FARKARKOR 3
Ankankinem Ḇeḇye Ine Kaku Ryama ro Allah ke?
1. Karkara Manseiso Ḇero Refo ya?
Ankankinem ḇeḇye sfas ro Refo ya ikofenḇairo snonkaku sya na sikenem fioro ro supswan. (Mazmur 37:29) Refo ya ḇesiper naser syap ri 66. Allah iwan snon ri 40 fa sfas na. Syap ririm ḇerandak ḇefas ya iso Moses i, fyas na ro 3.500 taun naiwara. Syap ḇepupes ḇefas ya iso Yohanes i, fyas na ro 1.900 taun naiwara. Karkara manseiso sfas ro Refo ya? Allah dawos faro si kuker rur ḇesren Ḇyedi. (2 Samuel 23:2) Rosai sfas na naiso karkara Allah ḇyena, ḇape karkara mankun sena ḇa. Inja, fasfas ḇero Refo ya ḇeramuma ro Allah.—Wasya 2 Timotius 3:16; 2 Petrus 1:20, 21.
Mam vidio Karkara Manseiso Ḇero Refoya?
2. Rariso na kokyar kaku snar Refo ya sfadwer na ḇa?
Kokyar Refo ya ryamuma ro Allah snaro dap ḇepon ras-ras naiwama namnis kaku. Snonkaku sya na sakfrur roi ḇeradine ḇa. (Yosua 23:14) Kukro Allah Ḇesambraḇ Syadi inja I monda ḇena samambraḇ fa myam mnis rariso kankenem snonkaku sya ro fafisu iwama.—Wasya Yesaya 42:9; 46:10.
Syap ḇeramuma ro Allah ine iḇese bur ro syap ḇesena. Refo syaran ḇe syaran sifrur na ro wos ḇebor kwar ma nasya ro moḇ nakam. Umur ḇyeja fioro kwar,ḇape Refo ya namnis kuker fawawi dunya ro baboine. Osower ido, rosai manfasfas ri 40 sfas ine nakame namnisyae. * Refo ya fyas kako snar rari Allah ḇyena iso saswar ya. Syap ine ismai sambraḇ fa fyadwer kankenem snonkaku sya napyum syadi. Ḇefandun kaku ya, snar iso Ḇesambraḇ Syadi, inja pok fa myam monda sifadwer Wos Ḇyena. Roi nanekam nḇuk kakyar kwar faro snonkaku ḇebor sya snar Refo ya iso Wos Allah ḇyena.—Wasya Yesaya 40:8; 1 Tesalonika 2:13.
Mam vidio Rosai Ḇefnai fa Kokyar Rosai Ḇero Refo Ima Nkaku?
3. Rosai ḇero Refo ya?
Refo ya naser ankankinem ḇeḇye ḇekofenḇair nari Allah ḇyuk fafisu ḇepyum ro oras naiwama faro snonkaku sya. Refo ya fyasnaḇair ro awar madero snonkaku sya sna swaf fa sikenem ro firdaus, mboi napromes kwar ḇape nari Allah ifrur kaḇer na.—Wasya Fasasna Faro Yohanes 21:4, 5.
Wos Allah ḇyena naser sasoser, wos ḇeknam ma ananun. Refo ya fyas kako rariso farfnoḇek Allah ḇyena faro snonkaku sya, ine nefasna rari Allah ḇyena. Inja, Refo ya na ifnoḇek Au fa mambir Allah I. Syap ine fyasnaḇair nyan fa ḇebati kuker I.—Wasya Mazmur 19:7, 11; Yakobus 2:23; 4:8.
4. Rariso na Wafawi kaku Refo ya?
Syap ine ifnoḇek Au fa Wafawi Refo ya imnis rariso Yesus ḇyuk farkarkor ya. Dap mnuk ḇebor na ro Refo ma fyasnaḇair ”sfawi Wos Refoya”.—Wasya Lukas 24:27, 45.
Ankankinem ḇeḇye ḇerama ro Allah monda iso ḇepyum syadi. Ḇape, ono snonkaku sefandun na ḇa, ma ono sisya kako sifafayaf srower na. Ḇape Wafandun awer si. Snar Wafarkor ma mambir Allah ido nari Wasmai saneraro kankenem fioro.—Wasya Yohanes 17:3.
^ par. 3 Mam syap Buku bagi Semua Orang (Ro wos Indonesia).
