Fyor sfor manwawan Yohanes i ma suni fa ḇyarek ro Myos Patmos, Yesus fyasnai mamam ri 16, ḇaido gambar kuker fafisu iwama. Mamam anna nfasnai rariso Allah snonsnon Ḇyedi ḇyefasren, Karajan Ḇyedi ryama, ma marisen Ḇyeja ndariri ro supswan ine imnis raris nanki.

Ro mamam oso, Yohanes myam Yahwe kyain ro karapesa ḇesren Ḇyedi ro nanki. Samar ma kadadur nsae ro karapesa ani. Ro ris ḇyeja, penatua ri 24 sisun sansun ḇepyoper ma sisaswo mahkota ro brawen. Sikunem ro Yahwe ḇarpon Ḇyedi ma sisyom I. Ro mamam ḇese wer, Yohanes myam raryur ḇeba ono ro snonkaku ḇero er nakam, keret, ma wos nakam sisyom Yahwe I. Rumkun Domba, Yesus i, fyarkin ma dun si ḇe war ḇeyun kankenem ya. Ramnai ro mamam ḇese wer, Yesus ḇyeparenta ḇe Raja ro nanki fnoḇek penatua ri 24 ansya. Ro mamam ḇeuser ya wer, Yesus myamun kuker korḇen isoine Setan ma ḇeso i sya. Yesus isawen si ro nanki ḇe supswan.

 Ramnai, Yohanes myam gambar ḇepyum kaku. Myam Rumkun Domba ani ma snonkaku ri 144.000 ḇeḇekinfir ansya sores ro Bon Zion. Myam kako malaikat sya sirow ḇe supswan ḇesiper. Malaikat ansi iwan insama snonkaku sya sfasnai makakak faro Allah ma sisandik I.

Ro mamam ḇeuser ya wer, mamamun Armagedon isya. Ro mamamun ani, Yesus ma sordade ḇyesya skakok dunya ḇeḇarḇor ro Setan i. Ro mamam ḇepupes ya, Yohanes myam ḇaḇeaski isya ro nanki ma supswan. Setan ma ḇeso i sya simkok si kwar. Ḇero nanki sya ma ḇero supswan sya kam sisandik snonsnon ḇesren Allah ma sisyom monda ḇe I.