Ro karajan Israel keret risamfur, raja ḇeḇarḇor sisya sibore. Oso ḇeḇarḇor syadi ya iso Ahab i. Fyarḇuk kuker Izebel, bin ḇeḇarḇor ḇesyom Baal. Ahab ma Izebel sumun Yahwe nabi ḇyesya ma sawninyan snonkaku ḇero sup ani fa saksyom faro Baal kako. Rosai Yahwe ifrur ya? Iwan Nabi Elia fa ikofenḇair anun faro Ahab i.

Elia ikofenḇair ḇe Raja Ahab snar ifrur roi ḇeḇarḇor, inja mekem ya na dado ro Israel ḇa. Fafisu swaf taun rikyor syadi, rokakerna nasurḇa mura snonkaku Israel sya sibiser. Ramnai Yahwe iwan Elia i fa isrow Ahab i. Raja ani ikofen, ’Roi nanekam ndramuma ro au!’ Elia kyarem, ’Dares ḇeba ine snar aya isyaḇa, ḇape snar wasyom ḇe Baal. Mkorama komampan mansei Allah ḇekaku ya. Wawan kawasa Besi ma nabi Baal sya fa sfanjur ro Bon Karmel pum ya.’

Mura kawasa ansi sifanjur ro bonya. Elia doḇe, ’Fandun fa mkun snemuk. Yahwe iso Allah ḇekakuya ido, mkoso i. Mboi Baal ido, mkoso i. Mkorama kofamfaḇri. Nabi Baal ri 450 sya sifrur farsarser ma sor allah sedi. Ma aya kako na yafrur farsarser ma yor Yahwe I. Ḇekarem kuker forya iso Allah ḇekakuya.’ Kawasa ansi sna kakara oser.

Nabi Baal sya sifrur farsarser sena. Ro ras ḇesiper sor allah sedi, ’Sye Baal, kwarem inko!’ Snar Baal kyarem si ḇa, inja Elia ikoryae si ḇo doḇe, ’Mkor naba syadi wer. Imbude denef ke inja mkora mkoḇan i.’ Sor Baal pdef isof ro roḇ ya, mboi kyarem si ḇa.

Elia ryir farsarser ḇyedi ro rokef farsarser ya ma isbawer war ro boya. Mura ḇyenadi, ’Sye Yahwe, wafrur kada snonkaku ansine fa sifawi Auso Allah ḇekakuya.’ Knik ani beri, Yahwe ifrur forya isabu ro nanki ma ikun pres farsarser anya. Snonkaku ansi sar naba, ’Yahwe iso Allah ḇekakuya!’ Elia doḇe, ’Mkofor nabi Baal  syakame!’ Ras anya, nabi Baal se 450 ansi seḇemun.

Rofyor smam ro moḇ ḇeḇinkwan boi mandep isya ro sorenya boya, Elia ikofen ḇe Ahab i, ’Kerower wam doḇerya ryama. Wek ḇe kereta bedi ḇo wabur mura.’ Mandep ḇero farsyos ya pyampan syadi wer, wamya ipok, ma repya dado. Dares iba anya imnai. Ahab dun kereta ḇyedi fa ifrar fasaw. Kuker fafnoḇek ro Yahwe I, Elia ifrar fasaw syadi ro kereta ani! Ḇape, samswen Elia ismaina namnai kwar ke? Rwama, kosewar fa kofawi.