Allah Yahwe iso ḇefrur ko. Ifrur roi nakam, isoine roi komam ro komkasna ma roi komam ḇa na kako. Rofyor ifrur roi komam na ḇaime, ifrur ḇepon malaikat sya sibor kaku. Wakfawi malaikat sya ke? Malaikat sima Yahwe manfamyan Ḇyesiri, ma simnis fanam kuker I. Kopok komam si ḇa, raris kopok komam Allah I ḇa ndraya. Malaikat oso Yahwe ifrur ḇepon kaku ifnoḇek I fa sufrur mak, planet na, ma roi ḇesena kam. Planet oso anya iso supswan, moḇ ḇepyum kaku koḇarek ine.

Mura, Yahwe fyasos pyum supswan ine insama aiwan ma snonkaku sya sikenem ro dia. Ifrur ori fa isnaiyar supswan ine. Ifrur bon, swan, ma warḇeki na.

Rosai Yahwe ifrur wer? Yahwe doḇe, ’Nari yafrur abris, rokaker, ma aiknam.’ Mura aibon, wei, ma pampen rosairirya kam naisya nasure. Ramnai, Yahwe ifrur aiwan syakam, ḇeroḇ ro farsyos, ḇekenem ro war yadori, ma aiwan ḇeyanawer sya kako. Ifrur aiwan ḇekasun sya, raris kelinci, ma aiwan ḇeba sya, raris gajah. Auma wamarisen syadi faro aiwan sairi?

Mura, Yahwe dawos ḇe malaikat ḇepon ani ḇo doḇe, ”Rwama kufrur snonkaku.” Snonkaku sima siḇesebur ro aiwan sya. Snonkaku sima sisambraḇ fa sifrur roi oso, sawose, simbrif, ma sḇenadi. Nari smamwarek supswan ine ma aiwan sya. Wakfawi  manseiso snonkaku Allah ifrur ḇepon ya? Rwama kosewar kankarem ḇyena.