Rofyor ras Paskah ya imnai, Yesus ma manfamyan ḇyesya skombranuk ro Samaria ma skokaḇer ḇe Galilea. Fyor skofanam ḇe mnu Sikhar kwar, Yesus kyain ro war ḇeyer Yakub ḇyedi. Imnaisu ro dia, ma manfamyan ḇyesi sra skoḇes roḇean ro mnu oso.

Fyoro ḇa, bin Samaria oso ryama fa dun ware. Yesus ikofen ḇe bin ani, ”Buk waroma yinem” ke? Bin ani kyarem, ’Sa ḇefnai fa wawos kuker aya? Aya ine bin Samaria. Snonkaku Yahudi sima simewer sawos kuker snonkaku Samaria sya.’ Yesus ikofen, ’Wafawi mansei aya ido, nari wor war ro aya, ma na yaḇuk faro au war ḇeyun kankenem ya.’ Bin ani ifuken, ’Yafawi roi wakofen kaku ine ḇa? Nwa papos noba.’ Yesus kyarem, ’Snonkaku ḇeyinem war yabuk ine ido na imbrow werḇa.’ Ikofen, ”Bukma ḇe aya war ani.”

Ramnai Yesus ikofen, ’Wor swambri muma.’ Ikofen, ’Yana swa yoḇa.’ Yesus ikofen, ’Imbo ḇae. Farḇuk rarwan ririm kwar, ma snon barkus ani ima swambri sya ḇa.’ Inja ikofen, ’Auma nabi kaku risau. Snonkaku Samaria sikyar snonkaku sya sisyom Allah I ro bon ine, mboi snonkaku Yahudi sya soḇe snonkaku sya sisyom Allah I ro Yerusalem monda. Yakyar kaku, Mesias ryama ido, nari fyarkor nko moḇsa nkosyom ḇe Allah I rai.’ Mura Yesus ikofen, ’Aya iso Mesias ani.’ Yesus ikofenḇair roi ine ḇe snonkaku sya ḇaim.

 Bin ani ibur ḇeri ḇe mnu ḇyedi ma ikofenḇair ḇe snonkaku Samaria sya ḇo doḇe, ’Insanja yasrow kwar kuker Mesias i. Ifawi mnis rosai ḇekur aya na. Mkorama koramura ḇe diwa!’ Inja skoso i ḇe war ḇeyer ani ma skorower Yesus farkarkor ḇyena.

Skor Yesus i fa iso si ḇe mnu sena. Ro diwa fyarkor si ras risuru, inja snonkaku ḇebor sya sikyar faro Yesus i. Sikofen ḇe bin Samaria ani, ’Fyor nkorower roi snon ani dawos nakam, nkokyar kaku ima dun faspar faro snonkaku sya.’