Ḇarpur ya, snonkaku Israel sisouser werḇa faro Yahwe ma sisyom allah-allah ḇekakuḇa. Ro swaf taun rifik, snonkaku Midian sifnak ker snonkaku Israel rokaker sena ma sikaraw rofanfan sesya. Insama snonkaku Midian sikyaren si awer, snonkaku Israel siyokef si ro aḇyaḇ ma bon na. Sor kaku ḇe Yahwe fa ifnoḇek si. Inja, Yahwe iwan malaikat ḇyedi fa isrow snon oso snoriso Gideon. Malaikat ani doḇe, ’Yahwe kyinfir au kwar fa ḇe mambri.’ Gideon ifuken, ’Moḇsa na yafnoḇek Israel rai? Ayama snon ḇefawi roioḇa.’

Rariso Gideon ifawi Yahwe kyinfir i kwar? Ryir srei wol ro saprop ma ikofen ḇe Yahwe, ’Meser arwo, rofyor srei ine idok snar wawurna mboi saprop ya isyor ido, na yafawi wamarisen aya fa yafnoḇek Israel si.’ Meser arwo ya, srei ani idok ḇape saprop ya isyor! Imbape Gideon dor insama ro meser arwo ya wer srei ya isyor mboi saprop ya idok. Roi anna ndarirya beri. Inja, Gideon ikyar kaku Yahwe kyinfir i kwar. Iryur sordade ḇyesya fa smamunmun snonkaku Midian sya.

 Yahwe ikofen ḇe Gideon, ’Nari yaḇuk payamyum ḇe snonkaku Israel sya. Ḇape, snar sordade besi sibor mankenem, nari mkoḇerada mkosmai payamyum snar samambraḇ ro mankun mko. Wawan sordade ḇemkak sya fa sibur.’ Inja, sordade ri 22.000 sibur beri, ma ḇedawer sya se 10.000. Mura Yahwe ikofen, ’Sordade besi sibor kaker. Wun si ḇe warḇedaf fa sinem ware. Sia ḇeyinem ḇo smamyaryar, siso kwinfir si fa sifnoḇek au.’ Snon ri 300 monda ḇefrur rarirya. Yahwe ḇyeasas sordade ansi nari sifrur kafyo sordade Midian ri 135.000.

Ro rob anya, Yahwe ikofen ḇe Gideon, ’Knikine oras fa mkomun snonkaku Midian sya!’ Gidoen ḇyuk trompet ro knapur ma ḇaḇewu ḇeser paramrom ḇe sordade ḇyesi. Ikofen ḇo doḇe, ’Mkomamuser aya, ma mkakfrur raris roi yafrurna.’ Gideon iwuf trompet anya ma iwef ḇaḇewu ḇyeja, ikanow paramrom ḇo dar naba, ’Sumber ḇeba ro Yahwe ma Gideon!’ Snon ri 300 ansikam sifrur rarirya kako. Snonkaku Midian simkak fafayaḇa ma sifrar famfnom ḇe moḇ nakam. Snar senapnap kwar inja smunyaye si. Osower, Yahwe ifnoḇek snonkaku Israel fa sifrur kafyo mbroḇ sesya.