Moses ḇyarek ro sup Midian swaf taun ri 40. Fyarḇuk ma nya romawa ro diwa. Ras oso, rofyor myamwarek domba ḇyesi fanam ro Bon Sinai, dek faro roi oso ḇefrur i fa kyandor. For ḇesak isasyar ro manuk, mboi manuk ani inanem ḇa! Rofyor Moses imbran fanam fa ifawi rosai ḇeḇesya na, ryower mkarem oso ro manuk ani, ’Moses! Fanam awer. Per roi ḇesower wemsuya kukro moḇ wores anya ima saprop ḇesren dirya.’ Yahwe iso ḇeyawos yoḇ i roro malaikat oso.

Moses idwarek imkasna kukro imkake. Mura, Yahwe ikofen ḇo doḇe, ’Yamam snonkaku Israel sya kandera sena kwar. Nari yafaspar si ro snonkaku Masir sya ma Yun si ḇe sup ḇena saprop ḇedufen. Auso nari ḇefarkin kawasa Ayesi fa sisasyarbur sup Masir.’ Na Moses kyandor kaku ḇae.

Moses ifuken, ’Sifuken mansei ḇewan aya ido moḇsa na yakarem si rai?’ Allah kyarem, ’Wakofenḇair ḇe si ḇo woḇe Yahwe, Allah Abraham, Ishak, ma Yakub iso ḇewan au.’ Mura Moses doḇe, ’Simewer srower aya ido moḇsa na yaḇerai?’ Yahwe ḇyuk aḇyair oso ḇefasnai na ifnoḇek Moses i. Iwan Moses i fa isawen ankyon ḇyeja ḇe saprop. Mura, ankyon ani fyadwer ḇe ikak! Rofyor Moses duf ikak ani ro purai ḇyedi, ikak ani fyadwer kaḇer wer ḇe ankyon. Ramnai Yahwe doḇe, ’Mujisat ine nari fyasnaiḇair Aya iso ḇewan au ya.’

Mboi, Moses ikofen wer ḇo doḇe, ’Ayama yawoskir ḇa.’ Inja, Yahwe ikofen kaku yoḇ i, ’Nari yakofenḇair ḇe au rosai na wawos ya, ma nari yawan Harun ḇeba bedi fa ifnoḇek au.’ Moses ifawi Yahwe na ifnoḇek i, inja dun swari ma romawa ḇyesuya fa skoraḇe sup Masir.