Ḇarpur muma, Darius snonkaku Media ḇyeraja ro Babilon. Darius myam mboi Daniel ima iḇese ro ḇebarara ḇesesya. Inja, kyur Daniel i fa ḇyebukor faro snonkaku ḇena nasan ḇero sup ani sya. Sfafayaf Daniel i ma siḇe smun i. Sifawi Daniel ima imyaren ḇyenadi faro Yahwe ro ras oser rarwan rikyor. Inja sikofen ḇe Darius, ’Raja o, ipyum ya wafrur sasoser ḇewan snonkaku syakam fa senadi faro Raja au monda. Mansei ḇeyuk sasoser ine ido, fandun fa sisawen si ḇe der singa.’ Darius nya kakara oser, ma ḇyepanepen sasoser ani.

Rofyor Daniel ifawi sifrur sasoser ani raposa, ibur ḇe rum ḇyedi. Mura, ro ḇarpon kekbir ḇebasya, ḇyansuba ḇo ḇyenadi faro Yahwe I. Snonkaku ḇefafayaf i sya srama sisun kanandor ḇe rum ḇyedi ma smam isya ḇyenadi. Sikofenḇair beri ḇe Darius ḇo soḇo, ’Daniel isouser faro au ḇa. Ḇyenadi faro Allah Ḇyedi ro ras oser rarwan rikyor.’ Darius imewer kaku Daniel imar, snar imarisen faro Daniel i. Ras ḇesiper isewar nyan fa ifnoḇek Daniel i. Ḇape, osoḇaberi na ḇefadwer sasoser ani, Raja i kako. Darius imewer mboi iwan ḇemamwarek sya fa sisawen Daniel ḇe der ḇeser singa ḇerarmomen sya.

 Ro roḇ ani, Darius denef nanan ḇa snar kyara mura ḇe Daniel i. Arwoya, rya beri ḇe der singa ma dore, ’Daniel o, Allah bedi fyaspar au ke?’

Darius ryower mkaren oso. Daniel mkaren ḇyediri! Daniel kyarem, ’Yahwe malaikat Ḇyedi pyanoser singa sya sisḇasna. Sarek aya ḇaberi.’ Darius imarisen kaku! Iwan insama sisasyar Daniel ro der ani. Daniel ḇyeparpar kermkun ḇaberi. Mura Raja iwan, ’Mkofor snonkaku ḇeksof Daniel i kwar sya, ma mkosawen si ḇe der singa.’ Rofyor sḇeḇesawen ḇe der ya dori, singa sya san si beri.

Darius iwan kawasa ḇyesya, ’Snonkaku syakam fandun fa sḇesyowi Daniel Allah Ḇyedi. Fyaspar Daniel i kwar ro der singa.’

Raris Daniel i, wakḇenadi faro Yahwe ro ras nakam ke?