Marandan ḇekyor Paulus ḇyeja imnai ro Yerusalem. Ro diwa sfori ma sisun i ro bui. Ro roḇ oso, Yesus dawos ḇe i ro fasasna oso, doḇe, ’Rwaḇe Roma ma baryas ankankinem ḇeḇye ro diwa.’ Ramnai, sun Paulus i ro Yerusalem ḇe Kaisarea ma ismai taun risuru. Fafisu Gubernur Festus ḇyemankara i, Paulus ikofen, ’Yamarisen fa Kaisar ḇyemankara aya ro Roma.’ Mura Festus ikofen, ’Snar wor fa Kaisar ḇyemankara au, nari rwamura ḇe Kaisar i.’ Inja, sun i ro kapal ḇe Roma kuker naek risuru, Lukas ma Aristarkhus su.

Fyor skayun kwar, wamdoḇer myun kapal skoḇedi ras riḇeḇeso. Snonkaku ḇero kapal ansi soḇerada na skoroe. Ḇape Paulus ikofen ḇe si, ’Malaikat oso ikofen ḇe aya ro mafu, ”Paulus, wamkak awer. Nari rwamura ḇe Roma, ma snonkaku ḇefnoḇek au ro kapal ine sya kam nari sisma faspar.” Inja, mkomkak awer! Na komar ḇa.’

Wamdoḇer anya myun ras ri 14. Fyoro ḇa skomam sup oso. Ima myos Malta diri. Kapal ani ider ma fyarmakok, ḇape snonkaku ri 276 ḇero kapal ansi kam sikenem. Sia sas ma sia wer suf ro papan ker ḇemkok na ḇe ḇonde. Snonkaku Malta sya smam pyan si ma sifrur for fa sidapen insama sisyuf ḇa.

Paik rikyor ramnai, sordade sya sun Paulus i ḇe Roma kuker kapal ḇese. Fafisu Paulus isya ro Roma kwar, naek srar ḇero diansya srama fa sisrow i. Fafisu Paulus myam si, Paulus ikofen kasumasa ḇe Yahwe I snaro ismai samambraḇ. Sfori mboi ḇyarek ro rum sesewa ḇe i. Prajurit oso myamwarek i. Ḇyarek ro rum ani taun swaf risuru. Snonkaku srama smamfar i, inja fyawar Karajan Allah ma fyarkor Yesus nyan ḇyena ḇe si. Paulus fyas kako syap ḇe sidang jemaat ro Asia Kasun ma Yudea.  Kaku, Yahwe iso ḇewan Paulus i fa ḇyaryas ankankinem ḇeḇye ine ḇe er nakam.