FARKARKOR 4
Manseiso Yesus Kristus I?
1. Rariso kankenem Yesus ḇyedi ro randak ya?
Rari rosai monda ḇefrur fa simarisen sfanam Yesus i?—MATIUS 11:29; MARKUS 10:13-16.
Yesus ima braur bramin ḇerandak Allah ḇyedi. Yesus imnis ḇa kuk’r snonkaku ḇese, sḇeyaḇen i ro supswan ine ḇaim ima ikenem kwar ḇe malaikat ro nanki. (Yohanes 8:23) Bin oso daḇen i ro nanki ḇa. Kmari ro nanki Yahwe I, ifrur ḇeri Yesus i monda ro nanki. Inja, kaku ya Yesus sap i ḇe Romawa Allah. Sap kako i ḇe ”Wos” snaro iso ḇeyawos pyan wos Allah ḇyena. (Yohanes 1:14) Yesus i kako ifrur roi ḇesena kam.—Wasya Amsal 8:22, 23, 30; Kolose 1:15, 16.
2. Rosai ḇefnai fa Yesus ryama ḇe supswan ine?
Allah iwan Romawa Ḇyedi ro nanki ḇe supswan kuker fyadwer kankenem ḇyedi ro sne kapar insos Yahudi oso ḇenyir Maria i. Inja, Yesus nya kma snonkaku ḇa. (Lukas 1:30-35) Yesus ryama ḇe supswan infa (1) ḇyuk farkarkor ḇenapes kuker Allah (2) ḇyuk farari ḇepyum fa ifrur marisen Allah ḇyena rofyor ismai samswen, ma (3) ḇyuk kankenem ḇemnis ḇyedi fa ḇe ”ḇaḇyak”.—Wasya Matius 20:28.
3. Rosai ḇefnai fa kofandun kaku ḇaḇyak ya?
Ḇaḇyak ya iso roi sḇukḇak fa ḇefaspar snonkaku ro marmar ya. (Keluaran 21:29, 30) Rofyor ifrur snonkaku ya, Allah imewer kaku sḇe sinan ma simar. Kofawi na kwar snar Allah ikofen ḇe snonkaku ḇerandak, Adam i, ifrur ”sasar” imnis Refo ikofen na ido, na imar. Imbape, Adam ifrur sasar ḇa kada, na imar ḇa. (Kejadian 2:16, 17; 5:5) Refo ya ikofen, marmar ya ”syun” ḇe kawasa snonkaku sya roro Adam i. Inja, Adam ḇyuk sasar ma marmar ya faro kpu ḇyesi. Kofandun ḇaḇyak ya insama kosae bur ro marmar kosmai na ro Adam.—Wasya Roma 5:12; 6:23.
Mansei na ḇeḇuk ḇaḇyak fa kosmai fasaspar ro marmar ya? Rofyor komar, koḇak monda sasar mankun koḇena. Snonkaku ḇesasar sya na sipok fa sḇak sasar snonkaku ḇese sya ḇa.—Wasya Mazmur 49:7-9.
4. Rosai ḇefandun fa Yesus imar ya?
Yesus nya sasar noḇa, snaro ḇyeḇeaḇen kuker papoik Allah ḇyena, inja imnis kuker koḇa. Ifrur sasar kermkun ḇaḇeri. Inja, fandun fa imar faro sasar mankun ḇyena ḇa, mboi imar snar sasar snonkaku ḇese. Allah iwan i snaro Iswar kaku snonkaku sya. Yesus ikako fyasna saswar ḇyedi ḇeko kuker isoasuser Kmari ma ḇyuk kankenem ḇyedi ḇeko.—Wasya Yohanes 3:16; Roma 5:18, 19.
Mam vidio Rosai Ḇefnai fa Yesus Imar?
5. Rosai Yesus ifrurna ro kirine?
Rofyor ikenem ro supswan, Yesus ḇyuk pararei faro ḇeduf sya, ḇyawes ḇemar sya, ma ifnoḇek snonkaku ḇesmai kandera sya. Inja, fyasnai rosai na ifrur ro fafisu iwama faro snonkaku ḇesousersya kam. (Matius 15:30, 31; Yohanes 5:28) Yesus imar ramnai, Allah ḇyawes i ḇe malaikat wer. (1 Petrus 3:18) Ramnai, iwaf ro ḇar raku Allah ḇyedi isof Yahwe ḇyuk papoik faro i fa ḇye Raja ro supswan. (Ibrani 10:12, 13) Fafisu ine, ḇye Raja kwar ro nanki, ma manfamyan ḇyesi sḇeḇaryas ankankinem ḇeḇye ani ro supswan ḇesiper.—Wasya Daniel 7:13, 14; Matius 24:14.
Fioro werḇa, Yesus ḇyuk papoik ḇyena ḇe Raja fa ipyos kandera nakam ma snonkaku ḇefnai kandera ya. Snonkaku ḇekyar ma ḇesouser faro Yesus syakam nari sismai kankenem ro firdaus ro supswan.—Wasya Mazmur 37:9-11.
