FARKARKOR 8
Rosai Ḇefnai fa Allah Ipyos Ḇaim Ḇaḇeḇarḇor ma Kandera na?
1. Rariso ḇaḇeḇarḇor ya isya?
Allah ryir wararu ḇaḇesasoser snonkaku sya sḇepoik kawan kaker isof ro fafisu ine, infa nefasnaḇair snaro sesambraḇ ḇa fa sipyos kandera na
Ḇaḇeḇarḇor nasya kwar ro supswan ine rofyor Ibiris dawos ankarkar. Ro awar ya, Ibiris ima malaikat ḇemnis kaku. Ḇape, ”ikada iso napnapes yaḇa”. (Yohanes 8:44) Ibiris imarisen snonkaku sya sisyom i, mboi kaku ya, Allah I monda ḇenaḇye fa snonkaku sya sisyom I. Ibiris dankar bin ḇerandak, Eva i, fa isouser i, ḇape isouser Allah I ḇa. Adam i kako iso farari fa daksouser Allah I ḇa. Rosai Adam ifrur nane nafnai kandera ma marmar ya.—Wasya Kejadian 3:1-6, 19.
Rofyor Ibiris ifrowes Adam fa isouser Allah I ḇa, ifrur ḇaḇemḇroḇ faro papoik Allah Ḇyedi, ḇaido nasan Ḇyeja ḇe Allah Ḇekaki Syadi. Ḇar ḇeḇa ro snonkaku sya siso Ibiris kuk’r spampum Allah I. Inja, ”supswan ḇesiper ine isya ro papoik” Ibiris ya.—Wasya Yohanes 14:30; 1 Yohanes 5:19.
2. Braur bramin Allah ḇyena namnisḇa ke?
Braur bramin Allah ḇyena namnis kam. Snonkaku ma malaikat Allah ifrur sya sikame sisambraḇ fa sisouser mnis I. (Ulangan 32:4, 5) Allah ifrur ko fa kokinfir ro mankun ko, fa kofrur roi ḇeḇye ma roi ḇeḇye ḇa. Roi nane nḇuk ḇeko swaf fa kofasna saswar koḇena faro Allah.—Wasya Yakobus 1:13-15; 1 Yohanes 5:3.
3. Rosai ḇefnai fa Allah ipyos ḇaim kandera isof ro fafisu ine?
Ro fafisu ine, Yahwe ipyos ḇaim ḇaḇemḇroḇ faro papoik Ḇyena. Insama sfawi snar, kuk’r farfnoḇek Allah ḇyeja ḇa, na ḇaḇesasoser oso ḇaḇeri ḇeyun payamyum faro snonkaku sya. (Pengkhotbah 7:29; 8:9) Ro swaf kankenem snonkaku sya taun ri 6.000 ramnai, nefasnai bos kwar. Snonkaku ḇepoik sya sefyai ḇa fa sepyos mamamun, ḇaḇeḇarḇor, ḇaḇenanapesḇa, ḇaido dafduf ya.—Wasya Yeremia 10:23; Roma 9:17.
Ḇape, ḇaḇesasoser Allah dun fainda faro snonkaku ḇemarisen ḇekunem sya. (Yesaya 48:17, 18) Fioro werḇa, Yahwe na ipyos ḇaḇesasoser snonkaku sya kam. Snonkaku ḇekunem faro ḇaḇesasoser Allah ḇyena monda nari siso ḇekain pdef ro supswan ine.—Yesaya 11:9; Wasya Daniel 2:44.
Mam vidio Rosai Ḇefnai fa Allah Myam Monda Koḇekandera Kaker?
4. Snar Allah ḇyekaḇaḇaḇ inja, oras ḇepyum rosai kosmai na?
Ibiris ikofen snonkaku oso ḇaḇeri na beafuffarmyan faro Allah kuker sne ḇesiper. Na Wafasna kaku snar rosai Ibiris ikofen ine nekaku ḇa. Snar Allah ḇyekaḇaḇaḇ, kokame kona swaf fa kofasna snar kokinfir ḇaḇesasoser Allah ḇyena ke ḇaido ḇaḇesasoser snonkaku sya. Rosai kokinfir na nefasna bos ro kankenem koḇena.—Wasya Ayub 1:8-12; Amsal 27:11.
5. Rariso kofasna kokinfir Allah fa Ḇeḇepoik ko?
Rosai kokinfir ro kankenem kobena naiso nefasna komarisen kokunem be Allah I fa Ḇeḇepoik ko
Inja kokinfir Allah Ḇeḇepoik ko ido, na kosewar ma kosyom Allah ro farkunem ḇekaku ḇeknam ro Wos sren Allah ḇyena, Refo ya. (Yohanes 4:23) Kosampum Ibiris fa ḇeḇepoik ko ido, koso awer ro politik ma mamamun ya, imnis raris Yesus i.—Wasya Yohanes 17:14.
Kuker papoik ḇyeja, Ibiris dawyae snonkaku sya fa sifrur roi ḇeḇye ḇa ma ḇefnai fa kona roiyoḇa. Ḇape, kopampum roi ani ido, na bati ma kina koḇesya sawos anonef ma sisampum ko. (1 Petrus 4:3, 4) Inja, fandun fa kokinfir kaku. Komarisen koryur kuker snonkaku ḇeswar Allah I ke? Komarisen kosouser sasoser Allah ḇyena ḇefasnai fawi nanem ma saswar Ḇyena ke? Inja kofrur rarirya ido, na kofasna Ibiris ima dankarkar rofyor ikofen snonkaku oso ḇaḇeri na ḇesouser Allah I ḇa.—Wasya 1 Korintus 6:9, 10; 15:33.
Snar Allah iswar snonkaku sya inja, na ipyos ḇaḇeḇarḇor ma kandera na. Snonkaku ḇekyar faro roi ine, na sismai kankenem fioro ro supswan ine.—Wasya Yohanes 3:16.
