Kwarapan fawar ine: Rofyor Tim ifnak kuker bati ḇyesi, isyo pdef bola ani fa imerpum snonkaku sya jendela sena.

Au iso Tim ido, rosai nari wafrur ya?

NWA KANKINFIR RIKYOR:

1. Wafrar.

2. Wakurpum sasarya ḇe ḇesesya.

3. Wakofenḇair ḇe snonkaku ḇena rum ya, ma bak jendela sena.

Nari kwara ipyum ya kwinfir Kankinfir A. Ḇape, Au iso ḇefrur sasar anna ke, wafrur sasar ḇese ke, ipyumya iso wakofenḇair sasar Bena.

1. Iso roi ḇekaku fa wafrurna.

   Refoya doḇe, ”Nkomarisen nkofrur roi ḇenapes ḇesya kwar.”—Ibrani 13:18.

2. Snonkaku sya simarisen sḇuk ampun faro snonkaku ḇekofenḇair sasar sena.

   Refoya doḇe, ”Mansei ḇeyokef sasar ḇyena nari ismai fainda ḇa, imbape mansei ḇekofenḇair ma ḇembror nari ismai sawarwar ya.”—Amsal 28:13.

3. Ḇefandun syadi ya iso, insama nafrur fa Allah imarisen.

   Refoya doḇe, ”Yahwe dayin kaku faro snonkaku ḇefarawrowes ḇape ḇyebati fanam faro snonkaku ḇena sne ḇeuser.”—Amsal 3:32.

Ketrina, umur ḇyeja 20, ḇyensewar fa ikram kartu tilang ro kmari rofyor ismai tilang ro polisi. Mboi jadi fa iyokef pdef na ḇa. Ketrina doḇe, ”Taun oser ḇyenande kwar, kma yedi myam syap tilang ani neḇefas snonsnon ayedi. Yafawi inema sasar beba kaku dirya!”

Rosai farkarkor ya? Ketrina doḇe, ”Rofyor wakram sasar bena ido nari naḇyeḇa syadi. Nari wasmai bon ḇeḇyeḇa ro ras-ras ḇerama ya!”

Refoya doḇe, ”Snar kokam kosasar ro roi nabor.” (Yakobus 3:2) Imnis kofawi kwar, rofyor wakofenḇair sasar Bena ma wafrur mnisna ḇeri ido, ima nfasnaḇair nwa sne ḇerun ma wamas kwar ro rurya.

Nyan ḇeḇeuserya wer iso wafarkor ro sasar wafrurna. Insos oso ḇenir ḇe Fera doḇe, ”Yafarkor fa yamam sasar yafrur nakam nbe farkarkor ḇe aya. Nane nafnoḇ’k aya fa yaḇe snonkaku ḇepyum syadiwer. Ma, nane nafnoḇ’k aya fa yafrur mnis roi ḇeradirya ro fafisu ḇesena.” Rwama, mam rariso wafrurna rai.

Wor kmami sepeda ḇyedi ma wek ro na mboi wafruri fa iḇyeḇa. Rosai nari wafrur ya?

• Ḇefasis monda insama kmami ifawi awer.

• Wakofenḇair ḇeri ḇe kmami rosai ḇeḇejadi ya.

• Wakofenḇair ḇe kmami rosai ḇeḇejadi ya ḇape kwur sasarya ḇe snonkaku ḇesesya.

Wasmai nilei ḇepyum ḇa snar wafarkor myaren ḇa. Rosai nari wafrur ya?

• Wakofen ulangan ani iso ḇesasar ya.

• Wamsor awer snar wek kelas ḇa.

• Wakur sasarya ḇe guru Bedi snar imarisen faro Au ḇa.

 Mam kaḇer fawar insanja anna ma kwarapan Au iso (1) kmami ma (2) guru Bedi. Rosai nari sukara ya rofyor wakofenḇair sasar Bedi? Rosai nari sukara kuker Au rofyor wayokef sasar Bena?

Kirine kwarapan sasar wafrurna ro taun aniwara ma kwarem fakfuken-fakfuken ḇeḇeuser nane.

Sasar rosai rirya? Rariso wafrur mnis kaḇer sasar anna rai?

• Yayokef sasar ayena.

• Yakur sasar anna faro snonkaku ḇesesya.

• Yakofenḇair ḇeri sasar ayena.

Rofyor wakofenḇair sasar Bena ḇa ido, nari ro ḇarpurya rariso sneḇaḇir Bedi ndraya?

• Yamarisen—yamkei kwar ro sasar na!

• Yasasar—iḇye kada yakofen rosai ḇekaku ya.

Rariso wafrur mnis kaḇer fafisu ani kuker payamyum kaku?

Farkarkor rosai wun ro sasar wafrur kwar na?

Rosai ḇefnai fa snonkaku ḇeḇeso sya simewer sikofenḇair sasar sena?

Rosai nari snonkaku ḇesesya skara kuker Au rofyor wayokef ker sasar Bedi, ḇape rosai nari skara kuker Au rofyor wakofenḇair sasar Bedi?—Lukas 16:10.