1, 2. Moḇsa Bileam ḇyesewar fa ifrowes Yahwe kawasa Ḇyesi rai?

 SNONKAKU ḇesarfarfer oso na syewar ara ḇesrow fa syarfer in imarisen na. Ryo moḇ ḇesrow kaku kwar ido, na ryir sarfer ḇyena ma kyain iwaf rawo in ya dan ara ḇyena. In oso dan ara ḇyena kwar ido, na pyaw sarfer anya ḇeri insama gomora ani kyur ro swardip ḇyeja, mura pyos na.

² Kosasor ko ḇa ido, na komnis ra in ani. Rupa ra kawasa Israel ro fafisu naiwara. Sḇarek ro Sup Ḇeursḇa ro Moab rofyor sisya imbe sifyafer kwar ro Sup Ḇaḇeasas ya. Raja ḇero Moab ikofen yoḇ Bileam i ḇo doḇe ifrowes snonkaku Israel sya fa sismai fafras ido, nari ḇyuk pipi nabor ḇe i. Mura, Bileam isrow nyan fa snonkaku Israel mankunsi siso ḇefnai fafras ani. Kyinfir ara ḇesrow kaku. Inja, iwan binkbor Moab sya fa sra sifrowes snon Israel sya ro moḇ sḇarek roro ya.​—Bilangan 22:1-7; 31:15, 16; Fasasna 2:14.

3. Bon rosaiso Bileam ismai ro ara ḇyena?

 ³ Bileam ismai bon ro ara ḇyenane ke? Imbo. Snon Israel risyaran sya sifrur fararur farḇuk kuker bin Moab ansya. Mura, saksyom allah-allah ḇekaku ḇa sesya, ma sisyom allah fararur farḇuk ḇefrur ayin seja, isoine sor ḇe Baal Peor. Nane nafnai fa snonkaku Israel ri 24.000 simar rofyor sro marandan fanam ḇe Sup Ḇaḇeasas.​—Bilangan 25:1-9.

4. Rosai ḇefnai fa snonkaku Israel risyaran sya sifrur fararur farḇuk?

⁴ Rosai ḇefnai fa snonkaku Israel sya sisapi ro Bileam ara ḇyenane? Kukro skara marisen mankun sena ḇardi ma sḇefnder roi ḇebor Yahwe ifrur faro si kwar na. Roi nabor naisya ḇefnai fa snonkaku Israel sya sisouser faro Sinan I. Yahwe ḇyuk ḇaḇemkei ḇe si ro ḇaḇewomen ro sup Masir, ḇyuk anan faro si ro moḇ ḇeursḇa, ma dun pyum si fa sfanam kwar ro Sup Ḇaḇeasas ya. (Ibrani 3:12) Rarirya ḇesyaḇo, sisapi ro farawrowes fa sifrur fararur farḇuk. Manwawan Paulus fyas, ”Koma kofrur awer farbuk imnis ḇar ḇebaya moḇ sifrur raya.”​—1 Korintus 10:8.

5, 6. Farkarkor rosai kun ro snonkaku Israel sya?

⁵ Dunya babo fyanam kaku kwar. Inja, komnis ra snonkaku Israel ḇefanam kwar ro Sup Ḇaḇeasas ya. (1 Korintus 10:11) Snonkaku ḇero baboine sya simarisen syadi faro fararur farḇuk ro snonkaku Moab ḇero fafisu naiwara. Yahwe kawasa Ḇyesi sisasor si ḇa ido, na sradine kako kukro Ibiris ara ḇesrow kaku ḇyena iso fararur farḇuk ine.​—Bilangan 25:6, 14; 2 Korintus 2:11; Yudas 4.

⁶ Kwarapan, ’Ayama yamarisen syadi faro marisen faḇri mankun ḇekain fyoro ḇa ke, yakinfir syadi  marisen ḇekain fyoro ro dunya babo ya?’ Oroḇaido ipyum syadi koḇesewar kaku fa kosouser Yahwe parenta Ḇyena kuker ’koḇinkwan bur fararur farbuk’ na.​—1 Korintus 6:18.

7, 8. Fararur farḇuk ido rosairirya? Rosai ḇefnai fa komam na ḇe roi ḇefarfnak awer?

