Kwarapan fawar ine: Karen isya ro munara oso ma fyoroḇa ro swaf menit risamfur ryower mkaren ro bati ḇero ḇarpur ḇyedi.

Karen pyambar, myam bati ḇyedi Jesika duf botol risuru ḇebas kwar. Ifawi snar botol suru suine naser swan. Jesika duf botol oser ma myam Karen mkasi ma doḇe, ”Wakinem kermkun mura, insa wakmarisen waba kwar to?”

Karen imbe pyampum na mboi jadiḇa, snar Jesika ima bati ḇyedi rya. Ma Karen imewer nari bati ḇyedine kyara sasar ima bati ḇepyum ḇa. Osower ido, Jesika ima inai ḇefrur pyum dirya. Ma rofyor dinem ido, na dinem nabor ḇa. Karen dawos ro mankundi, ’inema aninem monda rirya, imnis kuk’r narkoba ḇa.’

Au iso ḇesmai fafisu ḇemnis Karen ido, nari rosai wafrur ya?

Ro fafisu ḇeradine wun snemuk kuker fawawinanem ido, fandun fa mambir mankundaw. Mambir mankundaw ine iso sneḇaḇir ḇefasnaḇair manseiso Au ma rariso kakyar Bedi raya. Kuker mambir mankundaw, nari nafnoḇek Au fa fara mankundaw ḇardibur ro snonkaku ḇese ḇefara kankenem Bedi.—1 Korintus 9:26, 27.

Inja, rariso na bisa swewar samambraḇ ya? Kuker kwarem fakfuken-fakfuken ḇeḇeuser nane, inema nyan ḇepyum dirya.

Kuker wafawi samambraḇ ma rari-rari ḇepyum Bedi nari nafnoḇek Au ro kakyar mankun Bedi.

FARARI RO REFOYA: Manwawan Paulus fyas, ”Yafawi yawawos mankunba, ḇape fawawi ḇekur Allah yafawi syadi.” (2 Korintus 11:6) Kuker Paulus fyawi kaku wos ḇero Refoya, dores nako rofyor snonkaku sya sawyae i. Imewer roi ḇeḇyeḇa snonkaku sya sifrurna nafrur fa kakyar ḇyena nsamḇraḇ ḇa.—2 Korintus 10:10; 11:5.

MAMBIR KAKU MANKUNDAW: Fas samambraḇ Bedi ḇaido ḇaḇekir wasmaina.

Fasnaḇair rari ḇepyum wasmaina. (Imnis raris, fasnai wafandun snonkaku ḇesesya ke? fasnaḇair snemura ke? sikyar faro Au ke? wafrur ḇeri rosai wakofen na ke?)

Rofyor mam monda ḇaḇeraryarḇa fyara kankenem Bedi ido, na jadi fa mambir mankundaw ḇa. Nari wamnis raris kabrai ḇefesepen nako ḇa.

FARARI RO REFOYA: Paulus fyawi ḇaḇeraryarḇa ḇyena. Fyas, ”Sneri kada imarisen faro Allah sasoser ḇyena, ḇape yafawi kaku ro baken ayeja sasoser oso ḇese isya ḇeyufepen aya, isoine sasoser ḇesampum kuker sasoser raris kakara fawawi ayena. Iso ebedari sasoser sasarya iyabek aya.”—Roma 7:22, 23.

MAMBIR KAKU MANKUNDAW: Ḇaḇeraryarḇa rosai monda fandun fa yasewar insa yapampum na?

Na wamarisen wek ro oto oso ma wakofen ḇe ḇeyun oto ani fa mufrar muyar monda ro moḇ oso rawo mani ro oto ani nabro ke? Ima fararur ḇeyun roi noḇa ma nafnak monda pipi!

Farkarkor ya iso? Wafawi rosai swewar ro kankenem Bedi ido, na wasmai nyan ḇemnis ro kankenem Bedi, insa wambran ro moḇ oser monda ḇa. Wafawi moḇ ma rariso rwaḇe diwa raya.

FARARI RO REFOYA: Paulus fyas, ”Eḇedari yafrar karker ḇemoḇ sfasnaya.” (1 Korintus 9:26) Paulus imewer roi ḇero dunya ine fyara kankenem ḇyeja. Mboi, ryir ro ḇarpon sasewar ḇyena ma ikenem imnis kuker sasewar ḇyena kam.—Filipi 3:12-14.

MAMBIR KAKU MANKUNDAW: Fas roi rikyor wamarisen swewar ro taun ḇeuser ya.

Rofyor nwa snemuk ḇa ido, nari ḇeḇirḇar. Imnis raris aiwan bunglon, nari bisa fa wafadwer Au fa wakmnis bati ḇesya. Ine kyurfasnai mankundaw nwa kakyar ḇenako ḇa.

Ḇardibur ro na, rofyor nwa snemuk kwar ido, ine kyurfasnai nwa kakyar ḇenako. Rosai snonkaku ḇesesya sifrurna, sipok fa sḇefara Au ḇa.

FARARI RO REFOYA: Rofyor nabi Daniel ḇyabo kaker, ”dun snemuk ro sneri” fa isouser faro Allah Sasoser Ḇyena, rofyor ḇyesisye kuker kina ḇyesi. (Daniel 1:8) Kuker ifrurna, isyambraḇ pdef. Daniel ikenem imnis kuker snemuk rosai dun kwar na.

MAMBIR KAKU MANKUNDAW: Rosai kakakyar Bedi? Imnis raris: Wakyar faro Allah ke? Wakyar ido, rosai ḇefnai ya? Rosai ḇefnai fa wakyar kaku snar Allah ima isya?

Wakyar snar farkankin ro Allah na nun payamyum faro Au ke? Rosai ḇefnai fa wakyar ya?

Inja, rosai wamarisen fa wakinfir ya—na wamnis airam ḇesapi ḇeḇeuf ro wamya mura-muma ke? Ḇaido wamnis raris aiknam ḇeyores nako rofyor wamdoḇer ḇeba myuni? Mambir kaku mankundaw ido, nari wamnis aiknam ani. Inja, na bisa fa kwarem fakfuken, Manseiso aya Ine?