Yahwe ḇyeasas faro Yakub i ḇo doḇe nari kyadaunwarek i raris moḇ kyadaunwarek Abraham ma Ishak su raya. Yakub ḇyarek ro Haran. Fyarḇuk ro diwa, mura kina ḇyesi sibor syadi. Nya kako nana arasai nabor kaku.

Mura, Yahwe ikofen ḇe Yakub i, ’Kwaḇer muraḇe sup marin bedi.’ Inja, Yakub ma kina ḇyesi sifrur marandan fa skaḇer ḇe sup sedi. Ro marandan sena, Yakub manfamyan ḇyesi sia sikofen yoḇ i, ’Ḇeba bani Esau i warpu snonkaku ri 400 sisyama!’ Yakub imkak na Esau ifrur susa i ma kina ḇyesi. Ḇyenadi ḇo dor faro Yahwe I, ’Faspar aya ro ḇeba yedi.’ Ro meser ya, Yakub iwan manfamyan ḇyesi fa sun domba, kambing, sapi, unta, ma keledai ḇe Esau i.

Ro roḇ rofyor Yakub demire, myam malaikat oso! Malaikat ani sufamfaḇri. Sufamfaḇri isof ro arwo. Yakub iduf kaku mboi isusu ḇa. Malaikat ani doḇe, ’Per aya.’ Mboi Yakub doḇe, ’Na yaper au ḇoi bebarakas aya resari kada.’

Mura malaikat ani ḇyebebarakas Yakub i. Ine insape Yakub ifawi Yahwe na myam monda Esau ifrur susa i ḇa.

Ro arwo ya, Yakub dores ḇo myam muraḇe moḇ ḇeḇinkwan, dek faro Esau ma snonkaku ri 400 siwarpu i. Yakub rya ḇepon kina ḇyesi ma ḇyansuba rarwan rifik ro Esau ḇarpon ḇyedi.  Esau ifrar fa isrow Yakub i ma fyorepen i. Manbekanaek ansuine sukanes ma sukain pyum kaḇer. Wakkara ido, moḇsa na Yahwe ḇyaḇir rai rofyor myam roi Yakub ifrur anya?

Raposa, Esau ibur kaḇer ḇe rum ḇyedi, ma Yakub imbran pdef. Yakub nya roma ri 12. Sisnosna naiso Ruben, Simeon, Lewi, Yehuda, Dan, Naftali, Gad, Asyer, Isakhar, Zebulon, Yusuf, ma Benyamin. Yahwe kyur oser rofandu si, isoine Yusuf i, fa fyaspar kawasa Ḇyesya. Wakfawi moḇsa Yahwe ifrur na rai? Rwama kosewar fa kofawi na.