⁷ Snonkaku ḇebor ḇero baboine sifawi adat ḇa ma sesyowi Allah parenta Ḇyena faro farḇakḇuk ya ḇaḇeri. Refo doḇe fararur farḇuk iso, snonkaku ḇefarḇuk ḇaim ḇo ifrur farḇuk famfnom. Ine kyur kako faro fararur farḇuk ro snon kuker snon ma bin kuker bin, oroḇaido kuker aiwan. Ine kyur kako ḇe anenef fasfus, fararur farḇuk ro swadon, fararur farḇuk ro kodon, ḇaido suf snonkaku ḇese rofmar sena insama nafsu sena neke. Nanema awawos ḇefrur mamyai nairi, mboi fandun kaku fa kofawi pyum roi nane insama koḇinkwanbur roi Allah imewer na.​—Mam Fasfas Ḇepupes 23.

⁸ Refo fyasnaibos kaku snar rofyor snonkaku oso ifrur ker fararur farḇuk ido, nari sisasyar i ro sidang yadori. (1 Korintus 6:9; Fasasna 22:15) Oso wer ido, na snonkaku ḇese smam pyum i ḇa ma sikyar i ḇa kwar. Fararur farḇuk ine nafnai samswen monda. Snonkaku ḇeradine, nari sneuser ḇyena nbuk sasar ḇe i, fyadores, ismai samswen ro farḇakḇuk ḇyena, iduf, ḇeḇyeḇa syadi wer iso imar. (Wasya Galatia 6:7, 8.) Rofyor snonkaku oso kyara roi nane kada, na imewer ifrur roi ḇeradine. Mboi faḇye kaku, snonkaku ḇebor skara nakwan ḇa ma skara monda marisen  sena ḇo sun nyan ḇesasar ro randak ya, isoine snar smam sonin ḇeḇyeḇa na.

9. Rosai ḇefnai fa sonin ḇeser fararur farḇuk na nun roi ḇesamswen?

⁹ Sifrur sonin ḇeḇyeḇa na insama nafsu koḇena neke. Baboine, sonin ḇeḇyeḇa nane naisya ro moḇ nakam, rupa ra ro majalah, syap, dow, felem, ma Internet. Sibor skara roi nane nun samswen oḇa. Imbape, roi nane nun roi ḇesamswen kaku. Roi nane nafrur fa snonkaku oso ifrur ker fararur farḇuk ma kyara ker marisen farḇuk ḇesasar. Rofyor oso myam sonin ḇeḇyeḇa na, nari syewar marisen fararur farḇuk kuker ifarfnak rofmar ḇyedi, ismai samswen ro farḇakḇuk ḇyena, ma farḇakḇuk ḇyena namuk.​—Roma 1:24-27; Efesus 4:19; mam Fasfas Ḇepupes 24.

10. Rariso wos farkin ro Yakobus 1:14, 15 nafnoḇek ko fa kofrur awer fararur farḇuk na?

¹⁰ Fandun kaku fa kofawi moḇsa fararur farḇuk namnis ra denem ḇefor ko. Komam swarapepen ḇero Yakobus 1:14, 15, ”Snonkaku oser-oser isma fafrowespan snar mankundi rmomen baken ḇyena, nasmeri ma nadenemi. Ma ḇaḇermomen baken ani ḇyebon kwar daḇen sasar; ma rofyor sasar imku kwar, daḇen marmari.” Inja, rofyor kona kakara ḇesasar ido, kosawen fasaw na ḇeri. Rofyor kokara ḇa ḇo komam sonin ḇeḇyeḇa na, kopambar komkasna ḇeri! Komun komputer, ḇaido kofadwer felem na. Komam monda awer marisen ḇesasar isur ro kosnesna. Oroḇa ido, nari marisen ḇesasar ani syambraḇ  kaku rawo samswen fa kosawen na.​—Wasya Matius 5:29, 30.

