Kakuḇae, musasewar kaku kwar fa farḇakḇuk ma kina muḇedi ismai aski. Mboi ḇaḇekandera kokara na ḇaim ndrama nawyae aski ro kina muḇedi. (Pengkhotbah 9:11) Snar Allah saswar Ḇyedi inja ḇyuk farfnoḇek ḇemu fa musambraḇ rofyor kandera ya ndrama. Rofyor mufrur wos ḇefarkin ro Refo ḇeuser ine, nari sambraḇsermu kuker kina muḇedi rofyor ḇaḇekandera ḇeba ndrama.

ROSAI REFO IKOFEN YA: ’Mkoḇuk makakwarek mkoḇena kam faro Allah, snar i ḇefaduru mko.’ (1 Petrus 5:7) Ḇaḇekandera musmai nane ndrama ro Allah I ḇa. (Yakobus 1:13) Rofyor mufanam ḇe I, nari Ifnoḇekmu kuker nyan ḇepyum. (Yesaya 41:10) ”Ro ḇarpon ḇyedi wakofenḇadir sneḇaḇir ḇedi.”—Mazmur 62:8.

Na musmai sneprei snar muwasya ma mufarkor Refo ine ro ras ḇe ras. Nari musmai sneprei ḇerama ro Yahwe rofyor ḇaḇekandera ndrama. (2 Korintus 1:3, 4; Roma 15:4) Yahwe ḇyeasas nari ḇyuk ḇemu ’saswar ḇaḇye ro Allah ḇesyadi ro kakara nakam’.—Filipi 4:6, 7, 13.

NA ROSAI WAFRUR NA:

• Muḇenadi faro Yahwe insama musmai sneprei ma kakara ḇepyum

• Mukara nyan ḇepyum sarirya ma mukinfir nyan ya faro mkokam

ROSAI REFO IKOFEN YA: ”Snonkaku ḇesmai fawawinanem sismai fawawi ya, ma kneram snonkaku ḇefawawinanem sine sisewar fawawi ya.” (Amsal 18:15) Muryur anun ḇebor. Musewar rosai kina ḇedi oser-oser sfandun na. Muwos kuker si ma murower si.—Amsal 20:5.

Rariso rofyor snonkaku waswar ya imar? Muḇe sneso ido famyun awer sneḇaḇir muḇena. Muswarepen, Yesus i kako, ”kyanes”. (Yohanes 11:35; Pengkhotbah 3:4) Fandun kaku fa muyenef pyum kako. (Pengkhotbah 4:6) Inja, nari napyan fa musambraḇ pdef ro fafisu ḇesamswen ine.

NA ROSAI WAFRUR NA:

• Muwawos ro ras ḇe ras sneḇaḇir muḇena faro kina muḇedi. Inja, Rofyor ḇaḇekandera ya ndrama, nari napyan fa sawos ḇemu

• Muwawos ḇe snonkaku ḇesesya, ḇesmai kwar kandera ḇemnis ḇeradirya

ROSAI REFO IKOFEN YA: ”Ḇaḇebati ḇekaku ya, ifo kuker saswar ro oras nakame, ma ḇye naek ma srar ḇeko ro fafisu ḇesamswen.” (Amsal 17:17) Bati muḇesi simarisen sifnoḇek mu, mboi sikmom rosai fandun sifrur ḇemu. Mumai awer mukofen ḇesi rosai mufandun na. (Amsal 12:25) Ma, musewar farkankin ro snonkaku ḇesmai fawawinanem syadi ro Refo. Nari sḇuk farkankin ro Refo fa ifnoḇek mu.—Yakobus 5:14.

Na musambraḇ pdef rofyor muḇebati kuker snonkaku ḇesmai kakyar nako ma sikyar faro Allah asas Ḇyena. Nari musmai sneprei rofyor musambraḇser snonkaku ḇese ḇefandun saramper muḇena kako. Fawar kakyar muḇedi ma Yahwe asas Ḇyena faro si. Ro ras ḇe ras mufnoḇek snonkaku ḇese ḇesmai kandera, ma mubinkwan bur awer snonkaku ḇeswar ma ḇefandun mu sya.—Amsal 18:1; 1 Korintus 15:58.

NA ROSAI WAFRUR NA:

• Muwawos ḇe bati muḇedi ma fandun fa mumarisen musmai farfnoḇek ḇyena

• Mukofen ḇeri, rosai mufandun kaku na