FARKARKOR 7
Karajan Allah Ido Rosairirya?
1. Karajan Allah ido rosairirya?
Rosai ḇefnai fa Yesus iso Raja bemnis kaku?—MARKUS 1:40-42.
Karajan Allah iso ḇaḇesasoser oser ro nanki. Karajan ine nari fyadwer ḇaḇesasoser ḇesena kam ma na ifrur mnis marisen Allah ḇyena ro nanki ma supswan. Inema ankankinem ḇeḇye ḇeko. Snonkaku sya sfandun kaku ḇaḇesasoser ḇepyum, ḇaḇesasoser ani iso Karajan Allah, ma fioro werḇa nari ryama. Karajan ani nari ifrur fa snonkakusya kam ro supswan ine fa sḇeoser.—Wasya Daniel 2:44; Matius 6:9, 10; 24:14.
Na raja oser ḇyepoik ro Karajan ine. Yahwe ryem kwar Yesus Kristus fa ḇye Raja ro Karajan Ḇyedi.—Wasya Fasasna Faro Yohanes 11:15.
Mam vidio Karajan Allah Ido Rosairirya?
2. Rosai ḇefnai fa Yesus iso Raja ḇemnis kaku?
Yesus iso Raja ḇemnis kaku snaro ḇyesyowi, ma damk nako napnapes ya ro kenem ḇyedi. (Matius 11:28-30) Osower ido, snaro ḇyepoik ro nanki ḇe supswan inja, ismai papoik fa ifnoḇek snonkaku sya. Rofyor ikḇawes kwar, dek ḇe nanki ma iwaf ro ḇar raku Yahwe ḇyedi. (Ibrani 10:12, 13) Ramnai, Allah ḇyuk papoik ḇe i fa ḇyepoik.—Wasya Daniel 7:13, 14.
3. Nari manseiso ḇepoik kayam kuker Yesus i?
Raryur ro snonkaku oser sisya sap siḇe ”snonkaku ḇesren” nari sḇepoik kayam kuker Yesus i ro nanki. (Daniel 7:27) Ro randak ya snonkaku sekinfir ḇe snonkaku ḇesren siso manwawan Yesus ḇesouser sya. Isof kirine, Yahwe kyinfir kaker snon ma bin ḇekyar fa sbe snonkaku ḇesren. Imnis Yesus i, si kako sikḇawes kuker ḇaken rur.—Wasya Yohanes 14:1-3; 1 Korintus 15:42-44.
Na snonkaku ḇeyek ḇe nanki sya se fis? Yesus ikofen snonkaku sine sibor ḇa. (Lukas 12:32) Karkor snonkaku ḇeyek ḇe nanki sya se 144.000. Nari sḇepoik kuker Yesus ro nanki ḇe supswan.—Wasya Fasasna Faro Yohanes 14:1.
4. Rofyor Yesus ḇyepoik kwar na rosai ḇeḇejadi ya?
Karajan Allah ḇyepoik ro taun 1914. * Ro fafisu ḇye Raja kwar, roi ḇepon ifrur na iso isawen Ibiris ma malaikat ḇeso i sya ḇe supswan. Ibiris irmomen kaku ma ifrur ḇaḇekandera ro supswan ḇesiper. (Fasasna Faro Yohanes 12:7-10, 12) Rofyor ya ḇeri, snonkaku sya sna kandera nabor kaku. Mamamun, ḇasḇiser, dafduf, ma saprop ya imer naine ḇe ”aḇyair” snar Karajan ani na kawan werḇa ḇyepoik ḇe supswan.—Wasya Lukas 21:7, 10, 11, 31.
5. Rosai Karajan Allah nari ifrur ya?
Roro fararur ḇaḇebaryas ro supswan ḇesiper, Karajan Allah iryur kwar snonkaku ro er nakam fa sḇeoser. Snonkaku ḇeḇor bena sne ḇemayar sine na sḇe kawasa Yesus ḇyesi. Rofyor Karajan Allah kyakok snonkaku ḇeḇarḇor sya ro supswan ine na snonkaku bena sne ḇemayar sya Yahwe kyadaun si. Inja, snonkaku ḇemarisen ḇesmai barakas ro Karajan Allah fandun fa sisoasuser Yesus i.—Wasya Fasasna Faro Yohanes 7:9, 14, 16, 17.
Ro swaf taun ri 1.000 ya, Karajan ani nari ifrur mnis marisen Allah ḇyena ro randak ya faro snonkaku sya. Supswan ḇesiper ine nari ḇye firdaus. Ramnai, Yesus ḇyuk kaḇer Karajan ani faro Kmari. (1 Korintus 15:24-26) Manseiso Wamarisen Wakofenḇair Karajan Allah ḇe i?—Wasya Mazmur 37:10, 11; Matius 5:5.
^ par. 6 Infa Wafawi naborwer kuker nubuat ro Refo ḇekyurfasnai be taun 1914, mam ram ḇeḇe 215-218 ro syap Rosai Refo Fyarkor Ḇeko?