11. Moḇsa na Yahwe ifnoḇek ko rofyor kona kakara ḇesasar?

¹¹ Yahwe fyawi syadi ko ro mankunko ḇardi. Inja, ifawi koma snonkaku ḇenapes ḇa siko. Mboi, ifawi kako kosambraḇ fa kopampum marisen ḇesasar na. Yahwe doḇe, ”Mkomun marisen baken saprop mkoḇena ḇero dunya ine insama mkosapi awer snar fararur farḇuk, roi ḇemamas, nafsu ḇepok ḇa kwar, ḇarḇor, ḇaido nambri, ḇemnis raris samsyom faro amfyanir.” (Kolose 3:5, NW) Kakuḇae, nanema roi ḇepyan risyaḇa. Mboi, Yahwe iwaf ko fa kombror ma imarisen ifnoḇek ko. (Mazmur 68:19) Naek ḇebabo oso isun ro denem ine kuker myam ker sonin ḇeḇyeḇa ma ifarfnak rofmar ḇyedi. Bati ḇyesya  ro rumfarkor soḇe nama roi ḇesasar ḇa nairi. Mboi doḇe, ”Ine nafrur fa sneuser ayena napup, ma yasapi ro denem kenem ḇeḇyeḇa.” Ifawi fandun fa isawen marisen ḇesasar ḇyena. Yahwe ifnoḇek i fa ibur kenem ḇeḇyeḇa ḇyenane. Kona kakara ḇesasar ḇeradine ido, kor papoik ro Yahwe insama kakara koḇena nasren ḇesya kwar.​—2 Korintus 4:7; 1 Korintus 9:27.

12. Rosai ḇefnai fandun kaku fa komamwarek sne koḇena?

¹² Salomo fyas, ”Iba syadi ro roi nakam fandun fa mamwarek na, mamwarek sne bedi.” (Amsal 4:23) ”Sne” koḇena iso kenem kaku koḇena, ma iso Yahwe myam ro na. Rosai komam ro komkasna, nakyaren sne koḇena. Ayub doḇe, ”Yaḇeasas kwar, snar na yapok yamam inai oso kuker marisen ḇesasar ḇaḇeri.” (Ayub 31:1) Raris Ayub i, fandun fa kofaduru swaruser koḇena ro rosai komam ma kokara na. Ma raris manfasfas Mazmur i, koḇenadi, ”Ḇe mka yesuine insama yamam awer roi ḇeyun roi noḇa.”​—Mazmur 119:37.

13. Dina kyinfir bati ḇemnis rariso?

¹³ Bati koḇesi na sifrur ko fa koḇe snonkaku ḇepyum syadi ḇaido ḇeḇyeḇa syadi. Mboi, kokinfir bati ḇesouser faro Yahwe I kada, na sifnoḇek ko fa kaksouser. (Amsal 13:20; wasya 1 Korintus 15:33.) Komam ro Dina farfyar ḇyena, moḇsariso bati koḇesya sifnai kaku ko rai. Dina ima Yakub inai ḇyediri, inja iba ro kina ḇesyom faro Yahwe I. Ima bin ḇembran famfnom risyaḇa, mboi ḇyebati kuker inai Kanaan ḇeyaksyom Yahwe I ḇa. Snonkaku Kanaan sima  sifrur ker fararur farḇuk ya. Mamam sena faro fararur farḇuk naḇesisye ro Yahwe kawasa Ḇyesi. (Imamat 18:6-25) Fafisu Dina iryur kuker inai Kanaan ansine, isrow snonkbor ḇenir ḇe Syikhem, ma snon ine imarisen i. Syikhem ima snonkaku sesyowi kaku ro kina ḇyedi. Mboi, ima iswar Yahwe I ḇa.​—Kejadian 34:18, 19.

14. Rosai ḇekur Dina i?

¹⁴ Syikhem ifrur roi smam ḇe roi ḇesasar ḇa ma roi simarisen na. Imarisen faro Dina i mura, dun i ḇo ifrur sasar i. (Wasya Kejadian 34:1-4.) Roi nane nafnai rakrok ma mamun ro Dina mankundi ma kina ḇyesi.​—Kejadian 34:7, 25-31; Galatia 6:7, 8.

15, 16. Rosai na kofrur insama kofawinanem?

¹⁵ Kosmai awer roi Dina ismai nane insape kofawi Allah parenta Ḇyena napyum. ”Snonkaku ḇembran kuker snonkaku ḇefawinanem nari fyawinanem, ḇape snonkaku ḇeso kuker snonkaku ḇenawnower nari ismai roi ḇemun.” (Amsal 13:20) Kofrur aw ḇepon fa kofawi nyan ḇepyum ro Refo nakam insama kokandenbur kandera ma saneso ḇefandun ḇa na.​—Amsal 2:6-9; Mazmur 1:1-3.

