Manfamyan sya sisouser Yesus parenta ḇyena fa sikofenḇair ankankinem ḇeḇye ḇe snonkaku syakam ro supswan ḇesiper. Ro taun 47 M, snonkaku Kristen ḇero Antiokhia siwan Paulus ma Barnabas su fa sura suḇaryas ankankinem ḇeḇye ine. Snon suine suryaḇ kaku, inja sura ḇe Asia Kasun ḇesiper (kirine sifawi i ḇe Turki), ḇe moḇ raris Derbe, Listra, ma Ikonium.

Paulus ma Barnabas suḇaryas ankankinem ḇeḇye ine ḇe snonkaku syakam, ḇe snonkaku ḇenana sya ḇaido ḇena roi noḇa sya, ḇebabo ḇaido ḇesinan kwar sya. Mura snonkaku ḇebor sya sikyar faro Kristus i. Ro fafisu Paulus ma Barnabas suyawos ḇe gubernur Siprus, Sergius Paulus i, snon ḇena mon oso imbe idwarek su. Ḇape Paulus ikofen ḇe i, ’Nari Yahwe ḇyuk samamyai ḇe au.’ Inja, rofyor anya ḇeri ḇena mon anine iprafe. Snar rosai Gubernur Paulus myam ine, ikyar ḇe Yesus i.

Paulus ma Barnabas suḇaryas ro rum ḇe rum, ro pasar, ro nyan, ma ro rum ari. Fyor suḇuk pararei ḇe snon ḇemanis ro Listra ani, snonkaku soḇe suma dewa suiri ma imbe sisyom su. Ḇape sukofen, ’Allah I monda ḇesmai samsyom ya! Numa snonkaku monda.’ Inja, snonkaku Yahudi riḇeḇeso srama ma sawyaye snonkaku ḇero diansya mura simsor Paulus i. Sso i kuker karui, sismeri ḇe mnu ḇeba bandiri, ma siburi snaro soḇerada imar kwar. Ḇape, ikenem kaker! Bati ḇyesi srama sifnoḇek i ma sun i ḇe mnu ḇeba. Ḇarpur mura, Paulus kyaḇer ḇe Antiokhia.

Taun 49 M, Paulus ifrur marandan ḇyeja wer. Isrow kuker  snonkaku Kristen ro Asia Kasun sya wer, ramnai ḇyaryas ḇe moḇ ḇeḇeḇinkwan syadi, ḇe Eropa. Ryaḇe Athena, Efesus, Filipi, Tesalonika, ma moḇ eḇesena. Silas, Lukas, ma roma babo ḇenir ḇe Timotius siso i. Skofararur kayam fa sḇawes sidang jemaat ḇebabo ma skoḇuk wos ḇeyun samambraḇ ḇe si. Paulus ḇyarek taun rioser paik riwonem ro dia ma syambraḇser snonkaku Kristen ḇero diansya. Ḇyaryas ankankinem ḇeḇye, ḇyuk farkarkor, ma fyas syap ḇe sidang-sidang. Dakfararur kako ḇe ḇefrur tenda. Ramnai, kyaḇer ḇe Antiokhia.

Ro taun 52 M, Paulus ifrur marandan ḇekyor ḇyedi. Randak ya, ryaḇe Asia Kasun. Ramnai, ryaḇe Filipi ma imbran wer ḇe Korintus. Paulus ḇyarek taun riḇeḇeso ro Efesus. Ro dia ḇyuk farkarkor, ḇyuk pararei ḇe snonkaku ḇeduf sya, ma ifnoḇek sidang. Ro ras-ras ḇyuk faya ro moḇ snonkaku siryur fa sfarkor rona. Snonkaku ḇebor sya srower roi ikofen na ma simbror. Ḇyaryas ankankinem ḇeḇye ro sup ḇeborna, ramnai Paulus ryaḇe Yerusalem.