Fafisu snonkaku Israel sro moḇ ḇeḇeursḇa, Korah, Datan, Abiram, ma snonkaku ri 250 ḇesesya sḇembroḇ faro Moses i. Sikofen ḇo soḇo, ’Wamnai mura! Rosai ḇefnai auso ḇe manfarkin faro nko ḇo Harun ḇye imam ḇeba ya? Yahwe ryous kokame, mboi au ma Harun muyerer monda ḇa.’ Yahwe imarisen ḇaḇeri. Myam ḇaḇembroḇ senane imnis ra sifrur yoḇ I!

Moses ikofen ḇe Korah ma ḇeso i sya, ’Meser ido mkora ḇe tabernakel, ma mkun rosaser ḇeser dupa. Yahwe nari fyasnaḇair mansei kyinfiri.’

Meser ya, Korah ma snon ri 250 sra sisrow Moses ro tabernakel. Mura sikun dupa raris imam. Yahwe ikofen ḇe Moses ma Harun, ’Muyores binkwanbur Korah ma ḇeso i sya.’

Korah isrow kuker Moses ro tabernakel kwar, mboi Datan, Abiram ma kina suḇesya simewer sisrow kuker i. Yahwe iwan snonkaku Israel sebinkwanbur Korah, Datan, ma Abiram rum kruben skoḇena. Snonkaku Israel sifrurna beri. Fafisu ya,  Datan, Abiram, ma kina suḇesya sores ro rum kruḇen skoḇeja bandiri. Fasaw kaku, saprop ya irwas ma doren sikame! Ramnai, for ro farsyos dado mumfes ma ikun pres Korah ma snon ri 250.

Yahwe ikofen ḇe Moses, ’Wun ro mananwir keret oser-oser ankyon sena, ma fasepen sisnosna ro ankyon anna. Ḇape ro ankyon keret Lewi ḇyeja, fasepen Harun snonsnon ḇyedi. Rwir ankyon annane ro tabernakel ya dori, ma ankyon ro snonkaku Yakinfiri nari ḇyepampen.’

Meser ya, Moses dun ankyon anna kam ḇe bandi ma fyasnai na ḇe mananwir keret ansya. Harun ankyon ḇyedi ḇyepampen ma ḇyebon almond ḇemas kwar. Ine kyurfasnai Yahwe kyinfir Harun i kwar fa ḇye imam ḇeba.