¹⁶ Na kofawinanem kuker kofarkor Refo ya, konadi kor faro Yahwe I rofyor kofrur wos snemuk ḇaim, ma koso anun ḇeramuma ro women ḇesouser ma ḇefawinanem. (Matius 24:45; Yakobus 1:5) Kakuḇae, kofawi kaku koine kosambraḇ ḇa ma konapes ḇa. (Yeremia 17:9) Mboi, rofyor sia sḇuk swarapepen ḇe ko kukro smam roi kofrur na nun ḇe fararur farḇuk ido, moḇsa komam si rai? Komsor ke? Ḇaido kuker sne  ḇerun kokofen kasumasa kukro sifnoḇek ko kwar?​—2 Raja 22:18, 19.

17. Fasnaiḇairpan moḇsa na kosmai roi ḇepyum ro anun ḇeramaker min Kristen koḇesya.

¹⁷ Kwarapan fafisu ine. Ro moḇ imbesrar oso fyararur ro ya, snon oso imarisen i ma dor fa sufrur wis saswar. Snon ani isyom Yahwe I ḇa, imboi rya ifrur pyum kero. Mura, imbesrar oso ḇese myam suisya suḇe kayamyam. Inja, syewar fa dorapepen imbesrar ani. Rosai nari imbesrar ani ifruri? Nari dawoswarek i ke, myam roi ḇepyum ro swarapepen anna? Imbude iswar Yahwe I ma imarisen ifrur roi ḇekaku. Mboi, imewer ḇo ifrur monda wis saswar kuker snon ani ido, isya pyampum fararur farḇuk ḇaido ikyar faro sneri monda ke?​—Amsal 22:3; 28:26; Matius 6:13; 26:41.

18, 19. Rosai ḇefnai fa Yusuf pyampum fararur farḇuk ya?

¹⁸ Yusuf ḇyewomen ro Masir fafisu ḇyabo kaker. Ro ras ḇe ras, amber ḇyani swari dembuk i fa sufrur fararur farḇuk. Mboi, Yusuf ifawi nama roi ḇesasar nairi. Yusuf ima iswar Yahwe I ma imarisen ifrur fa Yahwe imarisen. Inja, rofyor bin ani imbe ifrowes i, pyampum i ḇeri. Snar ifawi ima women rirya, inja na ipok fa ibur amber ḇyani rarirya monda ḇa. Ras oso, rofyor amber ḇyani swari idif i fa sufrur farḇuk, ifrar ḇe ḇandi ḇeri.​—Wasya Kejadian 39:7-12.

¹⁹ Imbape, Yusuf kyara ker fararur farḇuk ḇaido iwasen ker bin ani ido, na ifrar ḇa. Mboi Yusuf ima myam wis ḇyena kuker Yahwe iso roi ḇefandun syadi. Ikofen yoḇ bin ani ḇo doḇe, ”Amber yedi ikyar roi nya nakam faro aya . . . mboi au kada oroḇa, kukro auma swa ḇyedisau. Inja, moḇsa na yafrur roi ḇeḇarḇor kaku radiri ma yasasar faro Allah rai?”​—Kejadian 39:8, 9. 

20. Rosai ḇefnai fa kofawi Yahwe ima imarisen faro Yusuf i?

²⁰ Yusuf ḇyarek ḇinkwanbur ro kina ḇyesi ma rum ḇyedi, mboi isouser faro Yahwe I, inja ismai barakas. (Kejadian 41:39-49) Yahwe imarisen Yusuf soasuser ḇyena. (Amsal 27:11) Kakuḇae, pampum fararur farḇuk ima roi ḇepyan risyaḇa. Mboi, waswarepen wos nane, ”Ḇeswar Yahwe I mkoya, mkayin roi ḇeḇyeḇa na. Myamwarek kankenem ro manfamyan ḇesouser Ḇyesya; fyaspar si ro snonkaku ḇeḇarḇor sya ḇramin sena.”​—Mazmur 97:10.

