Elisabet ḇedar kasun ḇyedi ḇenirḇe Maria, ḇyarek ro kota Nazaret ḇero Galilea. Sḇuk Maria i ḇe Yusuf fa nya i kwar. Yusuf ima sukan ai riri. Fafisu Elisabet fyadores paik riwomen kwar, malaikat Gabriel isrow kuker Maria i. Gabriel ikofen, ’Be, Maria e. Yahwe imarisen kaku faro au.’ Maria ifawi mnis rosai Gabriel ikofen nane ḇa. Ramnai, Gabriel ikofen wer, ’Nari fardores, ma waḇen romawa snon oso. Romawa ani na nwir i ḇe Yesus. Nari ḇye Raja, ma Karajan ḇyedi kyain isof fyoro-fyoro.’

Maria ikofen, ’Ḇape yafarḇuk ḇaime. Inja, rariso na yana romawa rai?’ Gabriel ikofen, ’Yahwe bisa ifrur rosai dirya monda. Nari wakna romawa snar rur ḇesren nari isabu faro au. Elisabet eba bani isya dakfadores kako.’ Inja Maria kyarem ḇo doḇe, ’Aya ine binfamyan Yahwe Ḇyedi. Iḇye kada wos Bena ndarirya faro aya.’

 Ramnai, Maria ryamura ḇe kota ḇeḇebon fa isrow kuker Elisabet i. Fafisu isya ro diwa kwar ma dawos kuker i, Elisabet ḇyaḇir romawa ani iryaḇ kaku ma dapoper ro sneri. Rur ḇesren dado ro Elisabet i ma ikofen, ’Maria, Yahwe ḇyebarakas au. Syowi ḇeḇa kaku ḇe aya, kukro rasine Mesias snari ryama ḇe rum yedi.’ Maria ikofen, ’Yasandik Yahwe kuker sne ḇesiper.’ Maria ḇyarekus Elisabet i ro rum ḇyedi swaf paik rikyor. Ramnai, kyaḇer ḇe Nazaret.

Fyor Yusuf ifawi Maria fyadores kwar, kyara fa imbe imewer i. Ḇape malaikat oso fyasnai mankundi ḇe Yusuf i ro mafu ḇo doḇo, ’Wun Maria i ma buki. Wamkak awer. Ifrur sasar ḇa.’ Inja, Yusuf dun Maria i ma ḇyuki.