FARKARKOR 14
Rosai ḇefnai fa Allah nya organisasi?
1. Rosai ḇefnai fa ro randak iwara Allah iryur er Israel sya?
Allah iryur Abraham kpu ḇyesiḇe er oser ma ḇyuk sasoser ḇesi. Dap siḇe er ”Israel” ma Ifnoḇeksi fa sores nako ro ibadat ḇekaku ma wos sren Ḇyena. (Mazmur 147:19, 20) Inja, er ḇese sya kam sismai barakas snaro er Israel sya.—Wasya Kejadian 22:18.
Allah ḇyekinfir er Israel sya fa sḇe saksi ḇe I. Rosai er Israel sya sismai ro fafisu iwara nfasnaḇadiro sisouser Allah sasoser ḇyena. (Ulangan 4:6) Inja, roro er Israel ine, er ḇese sya sakfawi Allah ḇenapes ya.—Wasya Yesaya 43:10, 12.
2. Rosai ḇefnai fa snonkaku Kristen ḇekaku sya sḇeḇeryur?
Snaro er israel sya sisouser Allah iḇa, inja Allah imewer ma pyampum si ma fyadwer si kuker sidang jemaat Kristen. (Matius 21:43; 23:37, 38) Snonkaku Kristen ḇekaku ro fafisu ine, siso ḇefadwer er Israel sya fa sḇesaksi ḇe Yahwe.—Wasya Farfyar Ro Manwawansya 15:14, 17.
Yesus fyasos manfamyan ḇesya fa sḇaryas ma sifnoḇek er ḇese sya, fa sakḇe manfamyan ḇe Yesus I. (Matius 10:7, 11; 24:14; 28:19, 20) Fararur ine iba kaku ma komam ro supswan ḇesiper ine. Rofyor iwara isof ro kirine Yahwe ḇyuk fararur ḇaḇeḇaryas ine fa ḇyeryur snonkaku ḇerama ro er syakam ḇe ibadat ḇekaku ya. (Wasya Fasasna Faro Yohanes 7:9, 10) Fararur ine iba kaku ma komam ro supswan ḇesiper ine. Rofyor iwara isof ro kirine Yahwe ḇyuk fararur ḇaḇeḇaryas ine fa ḇyeryur snonkaku ḇerama ro er syakam, ḇe ibadat ḇekaku ya.—Wasya Ibrani 10:24, 25.
3. Rariso Saksi-Saksi Yahwe sisya ro fafisu ine?
Fanam ḇe taun 1870, Raryur snonkaku riḇeso ḇefarkor Refo sya sismai napnapes Refo ḇefroyo kwar ḇeḇefasna ḇaim. Snar sifawi Yesus fyasos kwar sidang Kristen fa sḇaryas, inja sikako sifrur mnis raris Yesus ikofen na iso sḇaryas Karajan Allah ḇe snonkaku ro supswan ḇesiper. Ro taun 1931, sap siḇe Saksi-Saksi Yahwe.—Wasya Farfyar Ro Manwawansya 1:8; 2:1, 4, 11; 5:42.
4. Rariso Saksi-Saksi Yahwe seorganisasi si rai?
Ro abad randak ya, sidang-sidang jemaat Kristen ro supswan ḇesiper sismai farkankin ro snonkaku Kristen ḇemanfarkin sya ma sfawi kaku Yesus iso ḇeḇukor ro sidang Kristen. (Farfyar Ro Manwawansya 16:4, 5) Ro fafisu ine kako, Saksi-Saksi Yahwe ro supswan ḇesiper sismai farkankin ro snonkaku Kristen riḇeso Ḇemanfarkin, sima Penatua ḇesmai fawawinanem ma ḇefawinabor kwar. Siso ḇeḇuk farkankin faro kantor-kantor cabang Saksi-Saksi Yahwe. Kantor-kantor nane naiso ḇefrur ma ḇefarem syap ḇeknam ro Refo ḇe supswan ḇesiper ma syap nane nasyadi ro wos ri 600. Inja, Snonkaku Kristen Ḇemanfarkin sine sḇuk wos ḇeyun sneprei ma ḇeknam ro Refo faro sidang ḇesyadi ro 100.000 ro supswan ḇesiper. Ro sidang oser-oser, ḇefararur ḇe penatua sya sima snon Kristen ḇena fawawi. Manfarkin sine sifasnaḇair sawarwar faro kawasa Allah ḇyesi. —Wasya 1 Petrus 5:2, 3.
Saksi-Saksi Yahwe sifasos si fa sḇaryas ankankinem ḇeḇye ma sifnoḇek snonkaku sya fa sakḇe manfamyan ḇe Yahwe I. Imnis raris manwawan sya siḇaryas ankankinem ḇeḇye ro rum ḇe rum. (Farfyar Ro Manwawansya 20:20) Si kako simarisen sḇuk farkarkor ro Refo ḇe snonkaku ḇeswar kaku napnapes ya. Saksi-Saksi Yahwe seoser monda ḇaḇoi, sekina oser ma siswaryae si snaro sisyom Kma ḇena saswar ya. (2 Tesalonika 1:3) Snar sḇeorganisasi si fa sifrur Yahwe marisen Ḇyena ma sifnoḇek snonkaku ḇesesya, inja siso kina ḇena aski syadi kaku ro supswan ine ḇesiper.—Wasya Mazmur 33:12; Farfyar Ro Manwawansya 20:35.