21. Moḇsa naek ḇebabo oso iso Yusuf nyan ḇepyum ḇyena rai?

²¹ Ras nakam, Yahwe kawasa Ḇyesi simkak ḇa ḇo  sfasnai sima sayin roi ḇeḇyeḇa ma siswar roi ḇepyum. (Amos 5:15) Kokam bisa kosouser faro Yahwe I, ndrama ro umur koḇena ḇa. Rupa ra, naek ḇebabo oso ismai farawrowes ro kakyar ḇyena ro rumfarkor. Inai oso ro rumfarkor ḇyedi doḇe naek ine ifnoḇek i ro ujian matematika ido, na imarisen ifrur farḇuk kuker i. Rosai naek ani nari ifruri? Iso nyan ḇepyum ro Yusuf i ma doḇe, ”Yapampum fararyor ḇyena ḇeri. Yasouser pdef faro Allah, inja smam aya ḇe snon ḇefamfnom risaya ḇa.” Marisen ḇekain kawan ḇa ro fararur farḇuk, nafnai monda kandera ma sanekar. (Ibrani 11:25) Soasuser faro Yahwe iso monda nari ḇeyun marisen ḇekain fyoro ḇesya kwar.​—Amsal 10:22.

22, 23. Moḇsa Yahwe ifnoḇek ko rofyor kofrur sasar ḇeba?

²² Ibiris ḇyuk fararur farḇuk ine fa ḇyedenem ko. Kosewar kaku fa kopampum roi ine kukro fafisu oso kokam kona kakara ḇesasar. (Roma 7:21-25) Yahwe ifawi roi ine ma ifawi ”koinema saprop siko”. (Mazmur 103:14) Inja, snonkaku Kristen oso ifrur sasar ḇeba ro fararur farḇuk ido, na rariso? Ine nḇair na ismai fafnoḇek wer ḇa ke? Oso imbror kaku kwar ido, nari Yahwe ifnoḇek i. Yahwe imarisen ḇyuk ampun.​—Mazmur 86:5; Yakobus 5:16; wasya Amsal 28:13.

²³ Yahwe ḇyuk kako roi ḇepyum faro ko. Siso penatua ḇemamwarek ma ḇeswar ko. (Efesus 4:8, 12; Yakobus 5:14, 15) Yahwe ḇyuk penatua sya fa sifnoḇek ko insama wis koḇena napyum kaḇer fa koḇebati kuker I.​—Amsal 15:32.

24, 25. Moḇsa ”kakara ḇepyum” nafnoḇek ko fa koḇinkwanbur fararur farḇuk na?

²⁴ Fandun fa kofawi kaku payamyum ro Yahwe parenta Ḇyena insama kofrur wos snemuk ḇepyum. Komewer komnis ra snonkbor Refo fyas ro Amsal 7:6-23. Nya ”kakara ḇepyum” ḇa ndari, dan Ibiris ara ḇyena, isoine fararur farḇuk. Kona kakara ḇepyum ima kona fawawi ḇemnis monda ḇa. Mboi, nari kosewar fa kofawi rosai Allah kyara na, ma kosouser na ro kenem koḇena. Koswarepen wos ḇepyum ine, ”Snonkaku ḇena kakara ḇepyum iswar i. Snonkaku ḇesyowi fawawi nari ismai payamyum.”​—Amsal 19:8.

²⁵ Kokyar Allah farkankin Ḇyena nkaku ke? Kokyar koso na ido nari kosmai marisen ke? (Mazmur 19:7-10; Yesaya 48:17, 18) Wakyar mankun ḇaim ido, waswarepen roi ḇepyum nabor Allah ifrur ḇe ko kwar na. ”Ḇaḇir ma mam snar Yahwe ima ipyum.” (Mazmur 34:8) Koswarepen roi nane ker kada, nari koswar syadi Yahwe I. Koswar roi imarisen na ma kayin roi dayin na. Koser roi ḇepyum fa nafo ro kakara koḇena, isoine roi ḇekaku na, roi Allah imarisen na, roi ḇesren na, roi nakam ḇeyun saswar, ma roi ḇepyum na. (Filipi 4:8, 9) Bisa kakmnis ra Yusuf i, ismai payamyum kukro ryower Yahwe I.​—Yesaya 64:8.

26. Rosai nari kawos wer ro farkarkor ḇerama ya?

²⁶ Kofarḇuk ḇaim ke kofarḇuk kwar ke, Yahwe imarisen kosmai payamyum ro kenem koḇena ma komarisen. Farkarkor risuru ḇerama ya nari suyawosḇair nyan insama farḇakḇuk koḇena nambran pyum.