus i, fandun fa komam monda faro saneraro koḇena. Ine nari nafnoḇek ko fa kosusu ḇa rofyor roi risai monda ndrama nkur ko.

20. Rosai ḇefnoḇek ko insama kona kakara ḇepyum?

²⁰ Yahwe myam kakyar ma ḇaḇefarmku koḇena. (Yesaya 30:18; wasya Maleakhi 3:10.) Ḇyeasas ’nari ḇyuk rosai kosnesna imarisen na’. (Mazmur 37:4) Inja, komarisen komam monda faro saneraro  koḇena. Ibiris imarisen saneraro kosmai na napromes ma kokara Yahwe na ifrur asas Ḇyena ḇa. Mboi, korower awer kakara ḇemnis ḇa ḇerarirya! Rofyor koḇaḇir saneraro ani imbe imbrer fawas, kor fafnoḇek ro Yahwe I. Koswarepen wos ḇero Filipi 4:6, 7, ”Iḇye mkoraryof rosairya wer kako, mboi mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa. Saswar-ḇaḇye ro Allah, ḇesyadi ro kakara, nari nfaduru sne ma kakara mkoḇena snar Yesus Kristus.”

21, 22. (a) Rosai Yahwe marisen Ḇyedi faro supswan ine? (b) Wos snemuk rosai imbe kun na?

²¹ Ipyum kaku fa kokarauser faro ras ḇarpon ḇepyum iyama. Fyoro wer ḇa, snonkaku syakam nari sisyom Yahwe I. (Fasasna 7:9, 14) Kwarapan kankenem ro supswan ḇebabo ya. Ima napyum syadi ro roi kokara na! Ibiris, rur ḇeḇarḇor, ma roi ḇeḇarḇor komam nakam na naisya wer ḇa kwar. Koduf ḇa ma komar ḇa. Mboi, na kokḇok kuker baken ḇeprei ma sambraḇ. Snonkaku syakam na sismai roḇean ḇeyan pyum ma sḇarek kuker payamyum. Snonkaku sya sifrur roi ḇeḇarḇor wer ḇa ma simasasor ḇa, mboi siswaryae si. Ḇarpur mura, snonkaku syakam ro supswan ine nari ’sismai ḇaḇemkei fnoḇek Allah romawa ḇyesi ro baba siḇe sismai ya’.​—Roma 8:21.

²² Yahwe imarisen fa kona I ḇe Bati ḇepyum. Inja, rwama kofrur roi ḇepyum kaku fa kosouser faro Yahwe I ma kofanam syadi faro I ro ras ḇe ras. Rarirya, kokam koisya pdef ro fadadiren Allah saswar Ḇyedi isof fyoro-fyoro!​—Yudas 21.