Roḇ oso, Raja Nebukhadnezar ismai mafafu ḇefrur makakak. Ine ifrur fa iknon ḇa ma jadi fa denef mnis ḇa. Dor bena robor sya ma ikofen ḇe si, ’Mkofasnaḇair knam ro mafafu yenane.’ Sikofen ḇo soḇo, ’Raja e, wakofenḇair ḇepon ḇe inko rosai wamafu ya.’ Ḇape, Nebukhadnezar ikofen yoḇ si, ’Roḇa! Mkoiso na ḇekofenḇair rosai yamafu ya. Oroḇa ido, na yamunbos mko.’ Sikofen yoḇ i wer, ’Raja, wakofenḇair ḇe inko mafafu bena, ma nari nkofasnaḇair knam ḇyena.’ Mboi doḇe, ’Mkoḇe mkofrowes aya. Mkokofenḇair fasaw ḇe aya, rosai yamafu ya!’ Sikofen ḇe raja, ’Osoḇaberi na ipok ifrur rarirya ḇa. Roi wor anya syamswen kaku.’

Nebukhadnezar imsor fafayaḇa inja iwan insama snonkaku ḇefawinanem ma ḇena robor ḇero sup ani syakam seḇemun. Ine kyurfasnai Daniel, Syadrakh, Mesakh, ma Abednego nari smun sko kako. Inja, Daniel dor faro Raja insama myun beri si awer. Mura, i ma bati ḇyeskoya skoḇenadi skor fafnoḇek ro Yahwe I. Rosai Yahwe ifrur ya?

Ro mamam oso, Yahwe fyasnai Nebukhadnezar mafafu ḇyedi ḇe Daniel ma ikofenḇair knam ḇyena. Meser ya, Daniel ryama isrow Raja manfamyan ḇyedi ma ikofen, ’Mun awer snonkaku ḇefawinanem ma ḇena robor sya. Yafawi yakofenḇair knam ro Raja mafafu ḇyena.’ Manfamyan ani dun Daniel ḇe Nebukhadnezar i. Mura Daniel ikofenḇair ḇe Raja, ’Allah ikofenḇair ras-ras nayama ḇe au kwar. Mafafu bena isoine: Mam amfyanir ḇeba kaku oso. Bruri ḇyeḇefrur ro brawen, ander ma brasi ro sarak, sasop ma wesop ro kansai, wepursi ḇe sop ro mankarmom, ma wepirew ḇe wempin sya ro mankarmom papyar  saprop ḇerik. Ramnai, karui mnuk isya ḇyeḇekaruk ro bon, ma karui ani iplam wepirew ro amfyanir ani. Amfyanir ani ḇye momom ma wamya dun bur na. Karui ani ḇye bon ḇeba kaku ma ḇyekanosen supswan.’

Ramnai Daniel ikofen, ’Ineiso knam ro mafafu bedi: Bruri ḇeḇe brawen iso karajan bedi. Sarak iso Karajan inari ḇepoik fadwer au. Ramnai, nari karajan ḇemnis kansai isya ḇepoik ro supswan ḇesiper. Karajan ḇeuser ya nari syambraḇ syadi raris mankarmom. Ḇepupes ya, nari karajan ḇeḇerarwas isya. Ḇar nono nsambraḇ kaku raris mankarmom ma nono wer nsambraḇ ḇa raris saprop ḇerik. Karui ḇe bon ani iso Karajan Allah. Iso nari ḇekakok karajan nakam ma kyain isof fyoro.’

Nebukhadnezar ḇyansuba beri ro Daniel ḇarpon ḇyedi. Ikofen ḇo doḇo, ’Allah bedi iso ḇekofenḇair ḇe au mafafu ine. Allah oso imnis I ḇa.’ Inja, Nebukhadnezar myun Daniel i ḇa ḇape ḇye i fa ḇyebukor faro snonkaku ḇefawinanem ma ḇyepoik ro Babilon. Yahwe kyarem kaku Daniel nadi ḇyena ḇae?