Rofyor kapira oso ḇyebeaḇen nari musmai aski, mḇoi kapirare ine ifrur fa mumor kaku. Rofyor muḇesinan ḇebabo, nari mukara ḇa na oras ma samambraḇ muḇedi naḇro muḇuk fa mufarasrus kapira ani. Snar inema na nafrur fa muyenef mnisḇa ma ine kako nafrur fa mumasasoryaemu. Inja mufasospyum insama mufaduru kapira ani ma mumamwarek insama farḇakḇuk muḇena ḇeaski pdef. Rariso farkankin ḇero Refo ya ifnoḇek mu?

ROSAI REFO IKOFEN YA: ”Saswar ani kaḇaḇaḇ ma ḇaḇenaḇye.” Saswar, ani ḇyedafdifer snonkaku ḇese fa siso marisen ḇyenaḇa, imasasor fasawḇa.” (1 Korintus 13:4, 5) Rofyor ḇe awin ḇebabo ido, nari swaruser Ḇena ḇesiper ḇuk faduru kapira Ḇedi. Ḇape, na swa Ḇedi byabir wafandun i ḇa. Inja ḇefarander awer insama mampyum i kako. Kuker kaḇaḇaḇ ma sawarwar wafrur fa ḇyabir i kako wafandun i fa mufaduru kayam kapira muḇedi.

”Snon ḇe fakawin kwar mkoya . . . mkokenem kuker fawawi faro swa mkoḇesi.” (1 Petrus 3:7) Fandun fa wafawi snar samambraḇ swa Ḇedi na ḇyuk nakame ḇe kapira muḇedi. Snar inema fakamamar babo ḇe i inja nafrur fa ḇyestres ḇaido imor, inja nari imsor fasawsaw ḇe Au. Ḇape befasis monda, ”Mko kam mkosamberen famkomnaf, ḇape mkowawos ma mkomasasor fasaw awer kako”. (Yakobus 1:19) Fasnaḇair nwa fawawi pyum ma ḇuk sarsonem faro rosai fyandun na.—Amsal 14:29.

NA ROSAI WAFRUR NA:

• Kamam: Wafnoḇek swa Ḇeja fa mufaduru kapira ya, ibasyadiwer ro roḇ na. Ḇuk oras Ḇedi nabor awer faro fararur ḇesena insama wasmai oras nabor faro swa ma kapira Beja

• Awin: Rofyor swa Ḇeja ikofen imarisen dakfaduru kapira mubedi na wamarisen kako. Mḇoi rofyor myammnis i ḇa ido wamsor awer mḇoi kuker kaḇaḇaḇ wakofen nyan ḇemnis faro i

ROSAI REFO IKOFEN YA: ”Sukam suḇe ḇaken oser” (Matius 19:5) Rofyor kapira ya isya kwar rofandu kina muḇedi ido, muswarepen Au ma swa Ḇedi muma ”ḇaken oser”. Inja fandun fa musambraḇser sfesepen muḇena.

Ḇinswa mkoya, mkokofen kasumasa faro swa mkoḇedi snar sarsonem ma farfnoḇek ḇyuk kwar na. Ḇaḇesyowi wafasna kwar na nari ḇyuk ’pararei’ ine kyurfasnai mkosambraḇser sfesepen mkoḇena ro fafisu ḇebabo ine. (Amsal 12:18) Snonswa mkoya, mkokofen faro swa mkoḇesi snar waswar ma ḇesyowi kaku i. Ḇesyowi i snar fararur marḇak ifrur kwar na ro kina.—Amsal 31:10, 28.

”Snonkaku oso ifararur faro fandun mankundi ḇyena ḇardi awer. Snonkaku oser-oser ifararur faro fandun snonkaku ḇese kako” (1 Korintus 10:24) Wafrur roi ḇepyum syadi faro swa Ḇedi. Ḇe snon ma binswa, fandun fa muna oras fa muwawos ro sne ḇe sne, muḇesyowiyae ma muroweryaemu. Fandun fa waswarepen insama ḇedif awer marisen ḇaken Ḇeja monda. Fandun fa mam mnis kaku fandandun snonswa ma binswa Ḇedi. Refo ya ikofen ”Muḇesisyeyae awer, fafisu ono muḇesisyeyae rofyor mumarisen kamwer.” (1 Korintus 7:3-5) Inja, muwawos roi naine kuker fababa rofandu mankunmu. Ḇaḇekaḇaḇaḇ ma fawawi pyum nari ḇesamḇraḇser farḇakḇuk muḇena.

NA ROSAI WAFRUR NA:

• Mufasos fa muna oras fa muyemir monda

• Wafrur roi kasun, imnis raris wafrur dur fa dinem ma wafnoḇek i ro rosai fyandun na inja na ifawi kaku waswar i

ROSAI REFO IKOFEN YA: ”Rofyor wabaḇaya mambir kwar Refo ḇeḇuk fawawinanem faro aw ma ḇefarkin aw faro fasaspar ya.” (2 Timotius 3:15) Mufasos rariso nari mufarkor kapira muḇedi. Kapira ya ismai samambraḇ fa fyawi pyum kwar rofyor ḇyebeaḇen ḇaim. Rofyor sna ḇyeja dores i kaker ifawi kwar mkarem muḇena ma i kako ḇyaḇir sneḇaḇir muḇena. Rofyor ḇyekapira kaker, wawasya fawar ro syap oso ḇe i. Rarirya imbude ifawi ḇaim na, mḇoi nari ine fnoḇek i fa imarisen iwasya rofyor iḇa kwar.

Mukara awer ḇyekapira kaker fa ryower fawar muḇena kuker Allah. Muḇenadi kayam kuker i ḇe Yahwe. (Ulangan 11:19) Rofyor mkoryur kayam, mufawar ḇe i braur bramin Allah Ḇyena. (Mazmur 78:3, 4) Inja rofyor iba mura, nari ḇyaḇir muswar kaku Yahwe I ma i kako ifarkor fa dakswar Yahwe I.

NA ROSAI WAFRUR NA:

• Muḇenadi fa muyor farkankin insama muḇuk farkor kapira muḇedi

• Muyawos saḇaḇek wos ḇefandun kaku insama fyarkor na rofyor ibaḇa kaker