FARKARKOR 10
Nyan risai ḇeyun ko ḇe Allah I?
1. Nyan oser monda ḇeyun ḇe Allah ke?
”Mkoḇesasor mkoro nabi-nabi sararer.”—MATIUS 7:15
Yesus fyakor nyan ḇaido kakyar oser ḇenapes faro snonkaku ḇeswar Allah I. Yesus ikofen ine imnis raris nyan ḇeyun ḇe kankenem fioro. Yesus ikofen snar ”kawasa ḇesmai sya sibor ḇaḇeri” ro nyan ine. (Matius 7:14) Allah imarisen monda kakakyar ḇeknam ro Wos sren Ḇyena. Allah imarisen snonkaku syakam ḇeso ma ḇembran ro nyan napnapes.—Wasya Yohanes 4:23, 24; 14:6; Efesus 4:4, 5.
Mam vidio Allah Imarisen faro Samsyom Nakam Ke?
2. Rosai Yesus ikofen kuker snonkaku Kristen ḇekakuḇa sya?
”Skarem soḇo sifawi Allah, ḇape ro fararur sena sfamyun Allah. Sikada snonkaku befrur roi bemnis oso ḇaḇeri.”—TITUS 1:16.
Yesus ḇyuk srawarapepen snaro nabi ḇekaku ḇa sisya rofandu snonkaku Kristen sya. Ro ḇandi sisnai ḇe ḇeso ro kakayar ḇekaku. Gereja ḇebor sya sap siḇe Kristen. Ḇape, rosai sikofen nakaku ke? Rariso kofawi na? Ḇe snonkaku Kristen ḇekaku sya sifasnaḇadiro rari rari ḇepyum ro fandu snonkaku ḇese sya.—Wasya Matius 7:13-23.
3. Rariso insama wafawi snonkaku ḇeso ro kakakyar ḇekaku ya?
Mam mnis nyan ririm ḇeuser ine:
-
Snonkaku ḇeso ro kakakyar ḇekaku ya sesyowi kaku Refo, snar Refo iso Wos sren Allah rirya. Snonkaku Kristen sya sikenem mnis kuker wos ḇeknam ro Refo. Inja, kakakyar ḇekaku iḇesebur ro kakakyar ḇeknam ro swaruser snonkaku sya.(Matius 15:7-9) Ḇeso ro kakakyar ḇekaku ya sikenem kuker rosai sifarkor kwar na.—Wasya Yohanes 17:17; 2 Timotius 3:16, 17.
-
Ḇeso ro kakakyar ḇekaku ya sesyowi Allah snonsnon Ḇyedi, Yahwe I. Nabi ḇepon raris Musa ma Daud sufawi pyum Allah snonsnon Ḇyedi (Keluaran 3:15; Mazmur 8:1) Yesus ikako ḇyesyowi Allah snonsnon Ḇyedi ma ikofenḇadir snonsnon ine ḇe snonkaku ḇesesya. Ifnoḇek si fa sifawi pyum Allah ma fyarkor nyan rariso sḇenadi insama sifasren Allah snonsnon ḇyedi (Matius 6:9) Ro moḇ ḇedi, mansei bekofenḇadir Allah snonsnon Ḇyedifaro snonkaku ḇesesya?—Wasya Yohanes 17:26; Roma 10:13, 14.
-
Ḇesoasuser kaku Yesus I, sḇaryas Karajan Allah. Allah iwan Yesus I fa ḇyeḇaryas ankankinem ḇeḇye kuker Karajan Allah. Snaro Karajan Allah iso ḇebuk saneraro oser ḇe kawasa sya. Inja ikofenḇadirna isof marmar ḇyeja. (Lukas 4:43; 8:1; 23:42, 43) Ḇesouseri sya nari sikako sakḇaryas ankankinem ḇeḇye ine. Rofyor ono srama sḇaryas kuker Karajan Allah ḇe Au ido, agama rosairirya?—Wasya Matius 24:14.
-
Ḇesouser Yesus siso ro bar dunya ḇeḇarḇor ine ḇa. Napyan fa wafawi pyum si snar sakso ro ḇar politik ro dunya ine ḇa. (Yohanes 17:16; 18:36) Osower ido, sikako sifarari kenem ḇepyum ḇa ma roi ḇeḇarḇor ro snonkaku dunya ine.—Wasya Yakobus 4:4.
-
Ḇesouser kaku Yesus I sifasna saswar ḇekaku rofandu si. Wos Allah fyarkor si fa sesyowi snonkaku ḇerama ro keret ḇese syakam. Kakakyar ḇekaku ya simewer sakso mamun ya. Mḇoi, agama ḇekaku ḇa simarisen siso kaku ro mamamun ya. (Mikha 4:1-3) Ḇape, ḇeso Yesus si simarisen sḇuk oras ma samambraḇ sena fa sifnoḇek ma sisaramper snonkaku ḇese sya.—Wasya Yohanes 13:34, 35; 1 Yohanes 4:20.
4. Na wafawi kakakyar ḇekaku ya ke?
Karkara ḇedi Rariso, agama sarirya farkarkor Ḇyena beknam ro Refo, ḇesyowi Allah snonsnon Ḇyedi, ma ḇeḇaryas Karajan Allah faro snonkakusya kam? Agama sairirya ḇefasnai saswar ḇekaku ma ḇeyakso ḇa ro mamun ya?—Wasya 1 Yohanes 3:10-12.
