Yehosyafat, raja Yehuda, imkok pres rokef farsarser faro Baal ma amfyanir ḇero sup ḇyedi. Imarisen kawasa ḇyansi sifawi Yahwe sasoser Ḇyena. Inja, iwan ḇebarara ma snonkaku Lewi sya fa sra ḇe sup Yehuda ḇesiper fa sḇuk farkarkor Yahwe sasoser Ḇyena faro snonkaku sya.

Er-er ḇefanam Yehuda simkake, snar sifawi Yahwe isaramper kawasa Ḇyesi. Syadi wer sun roi ḇepyum faro Raja Yehosyafat. Ḇape, snonkaku Moab, Ammon, ma snonkaku ḇeramaker Seir sya sibe smamunmun kuker Yehuda. Yehosyafat ifawi fyandun Yahwe fafnoḇek ḇyedi. Iwan snon, bin, ma romawa syakam fa sfanjur ro Yerusalem. Mura ḇyenadi ro ḇarpon sedi, ’Yahwe, wafnoḇek nko ḇa ido, na nkopok nkofrur kafyo si ḇa. Wakofenḇair ḇe inko kada rosai fandun fa nkofrur na.’

Yahwe kyarem nadi ḇyena, ’Wamkak awer. Nari yafnoḇek au. Mkofasos mko, mkores pdef, ma mkomam rariso yafaspar mko raya.’ Moḇsa Yahwe fyaspar si rai?

Meser arwo ya, Yehosyafat kyinfir ḇedisen sya ma iwan si fa simbran ro ḇarpon sordade ansi. Simbran ro Yerusalem ḇe bande ḇe moḇ smamunmun ro Tekoa.

Mura, sidisen sisandik Yahwe kuker raryaḇ ma kuker mkaren naba. Fafisuya, Yahwe isya myamunmun warek kawasa ḇyesya. Ifrur snonkaku Ammon ma Moab fa siḇoryae isof smunyaye si, ma simar kam. Ḇape, Yahwe kyadaun warek snonkaku Yehuda, sordade, ma imam sya. Snonkaku ḇero sup-sup ḇefanam sya srower rosai Yahwe ifrur kwar anya, ma sifawi Yahwe isya ifnoḇek kaker kawasa Ḇyesya. Moḇsa Yahwe fyaspar kawasa Ḇyesya rai? Kuker nyan oserḇa.  Insama ifrur na fyandun fafnoḇek ro snonkaku sya ḇa.