Snonkaku ḇero sup ḇar wamurem Israel sya sikyar mak sya bisa sḇair pyan nyan oso ḇe si. Ro roḇ oso, snon riḇeḇeso ḇero sup ḇar wamurem ansi smam roi oso ḇesnai ra mak. Fafisu ”mak” ani imbrane, snon ansi siso i. ”Mak” ani dun si ḇe Yerusalem. Sifawi romawa oso isya na ḇye raja ro Yahudi. Inja, sifuken ḇe snonkaku ḇero diansya moḇsa romawa ani ryo i, kukro imbe saksyom i.

Fafisu Herodes, raja ḇero Yerusalem ryower nari raja ḇese oso isya, imkak kaku. Ifuken ḇe imam sya, ’Moḇsa romawa nari ḇeḇeraja ani ryo i?’ Imam ansi skarem ḇo soḇo, ’Nabi-nabi sya soḇe na ḇyeaḇen ro Betlehem.’ Inja Herodes dor snon ḇero sup ḇar Wamurem ansi ma ikofen, ’Mkora ḇe Betlehem ma mkosewar romawa ani. Ramnai mkokofenḇair ḇe aya moḇsa ryo i. Imbe yaksyom i kako.’ Ḇape Herodes dankar monda.

Mak ani imbran wer, inja snon ansi siso i ḇe Betlehem. Ramnai, ”mak” ani imnai ro rum oso bori, inja sisun ḇe rum ani. Smam Yesus ma snari, Maria i. Skunem faro Yesus i ma sbuk roi ḇebor ḇepyum ḇe i raris brawen, kemenyan, ma papoi ḇediref pyum. Yahwe iso ḇewan snon ansine fa sisewar Yesus i ke? Aroḇa.

Ro roḇ ani, Yahwe dawos ḇe Yusuf i ro mafu, ’Herodes imbe myun Yesus i. Wun swambri ma romawa bani ma mkora ḇe Masir. Mkoḇarek ro diwa isof ro Yakofenḇair ḇe mko roi ḇeḇesya ani isya ḇa kwar.’ Inja, Yusuf ma Maria fnoḇek romawa subani skora ḇeri ḇe Masir.

Yahwe ikofenḇair ḇe snon ḇero sup ḇar wamurem ansi insama skaḇer ḇe Herodes i ḇa. Inja skaḇer ḇe i ḇa, mura imsor kaku. Snar isrow kuker Yesus i ḇa, inja iwan fa smun romamkun  snon ḇero Betlehem sya kam, ḇeḇeumur raris Yesus i. Bape, Yesus ima ryo Masir.

Ḇarpur mura ido, Herodes imar. Yahwe ikofen ḇe Yusuf i, ’Mkokaḇer mura kwar ḇe diwa.’ Yusuf, Maria, ma Yesus skokaḇer ḇe Israel. Ma, skoḇarek ro Nazaret.